Cossa che ne toca far par viver ntel novo mondo?

I ùltimi artìcoli i ga mostrà che suito Dio ndarà finir fora con questo mondo rugno e con tuti i problemi. Ma come che podemo esser sicuri che questo sucederà? La Parola de Dio, la Bìblia, la dise:

‘El mondo el sarà finio fora.’ — 1 GIOANI 2:17.

Ma ghen sarà ancora persone vive qua ntela Tera. Questo medèsimo versìcolo el dise:

“Quel che el fà quel che Dio el vol el viverà par sempre.”

Alora, se volemo restar vivi ghemo de far la volontà de Dio. Ma come che podemo saver quala che la ze la so volontà? Ghemo de cognosserlo.

GHEMO DE COGNOSSER A DIO PAR RESTAR VIVI

Stampe: 1. Una enfermera la ze nel ospedal sentada do in tera. Ela la ze tanto straca e stufa. 2. Ela la fà una pausa nel laoro e la vede una colega contenta drio leder una revista. 3. La colega la lede par ela un testo dela Bìblia e la ghe dà un carton de vìsita del site jw.org.

Gesù el ga dito: “Par [le persone] gaver la vita eterna, le ga de cognosser a ti, el ùnico vero Dio.” (Gioani 17:3) Par restar vivi nel fin del mondo, ghemo de cognosser a Dio. Ma, cognosserlo no l’è mia sol creder in lu o saver qualcossa sora Dio. Ghemo de esser so amighi. Come che se pol far questo? Se volemo esser amighi de una persona, ghemo de passar tempo con ela. L’è compagno anca con Dio. Adesso, ndemo veder arquante verità dela Bìblia che ne giuta a gaver una amicìssia con Dio e farla ancora pi forte.

Verità che imparemo nela Bìblia

Imparemo che Dio el volea che vivéssino nte un paradiso.

Quando Dio el ga creà Adon e Eva, Lu el ghe ga dato un bel posto par viver, el Giardin del Èden. Lori i gavaria una vita perfeta e felice. Intanto che i fusse amighi de Dio i viveria par sempre. Dio el ghe gavea dato un comandamento fàcile de obedir, ma lori i ga dessidio desobedirlo aposta.

Imparemo parché ghen’è tanto sofrimento.

Quando Adon el ga desobedio, lu el ga perso la oportunità de viver par sempre. Alora, tute le persone che le ze vegneste dopo de lu le ga eredità el pecato e la morte. La Bìblia la dise: “Par meso de un sol omo el pecato l’è vegnesto al mondo, e la morte par meso del pecato, cossita la morte la se ga spalià a tuti.” (Romani 5:12) L’è come se fusse una malatia che passa del pare o dela mare al fiol. Adon e Eva i ga passà ale persone la imperfession e la morte. Par quela, noantri vegnemo veci e morimo.

Imparemo quel che Dio el ga fato par giutarne.

La Bìblia la dise: “Dio el ga amà tanto el mondo, che el ga dato el so ùnico Fiol, cossita tuti quei che i dimostra fede in lu no i sìpia destruti, ma i possa viver par sempre.” (Gioani 3:16) Dio el ne ama tanto che el ga mandà el so fiol, Gesù, qua ntela Tera par dar la so vita par noantri. Un omo dela Ìndia, de 86 ani, el ga parlà del grando amor de Dio par lu: “Quel che Geovàa el ga fato mostra che lu el me ama pròpio tanto. E questo amor me dà la speransa de gaver la vita eterna nel futuro.”

Imparemo a mostrar che semo grati par tuto quel che Dio el ga fato par noantri.

Geovà el ne ama e no’l vol che noantri sofrimo. Par quela, lu el ne insegna come gaver una vita felice ancoi. (Isaia 48:17, 18) Mostremo che semo grati par tuto quel che Dio el ga fato par noantri quando ‘obedimo ai so comandamenti’. (1 Gioani 2:3) Lu el promete che, se femo questo, saremo felici adesso e gavaremo la oportunità de viver par sempre nel futuro.

GHEMO DE LEDER LA PAROLA DE DIO TUTI DI

Dopo de leder la Bìblia nela ora del disnar, la enfermera la varda su al cielo intanto che la ze fora del ospedal. — Par restar vivi nel fin del mondo, ghemo de pregar par gaver el aiuto de Dio e far la so volontà

Bisogna magnar tuti di par restar vivi. Ma Gesù el ga dito che “el omo el ga de viver, nò sol de pan, ma de cada parola che la vien dela boca de Geovà”. — Mateo 4:4.

Noantri podemo catar le parole de Geovà ntela Bìblia. Quando la ledemo podemo saver quel che Geovà el ga belche fato par noantri, quel che l’è drio far e quel che el farà nel futuro.

GHEMO DE DOMANDAR EL AIUTO DE DIO

Anca se volemo obedir a Dio, pol esser che sìpia fadiga fermarse de far quel che l’è sbalià. Cossa che podemo far se questo sucede? Un aiuto l’è cognosser a Dio cada volta de pi.

Vedemo el esémpio de una dona dela Àsia. Vanti de studiar la Bìblia ela la gavea una vita imoral, ma dopo la ga imparà che Dio el dise par ‘scampar via dela imoralità sessual’. (1 Corinti 6:18) Alora, la ga scominsià a pregar a Dio par gaver forsa de fermarse de far quel che l’è sbalià. Ma ela ancora la ga de sforsarse par far quel che l’è giusto. Ela la ga dito: “Quando me vien voia de far quel che l’è sbalià, suito prego a Geovà. Ghe conto tuto quel che sento parché sò che mi no saria bona de fermarme de far quel che l’è sbalià mi sola. Pregar a Geovà me ga fato deventar pi amiga de Lu.” Compagno a questa dona, tante persone le ze drio cognosser a Dio. Lu el ghe giuta a far cambiamenti nela so vita e a viver de una maniera che lu el ghe piase. — Filipensi 4:13.

Pi che te cognossi a Dio, pi te sarè par lu come un caro amigo. (Gàlati 4:9; Salmo 25:14) Cossita, te gavarè la oportunità de viver ntel novo mondo de Dio. Ma come che sarà questo novo mondo? El pròssimo artìcolo el ndarà spiegar questo.

a La Bìblia la dise che Geovà l’è el nome de Dio.