“Adesso mi amo predicar!”

MI NO GAVEA PI ALEGRIA

Quando mi gavea quasi 13 ani, mi no amea pi tanto a Geovà. Me parea che i me coleghi de scola i era lìberi par far tuto quel che i volea e mi me sentia in preson. Mi pensea che quel che i me genitori i me domandea e quel che la organisassion la disea i era drio intrigar la me vita. Mi anca pensea che ghe volea sforsarse massa par servir a Geovà. Mi no go mai assà de creder che Geovà l’è el vero Dio, ma no gavea pi una forte amicìssia con lu.

Ancora cossita, go seità a predicar. Mi fea pròpio poco nela predicassion, sol par no restar inativa. Quando ndea predicar, no me pareciea vanti. Alora, l’era fadiga saver cossa parlar. Cossita, no era bona de visitar altre volte le persone e no me piasea de predicar. Mi pensea: ‘Come che qualchedun l’è bon de far questo una stimana dopo l’altra, un mese dopo laltro?’

Quando mi gavea 17 ani, volea far quel che mi volea mi. Alora, go ciapà le me robe e son ndata de star nela Austràlia. Questo no l’è mia stato fàcile par i me genitori. Lori i ze restadi preocupadi, ma i pensea che mi ndaria seitar servir a Geovà.

Nela Austràlia, la me amicìssia con Geovà la ze restada pi fiaca. Mi no ndea in tute le riunion. Me piasea de ndar a spasso coi gióveni che i ndea ale riunion ma anca i ndea nei posti che i bevea massa e i balea. Mi era un poco dela banda de Geovà e un poco dela banda del mondo. Ma mi no era felice de gnanca una banda.

QUEL CHE ME GA GIUTÀ A CAMBIAR LA ME MANIERA DE PENSAR

Due ani dopo, go cognossesto una sorela che me ga fato pensar sora quel che era drio far. Mi era de star con altre quatro sorele nò maridade. Una volta el superintendente de sircuito e la so sposa, Tamara, i ze restadi nela nostra casa par una stimana. Intanto che lu el fea i laori dela congregassion, Tamara la restea insieme de noantri e noantri ciacoléino tanto. Questo l’era tanto bon! Ne piasea tanto ciacolar insieme parché la ne capia. Me ga piasesto cognosser una persona che la fea tanto par Geovà e che la era tanto felice!

Tamara la era una persona pròpio contenta. El so amor par la verità e par la predicassion giutea anca ai altri. Ela la era felice parché la fea el so meio a Geovà, ma mi nò parché no fea questo. Ela la me ga giutà tanto a cambiar la me maniera de pensar. El so esémpio me ga fato capir che Geovà el vol che noantri lo servimo “con alegria” e “osando de alegria”. — Sal. 100:2.

QUEL CHE ME GA GIUTÀ A AMAR NANTRA VOLTA LA PREDICASSION

Mi volea esser felice come Tamara. Ma me tochea cambiar tante robe nela me vita. Ghe ga metesto tempo, ma pin pian go cambià quel che gavea de bisogno. Go scominsià a pareciarme meio par predicar e dele volte mi laorea come pioniera aussiliar. Alora, mi restea manco ansiosa e gavea de pi coraio. Go anca doperà de pi la Bìblia e go scominsià a gaver alegria nela predicassion. Poco tempo dopo, go scominsià a laorar come pioniera aussiliar tuti i mesi.

Go scominsià a esser amiga de persone de tute le età che le fea el so meio a Geovà e le era contente de servir a lu. El so bon esémpio me ga giutà a saver cossa che mi gavaria de meter in primo posto nela me vita e a far el me meio a Geovà. Mi go scominsià a piaserghe cada volta de pi de predicar e go dessidio laorar come pioniera regolar. Alora, go scominsià a sentirme felice e tanto ben nela congregassion.

GO CATÀ UN AMIGO PAR PREDICAR INSIEME PAR TUTA LA VITA

Un ano dopo, go cognossesto Alex, un omo tanto bon e che el amea a Geovà e la predicassion. Lu l’era servo ministerial e fea sei ani che l’era drio laorar come pioniero regolar. Lu anca el ga giutà nte un posto che gavea bisogno de predicadori nel Malauì. In quel posto, lu el ga cognossesto arquanti missionari che i lo ga giutà e i lo ga incoraià a meter el Regno in primo posto nela vita.

Nel ano de 2003, se ghemo maridà e ghemo seità a laorar come pionieri. Ghemo imparà tante robe e Geovà el ne ga benedio de tante maniere.

NE GA SUCEDESTO TANTE BELE ROBE

Nel ano de 2009, semo stati convidadi par esser missionari nel Timor-Leste, che l’era un pìcolo paese darente dela Indonèsia. L’era una roba che no spetéino, alora semo restadi contenti ma spauradi. Sinque mesi dopo, semo rivadi a Dìli che la ze la capital del Timor-Leste.

Noantri ghemo bio de cambiar tante robe par ndar de star in quel paese. Tuto l’era difarente. Par esémpio, la cultura, la léngua, el magnar e la vita dele persone. Alora, ghemo bio de imparar a viver in quel posto. Nela predicassion, parléino cole persone poarete, che le gavea studià poco e che i altri ghe dea poco valor. Tante de lore le sofre tanto par causa dela guera e dela violensa.a

L’era bel de predicar là! Par esémpio, go cognossesto una gióvena de 13 ani che la gavea nome Maria.b Ela la sofria tanto parché la so mare la era morta e la vedea poco so pare. Come altre gióvene, Maria no la savea cossa far dela so vita. Me ricordo che un giorno la ga scominsià a parlar come la se sentia e la piandea tanto. Alora, mi no go capio gnanca una parola de quel che ela la me ga parlà parché mi no savea ben quela léngua. Mi go pregà a Geovà e go domandà che el me giutesse a darghe forsa a quela gióvena. Alora, go scominsià a leder arquanti testi par darghe consolo. Nei ani avanti, go visto come la verità la ga giutà Maria a cambiar quel che la fea, come la se rangiea e la so vita. Ela la ze stata batesada e adesso anca ela giuta ai altri a capir la Bìblia. Ancoi, i fradei i ze la so fameia e ela la ze pròpio contenta.

Geovà l’è drio benedir tanto el laoro nel Timor-Leste. Quasi tuti i predicadori che ghen’è li i ga imparà la verità nei ùltimi diese ani ma ghen’è tanti pionieri, servi ministeriai e ansiani. Tanti i laora nela tradussion dele publicassion nele léngue che ghen’è li. Son restada tanto contenta de vederli cantar nele riunion, de vederli contenti e servir cada volta de pi a Geovà.

SON TANTO CONTENTA COLA ME VITA

La nostra vita nel Timor-Leste la era tanto difarente de quela che gavéino nela Austràlia, ma no semo mia boni de imaginar una vita pi felice. Dele volte, èrino imuciadi rento de una lìnea e intorno ghen’era pessi e verdure. Altri giorni, èrino drio far stùdio nte una casa calda, mesa moia, cole galine e in tera no ghen’era gnente, sol tera. Ancora cossita, mi sempre pensea: ‘Che roba bona!’

Mi ringràssio tanto ai me genitori parché i me ga sempre giutà e insegnà sora Geovà, anca quando no me piasea servir a Geovà. Me ga sucedesto quel che dise Proverbi 22:6. Me pare e me mare i resta tanto contenti de veder che mi e Alex semo doperadi par Geovà. Del ano de 2016 in qua, semo drio servir come superintendenti nei posti che el Betel dela Australàsia el tende.

Sito bon de creder che a mi no me piasea predicar? Adesso mi amo predicar! Mi go imparà che anca che infrontemo dificoltà, sol saremo felici se servimo a Geovà de tuto el cuor. Mi son sicura che questi 18 ani che mi sirvo insieme a Alex i ze i ani pi bei dela me vita. Adesso, mi son bona de capir quel che Davi el ga dito par Geovà: “Tuti quei che i se refugia in ti i sarà felici. I osarà sempre de alegria . . . e quei che i ama el to nome i restarà contenti par causa de ti.” — Sal. 5:11.