1921 Sento Ani Indrio

LA REVISTA Tore de Vigia in inglese, che ancoi la ze La Sentinela, de 1 de genaro de 1921 la gavea questa domanda par i studianti dela Bìblia: ‘Che laoro ghemo de far questo ano?’ La revista la gavea el testo de Isaia 61:1, 2 che parla sora el laoro de predicassion. El testo el dise: “Geovà el me ga scoliesto par predicar le bone notìssie ai mansi. Par proclamar el ano dela bona volontà de Geovà, e el giorno de giulgamento del nostro Dio.”

LORI I GA PREDICÀ CON CORAIO

Par far el laoro de predicassion, i studianti dela Bìblia i gavea de esser coraiosi. Parché? Lori i gavaria de parlar “bone notìssie ai mansi”, ma anca del “giorno del giulgamento” ai rugni.

El fradel John Henry Hoskin, che l’era de star nel Canadà, el ga predicà con coraio anca che le persone le era contra. Par esémpio, nel scomìnsio del ano de 1921, el fradel John el ga catà un ministro dela ciesa metodista. El fradel el ghe ga dito: “Noantri ghemo de parlar cole bone sora le Scriture. Podemo anca no esser de acordo in tuto quel che parlemo, ma podemo finir la ciàcola come amighi.” Ma questo no’l ga mia sucedesto. El fradel John el ga dito: “Fea pochi minuti che èrino drio parlar, e el ministro el ga dato una bota tanto forte nela porta che mi pensea che el ndaria spacar el viero dela porta.”

El ministro el ga dito al fradel: “Parché che no te vè parlar con quei che no va drio a Cristo?” Sicuro che el fradel John no’l ga dito gnente, ma el ga pensà: ‘Mi pensea che ero drio parlar con un de questi!’

Nel giorno dopo, el ministro el ga parlà busie sora el fradel John nela ciesa. El fradel John el ga dito: “Lu el ga parlà ale persone nela ciesa che mi ero el pedo busier de quela cità e che mi gavea de esser morto.” Anca cossita, el fradel John no’l se ga fermà de predicar, e tante robe bone le ga sucedesto par causa del so laoro de predicassion. John el ga dito: “L’è stà el meio tempo de predicassion che go bio. Arquante persone le ga dito: ‘Mi so che te sì un bon omo!’ E i volea anca giutarme in quel che gavea de bisogno.”

AIUTO PAR I STUDIANTI DELA BÌBLIA

I studianti i ga fato una revista che la gavea nome La Età de Oroa par giutar le persone a capir ancora de pi la Bìblia. Ghen’era una parte in questa revista che la era par i gióveni. Quela parte la gavea domande che i genitori i doperea par insegnar ai fioi. I genitori i gavea de far le domande e giutarli a catar le risposte nela Bìblia. Ghen’era domande che insegnea robe come: “Quanti libri ghen’è nela Bìblia?” Ghen’era anca domande che le giutea i gióveni a predicar con coraio, come: “Sarà che tuti quei che i va drio a Cristo i sarà perseghidi?”

In questa revista, ghen’era anca una parte che la giutea i studianti dela Bìblia che belche i savea tanto sora la Bìblia. Ghen’era domande in quela parte che le era anca nei Studi dele Scriture. Miliari de studianti dela Bìblia i imparea tanto con quele parte. Ma, la revista La Età de Oro de 21 de disembre de 1921 la ga dito che no ghen saria pi quele parte. Parché?

UN NOVO LIBRO!

El libro *La Arpa de Dio*

Carton cole pàgine che la persona la gavea de leder nela stimana

Cartoni cole domande par el stùdio

I fradei in quel tempo i ga visto che saria meio che la persona la imparesse una roba ala volta. Alora, in novembre de 1921, lori i ga fato el libro La Arpa de Dio. Quando una persona la volea el libro, ela anca la scominsiea a far el stùdio dela Bìblia col libro. Nel stùdio, la persona la studiea ela sola e la imparea cossa che Dio el ndaria far par le persone viver par sempre nela Tera. Come che l’era el stùdio?

Quando una persona la scominsiea a studiar, la ricevea anca un pìcolo carton insieme col libro. El carton el disea cossa che la gavaria de leder in quela stimana. Alora, nela stimana dopo, la ndaria ricever nantro carton cole domande sora quel che la gavea ledesto nela stimana vanti. Nel fin del carton, ghen’era scrito le pàgine che la persona gavaria de leder fin la pròssima stimana.

Le congregassion in quel tempo le mandea un carton diferente tute le stimane ai studianti. Ma chi che mandea i cartoni? Quasi sempre i era i pi veci o quei che no i era boni de predicar de casa in casa. Par esémpio, la sorela Anna Katherine Gardner, dela Pensilvània, Stati Unidi, la ga dito: “La me sorela Thayle no la era bona de caminar. Ma quando i ga scominsià a doperar el libro La Arpa de Dio, ela la gavea tanto laoro de far con questi cartoni.” Alora, quando el studiante el finia el stùdio dela Bìblia dopo de 12 stimane, una persona lo visitea par giutarlo a imparar de pi sora la Bìblia.

TANTO LAORO

Nel fin de quel ano, el fradel Joseph F. Rutherford el ga scrito una carta a tute le congregassion. Nela carta l’era scrito: “Semo stati boni de predicar in de pi posti e giutar de pi persone che in tuti ani vanti.” El fradel Rutherford anca el ga dito: “Noantri ancora ghemo tanto laoro de far. Incoraia anca i altri a farlo.” Sicuro che i studianti dela Bìblia i ga fato cossita, parché nel ano de 1922, lori i ga predicà con coraio come mai i ga fato vanti.

Amighi che i ga coraio

Quei che i studiea la Bìblia i ga mostrà amor parché i giutea un al altro. Come? Lori i ga mostrà coraio quando i ga giutà i so amighi che i era drio infrontar dificoltà. Adesso ndaremo veder un esémpio. — Pro. 17:17.

Nel giorno 31 de maio de 1921, tante persone le ga barufà e le se ga copà nela cità de Tulsa, Oklahoma, Stati Unidi. Ma parché che ga sucedesto quel lì? Un omo negro l’è stà metesto in preson e acusà de darghe bote a una dona bianca. Alora, de pi de 1.000 òmini bianchi i ga scominsià a barufar con òmini negri. Presto, quasi tute le persone de Greenwood le ga scominsià a barufar intrà de lore. Le persone le ga ciavà robe e le ga metesto fogo in de pi de 1.400 comersi e case. La stòria la dise che 36 persone le ze morte, ma tanti i crede che le ze state intorno de 300 persone che le ze morte par causa de quel che ga sucedesto.

El fradel Joseph Richard Hill, che l’era un Studiante dela Bìblia negro de Greenwood, el ga dito cossa che l’era drio suceder. Lu el ga dito: “Nela note che tuto quel ga scominsià, èrino drio studiar la Bìblia come ghemo sempre fato. Quando ghemo finio el stùdio, ghemo scoltà tiri darente de lì. Quando semo ndati dormir, èrino ancora drio scoltar i tiri.” Nela matina dopo, la situassion la era ancora pedo. El fradel Richard el ga contà ancora: “Arquante persone le ne ga dito che se voléssino protegerse, gavarìssino de ndar presto al posto che la polìssia del paese la era drio proteger le persone. Alora, el fradel Richard, la so dona e i so sinque fioi i ze ndati fin là. Là, ghen’era belche intorno de 3.000 òmini e done negri. La polìssia del paese la era lì par protegerli e par finir fora col problema che l’era drio suceder.

In quela ora el fradel Arthur Claus, che l’era bianco, el ga mostrà tanto coraio. Lu el ga dito: “Quando go savesto che ghen’era persone in Greenwood che le era drio ciavar e meter fogo nele case, go dessidio veder come che stea el me amigo, el fradel Richard.”

El fradel Arthur Claus drio insegnar 14 tosatei sora la Bìblia col libro La Arpa de Dio

Quando Arthur l’è rivà nela casa de Richard, lu el ga catà un visin bianco che el gavea una sciopa in man. Anca lu l’era amigo de Richard e el ga pensà che Arthur l’era un de quei che i era drio barufar insieme coi altri. Alora, el ga osà: “Cossa che te sì drio far nel giardin de questo omo?”

Arthur el ga dito: “Se quel omo no’l credesse in quel che mi ero drio dir, lu ndaria darme un tiro. Alora, lo go assà sicuro che mi ero amigo de Richard e che ero belche ndato arquante volte nela so casa.” Cossita, Arthur e el visin i ze stati boni de proteger la casa contra quele persone cative.

Pena dopo de questo, Arthur el ga savesto che el fradel Richard e la so fameia i era nel posto che la polìssia la era drio proteger. Ma, lu el ga savesto che le persone negre sol le podaria ndar via de lì se el general Barrett el assesse. Arthur el ga dito: “L’è stà massa fadiga parlar con lu. Quando go parlà a lu cossa che volea far, lu el me ga domandà: ‘Te ndarè proteger questa fameia e tender de quel che lori i ga de bisogno?’ Sicuro che mi son stà de acordo.”

Arthur l’è stà bon de gaver la autorisassion e suito l’è ndato al posto che Richard e la so fameia i era. Quando el ga mostrà la autorisassion a un dei polissiai che l’era là, el polissial el ga dito: “Varda sol! El general el te ga assà menar via to amighi! Seto che te sì stà la prima persona che la ze stata bona de gaverla?” Alora, el polissial el ga catà Richard e la so fameia. Tuti i ze ndati rento el auto de Arthur e i ze ndati casa.

Arthur el ga fato el so meio par proteger la fameia del fradel Richard. Tanti i ga visto el amor e el coraio che el ga mostrà. Arthur el ga dito: “El visin che el me ga giutà a proteger la casa de Richard el ga scominsià a rispetar de pi quei che i serve a Dio. E tante persone le ga volesto saver de pi sora el Regno de Dio parché le ga visto che, par quei che adora a Dio, no ghen’è difarensa de rassa. Semo tuti compagni.”

a La Età de Oro la ga cambià el nome par Consolassion nel ano 1937 e par Despertai! nel ano 1946.