Mi go visto la fede de tanti servi de Geovà

Mi go ridesto parché el me amigo no’l me parea una persona religiosa. Alora, ghe go domandà: “Cossa seto dela Bìblia?” Lu no’l ga fato presto dirme. Ma go seità a domandar, fin che lu el ga dito che so mama la era una Testimònia de Geovà e ghe gavea insegnà arquante robe. Par quela, go seità a farghe domande.

Noantri ghemo seità discorer tuta la note. Par tuta la vita, mi gavea scoltà che tuto quel che sucede l’è dela volontà de Dio. Ma me fea fadiga creder in questo parché, anca se gavesse sol 26 ani, mi gavea belche visto tante brute robe suceder. Alora, quando el me amigo el me ga spiegà che la Bìblia la dise che l’è Sàtana el comanda questo mondo, son restà curioso. — Gioani 14:30.

Me pare l’era stà un piloto del esèrsito dei Stati Unidi. Alora, desde ben picinin, mi go sempre savesto che una guera la podaria suceder de colpo parché el esèrsito l’era pronto par molar una bomba quando che el volesse. Intanto che ero drio far la università nela Califòrnia, ga scominsià la guera nel Vietnan. Alora, go scominsià a far protesti insieme de altri studianti dela università. Par quela, la polìssia la vegnea drio de noantri parché la volea darne. Noantri èrino boni de scampar, ma mesi sofegadi e mesi orbi par causa dela fumassa dele bombe che i molea. Ghen’era tanti protesti e tanta gente cativa. Tuti i pensea de una maniera difarente sora cossa che i gavea de far. Ghen’era tanto bacan quela època.

Nel ano de 1970, mi go scominsià a laorar nel Alasca e go ciapà tanti soldi. Alora, son ndato a Londres, go comprà una moto e go dessidio viaiar in volta. Arquanti mesi dopo, son rivà ala Àfrica. Intanto che ero drio viaiar, go cognossesto tante persone che le volea scampar via dei problemi, compagno a mi.

Par causa de quel che mi gavea belche visto e scoltà nela me vita, go scominsià a creder in quel che el me amigo me gavea insegnà dela Bìblia. Go capio che l’è pròpio el Diaol che el comanda el mondo. Ma, ancora volea saver cossa Dio l’era drio far.

Un tempo dopo, go catà la risposta a questa domanda. Mi anca go cognossesto arquanti cari òmini e done che i ze fedele a Dio ancora che i ze drio infrontar dificoltà.

IRLANDA DEL NORT LA ERA “LA TERA DELE BOMBE E DEI TIRI”

Quando son tornà a Londres, son ndato parlar cola mama de me amigo, e ela la me ga dato una Bìblia. Pi tardi, mi son ndato a Amsterdan, e intanto che ero drio leder la Bìblia, un fradel el me ga visto e me ga giutà a imparar nantro poco. Dopo, son ndato a Dublin, nela Irlanda. Go catà el posto ndove l’era el Betel e son ndato bater nela porta. L’è stà lì che go cognossesto el fradel Arthur Matthews, che l’era pròpio brao. Mi ghe go dito che volea studiar la Bìblia, e lu el ga dito che ndaria insegnarme.

Mi fea el me meio nel me stùdio, e me piasea tanto leder la Bìblia e le publicassion dele Testimònie de Geovà. Ero tanto premoso par imparar cada volta de pi. Quando ndea ale riunion, mi restea maraveià de veder come i tosatei i rispondea a domande che i studiosi no i ze mia boni, come: ‘Parché che ghen’è tante robe rugne? Chi che l’è Dio? Cossa che sucede dopo la morte?’ Come mi no cognossea nissuni in quel paese, mi sol gavea amighi che i era Testimònie de Geovà. Lori i me ga giutà a amar a Geovà e a far quel che ghe piase a lu.

Son stà batesà nel ano 1972. Un ano dopo, son deventà pioniero e son ndato servir nte una pìcola congregassion in Newry, nela Irlanda del Nort. Go catà una casa in colònia darente de una montagna. Ghen’era diverse vache nel potrero darente casa. Alora, mi ghe fea scoltar i me discorsi. Me parea che le me scoltea con atension intanto che le rumighea el pasto. E ancora che no le me disea gnente, le me ga giutà a imparar come portarme davanti dele persone. Dopo, nel ano 1974, son deventà pioniero spessial e go scominsià a laorar insieme de Nigel Pitt, che l’è deventà un caro amigo par mi.

In quela època, ghen’era tanta violensa nela Irlanda del Nort. Tanti i cognossea quel posto come “la tera dele bombe e dei tiri” parché le persone le seitea a barufar, le se copea e le molea bombe in volta nei auti. Ghen’era anca tanti problemi par causa dela religion. Magari, come i protestanti e i catòlichi i savea che le Testimònie de Geovà no le se metea nela polìtica, lori i ne assea predicar sensa farne mal. Fin le persone nela predicassion le ne giutea, parché lore sempre le ne disea se ndea suceder qualcossa pericolosa.

Ancora cossita, ghemo infrontà bruti colpi. Un giorno, mi e nantro pioniero, de nome Denis Carrigan, semo ndati predicar nte una cità darente. Là, no ghen’era mia Testimònie de Geovà e èrino ndati in quela cità sol una volta. Alora, una dona la ga tacà a dir che èrino drio laorar par i soldadi inglesi. Fursi la ga dito quela roba parché gnanca un de noantri due èrino boni de parlar compagno la gente dela Irlanda. Noantri semo restadi pròpio spauradi parché, se i savesse che qualchedun gavea tratà ben i soldadi inglesi, i ndaria coparlo o darghe un tiro nel denòcio. Intanto che mi e el fradel speteino el ònibus là fora nel fredo, ghemo visto che l’era rivà un auto nel bar ndove ghen’era quela dona. Ela la ze vegnesta fora e ghemo capio che la era drio parlar de noantri. Alora, quei due òmini i ze vegnesti domandarne qualcossa sora la ora del ònibus. Quando el ònibus l’è rivà, lori due i ga parlà col motorista. Noantri no semo mia stati boni de capir cossa che i ga dito, ma come no ghen’era mia altre persone rento el ònibus, ghemo pensà che lori i se gavea parecià par finir fora con noantri. Magari, no ga sucedesto gnente de questo. Quando semo ndati fora del ònibus, mi ghe go domandà al motorista: “Quei òmini là i era drio far domande sora noantri?” Alora, el me ga rispondesto: “Mi sò chi che valtri sì e go contà a lori. No sté mia gaver paura parché no ndarà suceder gnente con valtri.”

Nel ano 1976, mi go cognossesto Pauline Lomax nte una assembleaa in Dublin. Ela e el so fradel, Ray, i cognossea a Geovà ancora de picinini. Pauline la servia come pioniera spessial nela Inglatera e la era una sorela tanto cara, brava e ùmile. Un ano dopo, mi e Pauline se ghemo maridà e semo ndati servir come pionieri spessiai in Ballymena, nela Irlanda del Nort.

Par un tempo, ghemo laorà come superintendenti de sircuito e ghemo visità posti pròpio pericolosi, come Belfast e Londonderry. Ghemo cognossesto tanti bravi fradei e sorele che i ze stati boni de assar indrio le busie dele religion false e de imparar a tratar a tuti con bontà e amor. Veder la so fede e come Geovà li ga benedio e li ga protegesti me ga dato tanto coraio!

Mi go vivesto nela Irlanda par diese ani. Alora, nel ano 1981, semo stati convidadi par far la turma 72 dela Scola de Gileade e semo stati mandadi ala Sera Leoa, nela Àfrica.

I FRADEI DE SERA LEOA I GAVEA FEDE ANCA SE I FUSSE POARETI

Noantri èrino de star nte una casa par missionari insieme a altri 11 cari fradei e sorele. Ghen’era sol una cosina, tre bagneri, due posti par lavarse, un telèfono, una màchina de lavar e una de sugar la roba. Tante volte, de colpo restéino sensa luce. Ghen’era rati che vegnea rento el cuerto e bisse che le ndea rento in cantina.

Anca che fusse fadiga viver là, l’era tanto bel predicar parché le persone le credea nela Bìblia e ghe piasea scoltarne. Par quela, tanti i ga scominsià a studiar la Bìblia e i ze deventadi Testimònie de Geovà. Le persone in quel posto le me ciamea de “Signor Robert” e la Pauline de “Signora Robert”. Ma come me ga tocà laorar de pi rento Betel, mi no gavea mia pi tanto tempo de ndar predicar. Alora, lori i ga scominsià a ciamarlade “Signora Pauline” e mi de “Signor Pauline”. Ela ghe ga piasesto tanto!

Tanti fradei i era pròpio poareti, ma Geovà el ga sempre tendesto de lori de maniere de gnanca creder. (Mat. 6:33) Me ricordo de una sorela che la gavea soldi par comprar de magnar a ela e so fioi sol par quel giorno. Ma la ghe ga dato i soldi a nantro fradel che el gavea la malaria e ghe ocorea comprarse remedi. Pi tardi in quel giorno, una dona la ze capitada e la ga pagà la sorela par rangiarghe i cavei. Robe cossita le sucedea sempre.

GHEMO IMPARÀ UNA NOVA LÉNGUA E CULTURA NELA NIGÈRIA

Dopo de servir nove ani nela Sera Leoa, noantri semo stati mandadi al Betel dela Nigèria che l’era tanto grando. El me laoro l’era quasi compagno a quel che mi fea nela Sera Leoa, ma el laoro de Pauline el ga cambià tanto. Prima, ela la fea 130 ore nela predicassion e la gavea bei studi. Ma adesso, ghe tochea star sentada do par cosir e rangiar le robe dei beteliti. Ghe ga fato fadiga par un tempo. Ma ela la ze restada contenta de veder che i beteliti i ghe dea valor al so laoro e la se ga sforsà sempre de incoraiarli.

Noantri gaveino tanto de imparar parché no cognosséino mia la cultura dela Nigèria. Una volta, un fradel l’è rivà nel me scritòrio par farme cognosser una sorela che la era pena rivada in Betel. Quando son levà su par saludarla e darghe la man, ela la se ga indenocià davanti de mi. No savea gnanca cossa far. Alora, me go ricordà de Ati 10:25, 26 e Apocalisse 19:10. Go pensà: ‘Sarà che ghe digo che no la ga mia de far cossita?’ Magari, me son incorto che la era vegnesta servir in Betel e ela la savea cossa la Bìblia la dise.

Intanto che go discoresto con quela sorela, go bio tanta vergogna. Ma dopo, son ndato in serca de saver parché che la ga fato cossita. Go imparà che tante persone le fà compagno a ela in tanti posti del paese parché l’è una maniera de mostrar rispeto una al’altra. La Bìblia anca la parla de tante persone che le se ga indenocià davanti altri e che no i era mia drio far adorassion. (1 Sam. 24:8) Cossita, son restà contento de no gaver parlà gnente che ndaria assarla con vergogna.

Nela Nigèria, ghemo cognossesto diversi fradei che i ga mostrà tanta fede nela so vita. Un de questi l’è stà Isaiah Adagbona.b Lu el ga imparà de Geovà quando l’era gióveno. Ma dopo, el ga savesto che el gavea la lepra e ghe ga tocà ndar de star nte un posto ndove sol ghen’era gente con lepra. Lì, lu l’era la ùnica Testimònia de Geovà. Ancora che tanti no i volesse che lu el predichesse, Isaiah el ga giutà de pi de 30 leprosi a imparar de Geovà e el ga scominsià una congregassion in quel posto.

I FRADEI NEL QUÉNIA I GA PORTÀ PASSIENSA CON MI

Nel ano de 1996, noantri semo stati mandadi servir nel Betel del Quénia. L’è stà tanto bel tornar a quel paese dopo de tanti ani. Intorno a Betel, ghen’era tanti macachi e, dele volte, lori fin i ciavea le sorele che portea fruti. Una volta, una sorela la ga assà so finestra verta, e quando la ze tornada casa, la ga catà una mùcia de macachi che i magnea quel che ghen’era. Ela la ga osà e la ze ndata fora de carera e i macachi anca i ga osà e i ga scampà via par la finestra.

Mi e Pauline ghemo scominsià a giutar una congregassion de léngua suaili. Poco tempo dopo, i me ga domandà de far el stùdio de libro, che ancoi l’è el stùdio bìblico cola congregassion. Magari, mi no ero mia bon de parlar polito la léngua. L’è vera che ero bon de far le domande parché mi le gavea studià casa. Ma se i fradei i rispondesse qualcossa un pochetin difarente de quel che l’era scrito, mi no ero mia bon de capirli. Alora, l’era pròpio bruto, e me fea pecà dei fradei e sorele. Ma, son restà maraveià de veder come i fradei i era ùmili, i portea passiensa e i me assea far el stùdio.

NEI STATI UNIDI, I FRADEI I MOSTRA FEDE ANCA SE I ZE SIORI

Noantri semo restadi nel Quénia manco de un ano, parché in 1997 semo stati mandadi servir nel Betel del Brooklyn, Nova York. Lì, le persone le gavea pi soldi e pi robe, alora, ghen’era altre dificoltà. (Pro. 30:8, 9) Ma ghemo visto che i fradei i gavea una forte amicìssia con Geovà. Invesse de doperar del so tempo e del so capital par restar cada volta pi siori, lori i doperea quel che i gavea par giutar la organisassion de Geovà.

In tuti questi ani, ghemo visto la fede dei nostri cari fradei de diverse maniere. Nela Irlanda, ghemo visto la fede dei fradei ancora che ghen fusse violensa. Nela Àfrica, ghemo visto la fede dei fradei anca se i fusse de star in posti distanti e i fusse poareti. Nei Stati Unidi, vedemo la fede dei nostri fradei ancora che i gàpie tanti soldi. Sicuro che Geovà l’è pròpio contento quando el varda do, e el vede le persone che lo serve mostrar amor par lu de tute queste maniere!

El tempo el ga passà e mi no go gnanca visto. (Giò 7:6) Ancoi, noantri laoremo nela sede in Warwick, Nova York, insieme de persone che le ama pròpio una al’altra. Restemo tanto contenti e felici de giutar el nostro Rè, Gesù Cristo, che de qua un poco, el ndarà ricompensar tuti quei che i ze fedeli a Geovà. — Mat. 25:34.