Domande dei letori

Quando che el laoro de predicassion el ndarà finirse?

Gesù el ga dito: “E queste bone notìssie del Regno le sarà predicade in tuta la tera abitada in testimònio a tute le nassion, e alora vegnerà el fin.” (Mat. 24:14) La parola greca doperada in questo versìcolo e nei versìcoli 6 e 13 par “fin” la ze telos. Questa parola la ze doperada nela Bìblia par parlar sora el fin del mondo de Sàtana nel Armagedon. (Apo. 16:14, 16) Cossita, capimo che seitaremo a predicar le bone notìssie fin un poco prima del fin de questo mondo. Alora, questo càmbia quel che una volta capiano.

Prima, capiano che ndarìssino fermarse de predicar quando Babilònia, la Granda, la fusse finida fora e scominsiesse la granda tribolassion. (Apo. 17:3, 5, 15, 16) Noantri credeino che dopo che scominsiesse la granda tribolassion, Geovà no’l assaria pi che nissuni podesse acetar le bone notìssie e dessider servirlo. (Isa. 61:2) Noantri anca penseino che quei che i seitaria vivi dopo dela granda tribolassion saria sol quei che i ga seità fedeli prima che la granda tribolassion la scominsiesse. Capiano che lori i saria compagno i giudei fedeli che i ze restadi vivi dopo che Gerusalen la ze stata finida fora in 607 vanti de Cristo. (Eze. 5:11; 9:4) Ma questa comparassion intrà questi giudei e quei che i seitarà vivi dopo la granda tribolassion no la ze de acordo con Mateo 24:14. Parché? Parché questo testo el mostra che le persone le podarà acetar le bone notìssie e cambiar fin un poco prima del fin, nel Armagedon.

Come ghemo cambià quel che capiano sora Mateo 24:14, anca ne ocore cambiar quel che credeino sora el messàgio che saria come sassi de graniso de Apocalisse 16:21. Dopo de studiar tanto sora questo, ghemo visto che un testo ne giuta a capir quelaltro. Come cossita? Ghemo de veder quel che la Bìblia la dise sora quel che le persone le faria dopo de scoltar le bone notìssie. El apòstolo Paolo el ga dito che le bone notìssie le ze come un “profumo de vita” par quei che i desside scoltarle. Ma, queste medèsimo bone notìssie le ze come un “profumo de morte” par i nemighi de Dio. (2 Cor. 2:15, 16) Lori i òdia queste bone notìssie parché le mostra che el mondo de Sàtana l’è tanto bruto e che el sarà finio fora. — Gio. 7:7; 1 Gio. 2:17; 5:19.

Varda anca nantra roba importante che Apocalisse 16:21 el mostra. Lì dise che la tempesta “la era pròpio granda”. Cossita capimo che nela granda tribolassion fursi el laoro de predicassion sarà ancora pi grando e che el nome de Geovà el sarà cognossesto come mai. (Eze. 39:7) Alora, sarà che dopo che scomìnsia la granda tribolassion arquante persone ancora le volerà scoltar le bone notìssie? Credemo che si! Pol esser che queste persone le se ricorde che le Testimònie de Geovà le ga seità a parlar che le religion false le saria finide fora.

La medèsima roba la ga sucedesto nel Egito quando Geovà el ga mandà le diese piaghe. Dopo che Geovà el ga fato el “giulgamento contra tuti i dèi del Egito”, tante persone che no le era israelite le ze ndate via insieme al pòpolo de Dio. (Éso. 12:12, 37, 38) Pol esser che lore le ga volesto scominsiar a adorar a Geovà dopo che le ga visto suceder quel che Moisè el gavea dito.

Alora, tuti quei che i volerà servir a Geovà dopo che Babilònia, la Granda, la sarà finida fora i podarà giutar i fradei de Cristo che ancora i sarà qua nela Tera. (Mat. 25:34-36, 40) Ma le persone sol le sarà giulgade come piégore se le desside servir a Geovà vanti del Armagedon, quando i untadi che ancora i sarà qua nela Tera i ndarà al cielo.

Dopo de capir meio questi testi, vedemo ancora de pi el amor e la misericòrdia de Geovà. Semo sicuri che lu “no’l vol che gnanca un el sìpia destruto, ma el vol che tuti i se ciame grami”. — 2 Pie. 3:9.