Anca se mi gavesse tanta vergogna, son deventada missionària

Mi son nassesta in 1951 in Vienna, nela Àustria. Mi me ricordo che, quando ero toseta, gavea tanta vergogna. La me fameia la era catòlica e mi credea in Dio e sempre preghea a lu. Quando mi gavea nove ani, me pare el ga scominsià a studiar la Bìblia cole Testimònie de Geovà, e poco tempo dopo, la me mama la ga scominsià a studiar insieme.

Suito ghemo scominsià a ndar ale riunion nela congregassion Döbling in Vienna. Mi e la me fameia sempre feino tante robe insieme. Par esémpio, studieino la Bìblia, ndeino ale riunion e laoreino nele assemblee. El me pare el me ga giutà a gaver una forte amicìssia con Geovà ancora quando ero ben gióvena. Lu el volea che mi e me sorela fùssino pioniere. Par quela, lu sempre el preghea a Geovà sora quel lì. Ma in quela època, no l’era questo laoro che mi volea far.

COSSA ME GA GIUTÀ A DEVENTAR PIONIERA?

Mi me go batesà in 1965, quando gavea 14 ani. Me fea fadiga ndar ala predicassion parché gavea massa vergogna de parlar cole persone che no cognossea. Mi sempre pensea che i altri i era meio che mi, e volea tanto che i me coleghi de scola i me volesse ben. Alora, dopo che me go batesà, go scominsià a star tanto insieme con persone che no le servia a Geovà. Ma mi me sentia tanto mal. Mi savea che no l’era bon passar tanto tempo insieme con persone cossita, ma no ero bona de cambiar mi mi sola. Alora, cossa che me ga giutà?

L’è stà in quela època che una sorela de 16 ani de nome Dorothée la ga scominsià a ndar nela me congregassion. Mi son restada maraveiada de veder come ghe piasea predicar de casa in casa. Mi ero un pochetin pi vècia che ela, ma ndea poco ala predicassion. Mi go pensà: ‘Mi go me pare e me mare che i serve a Geovà, ma la Dorothée la serve a Geovà ela sola e la ze de star cola so mare che la ze malada. Anca cossita, ela la ze sempre nela predicassion!’ El so bel esémpio el me ga giutà a far de pi par Geovà, e noantre due ndeino sempre insieme ala predicassion. Prima, ghemo scominsià a laorar insieme come pioniere aussiliar, che in quela època, se ciamea pioniere de fèrie. Dopo, ghemo laorà insieme come pioniere regolar. El amor che Dorothée la gavea par la predicassion me ga fato gaver voia anca mi de far questo laoro. Ela la me ga giutà a scominsiar el me primo stùdio bìblico. Dopo de un tempo, anca mi gavea caro de parlar cole persone de casa in casa e in tanti altri posti.

Nel me primo ano de pioniera regolar, un fradel dela Àustria de nome Heinz se ga cambià par la nostra congregassion. Lu el gavea imparà la verità nel Canadà quando l’era ndato visitar el so fradel che l’era Testimònia de Geovà. Heinz l’è vegnesto servir come pioniero spessial nela nostra congregassion in Vienna. Poco tempo dopo che se ghemo cognossesti, el me ga piasesto tanto. Ma lu el volea esser missionàrio e mi nò. Par quela, nel scomìnsio, mi go fato finta de gnente. Ma col tempo, ghemo scominsià a smorosar, se ghemo maridadi e ghemo seità a laorar insieme come pionieri nela Àustria.

COSSA CHE ME GA GIUTÀ A VOLER ESSER MISSIONÀRIA?

Heinz sempre el parlea che el volea tanto esser missionàrio, ma mai el me ga dito che me tochea esser. Una roba che lu el fea la era farme pensar nel assunto. Par esémpio, lu el me domandea: “Come no ghemo fioi, sarà che podemo far de pi par Geovà?” Mi gavea paura de esser missionària parché sentia tanta vergogna. Ma el me omo el me ga giutà con tanta passiensa. Lu el me ga dito par no pensar nela me paura, ma in come mi podaria giutar le persone. Questo consìlio el me ga giutà tanto.

Dopo de un tempo, go scominsià a gaver voia de esser missionària. Alora, ghemo fato la petission par la Scola de Gileade. Ma, un fradel de Betel el me ga dito che saria meio se prima mi studiesse un poco de pi el inglese. Alora, mi go studià par tre ani. Dopo, sensa che noantri spetessino, semo stati convidadi par laorar nte una congregassion dela léngua servo croata in Salzburgo nela Àustria. No l’era mia fàcile parlar questa léngua, ma ghemo insegnà la Bìblia a tante persone. Ghemo predicà sete ani nela léngua servo croata, e nte un de questi ani, ghemo servio nel sircuito.

In 1979, i fradei de Betel i ne ga domandà che ndessino ala Bulgària. Come là no se podea predicar, lori i ne ga domandà che fessino finta che èrino de fèrie. Alora, noantri semo ndati sol par portar publicassion ben picinine de scondon par sinque sorele che le era de star in Sòfia, la capital dela Bulgària. Mi go bio tanta paura, ma Geovà el me ga giutà. Le sorele che le era belche in quel paese le savea che le podea ndar in preson, ma stesso cossita, le gavea coraio e le era contente. Veder el so esémpio me ga incoraià a far el me meio in tuti i laori dela organisassion.

Un tempo dopo, ghemo mandà nantra volta la petission par far la Scola de Gileade e semo stati convidadi. Noantri penseino de far la scola in inglese nei Stati Unidi. Ma in novembre de 1981, questa scola anca ga scominsià a esser fata nel Betel dela Alemagna. Alora, l’è stà tanto bel parché ghemo fato la scola in aleman. Ma par ndove sarìssino mandadi?

SEMO NDATI SERVIR NTE UN PAESE CON TANTA GUERA

Semo stati mandadi servir nel Quénia. Ma el Betel del Chénia ne ga domandà se podarìssino ndar servir nela Uganda. Mi go bio tanta paura de cambiarme parché ghen’è stà tanta guera in questo paese. De pi de diese ani vanti, una autorità del esèrsito de nome Idi Amin gavea tolto el poder de Uganda. Nel so governo, tante persone le ze state copade e milioni de persone le ga patio tanto. In 1979, i nemighi de Idi Amin i ga finio fora col so governo. Ma la Scola de Gileade ne gavea parecià par fidarse in Geovà. Alora, anca con tanta paura, semo ndati servir nela Uganda.

La vita in Uganda no la era mia fàcile. Nel Anuário das Testemunhas de Jeová de 2010, Heinz el ga dito che el governo no’l dea àqua, luce e altre robe che le persone ghe ocorea. I telèfoni no i laorea mia, le persone le copea e le ciavea robe dei altri e l’era ancora pedo de note. Alora, dopo che el sol ndea do, tuti i se sarea rento casa e i preghea par nissun ndar rento par ciavar le so robe o coparli. Anca se la vita in Uganda no la era fàcile, i fradei i seitea a servir a Geovà contenti!

In 1982, semo ndati a Kampala, la capital de Uganda. Nei primi sinque mesi, semo restadi nela casa de Sam e Christina Waiswa. Nela so casa, anca stea i so sinque fioi e altre quatro persone dela fameia. Tante volte, lori i gavea el magnar sol par una volta nel giorno. Ma anca cossita, lori i spartia el magnar con noantri. Ghemo imparà bele robe con lori. Par esémpio, ghemo imparà a sparagnar àqua par lavarse e par doperar el bagnero. In 1983, se ghemo cambià par un posto che no ghen’era tanta violensa in Kampala.

Me piasea tanto predicar in Kampala. Me ricordo de un mese che ghemo assà 4 mila reviste cole persone. E el pi bel l’è che lore ghe piasea tanto discorer sora la Bìblia e le gavea tanto rispeto par Dio. Mi e me omo gaveino de 10 a 15 studi cada un, e ghemo imparà tanto coi nostri studianti. Par esémpio, resteino maraveiadi de veder che i ndea a pié par le riunion tute le stimane, sensa sbrontolar e i era sempre contenti.

In 1985 e in 1986, ghen’è stà altre due guere in Uganda. In quela època, fin i tosatei i era doperadi come soldadi. Lori i stea nele strade, i gavea arme in man e i disea se le persone le podea ndar avanti o nò. Quando ndeino via de casa par predicar, domandeino a Geovà che el ne giutesse a restar tranquili e a gaver sabedoria par darghene fora cole situassion. E Geovà sempre el ne ga giutà. Quando cateino qualchedun che volea scoltarne parlar sora Dio, suito se desmentegheino dela nostra paura.

Anca me piasea tanto predicar par i stranieri che i era de star nela Uganda. Par esémpio, insegneino la Bìblia a un dotor de nome Murat Ibatullin e la so dona, Dilbar. Lori i era de Tartariston, che l’è nela Rùssia. Lori i se ga batesà e i seita a servir a Geovà. Go anca cognossesto una dona dela Ucrània de nome Tatjana Vileyska. In quela època, ela la pensea de coparse. Ma ela la ga imparà la verità e la se ga batesà. Dopo, Tatjana la ze tornada ala Ucrània e la ga fin giutà nela tradussion dele publicassion par el ucraniano.a

MISSIONARI IN NANTRO PAESE

In 1991, quando èrino de fèrie nela Àustria, Betel ne ga domandà de ndar servir nela Bulgària. Èrino belche stati in questo paese par portar publicassion de scondon. In quela època, el governo no ne assea mia predicar, ma el novo governo no l’era contra el nostro laoro. Par quela, semo stati mandadi par questo paese par predicar.

I fradei de Betel i ne ga domandà de ndar suito ala Bulgària. Par quela, no ghemo gnanca podesto tornar ala Uganda ciapar le nostre robe e veder i nostri amighi par la ùltima volta. Invesse, semo ndati al Betel dela Alemagna, ghemo ciapà un auto e semo ndati fin la Bulgària. Nela nostra nova congregassion in Sòfia, ghen’era intorno de 20 predicadori.

Nela Bulgària, ghemo infrontà diverse dificoltà. Noantri no saveino parlar la léngua e anca ghen’era sol due publicassion in bùlgaro, che le era A verdade que conduz a vida eterna e Meu livro de história bíblicas. Anca l’era tanto fadiga scominsiar a insegnar la Bìblia ale persone. Anca cossita, i fradei i seitea a métegherla tuta nel laoro de predicassion. Par quela, la Ciesa Ortodossa no ghe piasea de noantri e la ga scominsià a vegnerne contra.

In 1994, el governo no ne vedea pi come una religion. Par quela, le persone le ga scominsià a pensar che èrino gente che volea far robe rugne ai altri. Arquanti fradei i ze stati fin metesti in preson. Le notìssie le disea che le Testimònie de Geovà disea un ai altri de coparse e le volea che i so fioi i morrisse parché no le acetea sangue. In quela època, l’era tanto fadiga predicar. Le persone le ne disea su, le era stùpide, le ciamea la polìssia e fin le ne trea robe drio. L’era tanto fadiga che rivesse publicassion nela Bulgària e catar un posto par far le nostre riunion. Una volta, la polìssia la ga capità in meso un congresso e no ghemo gnanca podesto finirlo. Predicar nela Bulgària l’era tanto difarente dela Uganda. Nela Uganda, le persone le ne volea ben e le volea studiar la Bìblia. Par quela, feino fadiga dàrghene fora con tanto òdio. Alora, cossa che ne ga giutà?

Ne ga giutà tanto star insieme coi nostri fradei e sorele. Lori i amea tanto la verità e i era contenti che èrino insieme. Noantri èrino tanto unidi e tendeino un del altro. Cossita, ghemo imparà che saremo felici in qualche laoro che femo nela organisassion se amemo i fradei.

Dopo de un per de ani, la situassion la ga cambià. In 1998, el governo ne ga acetà come religion nantra volta e ghen’era tante publicassion in bùlgaro. In 2004, el novo Betel l’è stà dedicà. Ancoi, nela Bulgària ghen’è 57 congregassion con 2.953 predicadori. Nel ùltimo ano de servìssio, 6.475 persone le ze ndate ala Selebrassion. Quando me ricordo che là nel scomìnsio ghen’era sol sinque sorele in Sòfia, e che adesso ghen’è nove congregassion, mi vedo che ‘el pìcolo l’è deventà mila’. — Isa. 60:22.

GHEMO BIO ALTRE DIFICOLTÀ

Nela me vita, go bio tanti problemi de salute. Mi go bio de darghene fora diverse volte col càncaro. Una volta, me ga dato un tumor nela testa. Alora, me ga tocà far radioterapia e anca ndar ala Ìndia par far una operassion che ghe ga metesto 12 ore. Alora, semo restadi nel Betel dela Ìndia fin che mi restesse meio, e dopo semo tornadi ala Bulgària.

In quela època, anca el me omo l’è restà malà. Lu el ga bio una malatia de nome Huntington. Questa malatia lo fea gaver dificoltà par caminar, parlar e controlar i so mùscoli. Come lu el restea cada volta pedo par causa dela so malatia, me tochea giutarlo cada volta de pi. Par quela, dele volte, mi pensea che no saria pi bona de tenderlo. Ma ghen’era un gióveno de nome Bobi che sempre el convidea el Heinz par predicar. Anca se el me omo no l’era bon de dir le parole polito e de controlar i so brassi e le so gambe, el Bobi no’l gavea mia vergogna de ndar insieme con lu nela predicassion. E sempre che me ocorea de aiuto par tender del me omo, lu el gavea caro de giutarme. Noantri no ghemo bio fioi, ma el Bobi l’è stà el fiol che Geovà el ne ga dato nela ora giusta! — Mar. 10:29, 30.

Anca el me caro omo el ga bio càncaro e l’è morto in 2015. Lu el me manca tanto, parché lu el me fea sentirme tanto tranquila. Mi penso tanto in lu e l’è come se el fusse ancora vivo. (Luc. 20:38) Mi seito a pensar nei bei consili che lu el me dea con tanta bontà. L’è stà tanto bel servir a Geovà par tanti ani insieme.

MI SON TANTO CONTENTA DE GAVER EL AIUTO DE GEOVÀ

Mi go infrontà tante dificoltà, ma Geovà sempre el me ga giutà a ndar avanti. Lu el me ga giutà a deventar una missionària che ama le persone, anca se gavea tanta vergogna. (2 Tim. 1:7) Col aiuto de Geovà, mi e me sorela doperemo la nostra vita par servirlo. Ela e el so omo i laora nel sircuito de léngua sèrvia nela Europa. Alora, Geovà el ga rispondesto le orassion che el me pare el ga fato tanti ani indrio!

Studiar la Bìblia me giuta a sentir la pace che vien de Geovà. Quando infronto brute dificoltà, mi prego ancora de pi, come Gesù el fea. (Luc. 22:44) Geovà el dopera el amor e la bontà dei fradei dela me congregassion in Sòfia par risponder le me orassion. Mi son tanto contenta parché sempre i me convida par far robe insieme e i mostra che i me ama.

Me piase tanto pensar nela ressuression. Mi penso come che sarà la vita in Paradiso. Mi penso nei me genitori gióveni nantra volta davanti ala nostra casa, la me sorela che la fà de magnar e el me caro Heinz in pié dela banda del so caval. Quando penso cossita, i me bruti pensieri i va via, e resto tanto contenta.

Quando penso in tuto quel che ga sucedesto nela me vita e in quel che Geovà el promete par el futuro, me sento come Davi, che el ga dito: “Ndove mi saria se no gavesse fede che mi ndaria veder la bontà de Geovà nela tera dei vivi? Speta in Geovà. Sìpia coraioso e forte de cuor. Si, speta in Geovà.” — Sal. 27:13, 14