Due novi fradei i fà parte del Corpo Governante

NEL GIORNO 5 de otobre de 2024, nela riunion anual, ghemo bio el anùnsio che i fradei Jody Jedele e Jacob Rumph adesso i fà parte del Corpo Governante dele Testimònie de Geovà. Fà tanti ani che questi due fradei i serve a Geovà.

El fradel Jedele l’è nassesto in Missouri, nei Stati Unidi, e i so genitori belche i era Testimònie de Geovà. La so fameia la era de star nte un posto ndove ghen’era bisogno de aiuto nela predicassion. Par quela, el ga cognossesto tanti fradei e sorele de difarenti posti che i vegnea giutar nela predicassion. Veder el amor de quei fradei lo ga giutà a voler servir a Geovà. Alora, lu l’è stà batesà in otobre de 1983. El fradel Jedele ghe piasea tanto de predicar, e in setembre de 1989, dopo che el ga finio la scola, el ga scominsià come pioniero regolar.

Intanto che l’era gióveno, la so fameia sempre ndea a Betel. Par quela che lu e la so sorela i ga bio voia de laorar in Betel, e dopo un tempo, lori due i ze ndati. El fradel Jedele el ga scominsià a laorar nel Betel de Wallkill in setembre de 1990. Lu el ga laorà nel Departamento de Netìssia e anca nel departamento che giuta a tender dela salute dei fradei.

In quela època, le congregassion de léngua spagnola darente a Betel le gavea bisogno de aiuto. Alora, el fradel Jedele el ga scominsià a ndar ale riunion in spagnol e a imparar la léngua. Dopo, el ga cognossesto una pioniera de quel sircuito de nome Damaris. Lori i se ga maridà e anca ela la ga scominsià a servir in Betel.

In 2005, ghe ga tocà ndar via de Betel par tender dei genitori. Ma, lori i ga seità a servir come pionieri regolari. El fradel Jedele el ga giutà nela Scola del Servìssio de Pioniero, nela Comission de Contato coi Ospedai e nte una comission che tende dele costrussion.

In 2013, Jedele e Damaris i ze stati convidadi par laorar nela costrussion in Warwick. Dopo, lori i ze ndati servir in Patterson e in Wallkill. El fradel Jedele el ga laorà nel Departamento Local de Progeto e Costrussion (LDC) e dopo nel Scritòrio de Informassion sora Ospedai. In marso de 2023, el ga scominsià a laorar come Assistente nela Comission de Servìssio del Corpo Governante. Sora tuti i difarenti laori che el ga fato, el fradel Jedele el ga dito: “Quando ghemo un novo laoro de far, podemo pensar che no saremo mia boni de farlo. Ma ne ocore ricordarse che l’è Geovà che el ne giuta a far tuto quel che el ne domanda.”

El fradel Rumph l’è nassesto nela Califòrnia, Stati Unidi. La so mare la era Testimònia de Geovà, ma no la ndea ale riunion gnanca ala predicassion. Ancora cossita, ela la se ga sforsà de insegnarghe la Bìblia. Tuti ani, el fradel Rumph el visitea la so nona che la ze una serva fedele de Geovà. Ela lo ga giutà a voler imparar la verità e quando lu el gavea 13 ani, la ghe ga domandà se el volea studiar la Bìblia. In 27 de setembre de 1992, ancora quando el fradel Rumph l’era ben gióveno, el se ga batesà. Dopo, la so mare la ga scominsià a ndar ale riunion e ala predicassion nantra volta e so pare e i so fradei i ga scominsià a imparar sora Geovà e i ze stati batesadi.

Quando l’era gióveno, el fradel Rumph el ga visto che i pionieri i era sempre contenti. Par quela, lu el ga scominsià come pioniero in setembre de 1995, dopo che el ga finio la scola. In 2000, lu l’è ndato giutar ndove ghen’era bisogno de aiuto nela predicassion nel Ecuador. Lì, lu el ga cognossesto una sorela del Canadà de nome Inga e lori i se ga maridà. Dopo, lori i ze ndati de star nte una cità con una congregassion con pochi predicadori nel Ecuador. Ancoi, questa congregassion la ze tanto granda.

Un tempo dopo, el fradel e la sorela Rumph i ga scominsià a laorar come pionieri spessiai e dopo nel sircuito. In 2011, lori i ga fato parte dela turma 132 dela Scola de Gileade. Dopo, lori i ga laorà in diversi paesi come missionari, nel sircuito e in Betel. El fradel Rumph anca l’è stà istrutor dela Scola par Vangelisadori del Regno.

Par causa dela pandemia dela COVID-19, lori i ga bio de tornar ai Stati Unidi e i ze stati convidadi par servir nel Betel de Wallkill. El fradel Rumph el ga scominsià a laorar nel Departamento de Servìssio. Dopo, lori i ze tornadi al Ecuador, ndove lu el ga fato parte dela Comission de Filial. In 2023 lori i ze tornadi a Warwick. In genaro de 2024, lu el ga scominsià a laorar come assistente dela Comission de Servìssio del Corpo Governante. El fradel Rumph el ga parlà sora tuti i posti ndove el ga servio: “El pi importante no l’è ndove servimo a Geovà, ma si le persone che laoremo insieme.”

Noantri restemo contenti col laoro de questi due bravi fradei e seitemo a dar tanto valor a fradei che i ze cossita. — Fil. 2:29.