Ricòrdate de pregar par i altri

1. Come che savemo che Geovà el ga caro de scoltar le nostre orassion?

LA ORASSION la ze un bel presente che Geovà ne ga dato. Parché che podemo dirlo? Geovà el ga domandà che i àngeli e Gesù Cristo i fesse tanti laori importanti. (Sal. 91:11; Mat. 28:18) Ma sarà che lu el ga domandà che qualchedun el scoltesse le orassion dei so servi? Nò. Geovà pròpio el vol scoltar le nostre orassion. Par quela che la Bìblia la dise che lu l’è quel che ‘scolta le orassion’. — Sal. 65:2.

2. Che bel esémpio Paolo el ne ga dato?

² Anca se podemo parlar a Geovà sora i nostri pensieri, ghemo de pregar anca par i altri. El apòstolo Paolo el ga fato pròpio cossita. Par esémpio, la Bìblia la dise che lu el ‘seitea a parlar dei fradei efesi nele so orassion’. (Efe. 1:16) Ma Paolo anca el preghea par una persona sol, come quando el ga pregà par Timòteo. Lu el ga dito a quel caro amigo: ‘Mi son grato a Dio e sempre me ricordo de ti nele me sùpliche giorno e note.’ (2 Tim. 1:3) Alora, anca se Paolo el preghesse sora i so pensieri, lu anca el se tolea tempo par pregar par i altri. — 2 Cor. 11:23; 12:7, 8.

3. Parché che fursi se desmenteghemo de pregar par i altri?

³ Pol esser che, dele volte, se desmenteghemo de pregar par i altri. Parché? Una sorela de nome Sabrinaa la ga dito: “Noantri ghemo sempre tanto de far e fursi pensemo tanto nei nostri problemi che preghemo sol par quel che ne ocore a noantri.” Se anca ti te te senti cossita, questo stùdio ndarà giutarte tanto. Noantri ndaremo veder (1) parché che l’è importante pregar par i altri e (2) robe che ne giutarà a saver come farlo.

PARCHÉ CHE GHEMO DE PREGAR PAR I ALTRI?

4-5. Parché che podemo dir che le orassion che femo par i altri le “ga tanto poder”? (Tiago 5:16)

⁴ La orassion che femo par i altri “la ga tanto poder”. (Ledi Tiago 5:16.b) Sarà che la orassion che femo par i altri la pol pròpio giutarli? Sicuro che si. Vedemo due esempi che ne assa sicuri de questo. Gesù el savea che presto Piero el ndaria dir che no lo cognossea mia. Par quela, lu el ghe ga dito: “Mi go suplicà a Dio par ti, che la to fede no la devente fiaca.” (Luc. 22:32) Anca Paolo el savea che le orassion le podea giutar i altri. Quando lu l’era preso a Roma, lu el ga dito a Filémon: ‘Mi speto che le vostre orassion le me giute a esser con valtri nantra volta.’ (Filém. 22; varda anca la nota de stùdio “speto che le vostre orassion le me giute”.c) E l’è stà questo che ga sucedesto, parché Paolo l’è stà liberà e el ga scominsià a predicar nantra volta.

⁵ Ma no ghemo mia de pensar che Geovà el ga sempre de far quel che volemo noantri. Lu l’è sempre atento ale nostre orassion e, dele volte, el desside far quel che ghe domandemo. Alora, podemo parlar par Geovà tuto quel che volemo e ghemo de esser sicuri che lu el ndarà far la meio roba. — Sal. 37:5; varda 2 Corinti 1:11 e le note nela Bìblia de Stùdio in portoghese.

6. Come che pregar par i altri pol cambiar quel che sentimo? (1 Piero 3:8)

⁶ Pregar par i altri ne giuta a gaver de pi “compassion”. (Ledi 1 Piero 3:8.d) Una persona che la ga compassion la resta disgustada de veder el sofrimento dei altri, ma anca la ga una forte voia de giutarli. (Mar. 1:40, 41) Un ansiano de nome Michael el ga dito: “Quando mi prego par i altri, son bon de restar pi atento a quel che i ze drio infrontar e el me amor par lori el resta pi forte. Me sento pi darente de questi fradei, anca se lori gnanca no i sa.” Un ansiano de nome Richard el ga dito: “Quando noantri preghemo par qualchedun, l’è pi fàcile che dopo femo qualcossa par giutarlo. E quando preghemo par un fradel, e dopo femo qualcossa par lu, l’è come se deventessino una risposta ala nostra pròpia orassion.”

7. Come che pregar par i altri ne giuta veder i nostri problemi dela maniera giusta? (Filipensi 2:3, 4) (Varda anca la ilustrassion.)

⁷ Pregar par i altri ne giuta a veder i nostri problemi dela maniera giusta. (Ledi Filipensi 2:3, 4.e) Tuti noantri infrontemo dificoltà parché vivemo nel mondo de Sàtana. (1 Gio. 5:19; Apo. 12:12) Ma sempre pregar par i altri pol giutarne. Parché? Parché noantri se ricordemo “che tuta la nostra fameia de fradei nel mondo la ze drio passar par i medèsimi sofrimenti”. (1 Pie. 5:9) Una pioniera de nome Katherine la ga dito: “Pregar par i altri me giuta a no pensar sol nei me problemi, parché me ricordo che anca i me fradei i ze drio infrontar dificoltà.”

I NOSTRI FRADEI I GA DE BISOGNO DELE NOSTRE ORASSION

8. Par chi che podemo pregar? Parla de arquanti esempi.

⁸ Noantri podemo pregar par i nostri fradei che i ze maladi, par i gióveni che i infronta problemi nela scola, par quei che i ze drio vegner veci e par quei che i sofre perseghission dela fameia o del governo. (Mat. 10:18, 36; Ati 12:5) Podemo anca pregar par i fradei che i ga bio de assar indrio la so casa e ndar de star in nantro paese par causa dela violensa o par quei che i ze drio tribolar par causa de una desgràssia dela naturesa. L’è vera che no cognossemo tuti questi fradei, ma quando preghemo par lori, obedimo al comandamento de Gesù de ‘amar un al altro’. — Gio. 13:34.

9. Parché che ghemo de pregar par i fradei che i tende dela organisassion e par le so done?

⁹ Podemo anca pregar par quei che i giuta a tender dela organisassion e dele congregassion. Par esémpio, podemo domandar che Geovà el giute i fradei del Corpo Governante e i so assistenti, fradei dele Comission de Filiai, i superintendenti in Betel, i superintendenti de sircuito, i ansiani e i servi ministeriai. Questi fradei i ga i so problemi e le so preocupassion, ma i fà el so meio par tender de noantri. (2 Cor. 12:15) Par esémpio, un superintendente de sircuito de nome Mark el ga dito: “La roba pi fadiga par mi la ze star distante dei me genitori. Lori i ze belche veci e tuti i due i ze maladi. Anca se me sorela e so omo i ze drio tenderli, mi resto disgustà de no star pi darente par giutarli.” Anca se no savemo tuto quel che questi fradei i ze drio infrontar, podemo domandar che Geovà li giute. (1 Tes. 5:12, 13) Podemo anca pregar par le so done che sempre li giuta a far i so laori nela congregassion.

10-11. Sarà che Geovà el resta contento quando domandemo che el giute tuti questi fradei? Spiega.

¹⁰ Come ghemo belche visto, podemo pregar par tuti i fradei che i ze drio infrontar dificoltà. Podemo anca domandar aiuto par i fradei che i ze in preson e par i fradei che i ze drio sofrir par causa dela morte de qualchedun che i amea. Un fradel de nome Donald el ga dito: “Ghen’è tanti fradei e sorele che i ze drio infrontar brute dificoltà. Par quela che, dele volte, noantri femo una orassion che la ze come una ombrela che la querde tante persone, o sia, la nostra orassion pol giutar tanti fradei nte un colpo sol.”

¹¹ Sarà che Geovà el resta contento quando domandemo che el giute tuti questi fradei? Sicuro che si! Noantri no savemo quel che cada fradel o sorela infronta nela so vita. Alora, l’è bon che domandemo che Geovà el giute a tuti lori. (Gio. 17:20; Efe. 6:18) Cossita, mostremo che ghemo amor par tuta la nostra ‘fameia de fradei’. — 1 Pie. 2:17.

PREGA PAR UN FRADEL CHE L’È DRIO TRIBOLAR

12. Come che star atenti a quel che i fradei i ze drio infrontar ne giuta?

¹² Stà atento a quel che i fradei i ze drio infrontar. L’è anca importante che noantri preghemo par un fradel o una sorela che l’è drio infrontar una dificoltà. Par esémpio, ghen’è qualchedun nela to congregassion che ga una bruta malatia? O cognossito un gióveno che l’è desanimà par causa de quel che l’è drio infrontar nela scola? O fursi te cognossi un pare o una mare che l’è drio tribolar par slevar lu lu sol el so fiol e par insegnarghe sora Geovà? (Efe. 6:4) Quando te stè atento a quel che i to fradei i ze drio infrontar, te ndarè capir quel che lori i ze drio sentir e te gavarè pi voia de pregar par lori.f — Rom. 12:15.

13. Cossa che podemo far par pregar par fradei che no cognossemo mia?

¹³ Quando te preghi, parla el nome dei fradei. Noantri podemo far cossita, anca se no li ghemo mai cognossesti. Par esémpio, noantri podemo parlar el nome dei fradei e sorele che i ze in preson nela Crimea, Eritrea, Rùssia e Singapura. Podemo catar el nome de questi cari fradei e sorele nel site jw.org.g Un superintendente de nome Brian el ga dito: “Me piase scriver do el nome dei fradei che i ze in preson e dirghelo in voce alta. Cossita, son pi bon de ricordarme dei so nomi quando fao le me orassion.”

14-15. Come che podemo pregar par quel che i fradei i ga pròpio de bisogno?

¹⁴ Pensa quel che un fradel fursi el ga de bisogno e domandelo a Geovà. Michael, che ghemo parlà prima, el ga dito: “Quando mi ledo nel jw.org quel che l’è drio suceder coi fradei che i ze in preson, mi proo pensar in quel che mi sentiria se fusse in quela situassion. Son sicuro che restaria tanto preocupà cola me dona e volaria che qualchedun la tendesse ben. Cossita, son pi bon de saver cossa dir quando prego par i fradei che i ze in preson.” — Ebr. 13:3.

¹⁵ Proa ancora pensar come l’è la vita de un fradel che l’è in preson. Te pol pregar che i polissiai che i laora in quela preson i mostre bontà al nostro fradel e che le autorità lo asse adorar a Geovà. (1 Tim. 2:1, 2) Te pol anca domandar che i fradei dela so congregassion i impare del so bel esémpio e che quei che no i ze Testimònie de Geovà i veda come lu l’è leal e i gàpia voia de scoltar le bone notìssie. (1 Pie. 2:12) Te pol far cossita quando te preghi par fradei che i ze drio infrontar altre dificoltà. Quando stemo atenti ai nostri fradei, parlemo del so nome nele nostre orassion e domandemo che Geovà el giute in quel che lori i ga de bisogno, mostremo che ghemo tanto ‘amor intrà de noantri’. — 1 Tes. 3:12.

LA MANIERA GIUSTA DE VEDER LE ORASSION

16. Cossa che ghemo de ricordarse sora le nostre orassion? (Mateo 6:8)

¹⁶ Come ghemo visto, le nostre orassion pol giutar tanto le persone. Ma ghemo de ricordarse che, quando preghemo a Geovà, no semo drio contarghe una roba che lu no’l sa gnanca no semo drio darghe consili de cossa lu el ga de far. Geovà el sa de quel che i so servi i ga de bisogno vanti de lori o de noantri nicorderse. (Ledi Mateo 6:8.h) Alora, parché che ne ocore pregar par i altri? Ghemo belche visto che Geovà ghe piase scoltar le nostre orassion. E quando preghemo par i nostri fradei, mostremo che se preocupemo con lori e li amemo. Geovà el resta tanto contento quando el vede che i so fioi i proa mostrar amor come lu.

17-18. Parla de una ilustrassion che mostra parché che l’è importante pregar par i altri.

¹⁷ Anca se ne par che le nostre orassion no le ze drio giutar i fradei, le mostra che ghe volemo ben. Geovà el resta contento de veder che se preocupemo coi nostri fradei. Pensemo nte una ilustrassion. Metemo dir che una fameia la ga un toseto e una toseta. Quel toseto l’è tanto malà. Alora, la toseta la domanda a so pare: “Pupà, fà qualcossa par giutar me fradel che l’è tanto malà.” Sicuro che el pare ghe vol tanto ben a so fiol e el ga belche fato quel che ghe ocore par tenderlo. Ma pensa che contento che lu el resta de veder che so fiola ghe vol tanto bel al so fradel e che ghe domanda de giutarlo.

¹⁸ Geovà el vol che tendemo un dei altri e che preghemo par i nostri fradei e sorele. Quando femo cossita, mostremo che li amemo, e Geovà mai el ndarà desmentegarse de quel che femo. (2 Tes. 1:3; Ebr. 6:10) E come ghemo visto, pol esser che Geovà fin el ndarà far quel che ghe domandemo in orassion. Alora, ghemo sempre de pregar par i altri!