Impara a pregar a Geovà de tuto el to cuor

1-2. (a) Parché che fursi ne fà fadiga parlar a Geovà tuto quel che sentimo? (b) Come che savemo che Geovà l’è atento ale nostre orassion?

PÉNSITO che, quando te preghi a Geovà, te parli sempre la stessa roba e che no te sì mia bon de parlar pròpio quel che te senti? A tuti noantri pol suceder una roba cossita parché ghemo massa robe de far e dele volte femo sol orassion svelte. O fursi te fà fadiga parlar a Geovà sora i to sentimenti parché te pensi che no te mèriti pregar a lu.

² La Bìblia la dise che Geovà l’è atento a quei che i prega a lu e che lu scolta “la orassion dei ùmili”. (Sal. 10:17) Geovà el ga caro de scoltarne quando preghemo a lu con umiltà e de tuto el cuor. No importa le parole che doperemo, lu el scolta tuto quel che ghe disemo parché el ne vol tanto ben. — Sal. 139:1-3.

3. Cossa che ndaremo imparar in questo stùdio?

³ Alora, fursi te te domandi: ‘Parché no me ocore gaver paura de pregar a Geovà? Come che le me orassion le pol far la me amicìssia con Geovà cada volta pi forte? Come che le orassion dela Bìblia le pol giutarme e cossa che posso far se go massa pensieri e l’è fadiga parlar quel che son drio sentir?’ Ndemo risponder a queste domande.

NO STÀ MAI TIRARTE INDRIO DE PREGAR A GEOVÀ

4. Cossa che pol giutarne a domandar el aiuto de Geovà? (Salmo 119:145)

⁴ Quando se ricordemo che Geovà l’è un caro amigo e che el vol el nostro meio, gavaremo voia de domandar el so aiuto. El scritor del Salmo 119 el ga fato pròpio cossita. Lu el gavea tanti problemi, el se sentia desanimà par via dei so sbali e arquante persone le ga dito busie sora lu. (Sal. 119:5, 23, 69, 78) Ancora cossita, lu no’l se ga tirà indrio de pregar a Geovà e de verder el so cuor. — Ledi Salmo 119:145.a

5. Parché che mai ghemo de assar che i bruti sentimenti che ghemo sora noantri stessi i ne intrighe de pregar a Geovà? Parla de un esémpio.

⁵ Geovà el vol scoltar le orassion de tuti, fin de quei che i ga fato bruti sbali. (Isa. 55:6, 7) Alora, mai ghemo de assar che i bruti sentimenti che ghemo sora noantri i ne intrighe de pregar a Geovà. Come cossita? Proa pensar in quel che sucede con un piloto de avion. Lu el sa che, se ghe ocore, lu el pol domandar el aiuto de altre persone quando lu l’è drio zolar. Alora se el piloto el fesse un sbàlio o el fusse perso, sarà che lu el gavaria vergogna de domandarghe aiuto? Dela stessa maniera, se noantri femo un pecato o ghemo de far una dessision importante, podemo domandar che Geovà el ne giute. — Sal. 119:25, 176.

COSSA CHE POL GIUTARTE A PARLAR TUTO QUEL CHE TE SENTI?

6-7. Come che pensar sora le qualità de Geovà pol giutarte a parlarghe tuto quel che te senti? Parla de un esémpio. (Varda anca la nota.)

⁶ Quando te preghi a Geovà e te parli tuto quel che te pensi e te senti, la to amicìssia con lu la restarà ancora pi forte. Ma cossa che pol giutarte a pregar cossita?

⁷ Pensa nele bele qualità de Geovà.b Quanto de pi te pensi sora le qualità de Geovà, pi fàcile sarà parlarghe sora quel che te pensi e sora i to sentimenti. (Sal. 145:8, 9, 18) Varda quel che ga sucedesto con una sorela de nome Kristine. Come so pare l’era tanto rugno, la fea fadiga pregar a Geovà e vederlo come un Pare che ghe vol ben. Kristine la ga dito: “Mi pensea che Geovà el ndaria abandonarme par causa dei me sbali.” Ma cossa che la ga giutada? Ela la ga dito: “Pensar sora el amor leal de Geovà me ga giutà a veder che lu el me amea. Adesso, son sicura che Geovà sempre el sarà dela me banda. Anca se fao un sbàlio, lu el seitarà a amarme e el ndarà giutarme. Capir el amor de Geovà me giuta a parlar a lu sora tuto quel che me assa contenta o disgustada.”

8-9. Parché che l’è bon pensar in quel che ndaremo parlar a Geovà prima de pregar? Parla de un esémpio.

⁸ Pensa in quel che te ndarè parlar. Prima de pregar, te pol farte arquante domande. Par esémpio: ‘Che dificoltà son drio infrontar adesso? Go bisogno de domandar el aiuto de Geovà par darghene fora con qualche problema? Sarà che me ocore perdonar qualchedun?’ (2 Rè 19:15-19) E ricòrdate de far come Gesù e pregar sora el nome de Geovà, sora el so Regno e sora la so volontà. — Mat. 6:9, 10.

⁹ Varda quel che ga sucedesto con una sorela de nome Aliska. Ela la fea fadiga pregar a Geovà dopo che la ga savesto che el so omo el gavea càncaro nel sarvel e che lu el ndaria morir. Ela la ga dito: “Son restada tanto disgustada che no savea gnanca sora cossa parlar a Geovà.” Cossa che la giuta? Aliska la ga dito: “Prima de pregar, mi proo pensar in altre robe che posso parlar a Geovà, invesse de parlar sol de mi e dela malatia del me omo. Questo me giuta a restar pi calma e a parlar con Geovà sora tante robe.”

10. Parché che l’è bon torse tempo par pregar? (Varda anca la ilustrassion.)

¹⁰ Sfòrsate par torte el tempo par pregar. Anca quando te fè orassion pi svelte, te pol far pi forte la to amicìssia con Geovà. Ma sarà pi fàcile verder el to cuor e parlar dei to sentimenti se te fè orassion pi longhe.c Elijah, el so omo de Aliska, el ga dito: “Mi proo pregar tante volte al giorno. Ma, torme un bon tempo par pregar ga fato la me amicìssia con Geovà ancora pi forte. Mi sò che Geovà el vol scoltar tuto quel che mi digo. Alora, quando prego, ghe meto el tempo che me ocore.” Cossa che te pol far? Proa catar un posto tranquilo e sfòrsate de torte un bon tempo par pregar. Te pol parlar con Geovà in voce alta e proa far questo tuti i giorni.

PENSA SORA LE BELE ORASSION DELA BÌBLIA

11. Come che pensar sora le bele orassion che le ze scrite nela Bìblia pol giutarte? (Varda anca el quadro “Anca ti te te senti cossita?”)

¹¹ Sarà tanto bon par ti leder sora le bele orassion e sora arquanti salmi che i ze nela Bìblia. Imparar sora come i servi de Geovà del passà i ga parlà sora i so sentimenti ndarà giutarte a parlar sora i to sentimenti. Te ndarè anca imparar arquante bele parole che te pol doperar par lodar a Geovà quando te preghi. E pol esser che te ndarè catar orassion de tanti servi de Geovà che i ga bio le medèsime dificoltà e sentimenti che ti.

12. Cossa che te pol domandarte intanto che te ledi una orassion che la ze nela Bìblia?

¹² Intanto che te ledi una orassion che la ze scrita nela Bìblia, te pol domandarte: ‘Chi che ga fato questa orassion e cossa l’era drio suceder nela so vita? Sarà che anca mi go pensieri cossita? Cossa che posso imparar con questa orassion?’ Pol esser che te tocarà studiar de pi par risponder a queste domande, ma te pol esser sicuro che te piaserà tanto. Ndemo veder arquanti esempi.

13. Cossa che te pol imparar sora la orassion che Ana la ga fato? (1 Samuel 1:10, 11) (Varda anca la ilustrassion dela prima pàgina.)

¹³ Ana la era drio infrontar due bruti problemi quando la ga fato la orassion che ledemo in 1 Samuel 1:10, 11. (Ledi.d) Ela no la podea gaver fioi e quel’altra dona del so omo la tratea tanto mal. (1 Sam. 1:4-7) Se fà tanto tempo che te ghè un problema, te pol imparar tanto cola orassion de Ana. Ela la se ga tolto tempo par pregar a Geovà e la ga parlà sora tuto quel che la era drio sentir. (1 Sam. 1:12, 18) Anca ti te podarè sentirte tanto meio quando te ‘buti la to carga sora Geovà’, o sia, quando te parli a lu sora tuti i to pensieri. — Sal. 55:22.

14. (a) Che nantra roba te pol imparar col esémpio de Ana? (b) Parché che leder la Bìblia e pensar sora pol giutarte a saver cossa parlar nele to orassion? (Varda la nota.)

¹⁴ Poco tempo dopo che Samuel l’è nassesto, Ana lo ga portà fin Eli, el Sasserdote Prinsipal. (1 Sam. 1:24-28) Ela la ga fato una bela orassion a Geovà par ringrassiarghe parché la ga visto come che lu el tende dei so servi.e (1 Sam. 2:1, 8, 9) L’è vera che ancora la gavea problemi casa, ma adesso la era atenta a quel che Geovà el ghe gavea dato. Cossa che te pol imparar? Sarà pi fàcile par ti seitar fedele anca cole dificoltà, se te seiti atento a come che Geovà l’è drio giutarte.

15. Cossa che podemo imparar dela orassion che Geremia el ga fato? (Geremia 12:1)

¹⁵ Ledi Geremia 12:1.f Geremia el se ga sentio tanto disgustà quando ghe parea che i rugni i ndea tanto ben. Lu anca el se ga sentio desanimà parché arquanti israeliti lo tolea in giro. (Ger. 20:7, 8) Pol esser che te capissi i sentimenti de Geremia quando i altri i te tol in giro o quando te par che no sucede gnente de rugno con quei che i fà robe sbaliade. Ma quel che Geremia el ga fato ne insegna una roba importante. Lu el ga parlà a Geovà sora i so sentimenti, ma mai el ga dito che lu no l’era drio far giustìssia. E, quando el ga visto che lu el ga castigà quei che i fea robe sbaliade, el se ga fidà ancora de pi che Geovà l’è giusto. (Ger. 32:19) Anca ti te pol parlar a Geovà che te resti disgustà de veder quel che le persone rugne le fà, ma te pol mostrar che te te fidi che lu el ndarà finir con tuto quel che l’è sbalià nela ora giusta.

16. Cossa che podemo imparar dela orassion del levita che el ga scrito el Salmo 42:1-4? (Varda anca la ilustrassion.)

¹⁶ Ledi Salmo 42:1-4.g Questo Salmo l’è stà scrito par un levita che no’l podea mia ndar fin al témpio par adorar a Geovà insieme a altri israeliti. Le so parole le mostra come che lu el se sentia. Pol esser che anca ti te te senti cossita se no te pol mia ndar via de casa parché te sì malà o se te sì in preson par causa dela to fede. Se te sì drio infrontar brute dificoltà, pol esser che una ora te sì contento e de colpo te resti disgustà. Ma questo salmo el insegna che el importante l’è che te seiti a pregar a Geovà e a parlar sora i to sentimenti. Come cossita? Quel levita el ga visto che ancora el gavea tante oportunità par lodar a Geovà. (Sal. 42:5) Lu anca el ga pensà sora come Geovà l’era drio tenderlo. (Sal. 42:8) Dela medèsima maniera, proa domandar che Geovà el te giute a capir i to sentimenti, a restar calmo e a seitar a perseverar.

17. (a) Cossa che podemo imparar dela orassion de Giona? (Giona 2:1, 2) (b) Parché che l’è bon ricordarse de arquanti salmi quando semo drio infrontar bruti colpi? (Varda la nota.)

¹⁷ Ledi Giona 2:1, 2.h El profeta Giona el ga fato questa orassion quando l’era rento la pansa de un grando pesse. Ancora che Giona no’l gavesse obedio a Dio, lu l’era sicuro che el ndaria scoltarlo e giutarlo. Giona el cognossea tanto ben el libro dei Salmi, parché nela so orassion, lu el ga doperà arquante parole che ledemo in questo libro.i Pensar sora questi versi lo ga giutà a ricordarse che Geovà el ndaria giutarlo. Dela stessa maniera, se te te sforsi de tegner in mente arquanti versìcoli dela Bìblia, lori i te giutarà a gaver calma quando te sì drio infrontar bruti colpi.

SEITA A PREGAR PAR ESSER CADA VOLTA PI AMIGO DE GEOVÀ

18-19. Come quel che l’è scrito in Romani 8:26, 27 pol giutarte quando no te sè mia cossa parlar a Geovà in orassion? Parla de un esémpio.

¹⁸ Ledi Romani 8:26, 27.j Pol esser che dele volte te ghè massa pensieri e te fà fadiga parlar a Geovà sora i to sentimenti. Ma te pol ricordarte de che in situassion cossita el spìrito el pol “parlar par ti”. Come cossita? Par meso del so spìrito santo, Geovà el ga doperà arquanti dei so servi par scriver tante orassion nela Bìblia. Alora, quando no te sè come parlar a Geovà sora i to sentimenti o cossa domandarghe, lu el ciapa una de quele orassion come se la fusse toa e el ndarà risponderte.

¹⁹ Pensar cossita ga giutà tanto una sorela dela Rùssia de nome Yelena. Ela la ze stata metesta in preson parché la era drio pregar e leder la Bìblia. Ela la ga sofrio tanto che la fea fin fadiga pregar. Yelena la ga dito: “Me go ricordà che quando go massa pensieri e no sò gnanca cossa parlar a Geovà, lu el pol acetar le parole dei so servi del passà . . . come se le fusse le me parole. . . . Questo me ga consolà e me ga giutà tanto quando go infrontà bruti colpi.”

20. Quando te ghè massa problemi, cossa che te pol far vanti de pregar?

²⁰ Se te ghè massa problemi, pol esser che te pensi nte una mùcia de robe intanto che te sì drio pregar. Alora, cossa che te pol far prima de pregar? Proa leder arquanti tocheti del libro dei Salmi in alta voce. Te pol anca scriver do i to sentimenti, compagno el rè Davi el ga fato. (Sal. 18, 34, 142; quel che l’è scrito vanti dei capìtoli.) No ghemo mia una règola de cossa ghemo de far prima de pregar a Geovà. (Sal. 141:2) Alora, te pol pareciarte par pregar dela meio maniera par ti.

21. Parché che podemo pregar a Geovà de tuto el cuor?

²¹ Sicuro che te resti tanto contento de saver che Geovà el capisse i to sentimenti ancora vanti che te parli qualcossa. (Sal. 139:4) Ma a lu ghe piase tanto quando te mostri che te te fidi in lu e te parli sora i to pensamenti e sentimenti. Par quela, no stà mai tirarte indrio de pregar a Geovà. Seita a imparar cole bele orassion che le ze scrite nela Bìblia. Sfòrsate de pregar de tuto el to cuor, de parlar sora quel che te fà contento e sora quel che te assa disgustà. Sìpia sicuro che Geovà l’è un vero Amigo e che sempre el sarà dela to banda par giutarte!