Chi che l’è el anticristo?
La risposta dela Bìblia
El anticristo no l’è sol una persona, un grupo de persone o una organisassion. La Bìblia la dise che ghen’è ‘tanti anticristi’. (1 Gioani 2:18) La parola “anticristo” la vien del greco e la vol dir “contra (o nel posto de) Cristo”. Alora, el “anticristo” l’è qualche persona che:
No la aceta che Gesù l’è el Cristo (Messia) o che lu l’è el Fiol de Dio. — 1 Gioani 2:22.
La va contra el Cristo, el Untà de Dio. — Salmo 2:1, 2; Luca 11:23.
La fà finta de esser el Cristo. — Mateo 24:24.
La perseghe i seghidori de Cristo, parché Gesù el ga dito che quel che le persone le fà ai so seghidori l’è come se le fusse drio farghe a lu. — Ati 9:5.
La dise che la va drio a Cristo, ma la fà quel che l’è sbalià e la imbroia i altri. — Mateo 7:22, 23; 2 Corinti 11:13.
La Bìblia la dise che le persone che le fà queste robe le ze anticristi, ma anca la parla de queste persone come parte de un grupo, che la ciama de “el anticristo”. (2 Gioani 7) El anticristo el ga capità nela època dei apòstoli, e el esiste fin ancoi. La Bìblia belche la disea che questo ndaria suceder. — 1 Gioani 4:3.
Come saver chi che i ze anticristi
Lori i parla busie sora Gesù. (Mateo 24:9, 11) Par esémpio, lori i insegna la Trinità, o che Gesù l’è el Dio Tuto Poderoso. Ma, in verità, questo insegnamento el va contra quel che Gesù el ga insegnà, parché el ga dito: “El Pare l’è pi grando de mi”. — Gioani 14:28.
I anticristi no i aceta quel che Gesù el ga dito sora come el Regno de Dio el laora. Par esémpio, arquanti lìderi religiosi i dise che Cristo el governa par meso dei governi umani. Ma questo va contra quel che Gesù el ga dito: “El me Regno no’l fà parte de questo mondo”. — Gioani 18:36.
I dise che Gesù l’è so Signor, ma no i obedisse ai so comandamenti, come quel de predicar le bone notìssie del Regno. — Mateo 28:19, 20; Luca 6:46; Ati 10:42.