I GIÓVENI I DOMANDA
Cossa che le me robe de vestir le mostra sora mi?
Le to robe de vestir le mostra come che ti te si. Cossa che i altri i pensa dela to maniera de vestirse?
Tre sbali che le persone le fa e come no farle
Sbàlio: Vestirse compagno le persone dela television e dela internet.
Una gióvena, che la ga nome Theresa, la ga dito: “Dele volte me piase de una roba de vestir sol parché vedo tante propagande de persone che le se veste cossita. Quando vedemo tante persone che le se veste dela medèsima maniera, anca noantri volemo vestirse compagno.”
El libro Guia Completo para Criar Meninos Adolescentes (in inglese), el dise che le tosete e anca i tosatei i vol far compagno a quel che i vede. Par quela, tante propagande le ze fate par i tosatei ancora quando i ze ciei.
La meio scòlia: La Bìblia la dise: “El bauco el crede in tuto quel che i ghe dise, ma el sàbio el pensa ben vanti de far qualcossa.” (Proverbi 14:15) Questo testo el ne dise che ghe toca pensar ben par capir cossa che una propaganda la dise. Par esémpio, se la dise che l’è bel una roba de vestir che la mostra massa el to corpo, te pol domandarte:
‘Chi che ndarà guadagnar i soldi?’
‘Se mi meto su una roba cossita, cossa che le persone le ndarà pensar sora mi?’
‘Questa roba la ze de acordo cola me maniera de viver?’
Proa far cossita: Par una stimana, proa star atento a quel che la television e le internet le parla sora la moda. Coma che la ze la vita dele persone che le veste quele robe? Sarà che la propaganda la vol farte pensar che te ghè de vestirse compagno? Una gióvena de nome Karen la ga dito: “Tuti i dise che ghemo de esser bei, gaver le robe e el corpo perfeto. E quei che i fa propagande i sa che l’è fàcile imbroiar i gióveni.”
Sbàlio: Vestirse de una maniera sol par assar i altri contenti.
Un gióveno che el ga nome Manuel el ga dito: “Se una roba de vestir la ze ntela moda, tuti i vol vestirse cossita. Le persone le assa de banda quei che no i se veste de questa maniera.” Una gióvena de nome Anna la ga dito: “El pi importante no l’è gaver le robe dela moda, ma si contentar i altri.”
La meio scòlia: La Bìblia la dise: “Ferméve de esser moldadi de acordo con questo mondo.” (Romani 12:2) Pensa in questo consìlio e domandate:
‘Cossa che mi penso quando vao scòlier una roba de vestir?’
‘L’è importante par mi gaver robe de vestir de marca?’
‘Sarà che proo farme veder cole me robe de vestir?’
Proa far cossita: No stà pensar che sol te pol far queste due robe: o te sì ntela moda e te contenta i altri o te ghè brute robe e i altri i te assarà de banda. Invesse, te pol doperar una roba de vestir che te piase e che te te senti ben. Cossita, no te ndarè preocuparte con quel che i altri i pensa dele to robe de vestir.
Sbàlio: Pensar che quanto de pi te mostri el to corpo l’è meio.
Una gióvena de nome Jennifer la ga dito: “Dele volte mi go voia de vestir una roba pìcola, pi curta e pi tacada nel me corpo.”
La meio scòlia: La Bìblia la dise: ‘Quel che te fà bela no’l ga de esser quel che se vede de fora. Invesse le qualità che no le se smarsisse e che te ghè par rento nel cuor.’ (1 Piero 3:3, 4) Dopo de questo consìlio, domandate: Cossa che l’è meio, le persone catar che mi son bel o che le vol esser me amighe par causa dele me qualità?
Proa far cossita: La meio roba de vestir la ze quela che la mostra rispeto. Ma ancoi, le persone no le pensa de questa maniera. Alora, proa pensar:
“Gheto belche sciacolà con una persona che la parla massa e che la parla sol de sì stessa? Restemo stufi con una persona cossita e pol esser che gnanca la sàpia che la ze drio sgionfarne!
Una persona che la dopera robe massa tacade o che la vol farse veder la ze compagna a una persona che la parla sol de si stessa
La persona che la veste robe che la mostra massa el so corpo e che la vol farse veder, la ze compagna a quei che i parla massa de si stessi. I altri i pol pensar che ela la ze drio dir: ‘Vardé, mi son qua!’ Lori anca i pol pensar che questa persona no la sà cossa far, che la pensa sol in si stessa, che la vol farse veder o che le vol far qualcossa sbaliada.
Invesse, te pol vestirse de una maniera che la mostra rispeto. Cossita, nissuni i ndarà pensar cose sbaliade sora ti. Una gióvena che la ga nome Monica la ga dito: “Vestirse de una maniera che mostra rispeto par i altri e par sì stesso no vol mia dir che te sì drio vestir le robe dela to nona.”