Cossa che l’è professia?

La risposta dela Bìblia

Professia l’è un messàgio che vien de Dio e che mostra quel che el pensa e quel che el vol. La Bìblia la dise che i profeti “i ga parlà dela parte de Dio intanto che el spìrito santo li guidea”. (2 Piero 1:20, 21) Alora, un profeta l’è una persona che riceve el messàgio de Dio e lo parla ai altri. — Ati 3:18.

Come che Dio el ga passà el so messàgio ai profeti?

Dio el ga fato i profeti saver i so pensamenti de arquante maniere:

• Par meso dela scrita. Una volta che Dio el ga doperà questa maniera l’è stà quando lu el ga scrito i Diese Comandamenti in tole de sasso e le ghe ga dato a Moisè. — Ésodo 31:18.

• Par meso de àngeli. Par esémpio, Dio el ga doperà un àngelo par dirghe a Moisè cossa che lu el gavea de parlar a Faraò. (Ésodo 3:2-4, 10) Quando ghe volea, Dio el doperea àngeli par dir parola par parola quel che el volea passar ai profeti. Par esémpio, una volta Moisè el ga ricevesto una òrdine: “Te ghè de scriver queste parole, parché de acordo con queste parole fao un acordo con ti e con Israel.” — Ésodo 34:27.a

• Par meso de vision. Dele volte, Dio el dea vision ai so profeti intanto che lori i era desmissiadi. (Isaia 1:1; Abacuche 1:1) Arquante volte, queste vision fin ghe parea de verità par la persona che la ricevea. (Luca 9:28-36; Apocalisse 1:10-17) Altre volte, queste vision le vegnea quando la persona no la savea cossa l’era drio suceder intorno de ela. (Ati 10:10, 11; 22:17-21) Dio anca el passea el so messàgio par meso de insogni quando el profeta l’era drio dormir. — Daniel 7:1; Ati 16:9, 10.

• Par meso de pensamenti. Dio el ga metesto nela mente dei profeti el so messàgio. Par quela che la Bìblia la dise: “Tuta la Scritura la ze ispirada par Dio.” La spression “ispirada par Dio” anca la pol esser tradusida come “sufiada par Dio”. (2 Timòteo 3:16; Novo Testamento Interlinear) Dio el ga doperà el so spìrito santo, o sia, la so forsa, par come che sufiar le so idee nela mente dei so servi. El messàgio l’era de Dio, ma i profeti i podea scòlier le parole che i ndea scriver. — 2 Samuel 23:1, 2.

Tute le professie le parla sora el futuro?

Nò. Le professie dela Bìblia no le ze sol par parlar quel che ndarà suceder. Ma ghen’è tanti dei messagi de Dio che i ze sora el futuro. Par esémpio, i profeti de Dio i ga avisà i israeliti tante volte che, se lori i seitesse a far robe rugne, ghe sucederia robe brute. Ma se i fesse robe bone, i gavaria tante benedission. (Geremia 25:4-6) El resultà l’era de acordo con quel che i israeliti i scoliea far. — Deuteronómio 30:19, 20.

Esempi de professie dela Bìblia che no le era sora el futuro

• Una volta, quando i israeliti i ga domandà aiuto a Dio, lu el ga mandà un profeta spiegarghe che lu no li gavea giutà parché lori no i ga obedio a Dio. — Giuisi 6:6-10.

• Gesù el ga parlà con una dona samaritana sora quel che la gavea fato nel passà. Lu mai gavaria savesto queste robe se no fusse par meso del poder de Dio. Cossita, ela la ga capio che Gesù l’era un profeta, anca se lu no’l gavesse dito gnente sora el futuro. — Gioani 4:17-19.

• Nel giulgamento de Gesù, so nemighi i ghe ga querto la fàcia, ghe ga dato bote e i ghe ga dito: “Va, profetisa! Chi che te ga dato bote?” Lori no i era drio domandar che Gesù el fesse una professia sora el futuro. Ma par dirghe, par meso del poder de Dio, chi che ghe ga batesto in fàcia. — Luca 22:63, 64.