Cossa che le Testimònie de Geovà le pensa sora funerai?
Quel che pensemo sora funerai vien dela Bìblia. Varda quel che la insegna sora questo assunto:
L’è normal restar tristi quando more qualchedun che amemo. Par esémpio, i dissìpoli de Gesù i ga piandesto e i ze restadi tanto tristi quando le ze morte persone che lori i amea. (Gioani 11:33-35, 38; Ati 8:2; 9:39) Par quela, no vedemo un funeral come una ora par far festa. (Eclesiasti 3:1, 4; 7:1-4) Invesse, l’è una ora par mostrar amor e consolar i altri. — Romani 12:15.
I morti no i sà gnente. No importa la nostra cultura o de ndove semo vegnesti, noantri no femo gnente che vegna dela credensa che i morti i ze vivi in nantro posto o che i pol farne ben o mal. (Eclesiasti 9:5, 6, 10) Par esémpio, no femo selebrassion par darghe onor ai morti, gnanca sacrifissi par lori, gnanca proemo parlar con lori o domandarghe qualcossa de far. Noantri no partissipemo de questi costumi parché obedimo a questo comandamento dela Bìblia: “Ndé via de in meso de lori . . . e fermeve de tocar in cose sporche”. — 2 Corinti 6:17.
Ghen’è una speransa par i morti. La Bìblia la insegna che ghen sarà una ressuression e che no ghen sarà pi la morte. (Ati 24:15; Apocalisse 21:4) Questa speransa la ga giutà tanti cristiani nel passà e anca ne giuta ancoi a no restar massa tristi e gnanca ndar drio a costumi che no ghe piase a Dio. — 1 Tessalonissensi 4:13.
No volemo farse veder. Noantri no vedemo i funerai come una oportunità de mostrar che ghemo soldi. (1 Gioani 2:16) No femo funerai che costa tanto par far festa cole persone. Gnanca li femo con cassoni massa cari o drio vestir robe che costa tanti soldi sol par sprosiarse.
No proemo obrigar nissuni a acetar le nostre credense sora funerai. Ndemo drio al prinsìpio: “Cada un de noantri el ga de risponder a Dio par quel che el fà”. (Romani 14:12) Ma quando ghemo la oportunità, proemo spiegar quel che credemo ‘con bontà e tanto rispeto’. — 1 Piero 3:15.
Come che l’è un funeral de una Testimònia de Geovà?
Posto: Una fameia la pol far un funeral nte un Salon del Regno, una funerària, una casa, un crematòrio o un semitèrio.
Come che l’è? Ghen’è un discorso par consolar la fameia e i amighi de quel che l’è morto. Questo discorso el spiega cossa che la Bìblia la dise sora la morte e sora la speransa dela ressuression. (Gioani 11:25; Romani 5:12; 2 Piero 3:13) Fursi quel che el fà el discorso el parla sora le qualità dela persona che la ze morta e anca sora cossa che podemo imparar del so bel esémpio de fede. — 2 Samuel 1:17-27.
Pol esser che cantemo un càntico che el parla sora la speransa dela Bìblia par quei che i ze morti. (Colossensi 3:16) Nel fin, se fà una orassion par consolar quei che i ze nel funeral. — Filipensi 4:6, 7.
Tasse o limòsine: Noantri no cobremo gnente par far una serimònia religiosa gnanca par i funerai. Gnanca tolemo su limòsine nele nostre riunion. — Mateo 10:8.
Chi che pol ndar? Compagno le nostre altre riunion, anca persone che no le ze Testimònie de Geovà le pol ndar a un funeral che l’è fato nte un Salon del Regno.
Le Testimònie de Geovà le va a funerai de altre religion?
Cada Testimònia de Geovà la pol dessider cossa far de acordo cola so cossiensa e con quel che la ga imparà dela Bìblia. (1 Timòteo 1:19) Ma noantri no partissipemo de gnanca una serimònia che la va contra quel che la Bìblia la insegna. — 2 Corinti 6:14-17.