I GIÓVENI I DOMANDA
Al esémpio de chi mi vao far compagno?
“Quando mi gavea problemi nela scola, me giutea pensar nte una persona che mi ghe volea ben e che la gavea infrontà i medèsimi problemi che mi. Alora, mi proea far compagno el so esémpio. Gaver un bon esémpio par ndarghe drio me ga giutà tanto a darghene fora cole dificoltà.” — Haley.
Gaver un esémpio par ndarghe drio pol giutarte a scampar via de problemi e a rivarghe ai to ogetivi. Par quela, toca scòlier un bon esémpio.
Parché che l’è importante scòlier un bon esémpio par ndarghe drio?
Parché te vè far compagno ala persona che te ghè scoliesto come esémpio.
La Bìblia la insentiva i cristiani a imparar coi boni esempi. La dise: “Quando vedé i boni resultadi par causa de quel che i fà, fé compagno ala so fede.” — Ebrei 13:7.
Proa far cossita: La persona che te scoli par ndarghe drio al so esémpio la pol farte deventar una persona meio o pedo. Alora, proa scòlier come esempi persone che le ga bone qualità, nò sol persone ben cognosseste o che le ga la medèsima età che ti.
“Mi cognosso un fradel de nome Adon. Go imparà tanto dela so maniera de far le robe. Ancora me ricordo dele robe che el disea e el fea. Lu gnanca el sà come che el me ga giutà.” — Colin.
Te vè pensar e sentir compagno ala persona che te ghè scoliesto come esémpio.
La Bìblia la dise: “No sté mia farve imbroiar. Le brute compagnie le rovina i boni comportamenti.” — 1 Corinti 15:33.
Proa far cossita: Scoli come esémpio una persona che la ga bone qualità, nò sol parché la ze bela. Senò pol esser che la persona la ndarà assarte disgustà.
“Quando te te compari con persone bele e famose, te te senti bruto e sensa importansa. Te pol fin restar massa preocupà cola to aparensa.” — Tamara.
Pensaghe sora: Parché che pol esser una tràpola scòlier persone famose come esémpio?
Quei che te scoli come esémpio pol giutarte a rivar ai to ogetivi o nò.
La Bìblia la dise: “La persona che la va con quei che i ga el saver la deventarà sàbia.” — Proverbi 13:20.
Proa far cossita: Scoli come esempi persone che le ga le bone qualità che te vol far compagno. Proa imparar con lore cossa che te pol far par rivarghe ai to ogetivi.
“Invesse de dir ‘Mi vui gaver de pi responsabilità’, te podarissi dir ‘Mi vui gaver de pi responsabilità compagno la Jane. Ela sempre la riva nela ora giusta e la tende ben dei so afari.’” — Miriam.
Conclusion: Quando te scoli un bon esémpio par ndarghe drio, te sì bon de scòlier che tipo de persona te ndarè deventar.
Sarà pi fàcile rivar ai to ogetivi se te ghè un bon esémpio par ndarghe drio!
Come scòlier un bon esémpio par ndarghe drio
Te pol farlo de due maniere.
Te pol pensar nte una qualità che te vol gaver e scòlier come esémpio una persona che la ga quela qualità.
Te pol pensar nte una persona che te vol far compagno e scòlier una qualità che ela la ga che anca ti te vol gaver.
La atività “Como escolher um bom exemplo” la pol giutarte a far cossita.
Te pol far compagno a queste persone:
Altri gióveni. “Mi vui far compagno ala me meio amiga. Anca se la ga tanto de far, sempre la se tol el tempo de mostrar interesse par i altri. Ela la ze pi gióvena de mi, ma mi vedo in ela qualità che mi no go mia. Par quela, mi vui far compagno el so esémpio.” — Miriam.
I pi veci. Pol esser i to genitori o altre persone che le ga le medèsime credense che ti. “Sicuro che i me genitori i ze bei esempi par mi. Lori i ga i so difeti, ma ancora cossita i ze persone fedele. Quando vegno granda, mi vui che le persone le parle cossita sora mi.” — Annette.
Persone dela Bìblia. “Mi go scoliesto far compagno arquante persone dela Bìblia, come Timòteo, Rute, Giò, Piero e la toseta israelita, cada un par un motivo difarente. De pi che imparo sora le persone dela Bìblia, de pi el so esémpio el me giuta. Me piase tanto studiar le stòrie del libro Imite a Sua Fé e la session “Exemplo a seguir” del libro Os Jovens Perguntam — Respostas Práticas.” — Melinda.
Proa far cossita: No stà scòlier sol un esémpio par ndarghe drio. El apòstolo Paolo el ga dito ai cristiani: “Vardé quei che i fà le robe de una maniera che la ze de acordo col esémpio che noantri ve gavemo dato.” — Filipensi 3:17.
Saveito de questo? Ti te pol esser un bon esémpio par qualchedun! La Bìblia la dise: “Deventa un esémpio par i fedeli nel parlar, nela condota, nel amor, nela fede, nela castità.” — 1 Timòteo 4:12.
“Anca se te sì ancora drio sforsarse par gaver de pi bele qualità, te pol giutar i altri a esser persone meio. Mai te sè chi che l’è drio vardarte e gnanca come quel che te disi pol cambiar la vita de una persona.” — Kiana.