UN MONDO PIEN DE PROBLEMI

1 | Tendi dela to salute

PARCHÉ CHE L’È IMPORTANTE?

Un problema o una desgràssia pol farghe mal ala to salute de diverse maniere.

Bruti colpi i pol assar le persone massa ansiose, e quei che i resta cossita par tanto tempo i pol restar maladi pi fàcile.
Quando sucede bruti problemi, fursi i ospedai no i ga rimedi che basta e no i ze mia boni de tender de tuti.
Quando sucede una desgràssia, le persone le pol restar con pochi soldi, e cossita l’è pi fadiga gaver quel che ghe ocore, come magnar e rimedi.

Cossa che te ghè de saver?

Se te ghè una bruta malatia o massa ansietà, pol esser che te fè dessision sensa pensarghe sora. Cossita te assi de far robe che le ze bone par la to salute e la malatia la resta pedo.
Se no te vè in serca de tratamento, i to problemi de salute i pol restar pedo e te pol fin morir.
Se la to salute la ze bona, te sì pi parecià par far bone dessision ancora che te infronti problemi.
Anca se te ghè pochi soldi, ghen’è robe che te pol far par tender ben dela to salute.

Cossa che te pol far adesso?

Sempre che la pol, una persona che la ga sabedoria la pensa nei perìcoli che i pol vegner fora e la fà qualcossa par protegerse. L’è cossita anca cola nostra salute. Se mantegnemo neti noantri stessi e anca la nostra casa, semo pi protegesti contra le malatie. L’è meio tender dela salute che bever rimedi.

“Se se sforsemo par esser sempre neti e par mantegner la nostra casa neta, l’è sicuro che no ndaremo guastar tanti soldi drio i dotori e i rimedi.” — Andrè.a

a Arquanti nomi in questa revista i ze stati cambiadi.

COME CHE TE POL FAR — Arquante sugestion

Quando ghen’è dificoltà, queste robe le va giutarte a tender dela to salute

MANTÉGNATE NETO

Mantégnate neto

La Bìblia la dise: “Quel che l’è prudente el vede el perìcolo e el va sconderse.” (Proverbi 22:3) Proa pensar vanti in quel che pol suceder e star distante de quel che pol farghe mal ala to salute.

Lava sempre le man con àqua e saon, ancora de pi vanti de magnar e cosinar o dopo de ndar al bagnero.
Neta pròpio ben la to casa, ancora de pi le robe o posti ndove le persone le mete la man tante volte.
Sempre che te pol, no stà rivar massa darente de quei che i ga una malatia che passa de una persona al’altra.

MAGNA QUEL CHE L’È BON PAR LA SALUTE

Magna quel che l’è bon par la salute

La Bìblia la dise: “Gnanca un omo el ga mai odià el so pròpio corpo, ma lu lo alimenta e lo tende.” (Efesi 5:29) Mostremo che amemo el nostro corpo quando tendemo con quel che magnemo e bevemo.

Bevi tanta àqua.
Magna diversi tipi de fruti e verdure.
Proa magnar manco grasso, sal e sucro.
No stà fumar, doperar droghe o bever massa àlcol e rimedi.

“Par no restar maladi, noantri proemo sempre magnar ben. Senò, ne tocaria guastar massa dei pochi soldi che ghemo par comprar rimedi. Alora, catemo meio guastar de pi con magnar che fà ben par la salute.” — Carlo.

FÀ ESERSISSI E RIPOSA

Fà esersissi

La Bìblia la dise: “L’è meio una sbranca de descanso che due sbranche de tanto laoro e corer par ciapar el vento.” (Eclesiasti 4:6) Ne toca laorar, ma anca ne toca riposar che basta.

Movete fora. Nel scomìnsio, te pol proar ndar caminar tuti i giorni. Far esersissi pol far la to salute restar meio, anca se te sì pi vècio, se te ghè qualche defissiensa o se te ghè una malatia.
Riposa

Riposa che basta. Se te riposi poco, te restarè ansioso e no te sarè bon de consentrarte nele robe importante e, col tempo, te pol fin gaver bruti problemi de salute.
Scoli una ora che la ze bona par ndar dormir e fà come te ghè dessidio. Proa ndar dormir e levarte su tuti i giorni nela medèsima ora.
No stà assister television gnanca doperar apareli eletrònichi pena vanti de ndar dormir.
No stà magnar massa gnanca bever robe con cafeìna o àlcol vanti de dormir.

“Mi go capio che dormir ben fà tanta difarensa nela me salute. Se mi no dormo che basta, dele volte go mala testa e mal da par tuto. Quando dormo ben, me sinto come se fusse bon de far qualche roba. Go tanta forsa e l’è pi fadiga restar malà.” — Giustino.