Cossa che te pol far se te vien fora un problema de salute?

La to salute la ze restada pedo nei ùltimi giorni? Alora, te sè come un bruto problema de salute el pol assarte avelio e che far el tratamento pol costar tanto. Come che te pol darghene fora con questa situassion? Come che ti te pol giutar un parente o un amigo tuo con un bruto problema de salute? La Bìblia no la ze un libro che parla sol sora salute, ma la ga boni prinsipi che i pol giutarte a esser bon de darghene fora con questa bruta situassion.

Idee par darghene fora con un problema de salute

• Va in serca de un dotor par tratarte

  Cossa la Bìblia la dise: “Quei che i ga salute no ghe ocore de dotor, ma quei maladi, si.” — Mateo 9:12.

  Cossa imparemo: Va in serca de un dotor quando te ghè bisogno.

  Penseghe sora: Va in serca del meio tratamento che ghen’è par ti. Fursi saria meio proar parlar con altri dotori. (Proverbi 14:15) Parla tuto quel che te ocore al to dotor. Proa capir ben tuto quel che lu el te dise e parlaghe tuto quel che te sì drio sentir. (Proverbi 15:22) Proa saver de pi sora el to problema de salute e anca tuti i tratamenti che ghen’è. Quando te capissi tuto quel che te ocore, sarà pi fàcile par darghene fora coi sentimenti e anca par far bone dessision sora el tratamento.

• Fà robe bone par tender dela salute

  Cossa la Bìblia la dise: “Far esersissi l’è bon par qualcossa.” — 1 Timòteo 4:8

  Cossa imparemo: Se te fè eserssisi sempre che te pol, te gavarè una bona salute.

  Penseghe sora: Fà eserssisi sempre che te pol, magna robe che te fà ben e riposa quel che ghe vol. Fursi, ancora no te sì mia costumà col to novo problema de salute, ma i dotori i ze de acordo che l’è importante che te fè sforso par gaver pi tempo e energia par far queste robe. Cossita te gavarè una salute meio. Sicuro che ti te ndarè pensar sora el to problema de salute vanti de far qualche altre robe par no intrigar el to tratamento mèdico.

• Va in serca del aiuto dei altri

  Cossa la Bìblia la dise: “Un vero amigo el ama tuto el tempo e el deventa come un fradel quando ghen’è situassion difìcile.” — Proverbi 17:17.

  Cossa imparemo: I to amighi i pol giutarte a infrontar brute situassion.

  Penseghe sora: Parla con un amigo che ti te te fidi. Se te fè questo, te resti manco preocupà e te resti meio. Sicuro che i to parenti e i to amighi i vol giutarte, ma pol esser che no i sa cossa dir. Alora, parlaghe a lori cossa che te sì drio sentir. No stà mia spetar massa de lori. Proa ringrassiarli par quel che i fà. Anca se i to amighi i vol giutarte, dele volte saria meio parlarghe a lori che, se i resta massa tempo insieme a ti, te resti canso. Par esémpio, te pol dirghe che no ghe ocore vegner tuti i giorni par restar insieme de ti.

• Seita a esser positivo

  Cossa la Bìblia la dise: “Un cuor contento l’è un bon rimèdio, ma el spìrito desanimà el finisse cole forse dela persona.” — Proverbi 17:22.

  Cossa imparemo: Gàpia una speransa e seita a esser positivo. Cossita, ti te sarè bon de dàrghene fora coi problemi de salute.

  Penseghe sora: Intanto che te sì drio costumarse cola situassion, pensa nela robe che te pol far e no nele robe che no te sì mia bon de far. No sta mia far comparassion coi altri o con quel che ti te eri bon de far vanti de restar malà. (Galati 6:4) Una roba che pol giutarte a seitar a esser positivo l‘è gaver ogetivi che te sè che te si bon de far. (Proverbi 24:10) Giuta i altri de acordo con quel che ti te pol far. Te sarè pi felice e questo ndarà giutarte a no pensar massa nei to problemi. — Ati 20:35.

Sarà che Dio el va giutarte a esser bon de darghene fora coi to problemi de salute?

La Bìblia la mostra che Geovà Dioa el pol giutar una persona a infrontar i problemi de salute. Noantri no spetemo che Dio el fae miràcoli par guarirne, ma quei che i dà onor a Dio i pol ricever questi aiuti:

Pace. Geovà el pol dar “la pace de Dio che la ze pi granda de quel che podemo capir.” (Filipensi 4:6, 7) Questa pace la pol giutar una persona a no esser massa ansiosa. Dio el ghe dà questa pace a quei che i prega a lu e ghe parla sora tute le so preocupassion. — 1 Piero 5:7.

Sabedoria. Geovà el pol dar sabedoria par una persona far bone dessision. (Tiago 1:5) Par gaver questa sabedoria, la persona ghe ocore imparar e meter in pràtica nela so vita i prinsipi dela Bìblia.

La promessa de un futuro meio. Geovà el ga prometesto che nel futuro nissun el ndarà dir: “Son malà.” (Isaia 33:24) Questa speransa la giuta tante persone a seitar a esser positive, anca se le ze drio infrontar bruti problemi de salute. — Geremia 29:11, 12.