Mi vui morir — Sarà che la Bìblia la pol giutarme se penso in coparme?

La risposta dela Bìblia

Si! La Bìblia la pol giutarte. Ela la vien de “Dio, che el consola quei che i ze desanimadi”. (2 Corinti 7:6) La Bìblia no la ze mia un libro sora salute mental, ma la ga giutà tante persone che le pensea in coparse a cambiar la so maniera de pensar. I so bei consili i pol giutar anca ti.

• Che consili la Bìblia la dà?

• Sarà che la Bìblia la parla de persone che volea morir?

• Che testi dela Bìblia pol giutarte a darghene fora se te pensi in coparte?

• E se un amigo el dise: “Mi vui morir”?

• E se mi go belche proà coparme?

Che consili la Bìblia la dà?

• ● Parla sora i to sentimenti.

  Cossa la Bìblia la dise: “Un vero amigo el ama tuto el tempo, e el deventa come un fradel quando ghen’è situassion difìcile.” — Proverbi 17:17.

  Cossa vol dir: Ne ocore del aiuto dei altri quando ghemo bruti pensamenti.

  Se no te parli sora i to sentimenti ai altri, pol esser che no te sarè pi bon de darghene fora. Ma se te parli con un amigo, te pol scominsiar a sentirte meio e veder la to situassion de maniera pi positiva.

  

  Proa far cossita: Parla con qualchedun ancoi, fursi una persona dela to fameia o un caro amigo.a Te pol anca scriver quel che te senti.

• ● Va in serca de un dotor par giutarte.

  Cossa la Bìblia la dise: “Quei che i ga salute no ghe ocore de un dotor, ma quei maladi si.” — Mateo 9:12.

  Cossa vol dir: Ghemo de ndar in serca del aiuto de un dotor quando semo maladi.

  Dele volte le persone le ga voia de morir parché le ga una malatia che fà lore gaver bruti pensamenti. Cossita come le malatie del corpo, no ghe ocore mia gaver vergogna, malatie mentai e emossionai le ga tratamento.

  Proa far cossita: Va presto in serca de un bon dotor par giutarte.

• ● Ricòrdate che Dio el te ama.

  Cossa la Bìblia la dise: “Se vende sinque pardai par due monede de poco valor, mia vera? Ancora cossita, Dio no’l se desméntega de gnanca un de lori. . . . No sté gaver paura, valtri valé de pi che tanti pardai.” — Luca 12:6, 7.

  Cossa vol dir: Te sì tanto pressioso par Dio.

  Pol esser che te pensi che nissun el se importa con ti, ma Dio el capisse quel che te infronti. Lu el se importa con ti, anca se te ghè perso la voia de viver. El Salmo 51:17 el dise: “Ò Dio, no te assarè de banda quei che i ga un cuor spacà e schissà.” Dio el vol che te resti vivo parché lu el te ama.

  Proa far cossita: Varda le prove che la Bìblia la ga che Dio el te ama. Par esémpio, ledi el capìtolo 24 del libro Achegue-se a Jeová.

• ● Prega a Dio.

  Cossa la Bìblia la dise: ‘Buté sora Dio tute le vostre preocupassion, parché lu el tende de valtri.’ — 1 Piero 5:7.

  Cossa vol dir: Dio el vol che te parli a lu tuto quel che te senti e quel che te assa preocupà.

  Dio el pol darte pace e forsa par ndar avanti. (Filipensi 4:6, 7, 13) L’è cossita che Dio el giuta quei che i prega a lu de tuto el cuor. — Salmo 55:22.

  

  Proa far cossita: Prega a Dio ancoi. Dopera el so nome, Geovà, e parla con lu sora quel che te senti. (Salmo 83:18) Domandaghe che el te giute a ndar avanti.

• ● Pénseghe sora la speransa che la Bìblia la dà par el futuro.

  Cossa la Bìblia la dise: “Ghemo questa speransa sicura e firme che la ze come una àncora par la ànima.” — Ebrei 6:19.

  Cossa vol dir: I to sentimenti i pol ndar su e zo come un bastimento che el infronta una tempesta nel mar, ma la speransa che ghen’è nela Bìblia la pol giutarte a restar firme.

  Questa speransa no la ze mia un sogno, ma la vien dela promessa de Dio de finir fora con tuto quel che ne fà sofrir. — Apocalisse 21:4.

  Proa far cossita: Ledi la lession 5 dela revista Bone Notìssie de Dio par Ti! par imparar sora la speransa che la Bìblia la dà.

• ● Fà qualcossa che te piase.

  Cossa la Bìblia la dise: “Un cuor contento l’è un bon rimèdio.” — Proverbi 17:22.

  Cossa vol dir: Far cose che ne assa contenti pol giutar la nostra salute mental e emossional a restar meio.

  

  Proa far cossita: Fà qualcossa che te piase. Par esémpio, scolta mùsiche animade, ledi qualcossa che te tira in su o qualche laoro che te assa contento. Te vè anca restar pi felice se te fè qualcossa par giutar i altri, anca che sìpia pìcole robe. — Ati 20:35.

• ● Tendi dela to salute fìsica.

  Cossa la Bìblia la dise: “Far esersissi l’è bon.” — 1 Timòteo 4:8.

  Cossa vol dir: Far esersissi, dormir ben e magnar robe bone par la salute l’è bon par noantri.

  Proa far cossita: Fà una caminada svelta, gnanca che sìpia par 15 minuti.

• ● Ricòrdate che la to situassion e i to sentimenti i càmbia.

  Cossa la Bìblia la dise: “Gnanca savé come sarà la vostra vita doman.” — Tiago 4:14.

  Cossa vol dir: Fin quando te pensi che i problemi no i ga solussion, lori i pol esser sol par un tempo.

  Anca se la to situassion adesso la ze tanto bruta, ela la pol cambiar doman. Par quela, va in serca de maniere par ndar avanti. (2 Corinti 4:8) Col tempo, la to bruta situassion la ndarà finirse, alora no stà mia finir cola to vita.

  Proa far cossita: Ledi nela Bìblia sora la vita de persone che le ze restade tanto desanimade che le volea morir e varda come la so situassion la ga cambià par meio col tempo, tante volte de maniere che lore gnanca le spetea. Varda arquanti esempi.

Sarà che la Bìblia la parla de persone che le volea morir?

Si. La Bìblia la parla sora persone che le ga dito che le volea morir. Dio no l’è mia restà cativo con queste persone, ma le ga giutade. Lu el pol far compagno con ti.

Elia

• ● Chi che l’era? Elia l’era un profeta coraioso, ma dele volte anca lu el se sentia desanimà. Tiago 5:17 dise: “Elia l’era un omo con sentimenti compagni ai nostri.”

• ● Parché el volea morir? In una situassion, Elia el se ga sentio lu sol, con paura e sensa valor. Alora el ga domandà a Dio: “Geovà, copame.” — 1 Rè 19:4.

• ● Cossa lo ga giutà? Elia el ga parlà a Dio pròpio quel che lu l’era drio sentir. Come che Dio lo ga incoraià? Dio el ga mostrà che el se preocupea con Elia e el ghe ga mostrà el so poder. Anca, Dio el ga assà Elia sicuro che lu ancora el gavea valor e el ga dato a Elia un amigo con tante bone qualità par giutarlo.

• ▸ Ledi sora Elia: 1 Rè 19:2-18.

Giò

• ● Chi che l’era? Giò l’era un paron de fameia sior che el adorea el vero Dio.

• ● Parché el volea morir? La vita de Giò la ga cambià de colpo, e tante robe brute le ga sucedesto con lu. Lu el ga perso tuto quel che el gavea. Tuti i so fioi i ze morti nte un disastro. Lu el ga bio una bruta malatia. E ancora i so amighi i ghe ga dito che lu el gavea la colpa de tuti i so problemi. Giò el ga dito: “Mi òdio la me vita, no vui pi viver.” — Giò 7:16.

• ● Cossa lo ga giutà? Giò el ga pregà a Dio e el ga parlà con altre persone. (Giò 10:1-3) Lu l’è stà incoraià par el so amigo Eliù, che el ga mostrà compassion e lo ga giutà a veder la so situassion de maniera difarente. E el pi importante l’è stà che Giò el ga acetà el aiuto e i consili de Dio.

• ▸ Ledi sora Giò: Giò 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moisè

• ● Chi che l’era? Moisè l’era el lìder dela nassion de Israel e un profeta fedele.

• ● Parché el volea morir? Moisè el gavea tanti laori par far, l’era criticà tuto el tempo e el se ga sentio stufo. El ga dito a Dio: “Alora copame.” — Nùmeri 11:11, 15.

• ● Cossa lo ga giutà? Moisè el ga parlà a Dio come el se sentia. Dio el ga fato altri òmini giutarlo nel so laoro e cossita lu l’è restà manco stufo.

• ▸ Ledi sora Moisè: Nùmeri 11:4-6, 10-17.