Quando sucede una desgràssia

Anca se fé el vostro meio par gaver un matrimònio e una fameia felice, ghen’è imprevisti che pol intrigar la vostra felicità. (Eclesiasti 9:11) Dio l’è tanto bon che el ne dà aiuto par infrontar le dificoltà. Se ve sforsé de meter in pràtica i prinsipi dela Bìblia, valtri e la vostra fameia saré boni de soportar anca le situassion pi difìcile.

1 FIDEVE IN GEOVÀ

COSSA CHE LA BÌBLIA LA DISE: “Buté sora de lu tute le vostre preocupassion, parché lu el tende de valtri.” (1 Piero 5:7) Ricordeve sempre che Dio no l’è mia el colpà dei nostri problemi. (Tiago 1:13) Se ndé darente de Lu, Lu el ve giutarà dela meio maniera. (Isaia 41:10) “Verdé el vostro cuor a lu.” — Salmo 62:8.

Leder e studiar la Bìblia tuti i giorni ve darà consolo. Se fé cossita, vederé come che Geovà “el ne consola in tute le nostre tribolassion”. (2 Corinti 1:3, 4; Romani 15:4) Lu el promete che el ve darà ‘la pace de Dio, che la ze pi granda de quel che podé capir’. — Filipensi 4:6, 7, 13.

COSSA CHE PODÉ FAR:

• Preghé a Geovà che el ve giute a mantegner la calma e a pensar ciaro.

• Vardé tute le scòlie che podé far e dopo podé scòlier la meio.

2 GAVÉ DE TENDER DE VALTRI E DELA VOSTRA FAMEIA

COSSA CHE LA BÌBLIA LA DISE: “El cuor dela persona inteligente el riva a gaver cognossensa, e la récia del sàbio la va in serca dela cognossensa.” (Proverbi 18:15) Ndé in serca de tute le informassion. Sforséve de saver cossa che tuti quei che i fà parte dela fameia i ga de bisogno. Gavé de parlar con lori e scoltarli. — Proverbi 20:5.

E se more una persona che valtri amé? No sté mia gaver paura de spressar i vostri sentimenti. Ricordeve che fin Gesù “el ga tacà piander”. (Gioani 11:35; Eclesiasti 3:4) L’è importante riposar e dormir. (Eclesiasti 4:6) Cossita sarà pi fàcile infrontar la situassion.

COSSA CHE PODÉ FAR:

• Gavé sempre de parlar cola vostra fameia, nò sol quando sucede una desgràssia. Quando vien fora problemi, tuti i se sentirà ben de parlar con valtri.

• Parlé con altri che fursi i ga passà una situassion compagna.

3 GAVÉ DE ACETAR EL AIUTO CHE VE OCORE

COSSA CHE LA BÌBLIA LA DISE: “Un vero amigo el ama tuto el tempo, e l’è un fradel nassesto par quando ghen’è aflission.” (Proverbi 17:17) I vostri amighi i vol giutarve, ma dele volte no i sà mia come far. Podé dirghe cossa che i pol far par valtri. (Proverbi 12:25) Anca ndé in serca del aiuto spiritual de quei che i cognosse la Bìblia. Sicuro che le orientassion dela Bìblia le ve giutarà. — Tiago 5:14.

Ve darà consolo star insieme a persone che le ga fede in Dio e che le se fida in Lu. Anca ve darà consolo giutar quei che i ze desanimadi. Parlé con lori sora la vostra fede in Geovà e in quel che Lu el promete. Doperé el vostro tempo par giutar quei che i ga de bisogno. No sté mia slontanarve de quei che i ve ama e che i se preocupa con valtri. — Proverbi 18:1; 1 Corinti 15:58.

COSSA CHE PODÉ FAR:

• Parlé con un bon amigo e assé che lu el ve giute.

• Parlé de maniera spessìfica e onesta sora quel che gavé de bisogno.