UN MONDO PIEN DE PROBLEMI

3 | Seita darente dela to fameia e amighi

PARCHÉ CHE L’È IMPORTANTE?

In questo mondo che l’è un rabalton, le persone le ze cada volta pi ansiose. Par quela, fin sensa nicorderse, tante persone le se tira distante de quei che le ama.

Le persone no le passa pi tempo coi so amighi.
I maridadi i barufa cada volta de pi.
I genitori i se importa poco o gnente coi problemi dei so fioi.

Cossa che te ghè de saver?

Gaver boni amighi fà ben par la salute del corpo e dela mente, ancora de pi quando te sì drio tribolar.
Le ansietà e le preocupassion par causa dela situassion bruta del mondo le pol far vegner fora problemi nela to fameia.
Notìssie rugne le pol far mal ai to fioi de pi de quel che te pensi.

Cossa che te pol far adesso?

La Bìblia la dise: “Un vero amigo el ama tuto el tempo, e el deventa come un fradel quando ghen’è situassion difìcile.” — Proverbi 17:17.

Parla con qualchedun che pol giutarte e darte boni consili. Gaver amighi cossita, che i se preocupa con ti, pol darte forsa par infrontar le dificoltà dela vita.

COME CHE TE POL FAR — Arquante sugestion

Quando ghen’è dificoltà, queste robe le pol giutarte a seitar darente dela to fameia e amighi

FÀ PI FORTE EL TO MATRIMÒNIO

Fà pi forte el to matrimònio

La Bìblia la dise: “L’è meio due che un. . . . Parché se un de lori el casca, quel altro pol giutarlo a levar su.” (Eclesiasti 4:9, 10) I maridadi i ga de esser come due giugadori dela medèsima echipe, nò ndar un contra el altro come se i fusse de echipe difarente. Varda cossa che i maridadi i pol far.

No stà inrabiarte col to omo o la to dona sol parché te sì massa preocupà o con ansietà. Tuto ndarà meio se i due i ga passiensa un col altro e i se capisse.
Tute le stimane, discoré sora i problemi che ve toca risolver. Ndé insieme contra el problema, nò un contra el altro.
Tolé un tempo par far insieme robe che ve piase.
Proé ricordarve de boni momenti che gavé passà insieme. Par esémpio, podé vardar i ritrati de quando ve gavé maridà o de altri bei momenti.

“I maridadi fursi no i ndarà sempre pensar compagno, ma no vol mia dir che no i sarà boni de laorar come una echipe. El omo e la dona i pol far dessision insieme e anca laorar insieme par le dessision ndar ben.” — Davi.

STÀ DARENTE DEI TO AMIGHI

Stà darente dei to amighi

Invesse de sol ricever aiuto dei to amighi, pensa in come ti te pol giutarli. Quando te giuti i altri, te sì drio giutar a ti stesso.
Tuti i giorni, parla con qualche amigo par veder come che la va.
Domanda ai to amighi come i ga fato darghene fora con problemi come i toi.

“Quando te infronti bruti colpi nela vita e no te sè cossa far, i to amighi i pol giutarte. I pol mostrarte par ndove ndar, anca se tuto quel che i fà l’è ricordarte de robe che belche te sè. I to amighi i se importa con ti e i sa che anca ti te te importi con lori.” — Nicole.

GIUTA I TO FIOI

Giuta i to fioi

La Bìblia la dise: “Tuti i ga de esser pronti par scoltar, ma i ga de esser lenti par parlar”. (Tiago 1:19) Nel scomìnsio, pol esser che i to fioi no i vol mia parlar sora quel che li assa con preocupassion o con paura. Ma se ti te li scolti con passiensa, l’è pi fàcile che lori i parle quel che i sente.

Giuta i to fioi a star tranquili par parlar quel che i sente. Par arquanti fioi, l’è pi fàcile parlar coi so genitori sora i so sentimenti quando i ze drio far altre atività, come ndar de auto o caminar.
Stà atento par nò assar i to fioi veder massa notìssie brute.
Contaghe ai to fioi cossa che te sì drio far par proteger la fameia.
Parla coi to fioi sora cossa far se sucede una desgràssia o una roba che no speté mia. E dopo trena con lori par assarli pareciadi.

“Parla coi to fioi e assali contar quel che i sente. Pol esser che i ga paura, ansietà o ràbia e no i vol che te sàpia. No stà gaver vergogna de dirghe che anca ti te senti queste robe, ma dighe anca come te sì bon de darghene fora con questi sentimenti.” — Tània.