UN MONDO PIEN DE PROBLEMI

4 | No stà perder la speransa

PARCHÉ CHE L’È IMPORTANTE?

La ansietà par causa dei problemi del mondo la pol assar le persone sfinide nel corpo e nela mente. Par quela, tanti i perde la speransa e i cata che le robe le restarà cada volta pedo. Come cossita?

Arquanti no i vol gnanca pensar sora el futuro.
Altri i bevi massa àlcol o i dopera droghe par proar desmentegarse dei so problemi.
Ghen’è de quei che i pensa che no val a pena seitar a viver. Par quela, i vol coparse.

Cossa che te ghè de saver?

Arquanti problemi che te infronti fursi no i restarà par sempre, e pol esser che la situassion la reste meio de un giorno al’altro.
Anca se la situassion la resta compagna, ghen’è robe che te pol far che te giutarà a soportarla.
Nela Bìblia, Dio el promete che el va finir fora con tuti i problemi che ghen’è, e te pol fidarte in questa speransa.

Cossa che te pol far?

La Bìblia la dise: “No sté mai restar ansiosi con quel che ndarà suceder doman, parché cada giorno el gavarà le so ansietà. Cada giorno el ga le so dificoltà.” — Mateo 6:34.

Proa viver un giorno ala volta. Se te resti massa preocupà con quel che ndarà suceder doman, no te sarè mia bon de far quel che te ghè de far ancoi.

Seitar preocuparte con robe che fursi le ndarà suceder sol va assarte pi ansioso ancora, e te pol scominsiar a perder la speransa de un futuro meio.

COME CHE TE POL FAR — Arquante sugestion

CONSÉNTRATE IN ROBE BONE

La Bìblia la dise: “Tuti i giorni de quel che el patisse i ze rugni. Ma quel che l’è alegre de cuor el ga sempre una festa.” (Proverbi 15:15) Se te seiti con bruti pensieri, te pol catar che la to situassion mai la restarà meio. Ma se te seiti pensar in robe bone, te sarè bon de pensar in cossa che te pol far par darghene fora cole dificoltà.

No stà guastar massa tempo drio vardar le notìssie e gnanca darghe massa atension.
Nel fin de cada giorno, pensa in due o tre robe che te pol esser grato.
Scrivi do tuto quel che te ghè de far ancoi. Spartisse i laori pi grandi in pìcole parte. Cossita, nel fin dela giornada, te ndarè veder tuto quel che te sì stà bon de far.

DOMANDA AIUTO DEI ALTRI

La Bìblia la dise: “Quel che no’l vol restar con nissuni . . . el se ricusa dimostrar sabedoria.” (Proverbi 18:1) No te sì mia bon de vegner fora de un buso fondo ti sol. Ma se te ghè el aiuto de nantra persona l’è pi fàcile.

Domandaghe aiuto ala to fameia o ai to amighi.
Pensa anca in quel che ti te pol far par giutar a lori. Cossita, no te pensarè sol nei to problemi.
Se ti te ghè perso la speransa e te cati che no val a pena seitar a viver, fursi l’è meio ndar in serca de un dotor. Se ti te senti massa avelio, pol esser che te gàpia un problema de salute come la depression. Una roba che la ga belche giutà tante persone l’è ndar in serca de tratamento.a

a Questa revista no la racomanda gnanca un tipo de tratamento.

La Bìblia la ne dà vera speransa

Un servo de Dio del passà el ga pregà: “La to parola la ze come una làmpada che la sciara ndove mi son drio caminar e come una luce che la slusa la me strada.” (Salmo 119:105) Varda come che la Bìblia la ze pròpio cossita.

Quando l’è scuro, una luce la pol giutarte a veder ndove ndar. Dela medèsima maniera, la sabedoria che ghen’è nela Bìblia la pol giutarte a saver ndove ndar, o sia, a far bone dessision nela vita.

Una luce anca la pol sciarar la nostra strada. Cossita, podemo veder quel che ghen’è pi avanti. L’è compagno cola Bìblia. Ela la pol mostrarne che ghen’è una speransa de un futuro meio.

La Bìblia la ze un libro sacro che el conta la stòria dela umanità e che anca el dà una vera speransa par el futuro.

Come?

Come che el sofrimento el ga scominsià? La Bìblia la dise: “Par meso de un sol omo el pecato l’è vegnesto al mondo, e la morte par meso del pecato, cossita la morte la se ga spalià a tuti, parché tuti i gavea pecà.” — Romani 5:12.

Parché?

Parché che i umani no i ze mia boni de finir coi nostri problemi? La Bìblia la dise che “no l’è mia el omo che el ga de dessider par ndove che el ga de caminar”. (Geremia 10:23) L’è sol vardar come che el mondo l’è par veder che l’è pròpio vera.

Cossa?

Cossa che Dio el farà par risolver i problemi del mondo? La Bìblia la dise che “lu el sugarà tute le làgrime dei so oci, e no ghen sarà pi la morte, gnanca pi tristessa, gnanca piander, gnanca dolor”. — Apocalisse 21:4.