Come che podemo esser amighi de Dio?

1. Sarà che Dio el scolta tute le orassion?

L’è pròpio bon poder parlar con Dio. Lu el vol che tute le persone le fassa orassion a Lu e le sìpia so amighe. (Salmo 65:2) Ma questo no’l vol dir che Lu el scolta o el aceta tute le orassion. Par esémpio, Dio no’l scolta le orassion de un sposo che el maltrata la so sposa. (1 Pedro 3:7) Dio anca no’l scolta le orassion de quei che i fà cose sbaliade e no i vol cambiar. Questo el ga sucedesto col pòpolo de Dio ntel passà. Ma Dio el aceta le orassion de una persona che la se ciama grama dele cose sbaliade che la ga fato. — Ledi Isaías 1:15; 55:7.

Varda el vídeo Dio el scolta tute le orassion?

2. Come che gavemo de pregar?

Gavemo de pregar sol al nostro Creador, Geovà. Questo el mostra che credemo che sol Lu l’è Dio. (Mateus 4:10; 6:9) Gavemo de pregar ntel nome de Gesù parché lu l’è morto par i nostri pecati. (João 14:6) Geovà no’l vol che disemo le medèsime parole drio man o orassion che le ze scrite nte un libro. Quando preghemo, Lu el vol che parlemo de cuor. — Ledi Mateus 6:7; Filipenses 4:6, 7.

El nostro Creador el pol scoltar anca le orassion che femo ntel nostro pensamento. (1 Samuel 1:12, 13) Podemo pregar in tuti i momenti: ntel scomìnsio del di e quando ndemo dormir, ntela ora del magnar e quando infrontemo problemi. — Ledi Salmo 55:22; Mateus 15:36.

3. Parché che l’è importante riunirse con quei che i ama a Dio?

No l’è mia fàcile par quei che i ze amighi de Dio viver in meso de persone che no le crede in Dio e che no le fà caso dele so promesse. (2 Timóteo 3:1, 4; 2 Pedro 3:3, 13) Alora, quei che i ama a Dio e vol servir a Lu i ga de bisogno de riunirse par giutarse un col altro. — Ledi Hebreus 10:24, 25.

L’è tanto bon star insieme ale persone che le ama a Dio. Questo el fà pi forte la nostra amicìssia con Dio. Ntele riunion dele Testimònie de Geovà catemo persone che le ne giuta a gaver de pi fede. — Ledi Romanos 1:11, 12.

4. Come che te pol esser amigo de Dio?

Par esser amigo de Dio, te ghè de torte tempo par pensarghe sora in quel che la Bìblia la dise. Pènsaghe sora ntele cose che Geovà el ga fato, ntei so consili e ntele so promesse. Pensarghe sora in queste cose e pregar i ne giuta a veder el amor e el saver de Dio. — Ledi Josué 1:8; Salmo 1:1-3.

Te ghè anca de bisogno de gaver fede in Dio. La fede la ze compagna una pianta. La pianta la cresse se te ghe dè àqua. La to fede anca la resta pi forte se ti te impari de pi sora Dio. — Ledi Mateus 4:4; Hebreus 11:1, 6.

5. Parché che l’è bon esser amigo de Dio?

Geovà el tende dei so amighi. Lu el protege noantri de tuto quel che el podaria destruser la nostra fede e la nostra speransa de viver par sempre. (Salmo 91:1, 2, 7-10) Dio anca el mostra cossa far par gaver bona salute e felicità. Geovà el insegna a noantri la meio maniera de viver. — Ledi Salmo 73:27, 28; Tiago 4:4, 8.