Come doperar ben i soldi

Tuti ghemo bisogno de soldi par dar ala nostra fameia quel che la ga de bisogno. (Proverbi 30:8) L’è vera che “i soldi i ze par una protession”. (Eclesiasti 7:12) Pol esser difìcile parlar de soldi col vostro sposo o sposa, ma no sté mia assar che i soldi i sìpia la causa de problemi nel vostro matrimònio. (Efesi 4:32) El sposo e la sposa i ga de fidarse un del altro e dessider insieme come doperar i soldi.

1 GAVÉ DE DESSIDER VANTI COME DOPERAR I SOLDI

COSSA CHE LA BÌBLIA LA DISE: “Un de valtri che el vol far su una tore, vanti el se senta e el fà la conta de quanto el va guastar par veder se el ga el sufissiente par finir el laoro, mia vera?” (Luca 14:28) L’è importante che valtri due insieme dessidé vanti come doperar i soldi. (Amòs 3:3) Gavé de dessider cossa comprar e quanto che podé guastar. (Proverbi 31:16) Sol parché gavé i soldi par comprar qualcossa, no vol dir che gavé pròpio de comprarla. No sté mia far dèbiti. Guasté sol i soldi che gavé. — Proverbi 21:5; 22:7.

COSSA CHE PODÉ FAR:

• Se nel fin del mese ga restà soldi, podé dessider insieme come doperarli.

• Se vedé che sé sensa soldi, gavé de dessider maniere pràtiche par sparagnar. Par esémpio, podé magnar in casa invesse che ndar magnar fora.

2 GAVÉ DE ESSER ONESTI PAR FAR BONE DESSISION

COSSA CHE LA BÌBLIA LA DISE: “Sforséve de far tute le robe de maniera onesta, nò sol davanti de Geovà, ma anca davanti dei òmini.” (2 Corinti 8:21) Gavé de dir la verità al vostro sposo o sposa sora quanto guadagné e quanto podé guastar.

Quando gavé de far dessision importante sora i soldi, sempre gavé de parlar col vostro sposo o sposa. (Proverbi 13:10) Parlar sora i soldi giutarà a mantegner la pace nel matrimònio. Gavé de pensar che quel che sé drio guadagnar i ze i soldi dela fameia, nò sol de un o de colaltro. — 1 Timòteo 5:8.

COSSA CHE PODÉ FAR:

• Meteve de acordo quanto che cada un de valtri el pol guastar sensa gaver de domandar al altro.

• Parlé sora i soldi vanti che vien un problema.