Sarà che tuto quel che l’è rugno vien dei soldi?

La risposta dela Bìblia

Nò. La Bìblia no la dise che i soldi i ze rugni, gnanca la dise che tute le robe rugne le vien dei soldi. Ghen’è quei che i dise che “i soldi i ze la radisa de tute le cose rugne”, ma no l’è quel che la Bìblia la insegna. Infati, la Bìblia la dise che “la radisa de tute le cose rugne l’è el amor ai soldi.”a — 1 Timòteo 6:10, Pastoral.

Cossa che la Bìblia la dise sora i soldi?

La Bìblia la dise che i soldi i pol esser boni par tante robe quando i ze ben doperadi. Anca la dise che i pol esser fin una “protession”. (Eclesiasti 7:12) E la Bìblia la parla ben de quei che i ze generosi e che i dopera i so soldi par giutar e dar presenti ai altri. — Proverbi 11:25.

Ma la Bìblia la dise che ghemo de star atenti par no far i soldi deventar la roba pi importante dela nostra vita. Ela la dise: “Che la vostra maniera de viver la mostre che no amé mia i soldi. Sté contenti cole robe che valtri gavé.” (Ebrei 13:5) Cossita imparemo che no ghemo de ndar in serca de restar siori. L’è meio restar contenti cole robe che ghemo de bisogno, come magnar, robe de vestir e un posto de star. — 1 Timòteo 6:8.

**Parché che la Bìblia la dise par no amar i soldi?**

Quei che i vol sempre de pi no i gavarà mia la vita eterna. (Efesi 5:5) Prima, parché la Bìblia la dise che voler sempre de pi l’è come adorar imàgine, o sia, una maniera de adorassion falsa. (Colossensi 3:5) E anca parché quei che i vol sempre de pi tante volte i pol far robe sbaliade par gaver quel che i vol. Proverbi 28:20 dise che “quel che vol deventar sior de colpo no’l va restar inossente”. Una persona che la ama i soldi la pol fin far qualche crime, come ciavar, minassar, imbroiar, sequestrar o fin copar.

Anca se una persona no la fà queste robe sbaliade, altre robe brute le pol suceder par via del amor ai soldi. La Bìblia la dise che “quei che i ga tanta voia de deventar siori i casca in tentassion, in tràpola e in tante voie stùpide e che ghe fà dano”. — 1 Timòteo 6:9.

Parché che ndar drio ai consili dela Bìblia sora i soldi l’è bon par noantri?

La Bìblia la dise quel che l’è giusto e che ghe piase a Dio. No volemo mia far robe sbaliade par guadagnar de pi soldi. El pi importante par noantri l’è far quel che ghe piase a Dio, cossita restemo pi contenti con noantri stessi e anca gavaremo la aprovassion de Dio. Lu el promete par quei che i va in serca de far la so volontà: “Mi mai vao assarte e mai vao abandonarte.” (Ebrei 13:5, 6) Lu anca el promete che “el omo fedele el va ricever tante benedission”. — Proverbi 28:20.

Testi dela Bìblia che parla sora soldi

Eclesiasti 7:12: “I soldi i ze una protession.”

Cossa vol dir: Quando li doperemo ben, i soldi pol giutarne a gaver quel che ghemo de bisogno.

Luca 12:15: “Anca quando qualchedun el ga abondansa, la so vita no la vien dele cose che el ga.”

Cossa vol dir: I soldi no i ze la roba pi importante dela nostra vita, gnanca i pol salvarne.

1 Timòteo 6:10: “El amor ai soldi l’è la radisa de tuti i tipi de cose pregiudissiai, e arquanti par ndar in serca de questo, i ze stati desviadi dela fede e i ga causà tanti sofrimenti a lori stessi.”

Cossa vol dir: No l’è che i soldi i ze rugni. Ma quei che i ama i soldi, o sia, quei che i fà dei soldi la roba pi importante dela so vita, i pol gaver tante dificoltà, come problemi nela fameia e salute fiaca parché i ga laorà massa.

Ebrei 13:5: “Che la vostra maniera de viver la mostre che no amé mia i soldi. Sté contenti cole robe che valtri gavé.”

Cossa vol dir: Invesse de sforsarse par restar siori, l’è meio restar contenti de gaver quel che ne ocore.

Mateo 19:24: “L’è pi fàcile un camel ndar rento par el buso de una gùcia che un omo sior ndar rento el Regno de Dio.”

Cossa vol dir: Gesù el gavea pena convidà un omo sior par esser so dissìpolo. Ma quel omo el ghe ga dito de nò, parché lu no’l volea assar indrio le so richesse. Gesù el volea dir che ghemo de star atenti. Una persona che la mete i soldi in primo posto, invesse de a Dio, la pol fin perder la vita eterna.

a Varda come nantra Bìblia la traduse questo versìcolo: “El amor ai soldi l’è la radisa de tuti i tipi de cose pregiudissiai.”