LESSION 22
Come che te pol parlar ai altri sora le bone notìssie?
Fursi te pensi che tuti i gavaria bisogno de saver le robe che te ghè belche imparà dela Bìblia. Vero, tuti i ga pròpio de bisogno! Ma pol esser che te ghè paura de parlar ai altri sora quel che te sì drio imparar. Questa lession la ndarà giutarte a dàrghene fora cola paura de parlar ai altri sora le bone notìssie e a restar contento de farlo.
1. Come che te pol scominsiar a parlar ai altri dela Bìblia?
I dissìpoli de Gesù i ga dito che no i podaria fermarse de parlar sora quel che i savea. (Ati 4:20) Lori i ghe piasea tanto de quel che i gavea imparà e i volea parlar sora questo a tute le persone che i fusse boni. Anca ti te pensi cossita? Alora, quando te sì cola to fameia e i to amighi, sfòrsate par parlar sora quel che te sì drio imparar. Ma ricòrdate che te ghè sempre de farlo con rispeto. — Ledi Colossensi 4:6.
Come che te pol scominsiar a parlar dela Bìblia?
Quando te sì drio discorer con qualchedun dela fameia te pol dirghe: “Questa stimana go imparà una roba tanto bela nel me stùdio dela Bìblia.”
Se te ghè un amigo che l’è malà o preocupà, te pol mostrarghe un versìcolo dela Bìblia che lo giute.
Se qualchedun nel to laoro el te domanda: “Come che la va?”, proa parlarghe sora cossa che te ghè imparà nel to stùdio dela Bìblia o nte una riunion.
Te pol anca mostrar ai to amighi el site jw.org.
Te pol anca convidar qualchedun par far el stùdio dela Bìblia con ti o mostrarghe come che el pol domandar el stùdio nel site jw.org.
2. Parché che l’è importante predicar coi fradei dela congregassion?
I dissìpoli de Gesù i parlea sora le bone notìssie a quei che i cognossea. Ma Gesù el ghe ga anca dito che i ndesse predicar de due in due in tute le cità. (Luca 10:1) Cossita, tante persone le podea scoltar le bone notìssie. I dissìpoli anca i restea contenti de laorar un colaltro. (Luca 10:17) Cossa che te pensi de sforsarte par predicar insieme coi fradei dela congregassion?
IMPARA DE PI!
Come che te pol dàrghene fora cola paura de parlar ai altri sora le bone notìssie e a restar contento de farlo?
3. Geovà el ndarà giutarte
Arquanti i ga voia de predicar, ma fursi i ga paura de quel che i altri i podarà far o pensar.
Anca ti te ghè paura de parlar sora quel che te sì drio imparar? Parché?
Vardé el VÌDEO, e dopo, parlé sora questo.
Come che questi gióveni i ze stati boni de dàrghene fora cola paura?
Ledé Isaia 41:10, e dopo, parlé sora questo:
Se te ghè paura de parlar ai altri sora quel che te impari, come che pregar a Geovà pol giutarte?
Seto questo?
Tanti i pensea che no i saria mai boni de parlar ai altri sora Geovà. Varda el esémpio de Sergey, che l’è un fradel dela Rùssia. Lu el pensea che no’l gavea valor e ghe fea tanta fadiga discorer coi altri. Ma el ga scominsià a studiar la Bìblia. Lu el ga dito: “Anca che mi gavesse paura, go scominsià a parlar ai altri sora quel che ero drio imparar. Son restà tanto contento parché me ga giutà a veder che mi gavea valor e a far pi forte la me fede.”
4. Mostra rispeto ai altri
Quando te vè parlar ai altri sora la Bìblia, stà atento a quel che te parli, ma anca a come te parli. Ledé 2 Timòteo 2:24 e 1 Piero 3:15, e dopo, parlé sora questo:
Come che te pol meter in pràtica questi versìcoli quando te parli ai altri sora la Bìblia?
Se qualchedun dela to fameia o un amigo no l’è de acordo con quel che te parli, cossa che te podarissi far? Cossa che no te ghè de far?
No ghemo de dir ale persone cossa le ga de creder. Pitosto, ghemo de farghe domande che ghe giute a capir. Parché?
5. Te restarè contento de parlar ai altri sora le bone notìssie
Geovà el ga dito a Gesù che el gavea de parlar ai altri sora le bone notìssie. Cossa che Gesù el pensea de farlo? Ledé Gioani 4:34, e dopo, parlé sora questo:
Noantri magnemo parché el nostro corpo el ga de bisogno, ma anca parché ne piase de farlo. Gesù el ga dito che obedir a Dio (par esémpio, predicar le bone notìssie) l’è come el magnar. Parché?
Che bele robe te pensi che pol suceder se te parli ai altri sora Geovà?
Proa far queste robe
Nele riunion in meso la stimana, impara a parlar coi altri sora la Bìblia.
Scomìnsia a far le dimostrassion nele riunion. Parla a quel che el stùdia la Bìblia con ti che te vol dar el to nome par scominsiar a farle. Queste dimostrassion le ndarà darte de pi coraio par parlar ai altri sora la Bìblia.
Dopera el “Fursi te ghè belche scoltà” e “Fursi qualchedun el te domande” par saver come risponder a qualche domande e cossa far se qualchedun no’l crede in quel che te sì drio dir.
FURSI QUALCHEDUN EL TE DOMANDE: “Cossa che te me conti de novo?”
Come che te podarissi parlarghe sora quel che te sì drio imparar dela Bìblia?
COSSA CHE TE GHÈ IMPARÀ?
Quando una persona la parla sora le bone notìssie, la resta contenta, e no l’è fadiga de farlo.
Sito bon de ricordarte?
Parché che predichemo ai altri sora le bone notìssie?
Come che te pol parlar ai altri sora le bone notìssie con rispeto?
Come che te pol dàrghene fora cola paura de predicar ai altri?
VUTO SAVER DE PI?
Come che te podarissi doperar el carton de vìsita del jw.org par predicar?
Impara sora quatro qualità che le ndarà giutarte a parlar ai altri sora le bone notìssie.
“Sito parecià par esser un pescador de òmini?” (La Sentinela, setembre de 2020)
Varda un esémpio che ghen’è nela Bìblia che el ne giuta a gaver de pi coraio par predicar le bone notìssie.
Come che te podarissi parlar sora quel che te impari ale persone dela to fameia?