Seitemo a predicar par causa del amor!

1. Cossa che ghemo imparà nela riunion anual de 2023?

LA RIUNION anual de 2023a la ne ga giutà a capir meio arquante verità dela Bìblia e anca el nostro laoro de predicassion. Par esémpio, ghemo imparà che arquante persone le podarà imparar sora Geovà anca dopo de “Babilònia, la Granda” esser finida fora. Anca ghemo visto che de novembre de 2023 avanti, i predicadori no ghe ocore pi scriver do tuto quel che i fà nela predicassion. Ma sarà che questo vol dir che no ghemo mia de meterghela tuta nela predicassion? Sicuro che nò!

2. Parché che ndar predicar l’è cada volta pi importante? (Mar. 13:10)

² El nostro laoro de predicassion l’è cada volta pi importante. Parché? Parché el tempo l’è drio finirse. Proa ricordarte de quel che Gesù el ga dito sora i ùltimi giorni. (Ledi Marco 13:10.b) Nel Vangelo de Mateo, ledemo che Gesù el ga dito che le bone notìssie le saria predicade in tuta la Tera vanti del fin de questo bruto mondo de Sàtana. (Mat. 24:14) Geovà el ga belche dessidio ‘el giorno e la ora’ par finirlo fora. (Mat. 24:36; 25:13; Ati 1:7) Alora, semo cada volta pi darente de questo fin. (Rom. 13:11) Par quela, ghemo de sforsarse de ndar predicar intanto che ancora ghemo tempo.

3. Parché che semo drio predicar le bone notìssie?

³ Quando ghe pensemo sora el nostro laoro de predicassion, ghemo de domandarse: ‘Parché che semo drio predicar le bone notìssie?’ Par causa del amor. In questo stùdio, ndaremo imparar de pi sora el nostro amor par le bone notìssie, par le persone, par el nostro caro Dio, Geovà, e par el so nome.

SEITEMO A PREDICAR PARCHÉ AMEMO LE BONE NOTÌSSIE

4. Cossa che te ghè voia de far quando ti te ricevi una bona notìssia?

⁴ Restemo pròpio contenti quando scoltemo una notìssia bona. Par esémpio, proa ricordarte de quel che te ghè sentio quando te ghè savesto che l’è nassesto un bambin nela fameia o quando te sì stà bon de catar un laoro che te ocorea. Sicuro che te sì restà premoso de parlar ai altri quel che te ga sucedesto. Sarà che te ghè sentio la stessa roba quando te ghè imparà la verità sora el Regno de Dio, la meio notìssia che ghen’è?

5. Cossa che te ghè sentio intanto che te ghè imparà le bone notìssie del Regno de Dio? (Varda anca la ilustrassion.)

⁵ Proa ricordarte quel che te ghè sentio quando te ghè imparà la verità dela Bìblia. Par esémpio, quando te ghè capio che Dio el te ama e che el vol che te sìpia parte dela so fameia. Te ghè capio che Geovà anca el ga prometesto che el ndarà finir fora col sofrimento, col dolor, che el ndarà ressussitar quei che i ze morti e che el ne darà tante altre benedission. (Mar. 10:29, 30; Gio. 5:28, 29; Rom. 8:38, 39; Apo. 21:3, 4) Te sì restà pròpio contento de imparar queste verità. (Luc. 24:32) Sicuro che te ghè scominsià a amar tanto le bone notìssie e te ghè volesto parlar ai altri quel che te eri drio imparar. — Varda anca Geremia 20:9.

6. Cossa che te ghè imparà cola speriensa de Ernest e Rose?

⁶ Varda quel che ga sucedesto con Ernest.c Lu el gavea sol diese ani quando so pare l’è morto. Ernest el ga dito: “Mi me domandea: ‘Sarà che lu l’è nel cielo? Sarà che lu no’l esiste pi?’ Mi volea tanto gaver me pare insieme a mi, compagno i altri toseti i gavea el suo.” Lu sempre el ndea al semitèrio e el preghea: “Dio, fame saver ndove l’è me pare.” Intorno de 17 ani dopo che so pare l’era morto, Ernest el ga scominsià a studiar la Bìblia cole Testimònie de Geovà. Lu l’è restà pròpio maraveià de imparar che i morti no i sa gnente, i ze come se i fusse drio dormir e che la Bìblia la dise che ghen sarà una ressuression. (Ecl. 9:5, 10; Ati 24:15) Dopo tanto tempo, Ernest l’è stà bon de catar le risposte ale domande che el se fea de gióveno. E lu el ga volesto insegnar ai altri quel che l’era drio imparar. Rose, so dona de Ernest, la ga scominsià a studiar insieme a lu e lori i se ga batesà in 1978. Ernest e Rose i seita a parlar sora queste bele verità ala so fameia, amighi e a tuti quei che i ghe dà atension. Cossita, i ze stati boni de giutar de pi de 70 persone a imparar la verità e a batesarse.

7. Cossa che volemo far dopo che scominsiemo a amar le verità dela Bìblia? (Luca 6:45)

⁷ Sicuro che amemo tanto le verità dela Bìblia. Par quela, volemo parlar ai altri dele bele robe che ghemo imparà. (Ledi Luca 6:45.d) Se sentimo compagno ai primi dissìpoli de Gesù, che i ga dito: “Noantri no podemo mia fermarse de parlar dele cose che ghemo visto e che ghemo scoltà.” (Ati 4:20) Amemo tanto queste verità e volemo insegnarghele a altre persone.

SEITEMO A PREDICAR PARCHÉ AMEMO LE PERSONE

8. Cossa che ne giuta a sforsarse de parlar sora le bone notìssie ai altri? (Varda anca el quadro “Amar le persone te giutarà a far dissìpoli”.) (Varda anca el ritrato.)

⁸ Compagno a Geovà e a Gesù, noantri amemo tanto le persone. (Pro. 8:31; Gio. 3:16) Par quela, ne fà pecà veder quei che no i cognosse a Dio e che no i ga speransa. (Efe. 2:12) Lori i ga tanti problemi ancoi, ma noantri podemo giutarli par meso dele bone notìssie del Regno de Dio. Volemo sforsarse del tuto par insegnar queste bone notìssie a tute le persone par causa del amor e dela compassion che sentimo. Queste verità ndarà darghe speransa e ndarà giutarli a viver felici adesso. E nel futuro, lori i podarà viver par sempre nel novo mondo de Dio. — 1 Tim. 6:19.

9. Cossa che parlemo ale persone che ndarà suceder, e parché? (Ezechiel 33:7, 8)

⁹ Par causa del nostro amor par i altri, volemo parlar a tuti che presto questo bruto mondo el sarà finio fora. (Ledi Ezechiel 33:7, 8.e) Ne fà pecà veder tante persone dela nostra fameia e altri che no i serve mia a Geovà. Magari, lori i seita viver sensa nicòrderse che presto “ghen sarà una granda tribolassion come mai ga sucedesto del scomìnsio del mondo fin adesso, nò, gnanca sucederà ancora”. (Mat. 24:21) Par quela, volemo dirghe cossa che ndarà suceder nel giorno de giulgamento. Prima, le religion false le sarà finide fora. E dopo el Armagedon, el bruto mondo de Sàtana no’l ghen sarà pi. (Apo. 16:14, 16; 17:16, 17; 19:11, 19, 20) Preghemo che le persone le cognossa a Geovà e che lo adore insieme a noantri. Ma cossa che ndarà suceder con quei dela nostra fameia e altre persone che no ghe bada mia quel che predichemo?

10. Parché che l’è tanto importante parlar ale persone cossa che ndarà suceder nel futuro?

¹⁰ Come ghemo visto nel stùdio vanti, pol esser che Geovà el ndarà salvar arquante persone che le scominsiarà a gaver fede in lu dopo veder “Babilònia, la Granda” esser finida fora. Alora, l’è ancora pi importante parlar a tuti sora quel che ndarà suceder. Parché? Parché lori sol i ndarà ricordarse de questo nel futuro se ghe lo disemo adesso. (Varda anca Ezechiel 33:33.) Pol esser che queste persone le ndarà ricordarse de quel che semo drio parlar e che le volarà servir a Geovà insieme a noantri, vanti che sìpia massa tardi. Compagno a quel comandante dela preson de Filipo, che el ga bio fede dopo del teremoto, pol esser che arquante persone le volerà adorar a Geovà dopo che Babilònia la sarà destruta. — Ati 16:25-34.

SEITEMO A PREDICAR PARCHÉ AMEMO A GEOVÀ E EL SO NOME

11. De acordo con Apocalisse 4:11, parché che volemo darghe a Geovà glòria, onor e el nostro poder? (Varda anca la ilustrassion)

¹¹ Come ghemo visto, noantri predichemo parché amemo le bone notìssie e le persone. Ma el pi importante l’è el nostro amor par Geovà. Savemo che podemo lodar a Geovà e el so nome par meso dela predicassion. (Ledi Apocalisse 4:11.f) Noantri semo sicuri che Geovà el mèrita ricever la glòria, el onor e el poder. Noantri demo onor e glòria a Geovà quando mostremo ai altri che lori i pol esser sicuri che lu el ga ‘creà tute le robe’ e che lu el ne ga dato la vita. E podemo darghe el nostro poder quando doperemo la nostra forsa, el nostro tempo e quel che ghemo par far el nostro meio nela predicassion. (Mat. 6:33; Luc. 13:24; Col. 3:23) Semo sempre premosi de parlar sora Geovà, parché lo amemo tanto e volemo insegnar ai altri sora el so nome e le so bele qualità.

12. Come che podemo santificar el nome de Geovà nela predicassion?

¹² Par causa del nostro amor par Geovà, volemo santificar el so nome. (Mat. 6:9) Questo vol dir che volemo parlar ai altri che le brute robe che Sàtana el ga dito sora Geovà le ze busie. (Gén. 3:1-5; Giò 2:4; Gio. 8:44) Alora, quando semo nela predicassion, volemo tanto parlar la verità sora Geovà a tuti quei che i vol scoltarne. Volemo che tuti i sàpia che lu l’è perfeto e giusto e che la so pi granda qualità la ze el amor. Anca volemo insegnarghe che tuti i gavarà pace e felicità par meso del Regno de Dio. (Sal. 37:10, 11, 29; 1 Gio. 4:8) Quando parlemo ai altri de queste robe sora Geovà, semo boni de santificar el so nome e restemo pròpio contenti de saver che semo drio viver come Testimònie de Geovà. Come cossita?

13. Parché che restemo contenti de esser cognossesti come Testimònie de Geovà? (Isaia 43:10-12)

¹³ Geovà el ne ga scoliesto par esser so “testimònie”. (Ledi Isaia 43:10-12.g) Arquanti ani indrio, el Corpo Governante el ga scrito una carta che la disea: “La roba pi importante che ghemo nela vita la ze esser cognossesti come Testimònie de Geovà.”h Come cossita? Metemo dir che te sì stà acusà de far una roba sbaliada e che te tocarà ndar al tribunal. Te gavarissi bisogno de una testimònia par dirghe a tuti che no te ghè mia fato quela bruta roba. Chi che te scolierissi? Sicuro che te scolierissi una persona che te cognossi, che te te fidi, che anca i altri i se fida e che tuti i creda che quel che la dise l’è vero. L’è pròpio questo che Geovà el ga fato quando el ga scoliesto le so testimònie. Alora, restemo pròpio contenti de saver che Geovà el ne cognosse e el se fida che ndaremo parlar ai altri la verità sora lu. Cossita, ghemo de far tuto quel che podemo par parlar ai altri che le brute robe che Sàtana el ga dito le ze busie. L’è par meso dela predicassion che mostremo che semo pròpio Testimònie de Geovà. — Sal. 83:18; Rom. 10:13-15.

SEITAREMO A PREDICAR FIN EL FIN

14. Che bele robe le podarà suceder nel futuro?

¹⁴ Semo premosi de veder le robe che le ndarà suceder. Col aiuto de Geovà, pol esser che arquante persone le acete le verità vanti che scomìnsie la granda tribolassion. E restemo maraveiadi de pensar in quel che sucederà dopo che scomìnsia la època pi bruta de tute. Pol esser che arquante persone no le volarà pi far parte del bruto mondo de Sàtana e le ndarà adorar a Geovà insieme a noantri. — Ati 13:48.

15-16. Cossa che seitaremo far e fin quando?

¹⁵ Par intanto, ghemo de predicar le bone notìssie del Regno de Dio in tuta la Tera, che l’è un laoro che mai pi faremo. Anca ne ocore parlar ai altri quel che presto ndarà suceder. Le persone le ga de saver che el fin del mondo de Sàtana l’è pròpio darente. Alora, quando vegnarà el giorno de giulgamento, lori i saverà che quel che parleino vegnea de Geovà. — Eze. 38:23.

¹⁶ Alora, cossa che seitaremo a far? Ndaremo predicar par causa del nostro amor par le bone notìssie, par le persone e par el nostro caro Dio, Geovà. Seitaremo a sforsarse de far questo laoro fin che Geovà el dise: “El laoro de predicassion l’è fato!”