Parché el Regno de Dio l’è importante par Gesù?

Gesù el ga doperà tanto del so tempo par predicar le bone notìssie del Regno de Dio qua nela Tera. (Luca 8:1) Lu el ga caminà par sentene de chilòmetri in Israel par insegnar ale persone sora el Regno de Dio. El so laoro l’è scrito nei quatro Vangeli che i parla de pi de sento volte sora el Regno. Quasi tute le volte l’è stà Gesù che el ga parlà sora el Regno e sicuro che el ga parlà tante de pi volte sora questo! — Gioani 21:25.

Parché che el Regno de Dio l’era tanto importante par Gesù? Par esémpio, lu el savea che Dio lo gavea scoliesto par esser Rè de questo Regno. (Isaia 9:6; Luca 22:28-30) Ma lu no’l volea gaver el poder o la glòria. (Mateo 11:29; Marco 10:17, 18) Gesù no’l ga mia predicà sora el Regno de Dio parché el pensea in lu. Ma el Regno de Dio l’era e el seita esser tanto importante par Gesùa par causa dele robe che questo Regno el farà par el so Pare nel cielo e par i so dissìpoli fedeli.

COSSA CHE EL REGNO EL NDARÀ FAR PAR EL PARE DE GESÙ?

Gesù el ama tanto al so Pare. (Proverbi 8:30; Gioani 14:31) A lu ghe piase tanto le qualità de so Pare, come el amor, la compassion e la giustìssia. (Deuteronómio 32:4; Isaia 49:15; 1 Gioani 4:8) Alora, semo sicuri che Gesù el òdia le busie che tanti i dise sora el so Pare. Par esémpio, che Dio no’l se preocupa col sofrimento dele persone e che el vol che noantri sofrimo. Par quela che Gesù el ga parlà tanto sora le bone notìssie del Regno. Lu el savea che el Regno ndaria mostrar che quel che i dise sora Dio l’è una busia. (Mateo 4:23; 6:9, 10) Come questo ndaria suceder?

Geovà el ndarà doperar el so Regno par cambiar le robe nela Tera. ‘Lu el sugarà tute le làgrime’ dei oci de quei che i ze fedeli a lu. Lu el ndarà finir cola ‘morte, cola tristessa, col piander e col dolor.’ (Apocalisse 21:3, 4) Cossita Dio el ndarà doperar el so Regno par finir con tuto quel che ne fà sofrir.b

Alora l’è fàcile de capir parché che Gesù el volea tanto parlar ale persone sora el Regno. Lu el savea che questo Regno ndaria mostrar che el so Pare el ga tanto poder e l’è misericordioso. (Tiago 5:11) Gesù anca el savea che questo Regno ndaria far tanto ben a tute le persone fedele.

COSSA CHE EL REGNO EL NDARÀ FAR PAR LE PERSONE FEDELE?

Gesù el ga vivesto tanto tempo col so Pare vanti de vegner ala Tera. Par meso del Fiol, el Pare el ga creà tute le robe. Par esémpio, i cieli, tante stele, galàssie, la Tera e tute le robe che ghen’è sora ela. (Colossensi 1:15, 16) E de tute le robe che le ze state creade, Gesù el ghe piasea de pi i umani. — Proverbi 8:31.

Quando Gesù el predichea, lu el mostrea tanto amor par le persone. Del scomìnsio, lu el ga mostrà che l’era vegnesto ala Tera par predicar le bone notìssie a quei che i gavea de bisogno. (Luca 4:18) Lu el ga parlà, ma anca el ga mostrà el so amor ale persone una volta dopo nantra. Par esémpio, quando tante persone le ze vegneste darente par scoltarlo, ghe ga fato pecà a Gesù e lu “el ga guario tuti i maladi.” (Mateo 14:14) Quando un leproso el ga dito che Gesù el podea guarirlo se el volesse, Gesù el ga mostrà che lo amea. Quando lo ga guario, Gesù el ga dito con tanto amor: ‘Mi vui, deventa neto.’ (Luca 5:12, 13) Dopo, quando el ga visto la so amiga Maria piander par causa dela morte del so fradel, Làsaro, Gesù l’è restà tanto triste e anca el ga piandesto. (Gioani 11:32-36) Alora, Gesù el ga fato una roba de maraveiarse. Lu el ga ressussità Làsaro, anca se lu l’era morto fea quatro giorni! — Gioani 11:38-44.

Sicuro che Gesù el savea che no l’era el tempo de finir fora con tuti i problemi dele persone. Lu el savea che tuti quei che lu el gavea guario i ndaria restar maladi nantra volta e quei che lu el gavea ressussità i ndaria morir nantra volta. Gesù anca el savea che el Regno de Dio ndaria finir con tuti questi problemi. Par quela che lu no’l ga fato sol miràcoli, ma el ga anca predicà tanto sora “le bone notìssie del Regno.” (Mateo 9:35) I miràcoli che Gesù el ga fato i ze stati sol par mostrar cossa che el Regno de Dio el ndarà far in tuta la Tera. Vardemo le promesse dela Bìblia sora questo tempo.

• 

  No ghen sarà pi problemi de salute.

  “In quel tempo i oci dei orbi i sarà verti, e le récie dei sordi le sarà verte. In quel tempo el sòto el ndarà saltar come el servo e la lèngua de quei che no i parla i ndarà osar de contenta. E gnanca un residente el dirà: ‘Son malà.’” — Isaia 33:24; 35:5, 6.

• 

  No ghen sarà pi la morte.

  “I giusti i sarà paroni dela tera e i viverà par sempre ntela tera.” — Sal 37:29.

  “Lu el finirà cola morte par sempre, e el Sovrano Signor Geovà el sugarà le làgrime de tute le fàcie.” — Isaia 25:8.

• I morti i sarà ressussitadi.

  “Tuti quei che i ze ntele tombe memoriai i scoltarà la so voce e i vegnerà fora.” — Gioani 5:28, 29.

  “Ghen sarà una ressuression.” — Ati 24:15.

• 

  Ghen sarà case e laoro par tuti.

  “Lori i ndarà far su case e i ndarà de star in lore. I ndarà tirar su vignai e i ndarà magnar dei so fruti. No i ndarà far su case par i altri de star, gnanca i piantarà par i altri magnar. Parché i giorni del me pòpolo i sarà come i giorni de una pianta, e i me scoliesti i ndarà goder de tuto el laoro dele so man.” — Isaia 65:21, 22.

• 

  No ghen sarà pi le guere.

  “Lu el finisse cole guere in tuta la tera.” — Salmo 46:9.

  “Lore no le alsarà la spada una contra le altre, gnanca le impararà mai pi a far la guera.” — Isaia 2:4.

• 

  No ghen sarà mancansa de magnar.

  ‘Nostro Dio el ne benedirà; la tera la darà la so produssion.’ — Salmo 67:6.

  “Ghen sarà una abondansa de grani nela tera; su i monti ghen sarà ancora de pi.” — Salmo 72:16.

• Nissuni i sarà pi poareti.

  ‘I poareti no i sarà desmentegadi par sempre.’ — Salmo 9:18.

  ‘Lu el ndarà salvar el poareto che fà sùplica par aiuto e anca el ùmile e tuti quei che no i ga qualchedun che li giute. El ùmile e el poareto ndarà farghe pecà, e el ndarà salvar la vita dei poareti.’ — Salmo 72:12, 13.

Quando te vedi queste promesse, te capissi parché el Regno l’è tanto importante par Gesù? Quando l’era nela Tera, Gesù el parlea sora el Regno a tute le persone che le volesse scoltar. Lu el savea che el Regno el ndaria finir con tuti i problemi che ghen’è ancoi.

Te ga piasesto cognosser le promesse dela Bìblia sora el Regno? Ma, come che te pol imparar de pi sora el Regno? Cossa che te pol far par ricever queste benedission?