“Paolo el ga ringrassià a Dio e el se ga fato coraio”

Quando la congregassion de Roma la ga savesto che Paolo l’era drio rivar, un grupo de fradei i ga viaià intorno de 64 chilòmetri par catarlo. Come che Paolo el se ga sentio quando el ga visto questa dimostrassion de amor dei fradei? “Quando li ga visti, Paolo el ga ringrassià a Dio e el se ga fato coraio.” (Ati 28:15) Tuti i savea che Paolo sempre el incoraiea le congregassion che lu el visitea. (2 Corinti 13:10) Ma adesso che Paolo l’era prisionero, l’è stà lu che el ga ricevesto incoraiamento dei fradei.

Ancoi, i superintendenti de sircuito i viaia de congregassion in congregassion par incoraiar i fradei. Come tuti noantri, anca lori dele volte i se sente strachi, ansiosi o desanimadi. La pròssima volta che el superintendente de sircuito e la so sposa i vìsita la to congregassion, cossa che ti te pol far par incoraiarli? — Romani 1:11, 12.

• 

  Daghe apoio ala riunion de predicassion. Ghe dà incoraiamento al superintendente de sircuito veder i publicadori far sacrifissi par apoiar la stimana dela vìsita. (1 Tessalonissensi 1:2, 3; 2:20) Gheto belche pensà de far el pioniero ausiliar nel mese dela vìsita? Te podaria ndar predicar col superintendente o cola so sposa, tanto de casa in casa come far studi e vìsite? Lori i ghe piase tanto de predicar con diferenti fradei, anca con quei pi novi e con quei che i cata che no i ze tanto boni de predicar.

• 

  Ricévili ben. Te podaria darghe un posto par star quela stimana o una refession? Cossita te mostri che te ami el superintendente e la so sposa. Lori no i vol che ti te fae qualcossa de spessial o massa caro. — Luca 10:38-42.

• 

  Scolta e obedissi ale so orientassion e ai so consili. El superintendente de sircuito el ne giuta con amor a veder come che podemo servir meio a Geovà. Dele volte, lu el ga de darne consili ben forti. (1 Corinti 5:1-5) E lu el resta tanto contento quando noantri semo obedienti e acetemo de cuor la so orientassion. — Ebrei 13:17.

• 

  Mostra che te dè valor al so laoro. Dighe al superintendente de sircuito e ala so sposa come che te ga giutà quel che lori i fà. Te pol dirlo a lori o te pol scriverlo nte un carton. — Colossensi 3:15.