STÙDIO 28
El Regno de Dio l’è belche drio governar!
“El regno del mondo l’è deventà el Regno del nostro Signor e del so Cristo.” — APO. 11:15.
CÀNTICO 22 Che vegna el Regno de Dio!
COSSA CHE NDAREMO IMPARAR?a
1. (a) Che robe le ze drio suceder nel mondo de ancoi? (b) Cossa che le robe che le ze drio suceder le prova?
QUANDO le persone le vede quel che sucede nel mondo no le ze bone de creder che le robe le restarà meio. Parché? Parché le fameie le ze drio spartirse, le persone le ze drio restar cada volta pi violente e pensar sol in lore stesse. E tante no le ze pi bone de fidarse in quei che i ga autorità. Ma tute queste robe le prova che suito ghen sarà un mondo meio. Come cossita? La Bìblia belche la disea che le persone le faria queste robe “nei ùltimi giorni”. (2 Tim. 3:1-5) Tute le persone che le crede nela Bìblia e le vede quel che l’è drio suceder nel mondo, le capisse che el Regno de Dio l’è belche drio governar. Adesso, ndaremo veder altre professie che le ne giutarà a far pi forte la nostra fede che el Regno de Dio l’è belche drio governar.
I libri de Daniel e de Apocalisse i ne giuta a capir come arquante professie le se ga belche realisà e le ze drio realisarse ancoi. Anca ne giuta a veder che tute le robe le ze drio suceder nel tempo che Geovà el vol (Vedi el paràgrafo 2.)
2. Cossa che ndaremo veder in questo stùdio e cossa che saremo boni de capir? (Parla anca sora la ilustrassion dela prima pàgina.)
2 In questo stùdio, ndaremo veder (1) una professia che ne giuta a capir quando el Regno de Dio el ga scominsià a governar, (2) professie che le ne giuta a esser sicuri che Gesù l’è deventà el Rè del Regno de Dio nel cielo, e (3) professie che le ne mostra come che i nemighi del Regno de Dio i sarà destruti. Quando studiemo sora queste professie, capimo meio in che època semo drio viver e che Geovà el fà tuto nela ora giusta. Podemo dir che cada professia la ze come una parte de un disegno. Alora, quando tute le parte le ze meteste insieme, semo boni de veder tuto el disegno.
QUANDO CHE GESÙ EL GA SCOMINSIÀ A GOVERNAR?
3. Cossa che la professia de Daniel 7:13, 14 la ne assa sicuri sora Gesù?
3 La professia de Daniel 7:13, 14 la ne assa sicuri che Gesù Cristo el saria el meio governante par el Regno de Dio. La professia la ga anca dito che gnanca un governante el ndaria ciapar el so posto e le persone de tute le nassion le ndaria servirlo contente. Nantra professia de Daniel la disea che Gesù el ndaria scominsiar a governar nel fin dei “sete tempi”. Ma sarà che podemo saver quando Gesù l’è deventà rè?
4. Come che Daniel 4:10-17 el ne giuta a capir quando che Gesù l’è deventà rè? (Varda anca la nota.)
4 Ledi Daniel 4:10-17.b I “sete tempi” i rapresenta 2.520 ani. Questo tempo el ga scominsià in 607 vanti de Cristo quando Babilònia la ga tolto el poder del rè che governea Gerusalen. E quando che i se ga finio i sete tempi? Nel ano 1914. In questo ano Geovà el ga fato Gesù, che el ga el dirito de governar, deventar Rè del so Regno.c — Eze. 21:25-27.
5. Parché che l’è bon capir la professia sora i “sete tempi”?
5 Come che questa professia la ne giuta? Quando capimo la professia sora i “sete tempi”, se fidemo de pi che Geovà el ndarà far quel che el ga prometesto nela ora giusta. Par esémpio, Geovà el ga scoliesto el tempo giusto par Gesù deventar Rè. Questo vol dir che tute le altre professie le ndarà suceder nela ora giusta. Alora, podemo esser sicuri che “el giorno de Geovà no’l tardigarà!”. — Aba. 2:3.
COME CHE SAVEMO CHE GESÙ L’È DEVENTÀ RÈ DEL REGNO DE DIO?
6. (a) Come che savemo che Gesù l’è belche drio governar? (b) Come che Apocalisse 6:2-8 el prova che Gesù l’è belche drio governar?
6 Quando Gesù l’era drio finir el so laoro qua nela Tera, el ga dito quel che ndaria suceder dopo che el scominsiesse a governar nel cielo. Par esémpio, Gesù el ga dito che ghen saria guere, fame, teremoti e brute malatie nte un posto dopo l’altro. La pandemia dela COVID-19 la ze un esémpio de una bruta malatia. E la Bìblia la parla che tute queste robe le faria parte del “segnal” che Gesù el saria drio governar. (Mat. 24:3, 7; Luc. 21:7, 10, 11) De pi de 60 ani dopo dela so morte e ressuression, Gesù el ga parlà al apòstolo Gioani sora le brute robe che le ndaria suceder qua nela Tera. (Ledi Apocalisse 6:2-8.d) Tute queste robe le ga scominsià a suceder quando Gesù l’è deventà Rè in 1914.
7. Parché che dopo che Gesù l’è deventà Rè le robe le ze ancora pedo qua nela Tera?
7 Parché che le robe qua nela Tera le ze ancora pedo dopo che Gesù l’è deventà Rè? Parché Gesù el ga fato guera contra Sàtana e i so demoni quando l’è deventà Rè. (Apo. 6:2) E el capìtolo 12 de Apocalisse parla che Sàtana e i so demoni i ga perso la guera e i ze stati paradi via qua ala Tera. Alora, Sàtana l’è tanto inrabià e l’è drio far le persone sofrir tanto. — Apo. 12:7-12.
Ne despiase veder le robe rugne che le ze drio suceder, ma le ne mostra che le professie le ze drio realisarse. Questo ne assa sicuri che el Regno de Dio l’è belche drio governar (Vedi el paràgrafo 8.)
8. Cossa che le brute robe che le ze drio suceder le prova?
8 Come queste professie le ne giuta? Le brute robe che le ze drio suceder e quel che le persone le ze drio far le prova che Gesù l’è belche drio governar. Par quela no ghemo de restar tanto disgustadi con quel che le persone le fà, parché le professie le ze drio realisarse. (Sal. 37:1) E savemo che fin el Armagedon le robe le restarà cada volta pedo. (Mar. 13:8; 2 Tim. 3:13) Sicuro che restemo tanto contenti de servir a un Dio che el ne ama tanto e che el ne spiega parché che queste robe le ze drio suceder.
COME CHE I NEMIGHI DE DIO I SARÀ FINIDI FORA?
9. (a) Cossa che Daniel 2:28, 31-35 el dise sora la ùltima potensa mondial? (b) Quando che questa potensa la ga scominsià a governar?
9 Noantri semo drio veder la professia de Daniel 2:28e, 31-35f realisarse ancoi. (Ledi.) Par meso de quel che Nabucodonosor el se ga insognà, Geovà el ga dito quel che ndaria suceder nei ùltimi giorni, dopo che Cristo el scominsiesse a governar. Nabucodonosor el se ga insognà con una stàtua che la rapresentea i nemighi de Gesù qua nela Tera. Questa stàtua la gavea i pié de fero e de baro. I pié i rapresenta la ùltima potensa mondial e la ze drio governar ancoi. Ma chi che la ze questa potensa mondial? Nela Prima Guera Mondial, la Gran-Bretagna e i Stati Unidi i se ga metesti insieme par deventar la Potensa Mondial Anglo-Americana. La stàtua la ga anca mostrà due robe che faria questa potensa esser difarente de quele che le ga governà vanti.
10. (a) Come che la professia de Daniel sora la Potensa Mondial Anglo-Americana la ze drio realisarse? (b) Parché che ghemo de star atenti col baro? (Vedi el quadro “Stà atento col baro!”)
10 Prima, la Potensa Mondial Anglo-Americana no la ze come le altre potense che le ze fate de una roba sol come el oro o el argento. Ela la ze fata de due robe, o sia, el fero e el baro. El baro el rapresenta le persone. (Dan. 2:43) Ancoi, vedemo che le persone le seita a dir quel che i governanti i ga de far. Par esémpio, quando le ga de scòlier i governanti, quando le fà protesti e par meso dele organisassion che lota par i governi far quel che le vol. Par quela che i governanti no i ze boni de far tuto quel che i vol.
11. Cossa che ne assa sicuri che suito i governi i sarà finidi fora?
11 Che nantra roba fà dela Potensa Mondial Anglo-Americana difarente de quel’altre? La ze la ùltima potensa mondial che la Bìblia la dise che ghen saria. Alora, dopo de questa potensa mondial no ghen sarà mia nantra. Cossa che ndarà suceder con questa potensa? El Regno de Dio el ndarà finirla fora insieme coi altri governi nel Armagedon.g — Apo. 16:13, 14, 16; 19:19, 20.
12. Che altra prova el libro de Daniel el ne dà che semo darente del fin?
12 Come che questa professia la ne giuta? La professia de Daniel la ne dà altre prove che semo drio viver nei ùltimi giorni. Par esémpio, de pi de 2.500 ani indrio, Daniel el ga dito che dopo de Babilònia ghen saria altre quatro potense mondiai che le ndaria governar sora el pòpolo de Dio e che la ùltima la saria la Potensa Mondial Anglo-Americana. Come che se sentimo de saverlo? Tanto contenti parché questo mostra che suito el Regno de Dio el finirà fora con tuti i governi e el governarà tuta la Tera. — Dan. 2:44.
13. (a) Chi che l’è el “otavo rè” e i “diese rè” de Apocalisse 17:9-12? (b) Come che questa professia la ze drio realisarse?
13 Ledi Apocalisse 17:9-12.h Dopo dela Prima Guera Mondial, se ga realisà anca nantra professia sora i ùltimi giorni. Come i governanti del mondo i volea pace, in genaro de 1920 lori i ga fato la Liga dele Nassion. In otobre de 1945, la ze deventada le Nassion Unide. La professia la mostra che le Nassion Unide le ze anca el “otavo rè”. Ma ela no la ze una potensa mondial, parché la ga bisogno del aiuto dei altri governi, che la Bìblia la dise che i ze i “diese rè”.
14-15. (a) Cossa che Apocalisse 17:3-5 dise sora “Babilònia, la Granda”? (b) Cossa che l’è drio suceder col rio de protession de Babilònia, la Granda?
14 Ledi Apocalisse 17:3-5i. Nte una vision, Gioani el ga visto una prostituta, che la ga nome “Babilònia, la Granda”. Questa prostituta la rapresenta tute le religion false del mondo. Come che questa vision la ze drio realisarse? Romai fà tanti ani che le religion false e i governi i giuta un al altro. Ma suito Geovà el ndarà far che i governanti i gàpia “la voia de realisar el so pensamento”. Cossa che ndarà suceder par via de questo? Questi governi, o sia, i “diese rè” i ndarà atacar e finir fora con tute le religion false. — Apo. 17:1, 2, 16, 17.
15 Come che savemo che Babilònia, la Granda, suito la sarà finida fora? Par giutarne a capir, podemo ricordarse che la cità de Babilònia la gavea la àqua del rio Eufrate intorno par darghe protession. El libro de Apocalisse el mostra che i milioni de persone che le va nele religion false le ze come questo rio de protession. (Apo. 17:15) Apocalisse anca el dise che questa àqua la se sugaria, o sia, che le persone no le ndaria pi nele religion false. (Apo. 16:12) Questa professia la ze pròpio drio realisarse ancoi parché tante persone le ga assà le so religion e le va in serca de aiuto in altri posti.
16. Parché che i servi de Dio i pol restar contenti cole professie sora le Nassion Unide e Babilònia, la Granda?
16 Come che queste professie le ne giuta? Ghemo visto che le professie sora le Nassion Unide e sora le persone che le assaria de ndar nele religion false le ze drio realisarse. Questo prova che semo nei ùltimi giorni. L’è vera che le religion false no le ndarà finirse sol parché nissun ghe va pi drio. Come ghemo capio, Geovà el ndarà doperar i “diese rè”, che i ze i governi che i giuta le Nassion Unide, a far quel che lu el vol. Nte un giorno che nissun l’è drio spetar, questi governi i ndarà finir fora con Babilònia, la Granda.j (Apo. 18:8-10) Le persone de tuto el mondo le saverà che le religion false le ze state finide fora e fursi ghen sarà tante dificoltà. Ma quei che i serve a Dio i restarà tanto contenti. Parché? Prima, parché no ghen sarà pi le religion false. Seconda, parché pena dopo Dio el ndarà finir fora con questo bruto mondo. — Luc. 21:28.
SÌPIA SICURO CHE GEOVÀ EL NDARÀ PROTEGER I SO SERVI
17-18. (a) Come che podemo far pi forte la nostra fede? (b) Cossa che ndaremo imparar nel pròssimo stùdio?
17 Daniel el ga dito che ghen saria tanto saver sora la verità dela Bìblia nei ùltimi giorni. Questo l’è pròpio drio suceder parché semo boni de capir le professie sora i nostri giorni. (Dan. 12:4, 9, 10) Veder le professie realisarse del tuto ne fà rispetar cada volta de pi Geovà e la so Parola. (Isa. 46:10; 55:11) Alora volemo seitar a studiar la Bìblia e giutar anca i altri a gaver una forte amicìssia con Geovà. Cossita gavaremo la protession de Geovà e seitaremo a gaver pace. — Isa. 26:3.
18 Cossa che ndaremo imparar nel pròssimo stùdio? Ndaremo studiar le professie sora i servi de Dio nel tempo del fin. Ndaremo veder come queste professie le ne giuta a capir che semo nei ùltimi giorni e prove che nostro Rè, Gesù Cristo, l’è drio tender dei servi de Dio.
CÀNTICO 61 Avanti, Testimònie!
a Noantri semo drio viver nte una època tanto spessial. El Regno de Dio l’è belche drio governar come le professie dela Bìblia le ga dito. In questo stùdio, ndaremo veder arquante de queste professie. Ndaremo anca veder come lore le ne giuta a far pi forte la nostra fede in Geovà, e a seitar tranquili adesso e nel futuro.
b (Daniel 4:10-17) “‘Nele vision che go bio intanto che ero butà do in leto, go visto una pianta in meso la tera, e la era tanto granda. 11 La pianta la ze vegnesta granda e forte fin che la ze rivada al cielo, e tuti nela tera i era boni de vederla. 12 La gavea bele foie, tanti fruti e magnar par tuti. Le bèstie de mato le restea soto la so ombria e i osei i vivea nei so rami, e tute le persone e le bèstie le magnea dei so fruti. 13 “‘Nel me leto, intanto che gavea le vision, go visto un vigilante, un santo, che l’era drio vegner do del cielo. 14 Lu el ga osà con forsa: “Buté do la pianta, taié i so rami, fé cascar do le so foie e spaié i so fruti! Fé le bèstie scampar via de soto dela pianta e i osei dei so rami. 15 Ma assé la soca e le radise nela tera, con serci de fero e de rame, in meso el mato. El sguasso dei cieli la bagnarà e la restarà cole bèstie de mato 16 Cambié el so cuor. Invesse de un cuor umano, déghe un cuor de bèstia. E sete tempi i ga de passar sora ela. 17 Questo l’è un comandamento dei vigilanti e quei che i lo dise ze i santi. Cossita, tuti quei che i vive i ga de saver che el Altìssimo l’è el Governante nel regno dela umanità. Lu lo dà a chi el vol, e el mete fin el omo pi ùmile par governarlo.”
c Vedi el punto 4 dela lession 32 del libro Te pol viver felice par sempre!, e el vìdeo El Regno de Dio ga scominsià governar ntel 1914 nel site jw.org.
d (Apocalisse 6:2-8) Mi go visto un caval bianco. El so cavaliero el gavea un arco; lu el ga ricevesto una corona, e lu l’è ndà via par vinser e completar la so vitòria. 3 Quando lu el ga verto el secondo selo, go scoltà el secondo cherubin dir: “Vien!” 4 E l’è ndà fora nantro caval, col color de fogo. El cavaliero el ga ricevesto el poder de cavar la pace dela tera, parché i òmini i se copasse un al altro, e lu el ga ricevesto una granda spada. 5 Quando lu el ga verto el terso selo, go scoltà el terso cherubin dir: “Vien!” E go visto un caval negro. E el cavaliero el gavea una balansa ntela man. 6 In meso dei quatro cherubini go scoltà una voce, che la disea: “Un litro de formento par un denàrio e tre litri de sevada par un denàrio. No stà far dano al oio e al vin.” 7 Quando lu el ga verto el quarto selo, go scoltà el quarto cherubin dir: “Vien!” 8 E go visto un caval sensa color; e el so cavaliero l’era ciamà de Morte. E el Sepolcro el ndea de drio ben darente. E le ga ricevesto autorità sora la quarta parte dela tera, par copar con una spada longa, e cola fame, cole praghe che copa, e cole bèstie dela tera.
e (Daniel 2:28) Ma ghen’è un Dio nel cielo e lu el spiega i segreti. Lu el ga mostrà al rè Nabucodonosor quel che ndarà suceder nei ùltimi giorni. Questo l’è quel che te ghè insognà e queste le ze le vision che te ghè bio intanto che te eri butà do nel to leto.
f (Daniel 2:31-35) “Ò rè, nela vision, te ghè visto una stàtua tanto granda. Questa stàtua che la era tanto granda e che la slusea la era davanti de ti e la fea paura. 32 La testa dela stàtua la era de oro puro, el peto e i brassi i era de argento, la pansa e la parte de sora dele gambe le era de rame, 33 le gambe le era de fero e i pié i era parte de fero e parte de baro. 34 Intanto che te eri drio vardar, un sasso l’è stà taià via de un monte, sensa esser stà una persona a taiarlo. El sasso l’è vegnesto contra i pié dela stàtua che i era de fero e baro, e li ga fati a tochi. 35 Alora, el fero, el baro, el rame, el argento e el oro i ze stati fati a tochi nte un sol colpo e i ze restadi come la paia che la zola nei campi nel istà. El vento li ga portà via e no se podea pi catarli. Ma el sasso che l’è vegnesto contra la stàtua l’è deventà un grando monte e el ga querto tuta la tera.
g Par capir meio le professie de Daniel, varda La Sentinela de 15 de giugno de 2012, pàgine 14-19.
h (Apocalisse 17:9-12) “Par questo che ghen’è bisogno de una mente sàbia: le sete teste le rapresenta sete montagne, ndove che la dona la ze sentada. 10 E ghen’è sete rè: sinque i ze cascadi, un l’è, e el altro ancora no l’è rivà, ma, quando el rivarà, el durarà par poco tempo. 11 E la bèstia cativa che la era ma no la ze, la ze anca el otavo rè, ma la vien dei sete, e la sarà finida fora. 12 “I diese corni che te ghè visto i rapresenta diese rè che no i ga gnancora ricevesto un regno. Ma lori i ga ricevesto autorità come rè par una ora insieme cola bèstia cativa.
i (Apocalisse 17:3-5) Alora el me ga menà par meso del spìrito nte un deserto. E go visto una dona sentada sora una bèstia cativa de color scarlate, che la era piena de nomi che i insultea a Dio e la gavea sete teste e diese corni. 4 La dona la era vestida de color viola e scarlate e la doperea oro, sassi pressiosi e pèrole; nela man la gavea un càlisse de oro pien de robe sporche e de robe impure dela so imoralità sessual. 5 E nel so viso ghen’era scrito un nome, un mistero: “Babilónia, la Granda, la mare dele prostitute e dele robe sporche dela tera.”
j Par capir meio quel che ndarà suceder nel futuro, varda el capìtolo 21 del libro El Regno de Dio l’è drio Governar!