Cossa che i gióveni i ga de far par esser bravi servi de Geovà?

1. Cossa che i gióveni i ga de far par esser bravi servi de Geovà?

EL RÈ Davi el ga dito al so fiol Salomon: ‘Sìpia un omo bravo e forte.’ (1 Rè 2:1-3) Ancoi, tuti i gióveni che i vol ndar drio el esémpio de Gesù i ga de far pròpio cossita. Par quela, ghe toca obedir a Geovà e meter in pràtica i so consili. (Luc. 2:52) Ma parché che l’è importante che i gióveni i devente bravi servi de Geovà?

2-3. Parché che l’è importante che i gióveni i devente bravi servi de Geovà?

² I fradei i ga tanta responsabilità nela congregassion e nela fameia. Semo sicuri che te volarè far ben tuti i to laori quando te vien grando. Fursi te pensi de far de pi par Geovà, esser un servo ministerial o un ansiano. Pol esser che te pensi de maridarte e gaver fioi. (Efe. 6:4; 1 Tim. 3:1) Ma par far ben tute queste robe, te toca esser un bravo servo de Geovà.b

³ Ma cossa che pol giutarte a esser un bravo servo de Geovà e a pareciarte par tender dele responsabilità che te gavarè nel futuro? Imparar arquante robe e gaver bele qualità. Ndemo veder cossa che pol giutarte.

DEVENTA UN BRAVO SERVO DE GEOVÀ

4. Ndove che te pol catar bei esempi? (Varda anca la ilustrassion.)

⁴ Fà compagno bei esempi. Nela Bìblia, podemo imparar de tanti gióveni che i ga servio a Geovà. Tuti lori i ga mostrà el so amor par Dio e i ga giutà a tender del so pòpolo. Par esémpio, te pol imparar col bel esémpio de Gesù. (1 Pie. 2:21) Podemo imparar anca de bravi servi de Geovà dela nostra fameia e dela congregassion. (Ebr. 13:7) Intanto che te impari sora questi bei esempi, pensa nele so bele qualità e proa far compagno a lori. — Ebr. 12:1, 2. 

5. (a) Cossa che pol giutarne a pensar ben vanti de far qualcossa? (b) Parché che l’è importante far cossita? (Salmo 119:9)

⁵ Proa capir ben se quel che te ndarè far l’è giusto. (Pro. 3:21) Una persona cossita sempre la pensa ben vanti dessider cossa che la ndarà far. Alora, sempre te ghè de pensar se quel che te ndarè far l’è giusto. Ancoi, ghen’è tanti gióveni che sol i fà quel che i pensa che l’è giusto e quel che i vol lori. (Pro. 7:7; 29:11) E la television, i filmi e la internet i pol farne pensar compagno de quei che no i serve a Geovà. Alora, cossa pol giutarte a pensar ben vanti de far qualcossa? Proa imparar come che Geovà el pensa e parché questo l’è bon par ti. Dopo, dopera quel che te ghè imparà par far quel che ghe piase a Geovà. (Ledi Salmo 119:9.c) Parché che l’è importante far cossita? Se te impari a pensar dela maniera giusta, te deventarè un bravo servo de Geovà. (Pro. 2:11, 12; Ebr. 5:14) Adesso, ndemo veder come pensar ben vanti de far qualcossa pol giutarte a (1) mostrar rispeto par le sorele e (2) far bone dessision sora come te te rangi e le robe che te meti su.

6. Come che quei che i pensa ben vanti de far qualcossa i mostra rispeto ale sorele?

⁶ Un omo che el pensa ben vanti de far qualcossa el mostra rispeto par le sorele. Pol esser che un gióveno el gàpia voia de cognosser meio una sorela par maridarse, e lu no l’è drio far gnente de sbalià. Ma saria sbalià far finta che el vol smorosar una sorela se no’l vol mia. Alora, lu el ga de star atento a quel che el dise, scrive e fà. (1 Tim. 5:1, 2) E se te sì drio smorosar, mai te restarè ti ti sol cola to morosa, parché i altri i podaria pensar robe sbaliade sora ela. — 1 Cor. 6:18.

7. Come che pensar ben pol giutarte quando te vè scòlier le robe che te ndarè meterte su e come che te te rangi i cavei?

⁷ I gióveni anca i pol mostrar che i vol far le meio dessision par meso dele robe che i se mete su e come i se rangia i cavei. Tanti ancoi i dopera robe che no le mostra mia rispeto a Dio. Par esémpio, ghen’è gióveni che i dopera robe massa strete o compagno dele done. Ma un gióveno che el vol ndar drio el esémpio de Gesù sempre el pensa se quel che l’è drio vestir contenta a Geovà. Par quela, domandate: ‘Sarà che le me robe de vestir mostra che fao bone dessision e rispeto i altri? Sarà che i altri i me vede come una Testimònia de Geovà?’ (1 Cor. 10:31-33; Tito 2:6) Se scoliemo ben le robe che metemo su, mostremo rispeto par i fradei e par Geovà.

8. Come che un gióveno el pol imparar a esser una persona de fidarse?

⁸ Sìpia una persona de fidarse. Un gióveno che el vol esser una persona de fidarse el proa tender de tute le so responsabilità. (Luc. 16:10) Varda el bel esémpio de Gesù. Geovà el ghe ga dato laori pròpio fadiga de far. Ma come Gesù el amea tanto a Geovà e ale persone, lu el ga dato la so vita come sacrifìssio e sempre el ga fato quel che el podea par giutar a tuti. (Gio. 13:1) Alora, fà compagno a Gesù e proa far ben i laori che te ghè. Invesse de sol far quel che te toca, sfòrsate de far sempre el to meio. (Rom. 12:11) Ricòrdate che te sì drio laorar “par Geovà e nò par òmini”. (Col. 3:23) Ma, se no te sè mia come far un laoro, sìpia ùmile e domanda aiuto ai altri fradei. E gàpia in mente che no te sì mia perfeto e che te ndarè sbaliar. — Pro. 11:2.

BELE ROBE CHE TE POL IMPARAR A FAR

9. Parché che i gióveni i ga de imparar a far arquante robe?

⁹ Par esser un bravo servo de Geovà, te toca imparar a far arquante robe. Cossita, te sarè bon de giutar nela congregassion, catar un laoro, tender dela to fameia e gaver bele amicìssie. Vedemo arquante bele robe che te pol far.

10-11. Parché che l’è bon che i gióveni i impare a leder e a scriver ben? (Salmo 1:1-3) (Varda anca el ritrato.)

¹⁰ Impara a leder e a scriver ben. La Bìblia la dise che tuto ndarà ben cola persona che la lede la Bìblia e la ghe pensa sora. (Ledi Salmo 1:1-3.) Quando una persona la lede la Bìblia tuti i giorni, la ze bona de capir come Geovà el pensa e de meter in pràtica i consili dela Bìblia. (Pro. 1:3, 4) Ghemo bisogno de òmini cossita nela congregassion. Parché?d

¹¹ I fradei che i sa doperar ben la Bìblia par insegnar e darghe consili i ze boni de giutar tanto la congregassion. (Tito 1:9) Alora, se te sè leder e scriver ben, te ndarè pareciar boni discorsi e boni comentari che incoraia i fradei. Te podarè anca scriver do bele robe de quel che te studi e che te scolti nele riunion, assemblee e congressi. Cossita, to fede la deventarà cada volta pi forte e te podarè incoraiar i to fradei.

12. Cossa che pol giutarte a esser bon de discorer coi altri?

¹² Impara a parlar quel che te pensi e a capir i altri. Un bravo servo de Geovà el sa parlar e scoltar i altri. (Pro. 20:5) Alora, impara a star atento ala maniera che i altri i parla, ala so fàcia e ala so voce par capir come che i se sente. Ma, mai te sarè bon de esser cossita se no te discori coi altri. Par quela, invesse de restar sempre su par el telèfono o par la internet, sfòrsate de catarte coi fradei par ciacolar. — 2 Gio. 12.

13. Che altre robe i gióveni i pol imparar? (1 Timòteo 5:8) (Varda anca el ritrato.)

¹³ Impara a laorar par gaver quel che te ocore. Un bravo servo de Geovà l’è bon de tender de lu stesso e anca dela so fameia. (Ledi 1 Timòteo 5:8.) I gióveni i pol imparar un laoro con qualchedun dela so fameia o nela scola. Ma el pi importante l’è imparar quel che ghe ocore par gaver un laoro. (Ati 18:2, 3; 20:34; Efe. 4:28) Alora, sfòrsate de esser un bravo laorador e de finir del bon quel che te scomìnsi. Cossita, i altri i vederà che te sì de fidarse e sarà pi fàcile catar un laoro. Queste qualità le te giutarà anca cole responsabilità che te gavarè nel futuro.e

PARECIETE PAR LE RESPONSABILITÀ

14. Cossa che pol giutar i gióveni a far de pi par Geovà?

¹⁴ Fà de pi par Geovà. Arquanti bravi servi de Geovà i ga scominsià a far de pi ancora de gióveni. El laoro de pioniero pol giutar i gióveni a esser boni de parlar con persone difarente, sparagnar i soldi e guastarli dela maniera giusta. (Fil. 4:11-13) Tanti i ga scominsià come pionieri aussiliari, e dopo, i ze stati boni de deventar pionieri regolari. Alora, proa anca ti esser un pioniero aussiliar sempre che te pol. E ricòrdate che el laoro de pioniero l’è sol el scomìnsio de tanti bei laori che te pol far par Geovà. Par esémpio, te pol laorar nela costrussion o ndar de star in Betel.

15-16. Cossa che i gióveni i ga de far par giutar de pi nela congregassion?

¹⁵ Servo ministerial o ansiano. Tuti i fradei i ga de sforsarse par esser ansiani e giutar a tender dela congregassion. La Bìblia la dise che quei che i vol esser ansiani i “vol far un laoro tanto bon”. (1 Tim. 3:1) Ma, vanti de esser un ansiano, lu el ga de laorar come servo ministerial e giutar i ansiani a far tanti laori. I servi ministeriai e i ansiani i ze fradei ùmili che i giuta i fradei e che i fà un bel laoro nela predicassion. I gióveni i pol scominsiar a laorar come servi ministeriai con 19 ani o manco. E un bravo servo ministerial el pol esser un ansiano con 25 ani o manco.

¹⁶ Come che te pol esser bon de giutar de pi nela congregassion? Sfòrsate de gaver le qualità che te ocore e ama a Geovà, la to fameia e la congregassion. (1 Tim. 3:1-13; Tito 1:6-9; 1 Pie. 5:2, 3) Stùdia sora le qualità che te ocore e domanda che Geovà el te giute a gaverle.f

17. Cossa che un gióveno el ga de far par esser un bravo paron de fameia? (Varda anca el ritrato.)

¹⁷ Paron de fameia. Gesù el ga dito che arquanti servi de Geovà no i ndaria mia maridarse. (Mat. 19:12) Ma se te vol maridarte, Geovà el vol che el omo che l’è maridà el sìpia amigo de so dona, ghe mostre amor e la giute a gaver una forte fede. (1 Cor. 11:3; Efe. 5:28, 29) Alora, le qualità che ghemo visto in questo stùdio le te giutarà a pensar ben vanti de far qualcossa, mostrar rispeto ala to dona e esser una persona de fidarse. Cossita, te sarè pronto par esser un bravo paron de fameia.

18. Cossa che pol giutar un gióveno a pareciarse par esser un bon pare?

¹⁸ Pare. Se te te maridi, pol esser che te gavarè un fiol. Alora cossa che te ghè de far par esser un bon pare? Te pol imparar tanto con Geovà. (Efe. 6:4) Arquante volte, Geovà el ga lodà Gesù e el ga dito che lo amea. (Mat. 3:17) Compagno a Geovà, un bon pare sempre el se sforsa de lodar so fiol par quel che el fà e de dirghe che lo ama. I genitori che i va drio al esémpio de Geovà i ze boni de giutar so fioi a esser brave persone. E cossa che te pol far ancora adesso? Te pol dirghe e mostrar che te ghe vol ben a quei dela to fameia e ai fradei dela congregassion. (Gio. 15:9) Cossita, te ndarè contentar a Geovà, giutar la to fameia e la to congregassion e te sarè parecià par esser un bon pare e un bravo paron de fameia.

COSSA CHE TE NDARÈ FAR?

19-20. Cossa che pol giutar i gióveni a deventar bravi servi de Geovà? (Varda anca la ilustrassion dela prima pàgina.)

¹⁹ Se te sì un gióveno, te tocarà sforsarte tanto par deventar un bravo servo de Geovà. Alora, impara de boni esempi, pensa ben vanti de far qualcossa, sìpia una persona de fidarse, impara a far arquante robe e sìpia parecià par le responsabilità che te gavarè.

²⁰ Pol esser che te par massa fadiga far tuto quel che te ocore. Ma no stà gaver paura. Te sarè bon dàrghene fora parché Geovà el ndarà giutarte. (Isa. 41:10, 13) Ricòrdate che anca i fradei e sorele dela congregassion i ndarà giutarte. Se te deventi un bravo servo de Geovà, te gavarè tanta alegria. Ve amemo tanto gióveni fradei, e volemo che Geovà el seite a benedirve! Podé esser sicuri che ndaré deventar bravi servi de Dio. — Pro. 22:4.