STÙDIO 33
CÀNTICO 130 El amor de Geovà ne motiva a perdonar
Come che podemo far compagno a Geovà quando qualchedun fà un bruto pecato?
“Se qualchedun el fà un pecato, noantri ghemo un che el ne giuta.” — 1 GIO. 2:1.
COSSA CHE NDAREMO IMPARAR?
Ndaremo veder cossa che podemo imparar de quel che ga sucedesto nel primo sècolo in Corinto, quando un fradel el ga fato un bruto pecato.
1. Cossa che Geovà el vol par tuti?
GEOVÀ el ne ga dato la libertà de far le nostre dessision. Questo l’è un bel presente che lu el ne ga dato quando el ne ga creà, e tuti i giorni femo tante dessision. Ma la dessision pi importante dela nostra vita la ze stata de dedicar la nostra vita a Geovà e adorarlo insieme ai nostri cari fradei e sorele. Come Geovà el ama a tute le persone, lu el vol che tute le fae questa dessision. Geovà el vol che tute le persone le gàpia una bela amicìssia con lu, le sìpia felice e le viva par sempre. — Deu. 30:19, 20; Gàl. 6:7, 8.
2. Quando una persona la fà un bruto pecato, cossa che Geovà el vol che la fae? (1 Gioani 2:1)
2 Ma Geovà no’l obriga nissun a obedirghe. Invesse, lu el vol che cada un el fae la so dessision de volentiera. Ma, se una persona belche dedicada la fà un bruto pecato e no la se ciama grama, ela la ga de esser cavada via dela congregassion. (1 Cor. 5:13) Ancora cossita, Geovà el vol tanto che questa persona la se ciame grama e la sìpia nantra volta so amiga. Podemo esser sicuri de questo, parché Geovà el ga dato la vita de Gesù par perdonar i nostri pecati. (Ledi 1 Gioani 2:1.a) Lu el ne ama tanto e el vol che tuti i pecadori i se ciame grami. — Zac. 1:3; Rom. 2:4; Tia 4:8.
3. Cossa che ndaremo imparar in questo stùdio?
3 Par meso dela Bìblia, Geovà el ne mostra cossa che lu el pensa sora el pecato e sora quei che i fà bruti pecati. E lu el vol che pensemo compagno a lu. Alora, in questo stùdio ndaremo veder (1) quel che i fradei corinti i ga fato quando un fradel el ga fato un bruto pecato, (2) cossa che el apòstolo Paolo el ga dito che tuti i gavaria de far dopo che quel fradel el se gavea ciamà gramo e (3) cossa che Geovà el sente quando qualchedun fà un bruto pecato.
COSSA CHE I FRADEI IN CORINTO I GA FATO QUANDO UN FRADEL EL GA FATO UN BRUTO PECATO?
4. De acordo con 1 Corinti 5:1, 2, cossa che ga sucedesto nela congregassion in Corinto nel primo sècolo?
4 Ledi 1 Corinti 5:1, 2.b Quando l’era nel so terso viaio missionàrio, Paolo el ga savesto che una bruta roba la era drio suceder nela congregassion in Corinto. Un fradel l’era drio far imoralità cola dona del so pare. Fin le persone che no le servia a Geovà le savea che questa la era una roba tanto bruta. Ma i fradei in Corinto i pensea che no ghen’era problema se quel omo el seitesse nela congregassion anca se l’era drio far quel bruto pecato. Pol esser che lori i pensesse che questo mostrea come la misericòrdia de Geovà la ze granda con noantri che semo imperfeti. Invesse, Geovà no’l aceta mia che i so servi i fae brute robe cossita. Quei che no i fea parte dela congregassion i podaria scominsiar a parlar contra Geovà e i so servi, e fursi arquanti fradei i scominsiesse a far bruti pecati compagno a quel omo. Alora, cossa che Paolo el ga dito che i fradei in Corinto i gavaria de far?
5. De acordo con 1 Corinti 5:13, cossa che Paolo el ga dito che i fradei dela congregassion i gavaria de far, e cossa che questo vol dir? (Varda anca la ilustrassion.)
5 Ledi 1 Corinti 5:13.c Geovà el ga doperà Paolo par scriver una carta par dirghe ai fradei in Corinto che quel fradel el gavaria de esser ‘cavà via’ dela congregassion. Come che i fradei e le sorele i gavaria de tratarlo? Paolo el ga dito che lori i gavea de “assar de star insieme” a lu. Ma cossa che questo vol dir? Che lori no i gavea gnanca de “magnar con una persona cossita”. (1 Cor. 5:11) Quando magnemo insieme a una persona, passemo tempo insieme e l’è fàcile scominsiar a ciacolar. Alora, Paolo l’era drio dir che nissun dela congregassion podaria esser amigo de quel omo. Cossita, questo ndaria proteger i fradei de no ndarghe drio el so bruto esémpio. (1 Cor. 5:5-7) E se tuti dela congregassion i assesse de star insieme a quel omo, questo ndaria giutarlo. Come cossita? Lu el podaria nicorderse che el gavea assà Geovà tanto disgustà, gaver vergogna del so pecato e ciamarse gramo.
Geovà el ga doperà Paolo par scriver una carta che la disea che quel omo che no’l se gavea ciamà gramo del so bruto pecato el gavea de esser cavà via dela congregassion (Varda el paràgrafo 5.)
6. (a) Cossa che i fradei dela congregassion in Corinto i ga fato dopo che i ga ricevesto la carta de Paolo? (b) Come la carta de Paolo ga giutà anca quel fradel che el gavea fato un bruto pecato?
6 Dopo che el ga scrito la carta ai fradei in Corinto, Paolo el se domandea cossa che i fradei i faria con questa orientassion. Alora, un tempo dopo, Tito el ga parlà a Paolo che i fradei i gavea obedio ala so orientassion e i gavea ‘cavà via’ quel fradel dela congregassion. (2 Cor. 7:6, 7) E un per de mesi dopo che i ga ricevesto quela carta, anca quel omo el se gavea ciamà gramo del sbàlio che el gavea fato. Lu el gavea cambià quel che l’era drio far e el ga scominsià a obedir a Geovà. (2 Cor. 7:8-11) Adesso, ndemo veder cossa Paolo el ga dito che quei fradei gavaria de far dopo de questo.
COME CHE LA CONGREGASSION LA GAVEA DE TRATAR QUEL OMO?
7. Cossa che quel omo el ga fato dopo che l’è stà cavà via dela congregassion? (2 Corinti 2:5-8)
7 Ledi 2 Corinti 2:5-8.d Paolo el ga dito che la maniera che i fradei i gavea tratà quel omo bastea par lu. Come cossita? Dopo che l’è stà cavà via dela congregassion, quel omo el se ga ciamà gramo. Alora, lu no’l gavea bisogno de seitar a esser dissiplinà. — Ebr. 12:11.
8. Cossa che Paolo el ga dito che la congregassion la gavaria de far?
8 Dopo, Paolo el ga dito che tuti nela congregassion ‘i gavea de perdonarlo con bontà, consolarlo e mostrar el so amor par lu’. Paolo el ga dito che quei fradei i gavea de far de pi che sol acetarlo nantra volta nela congregassion. Lori i gavea de assar ciaro che lo gavea perdonà e che lo amea tanto. Come? Par meso de quel che i parlea, i fea e dela maniera che i lo tratea. Cossita, lu el saria sicuro che tuti nela congregassion i era contenti de gaverlo insieme nantra volta.
9. Parché che fursi l’è stà fadiga par arquanti fradei perdonar quel omo?
9 Pol esser che arquanti nela congregassion no i ze restadi contenti quando i ga savesto che quel omo el ndaria far parte dela congregassion nantra volta. Parché? La Bìblia no la dise, ma pol esser che i fradei i era disgustadi con lu parché i gavea infrontà problemi par causa de quel pecato o parché i gavea visto come la congregassion la gavea sofrio. Altri fradei che i se gavea sforsà tanto par obedir a Geovà no i pensea che l’era giusto acetar quel omo con tuto quel amor. (Varda anca Luca 15:28-30.) Ma parché che l’era tanto importante che tuti i fradei i ghe mostresse amor a quel fradel?
10-11. Cossa che podaria suceder se i ansiani no i perdonesse quel omo?
10 Cossa che podaria suceder se i ansiani no i acetesse quel omo nela congregassion o se i fradei e sorele no i mostresse che lo amea? Pol esser che lu el restaria massa triste e tanto desanimà. Fursi, lu el ndaria pensar che no’l podaria pi tornar a servir a Geovà, che Geovà mai lo perdonaria e che no ghen’era pi gnente de far.
11 Ma ancora nantra roba podaria suceder se tuti nela congregassion no i perdonesse quel omo. Cossa? Quei fradei e sorele i ndaria rovinar la so amicìssia con Geovà. Parché? Parché lori no i saria drio far compagno a Geovà, che sempre el mostra misericòrdia e el perdona i so servi. Invesse, lori i faria compagno a Sàtana, che l’è pròpio rugno. Se no i acetesse quel omo, lori i assaria che Sàtana li doperesse par desanimarlo de servir a Geovà. — 2 Cor. 2:10, 11; Efe. 4:27.
12. Come che la congregassion de Corinto la podaria far compagno a Geovà?
12 Come che tuti nela congregassion in Corinto i podaria far compagno a Geovà e nò a Sàtana? Lori i gavaria de perdonar quel omo, compagno Geovà el fà. Varda cossa che arquanti servi de Geovà i ga scrito. Davi el ga dito che ‘Geovà l’è bon, e l’è sempre pronto par perdonar’. (Sal. 86:5) Michea el ga dito che ‘no ghen’è un Dio come lu, che el perdona el sbàlio e la desobediensa’. (Mic. 7:18) E Isaia 55:7 dise: “La persona rugna la ga de assar la so strada, e quel che el fà robe rugne, i so pensamenti. Lori i ga de tornar a Geovà e el gavarà misericòrdia. I ga de tornar al nostro Dio, parché li perdonarà del tuto.”
13. Parché che i ansiani no i gavaria de spetar pi tempo par acetar quel omo nantra volta nela congregassion? (Varda anca el quadro “Quando che quel omo l’è tornà ala congregassion in Corinto?”.)
13 Tuti nela congregassion in Corinto i ndaria drio al esémpio de Geovà se i acetesse quel omo e i mostresse so amor par lu. Lori i gavaria de meter in pràtica el consìlio de Paolo par mostrar che i era ‘obedienti in tute le robe’. (2 Cor. 2:9) Anca se quel omo el fusse stà cavà via dela congregassion sol pochi mesi prima, lu el se gavea belche ciamà gramo. Alora, i ansiani no i gavaria de spetar de pi tempo par acetarlo nela congregassion nantra volta.
MOSTRA GIUSTÌSSIA E MISERICÒRDIA COMPAGNO A GEOVÀ
14-15. Cossa che imparemo con quel che ga sucedesto nela congregassion in Corinto? (2 Piero 3:9) (Varda anca la ilustrassion.)
14 Quel che ga sucedesto nel primo sècolo nela congregassion de Corinto l’è stà scrito nela Bìblia “par insegnarne”. (Rom. 15:4) Par meso de quel che ga sucedesto, imparemo che Geovà no’l aceta mia che i so servi i fae bruti pecati. Arquanti i pensa che Geovà el mostra misericòrdia se el assa che una persona che no la se ga ciamà grama del so pecato la seite nela congregassion. Ma Geovà no’l mostra la so misericòrdia cossita. Anca se Geovà el ga misericòrdia, lu no’l aceta che so servi fae robe sbaliade e no’l càmbia quel che l’è giusto e sbalià. (Giuda 4) Se Geovà el assesse che una persona che la ga fato un bruto pecato e no la se ga ciamà grama la restesse rento la congregassion, questo podaria intrigar la amicìssia che tuti i ga con lu. — Pro. 13:20; 1 Cor. 15:33.
15 Noantri anca podemo imparar che Geovà no’l vol che nissuni sìpia destruti. Invesse, lu el volaria che tute le persone le vivesse par sempre. Par quela, Geovà el mostra misericòrdia a quei che i se ciama grami e i vol tornar a esser so amighi. (Eze. 33:11; ledi 2 Piero 3:9.e) Alora, quando quel omo in Corinto el se ga ciamà gramo e el ga cambià quel che l’era drio far, Geovà el ga doperà Paolo par spiegar ala congregassion che lori i gavaria de perdonarlo e acetarlo nantra volta.
Noantri se sforsemo de far compagno a Geovà e tratar con amor e misericòrdia una persona che la ze tornada ala congregassion (Varda i paràgrafi 14 e 15.)
16. Come che te te senti dopo de imparar sora quel che ga sucedesto nela congregassion in Corinto?
16 Quel che ga sucedesto nel primo sècolo nela congregassion in Corinto ne insegna che Geovà sempre el fà quel che l’è giusto e che el ne ama tanto. (Sal. 33:5) Anca se ricordemo che tuti noantri ghemo bisogno del so perdon, parché semo imperfeti e femo tanti pecati. Par quela, Geovà el ga mandà el so Fiol qua ala Tera par dar la so vita come sacrifìssio. Sicuro che pensarghe sora tuto quel che Geovà el ga fato par noantri e sora le so bele qualità ne fà gaver ancora de pi voia de lodarlo. L’è tanto bon saver che Geovà el ne ama tanto e el vol el nostro meio!
17. Cossa che ndaremo imparar nei pròssimi studi?
17 Nei pròssimi studi, ndaremo risponder ale domande: Se un fradel o una sorela i fà un bruto pecato ancoi, come che i ansiani nela congregassion i pol far compagno a Geovà e mostrar amor e giutar questa persona a ciamarse grama? Cossa che i altri fradei e sorele i ga de far se i ansiani i desside che l’è meio cavarla via dela congregassion? E cossa i fradei e sorele i ga de far se i ansiani i desside acetar nantra volta una persona che la era stata cavada via dela congregassion?
CÀNTICO 109 Mostremo amor un al altro de cuor
a (1 Gioani 2:1) Me cari fioi, mi son drio scriverve queste robe e cossita valtri no ndaré far pecato. Ma, se qualchedun el fà un pecato, noantri ghemo un che el ne giuta, che l’è insieme al Pare: Gesù Cristo, un giusto.
b (1 Corinti 5:1, 2) Go scoltà che ghen’è imoralità sessual intrà de valtri, imoralità che no la se cata gnanca intrà le nassion: un omo l’è de star cola sposa de so pare. 2 E valtri, gavé orgòlio de questo? No gavarissi de sentirve mal e cavar intrà de valtri el omo che el ga fato questo pecato?
c (1 Corinti 5:13) intanto che Dio el giudica quei de fora? “Cavé via de intrà de valtri la persona rugna.”
d (2 Corinti 2:5-8) Se una persona la ga fato qualcossa de bruto, no la me ga disgustà a mi, ma a tuti valtri. Ve digo questo parché no vui esser massa rugno. 6 Par questo omo, basta la reprension che el ga bio dela pi granda parte dele persone. 7 Adesso, invesse, gavé de perdonarlo con bontà e consolarlo, parché lu no’l sìpia vinsesto par la so tristessa. 8 Alora, mi ve domando che dimostré el vostro amor par lu.
e (2 Piero 3:9) Geovà no’l tardiga par realisar la so promessa, come arquanti i pensa. Ma lu el mostra passiensa con valtri, parché no’l vol che gnanca un el sìpia destruto, ma el vol che tuti i se ciame grami.