Come che i ansiani i pol mostrar amor e misericòrdia a quei che i ga fato un bruto pecato?

1. Cossa che pol suceder dopo che una persona la fà un bruto pecato?

NEL STÙDIO prima, ghemo imparà che el apòstolo Paolo el ga dito ai fradei in Corinto che un omo che el gavea fato un bruto pecato el gavea de esser cavà via dela congregassion. Quel omo el gavea fato un bruto pecato e no’l se gavea ciamà gramo. Ma el testo de questo stùdio el ne insegna che Geovà el pol giutar una persona che la ga fato un bruto pecato a ciamarse grama. (Rom. 2:4) Adesso, ndemo veder come che i ansiani i pol giutar una persona che la ga fato un bruto pecato a ciamarse grama.

2-3. (a) Cossa che ghemo de far se savemo che qualchedun nela congregassion l’è drio far un bruto pecato? (b) Parché che ghemo de far questo?

² I ansiani i podarà giutar una persona che la ga fato un bruto pecato sol se lori i sa de quel che ga sucedesto. Alora, se savemo che un dei nostri fradei el ga fato un bruto pecato, ghemo de incoraiarlo a ndar parlar coi ansiani e a domandarghe aiuto. — Isa. 1:18; Ati 20:28; 1 Pie. 5:2.

³ Ma cossa ghemo de far se el fradel o la sorela che ga fato un bruto pecato no’l vol ndar parlar coi ansiani? Ghemo de ndar noantri parlar coi ansiani e domandarghe che i giute questa persona. Se femo cossita, mostremo che amemo el nostro fradel o sorela. Parché che podemo dirlo? Parché, se questa persona la seita a far quel pecato, la ndarà rovinar la so amicìssia con Geovà. E se quei che no i serve mia a Geovà i sa del pecato che la ze drio far, fursi lori i ndarà parlar robe rugne sora Geovà e sora i fradei. L’è vera che pol esser tanto fadiga ndar parlar coi ansiani sora el pecato che questa persona la ga fato. Ma, come amemo a Geovà e a questo fradel o sorela, ghemo de mostrar coraio e parlar coi ansiani. — Sal. 27:14.

COME CHE I ANSIANI I POL GIUTAR QUEI CHE I GA FATO UN BRUTO PECATO?

4. Cossa che i ansiani i se sforsa de far quando qualchedun fà un bruto pecato?

⁴ Quando qualchedun nela congregassion fà un bruto pecato, i ansiani i ndarà scòlier tre ansiani par esser una comission, o sia, un grupo de ansiani che ndarà parlar con questa persona.a Questi bravi ansiani i ga de esser pròpio ùmili. Lori i se sforsa de giutar la persona a ciamarse grama. Ma lori i capisse che anca che i fae tuto che pol par giutar la persona a ciamarse grama, lori no i pol obrigar nissuni a cambiar. (Deu. 30:19) Lori i sa che gnanca tuti i sarà compagno a Davi, che el se ga ciamà gramo e el ga cambià. (2 Sam. 12:13) Pol esser che arquanti i scòlie seitar a far quel che l’è sbalià. (Gén. 4:6-8) Anca cossita, i ansiani i se sforsa del tuto par giutar la persona a ciamarse grama. Cossa che i ansiani i se ricorda quando i va giutar una persona che la ga fato un bruto pecato?

5. De acordo con 2 Timòteo 2:24-26, come che i ansiani i ga de tratar la persona che la ga fato un bruto pecato? (Varda anca la ilustrassion.)

⁵ I ansiani i vede la persona che la ga fato un bruto pecato come una piégora de Geovà che la se ga perso. (Luc. 15:4, 6) Par quela, lori mai i parla cativi o i la trata mal. Lori gnanca no i pensa che l’è sol ndar lì e farghe domande e saver quel che ga sucedesto. Invesse, lori i se sforsa de mostrar le qualità che ghen’è in 2 Timòteo 2:24-26. (Ledi.b) Lori sempre i resta calmi e i mostra bontà parché i vol giutar la persona a capir el sbàlio che la ga fato e a ciamarse grama.

6. Cossa che i ansiani i fà prima de parlar cola persona che la ga fato un bruto pecato? (Romani 2:4)

⁶ I ansiani i pensa sora prinsipi dela Bìblia e i prega a Geovà par domandarghe aiuto. Paolo el ga dito sora Geovà: “Dio, cola so bontà, l’è drio proar farte ciamarte gramo.” (Ledi Romani 2:4.c) Alora, i ansiani i se ricorda che i ga de tratar la persona compagno a Geovà e che i ze pastori che i ga de ndar drio ale orientassion de Gesù, e che i ga de tender dela congregassion compagno a lu. (Isa. 11:3, 4; Mat. 18:18-20) Cossita, cossa che i ansiani i fà prima de parlar con una persona che la ga fato un bruto pecato? Lori i prega a Geovà par domandarghe spìrito santo e i proa pensar come che i pol giutar la persona a ciamarse grama. Lori anca i stùdia la Bìblia e le publicassion e i domanda che Geovà el ghe dae saver. Dopo, i ansiani anca i pensa sora quel che ga sucedesto nela vita de questa persona. Cossita, lori i pol capir meio parché che la ga fato quel sbàlio. (Pro. 20:5) Sicuro che i ansiani i fà tute queste robe parché i vol giutar la persona a ciamarse grama.

7-8. Come che i ansiani i pol far compagno a Geovà?

⁷ I ansiani i mostra passiensa compagno Geovà. I ansiani sempre i se ricorda dela maniera che Geovà el ga tratà i so servi che i ga fato bruti pecati nel passà. Vedemo un per de esempi. Geovà el ga bio tanta passiensa con Cain. Lu el ga proà giutarlo a capir quel che sucederia se el seitesse a far quel sbàlio e el ghe ga dito che el saria benedio se el scominsiesse a far quel che l’è giusto. (Gén. 4:6, 7) Geovà el ga anca proà giutar Davi. Lu el ga doperà el profeta Natan par darghe bei consili e contarghe una ilustrassion che ndaria giutarlo a ciamarse gramo. (2 Sam. 12:1-7) E Geovà anca el ga giutà tante volte la nassion de Israel, quando ‘el ga seità a mandar’ profeti par dirghe che i se ciamesse grami. (Ger. 7:24, 25) Geovà no’l ga mia spetà che queste persone le se ciamesse grame par sol dopo ndar giutarle. Invesse, ancora quando le era drio far pecati, lu el ga fato tuto quel che el podea par giutarle a ciamarse grame.

⁸ I ansiani i se sforsa de far compagno a Geovà quando i proa giutar una persona che la ga fato un bruto pecato. Come mostra 2 Timòteo 4:2, lori sempre i parla cola persona “con tuta la passiensa”. Alora, un ansiano el ga de esser sempre calmo e mostrar passiensa par giutar una persona a far quel che l’è giusto. Se un ansiano el resta cativo e el assa de mostrar passiensa, pol esser che questa persona no la acete mia i so consili e no la se ciame grama.

9-10. Come che i ansiani i pol giutar la persona a capir quel che la ga fato de sbalià?

⁹ I ansiani i proa capir che dessision la persona la ga fato prima del pecato. Lori i pol domandarse: ‘Sarà che la so amicìssia con Geovà pin pianeto la era restada pi fiaca? Sarà che la se gavea fermà de studiar la Bìblia, ndar ala predicassion e de pregar sempre a Geovà? O sarà che fursi no la ga bio pi forsa de dàrghene fora cole voie sbaliade? Chi che i era i so amighi? Cossa che ghe piasea far par divertirse? Come che queste robe le ga cambià la so maniera de pensar e far le robe? Sarà che la ze bona de capir come che Geovà el se sente dopo che la ga fato quel pecato?’

¹⁰ I ansiani i pol far domande ala persona par giutarla a capir parché che la so amicìssia con Geovà la era restada pi fiaca e parché che fursi la ga fato quel pecato. Sicuro che i ansiani i ndarà sempre parlar con bontà e i ndarà domandarghe sol quel che ghe ocore pròpio. (Pro. 20:5) Lori anca i pol doperar ilustrassion par giutar la persona a capir quel che la ga fato de sbalià, cossita come Natan el ga fato con Davi. Alora, pol esser che ancora nela prima volta che i ansiani i parle con questa persona, ela la sìpia bona de capir quel che la ga fato de sbalià, la reste disgustada con quel che la ga fato e fin la se ciame grama.

11. Come che Gesù el ga giutà persone che ga fato bruti sbali?

¹¹ I ansiani i se sforsa de far compagno a Gesù. Dopo de esser ressussità, Gesù el ga dito a Saulo de Tarso: “Saulo, Saulo, parché te sì contra mi?” Cossita, Gesù lo ga giutà a pensar sora cossa l’era drio far de sbalià. (Ati 9:3-6) E Gesù el ga dito sora ‘quela dona Gesabel’: ‘Mi ghe go dato tempo par ciamarse grama.’ — Apo. 2:20, 21.

12-13. Come che i ansiani i pol darghe tempo a una persona par ciamarse grama? (Varda anca la ilustrassion.)

¹² Come che i ansiani i pol far compagno a Gesù? Lori no i ga mia de pensar suito che la persona no la ndarà ciamarse grama. Arquante persone le se ciama grame ancora nela prima riunion, ma altre fursi ghe ocore de pi tempo. Par quela, i ansiani i pol parlar con questa persona de pi de una volta. Pol esser che dopo dela prima volta, questa persona la ndarà pensar sora quel che la ga fato e la ndarà pregar a Geovà par domandarghe perdon. (Sal. 32:5; 38:18) Cossita, nela pròssima volta che i ansiani i parla con questa persona, pol esser che sìpia pi fàcile che la acete el aiuto e la se ciame grama.

¹³ Par giutar la persona che la ga fato un bruto pecato, i ansiani i ga de sempre mostrarghe bontà e proar capir quel che la ze drio sentir. Lori anca i prega a Geovà par domandarghe che li giute. I ansiani i vol tanto che questa persona la càmbie e la se ciame grama. — 2 Tim. 2:25, 26.

14. Quando una persona la se ciama grama, de cossa ghemo de ricordarse, e parché?

¹⁴ Sicuro che noantri restemo tanto contenti se un fradel che el ga fato un bruto pecato el se ciama gramo! (Luc. 15:7, 10) L’è vera che i ansiani i se ga sforsà tanto par giutarlo. Ma ghemo de ricordarse de quel che Paolo el ga dito par saver chi che lo ga pròpio giutà. Lu el ga dito: ‘Fursi Dio el pol assar che el càmbie’. (2 Tim. 2:25) Alora, l’è stà Geovà, e nò una persona, che ga giutà questo fradel a cambiar la so maniera de pensar e quel che el fea. Paolo anca el ga parlà dele robe bone che sucede dopo che el se ciama gramo. Lu el scomìnsia a capir meio la verità, a pensar dela maniera giusta e a esser bon de scampar via dele tràpole de Sàtana. — 2Tim. 2:26.

15. Come che i ansiani i seitarà a giutar la persona che la se ga ciamà grama?

¹⁵ Quando una persona la se ciama grama, i ansiani i seitarà a farghe vìsite par giutarla a far pi forte la so fede, a gaver forsa de dàrghene fora cole tràpole de Sàtana e par seitar far quel che l’è giusto. (Ebr. 12:12, 13) Sicuro che i ansiani no i ndarà mai dirghe a nissuni quel che la ghe ga contà. Alora, cossa che i fradei dela congregassion i ga de saver?

‘TE GHÈ DE COREGER DAVANTI DE TUTI’

16. Sora chi che Paolo l’era drio parlar in 1 Timòteo 5:20?

¹⁶ Ledi 1 Timòteo 5:20.d Paolo el ga scrito queste parole a Timòteo par spiegarghe quel che i gavaria de far con una persona che la gavea fato un bruto pecato. Sarà che Paolo el volea dir che questa persona la gavea de esser dissiplinada “davanti de tuti” nela congregassion? Nò. Invesse, lu l’era drio parlar de quei che i savea del pecato. Pol esser che lori i gavea visto el fradel far quel pecato o i era intrà quei che lu el ghe ga contà quel che gavea fato. I ansiani sol i parlarà che i ga dissiplinà e che i ze belche drio giutar la persona che la ga fato quel bruto pecato a quei che i lo ga savesto.

17. Cossa che i ansiani i ndarà far se tuti nela congregassion i ga savesto o i saverà de un pecato che un fradel el ga fato, e parché?

¹⁷ Ma pol esser che tuti nela congregassion i ga savesto o fursi i saverà del pecato che la persona la ga fato. Alora, se sucede una roba cossita, un ansiano el ndarà far un anùnsio nte una riunion e el dirà che i ansiani i ghe ga dato consili e dissiplina a questo fradel. Parché? Paolo el ga dito: ‘Cossita, quei che lo vede gavarà paura de far quel che l’è sbalià.’

18. Cossa che i ansiani i fà quando un fradel con manco de 18 ani el fà un bruto pecato? (Varda anca el ritrato.)

¹⁸ Ma cossa i ansiani i ga de far se un fradel con manco de 18 ani el fà un bruto pecato? I ansiani i ndarà scòlier due ansiani par parlar con questo gióveno e coi so genitori che i ze Testimònie de Geovà.e Alora i ansiani i ndarà domandar ai so genitori se lori i ga belche fato quel che ghe ocorea par giutar so fiol a ciamarse gramo e a cambiar quel che el ga de bisogno. Se el fiol el scolta i consili dei so genitori e el càmbia quel che ghe ocore nela so maniera de pensar e de far le robe, quei due ansiani fursi i desside che no ghe ocore che tre ansiani i parle con quel gióveno e i so genitori. Ghemo de ricordarse che Geovà el ga dato ai genitori el laoro de insegnarghe ai fioi. (Deu. 6:6, 7; Pro. 6:20; 22:6; Efe. 6:2-4) E, dele volte, i ansiani i ndarà veder se i genitori i seita a giutar so fiol in quel che ghe ocore. Ma, se el gióveno no’l aceta el aiuto dei so genitori e el seita a far quel che l’è sbalià, tre ansiani i ndarà parlar con lu e i so genitori.

“GEOVÀ EL GA TANTO AMOR E MISERCÒRDIA”

19. Come che i ansiani i pol far compagno a Geovà quando qualchedun fà un bruto pecato?

¹⁹ Geovà el ga dato un laoro tanto importante ai ansiani. Lori i ga de proteger la congregassion de tuti quei che no i vol obedir a Geovà. (1 Cor. 5:7) Lori i se sforsa par far sempre compagno a Geovà, che “el ga tanto amor e misericòrdia”. (Tia. 5:11) Par quela, quando qualchedun fà un bruto pecato, i ansiani i ga speransa che questa persona la càmbie quel che ghe ocore e i fà tuto quel che i pol par giutarla. El apòstolo Gioani el ga mostrà tanto amor par i so fradei. Lu el ga scrito: “Me cari fioi, mi son drio scriverve queste robe e cossita valtri no ndaré far pecato. Ma, se qualchedun el fà un pecato, noantri ghemo un che el ne giuta, che l’è insieme al Pare: Gesù Cristo, un giusto.” — 1 Gio. 2:1.

20. Cossa che ndaremo imparar nel pròssimo stùdio?

²⁰ Ma, dele volte, una persona che la ga fato un bruto pecato no la se ciama grama. Se una roba cossita sucede, questa persona la ga de esser cavada via dela congregassion. Nel pròssimo stùdio, ndaremo veder cossa che i ansiani i ga de far se una roba cossita sucede.