Domanda aiuto ai ansiani

1. Come che savemo che Geovà el ama tanto i so servi?

GEOVÀ el ama tanto i so servi. Lu li tende con bontà, compagno un bon pastor el fà cole so piégore. Come che lo savemo? Geovà el ga dato la vita del so Fiol par salvar i so servi e el ga scoliesto ansiani par tenderli. (Ati 20:28) Geovà el ga dato a Gesù la autorità sora la congregassion. Lu el giuta i ansiani a tender con bontà dei fradei e sorele de tute le congregassion. Gesù el speta che i ansiani i fae compagno a lu e i giute i so servi a seitar fedeli. — Isa. 32:1, 2.

2. Chi che Geovà l’è ancora pi premoso de giutar? (Ezechiel 34:15, 16)

² Geovà el vol giutar a tuti i so servi. Ma lu l’è ancora pi premoso de giutar quei che i ze drio sofrir. Arquanti dei so servi i ze drio sofrir par causa dei sbali che i ga fato e lu el dopera i ansiani par giutarli. (Ledi Ezechiel 34:15, 16.a) Ma semo noantri che ghemo de domandar aiuto. Come? Podemo pregar a Geovà e anca domandar che i “pastori e istrutori” dela congregassion i ne giute. — Efe. 4:11, 12.

3. Parché che l’è bon par tuti noantri imparar de pi sora i ansiani?

³ In questo stùdio, ndaremo imparar de pi sora come Geovà el dopera i ansiani par giutar quei che i ghe ocore de aiuto par seitar fedeli. Ndaremo risponder ale domande: Quando che ghemo de domandar aiuto ai ansiani? Parché che ghemo de farlo? Come che i ansiani i ne giuta? Anca se adesso no ne ocore del aiuto dei ansiani, questo stùdio ne giutarà a dar ancora pi valor al laoro che i fà, e anca saveremo cossa far se ne ocore del so aiuto pi avanti.

QUANDO GHEMO DE ‘CIAMAR I ANSIANI’?

4. Come che savemo che el testo de Tiago 5:14-16, 19, 20 parla de quei che i ga de tornar a esser amighi de Geovà? (Varda anca la ilustrassion.)

⁴ El apòstolo Tiago el ga spiegà come che Geovà el dopera i ansiani par giutarne. Lu el ga scrito: “Ghen’è qualchedun malà intrà de valtri? Che el ciame i ansiani dela congregassion.” (Ledi Tiago 5:14-16,b 19, 20.c) In questo testo, Tiago el ga ciamà una persona che no la gavea pi una forte amicìssia con Geovà de malada. Parché che podemo dirlo? Prima, parché Tiago el ga dito che el malà el gavea de ciamar i ansiani e nò un dotor. Seconda, parché lu el ga dito che el malà el restaria meio dopo che i so pecati i fusse perdonadi. Pensa nela persona che la ga pròpio una malatia. Ela la va in serca de un dotor, la parla quel che la ze drio sentir e la mete in pràtica le so orientassion. Dela medèsima maniera, quando ghemo bisogno de aiuto par tornar a esser amighi de Geovà, ghemo de ndar in serca dei ansiani, parlarghe quel che l’è drio suceder e meter in pràtica i consili dela Bìblia che i ne dà.

5. Come che podemo saver se la nostra amicìssia con Geovà la ze deventada pi fiaca?

⁵ Tiago capìtolo 5 ne dise che ghemo de parlar coi ansiani quando vedemo che la nostra amicìssia con Geovà la ze deventada pi fiaca. Ma l’è importante domandar el so aiuto vanti che questa amicìssia la se finissa fora. La Bìblia la dise che fursi imbroiemo a noantri stessi. Parché? Se no stemo pròpio atenti, pol esser che la nostra amicìssia con Geovà la ze belche fiaca, ma ancora cossita, pensemo che l’è tuto polito. (Tia. 1:22) L’è questo che ga sucedesto nel passà coi fradei dela congregassion de Sardes. Par quela, Gesù el ghe ga dato un consìlio e ghe ga dito che no i era pi drio contentar a Geovà. (Apo. 3:1, 2) Ma cossa che podemo far par saver se la nostra amicìssia con Geovà la ze forte? Una roba che podemo far la ze pensar se adesso semo pi contenti de adorar a Geovà de che quando semo stati batesadi. (Apo. 2:4, 5) Podemo domandarse: ‘Ancora son contento de leder la Bìblia e pensarghe sora quel che go imparà? Son drio ndar a tute le riunion e son drio pareciarme par comentar? Son premoso de ndar ala predicassion o me piase de pi doperar el me tempo par far altre robe? Adesso penso de pi nei soldi de che prima?’ La risposta sinsiera a cada una de queste domande la te giutarà a capir se te ocore de aiuto par far pi forte la to amicìssia con Geovà. Se no te sì bon de cambiar ti ti sol o se te ghè belche fato qualcossa che ga disgustà a Geovà, te toca domandar aiuto ai ansiani.

6. Cossa che ghemo de far se ghemo fato un bruto pecato?

⁶ Pol esser che una persona la sìpia cavada via dela congregassion parché la ga fato un bruto pecato. Se noantri femo un pecato cossita, ghemo de parlar con un ansiano. (1 Cor. 5:11-13) Parché? Parché no semo boni de tornar a gaver una forte amicìssia con Geovà noantri soli. La Bìblia la dise che ghemo de mostrar che se ghemo ciamadi grami par gaver el perdon de Geovà. (Ati 26:20) Una maniera de mostrar che se ghemo ciamadi grami la ze parlar coi ansiani sora el pecato che ghemo fato.

7. Che altri fradei i ansiani i ga caro de giutar?

⁷ I ansiani i giuta quei che i ga fato un bruto pecato e quei che ghe ocore tornar a gaver una forte amicìssia con Geovà. (Ati 20:35) Par esémpio, pol esser che te pensi che no te sì pi bon de darghene fora cole to voie sbaliade. Pol esser ancora pi fadiga se vanti de servir a Geovà te doperei droghe, te vedei pornografia o te fei imoralità. Ma adesso, no te ocore darghene fora con queste robe ti ti sol. Invesse, proa parlar coi ansiani. Lori i ndarà scoltarte, i ndarà doperar la Bìblia par darte consili e ricordarte che Geovà l’è contento se te seiti a sforsarte. (Ecl. 4:12) Se te sì desanimà, i ansiani i te giutarà a veder che te sì stà ùmile de domandar aiuto e che te vol contentar a Geovà. — 1 Cor. 10:12.

8. Sarà che ghemo de parlar coi ansiani sora tuti i sbali che femo? Spiega.

⁸ No ne ocore ciamar i ansiani par parlar de tuti sbali che femo. Par esémpio, pol esser che te ghè dito qualcossa che ga disgustà un fradel o una sorela o che te ze vegneste su le fumane. Alora, invesse de ciamar i ansiani, te pol proar meter in pràtica i consili de Gesù e domandar scusa a quel fradel o sorela. (Mat. 5:23, 24) Te pol anca imparar de pi sora la brandura, passiensa e autocontrolo. Ma se te vedi che no te sì stà bon de darghene fora cola situassion, te pol domandar aiuto a un ansiano. Quando el apòstolo Paolo el ga scrito la carta ai filipensi, lu el ga domandà che un fradel el giutesse Evòdia e Sìntiche a esser intese nantra volta. Un ansiano dela to congregassion pol giutarte dela stessa maniera. — Fil. 4:2, 3.

PARCHÉ CHE GHEMO DE CIAMAR I ANSIANI?

9. Parché che no ghemo mia de assar che la vergogna la ne fae tirarse indrio de parlar coi ansiani? (Proverbi 28:13)

⁹ Ne ocore fede e coraio par domandar aiuto quando femo un bruto pecato o quando ne fà fadiga dàrghene fora con una voia sbaliada. Ma mai ghemo de assar che la vergogna ne fae tirarse indrio de domandar aiuto ai ansiani. Parché? Parché Geovà el ga scoliesto i ansiani par giutarne a seitar fedeli. Alora, quando ghe domandemo aiuto, mostremo che se fidemo in Geovà, che volemo obedirghe e che savemo che ne ocore de aiuto. (Sal. 94:18) E se ghemo fato un bruto pecato, semo sicuri che Geovà el ndarà perdonarne se parlemo ai ansiani sora el sbàlio e cambiemo. — Ledi Proverbi 28:13.d

10. Cossa che ndarà suceder se proemo sconder i sbali che ghemo fato?

¹⁰ Invesse, se proemo sconder i nostri sbali e no parlemo ai ansiani, ndaremo sofrir tanto. Par esémpio, quando el rè Davi el ga proà sconder i so sbali, lu l’è restà tanto desanimà e fin malà parché el savea che el gavea disgustà a Geovà. (Sal. 32:3-5) Se semo maladi e ghe metemo massa par ndar al dotor, noantri sofrimo de pi. Dela stessa maniera, se ghemo fato un bruto sbàlio, e ghe metemo massa par parlar coi ansiani, sarà pedo. E come Geovà el vol ‘meter a posto’ le robe con noantri el ga scoliesto i ansiani par giutarne. — Isa. 1:5, 6, 18.

11. Che nantra roba pol suceder se no parlemo ai ansiani sora un bruto pecato?

¹¹ Se no parlemo ai ansiani sora un bruto pecato che ghemo fato, podemo anca far i altri sofrir. Pol esser che Geovà el se ferme de benedir la congregassion del tuto e che no ghen sìpia pi pace. (Efe. 4:30) Alora, se savemo che un fradel el ga fato un bruto pecato, ghemo de dirghe che el parle coi ansiani. Se lu no ghe parla mia, noantri ghemo de ndar contarghe quel che savemo.e Se no femo cossita, saremo anca noantri drio far un pecato contra Geovà. (Lev. 5:1) Ma, come amemo tanto a Geovà, ndaremo parlar coi ansiani se qualchedun fà un bruto pecato. Cossita, ndaremo proteger i nostri cari fradei e sorele e giutaremo quei che i ga sbalià a tornar esser amighi de Geovà.

COME CHE I ANSIANI NE GIUTA?

12. Come che i ansiani i giuta quei che no i ga pi una forte amicìssia con Geovà?

¹² La Bìblia la dise che i ansiani i ga de giutar quei che no i ga pi una forte amicìssia con Geovà. (1 Tes. 5:14) Alora, se te ghè fato un bruto sbàlio, i ansiani ndarà farte domande par capir quel che te sì drio pensar e sentir. (Pro. 20:5) Fursi no l’è mia fàcile par ti parlar coi altri sora i to sentimenti parché te ghè vergogna o parché te sì drio sentirte mal con quel che ga sucedesto. Ma sfòrsate de parlar tuto quel che te ghè nel cuor sensa preocuparte tanto con quel che i va pensar de ti. (Giò 6:3) Lori no i ndarà giulgarte par quel che te sì drio dir, invesse, i ndarà scoltarte par capir quel che ga sucedesto e par darte i consili che te ocore. (Pro. 18:13) I ansiani i sa che ghe mete tempo par giutar qualchedun e che fursi ghe tocarà parlar cola persona de pi de una volta par giutarla.

13. Come che i ansiani i pol giutarte par meso dele so orassion e dei so consili? (Varda anca la ilustrassion.)

¹³ I ansiani i ndarà sforsarse par no farte sentirte ancora de pi in colpa e i ndarà pregar par ti. Ti te restarè maraveià de veder come la so orassion la ga poder e la pol giutarte. Nantra roba che lori i ndarà far l’è ‘meter òio sora ti in nome de Geovà’. (Tia. 5:14-16) Come cossita? Questo “òio” vol dir le verità dela Bìblia. Alora, i ansiani i ndarà doperar la Bìblia par incoraiarte e giutarte a gaver una forte amicìssia con Geovà nantra volta. (Isa. 57:18) Questi consili dela Bìblia i pol giutarte a seitar fedeli. Par meso dei ansiani, te podarè sentir Geovà dirte: “Questa la ze la strada. Ndé par ela.” — Isa. 30:21.

14. De acordo con Gàlati 6:1, come i ansiani i proa giutar quei che i ga fato “un sbàlio sensa nicorderse”?

¹⁴ Ledi Gàlati 6:1.f Pol esser che un fradel el sìpia drio far “un sbàlio sensa nicorderse”. Fursi, lu el ga fato una bruta dessision o un bruto pecato. Alora, con amor, i ansiani i proarà “indrissar” questo fradel con brandura. La parola greca par “indrissar” anca la ze doperada par parlar quel che un dotor el ga de far quando un osso va fora del posto. Questo dotor proarà meter quel osso nel so posto sensa far la persona sentir ancora pi dolor. Dela stessa maniera, i ansiani i proa giutar quei che i ga fato un sbàlio sensa farli sentirse ancora pi disgustadi. La Bìblia anca la dise che i ansiani i ga de star atenti a lori stessi. Alora, quando i ansiani i proa giutarne, i se ricorda che anca lori i ze imperfeti e i fà sbali. Invesse de pensar che i ze meio che noantri o che i ze lì par giulgarne, i ansiani i se sforsa de esser ùmili e de capir i nostri sentimenti. — 1 Pie. 3:8.

15. Cossa podemo far se ghemo un problema?

¹⁵ Noantri podemo fidarse nei ansiani dela nostra congregassion. Parché? Parché, Geovà el ghe ga insegnà che no i ga de parlar ai altri quel che i sa sora noantri. Lori i ga de dar consili de acordo con quel che la Bìblia la dise e nò de acordo con quel che i pensa. I ansiani anca i ga imparà che i ga la responsabilità de giutarne a darghene fora cole nostre dificoltà. (Pro. 11:13; Gàl. 6:2) Noantri ghemo de ricordarse che i ansiani i ze difarenti un del altro. Lori i ga qualità difarente e fursi un ga de pi speriensa de quel altro. Alora, te pol restar tranquilo e parlar con quel che te ghè pi caro. Ma no ghemo de far compagno a quei fradei del passà che i era ‘in serca de istrutori che i ghe disesse quel che i volea scoltar’, invesse de ndar in serca de un “insegnamento bon”. (2 Tim. 4:3) Alora, no te ghè mia de parlar con un ansiano dopo l’altro par catar fora un che te dise quel che te vol scoltar. Quando parlemo con un ansiano sora un problema, fursi lu el ndarà domandarne se ghemo belche parlà con nantro ansiano e cossa che lu el ne ga dito. E i ansiani che i ze ùmili tante volte i domandarà aiuto a nantro ansiano. — Pro. 13:10.

GHEMO LA NOSTRA RESPONSABILITÀ

16. Che responsabilità tuti noantri ghemo?

¹⁶ I ansiani i ne dà consili e i ne giuta quando ghemo problemi. Ma lori no i ndarà mia dir che dessision ghemo de far. Tuti noantri ghemo la responsabilità de mostrar par meso de quel che parlemo e femo che volemo servir a Geovà e che lo amemo. Col aiuto de Geovà, podaremo far bone dessision e seitar fedeli. (Rom. 14:12) Par quela, invesse de dirne quel che ghemo de far, i ansiani i dopera la Bìblia par giutarne a capir cossa che Geovà el pensa e dopo, noantri che ghemo de far le nostre dessision. Quando ndemo drio ai consili dela Bìblia e doperemo nostra “capassità de dissernimento”, imparemo a pensar ancora de pi compagno a Geovà e faremo bone dessision. — Ebr. 5:14.

17. Cossa che Geovà el vol che tuti noantri femo?

¹⁷ Semo tanto contenti de saver che Geovà el ne ama tanto. Lu ne tende tanto ben, compagno un bon pastor el fà cole so piégore. Lu el ga mandà Gesù, “el bon pastor”, par dar la vita par noantri. Cossita, ghemo la speransa de viver par sempre. (Gio. 10:11) Par meso dei ansiani, Geovà el fà pròpio quel che el ga prometesto: ‘Vao darve pastori che i ndarà far quel che mi vui, e lori i ndarà darve de magnar e i ndarà giutarve a capir quel che l’è giusto.’ (Ger. 3:15) Alora, se te senti che la to fede la ze fiaca o se te ocore de aiuto par far pi forte la to amicìssia con Geovà, no stà gaver paura de ciamar i ansiani. Cossita, te ndarè doperar el bel presente che Geovà el te ga dato, i ansiani.