Noantri ghe demo tanto valor al perdon de Geovà

1-2. Parché podemo dir che quel che ga sucedesto con tute le persone l’è compagno a quel che ga sucedesto col gióveno del paràgrafo 1?

PROA pensar nte un gióveno che l’è stà slevà su nte una fameia tanto siora. Un giorno, de colpo, so pare e so mare i ze morti, e lu l’è restà tanto disgustà. Ma ga sucedesto nantra bruta roba. So pare e so mare i gavea magnà fora tuto el capital dela fameia e i gavea fato tanti dèbiti. Alora, invesse de ricever una eransa, lu el ga ricevesto una mùcia de dèbiti che ghe tocaria pagarli suito. Questo gióveno mai el saria bon de pagar tuti questi dèbiti.

² Podemo dir che la medèsima roba la ga sucedesto con noantri. Adon e Eva i era perfeti e i vivea nte un bel paradiso. (Gén. 1:27; 2:7-9) Lori i podea viver felici e par sempre. Ma par causa del so pecato, Adon e Eva i ga perso el Paradiso e anca la vita eterna. Cossa che lori i ga assà par i so fioi? La Bìblia la dise: “L’è par quela che, par meso de un sol omo el pecato l’è vegnesto al mondo, e la morte par meso del pecato, cossita la morte la se ga spalià a tuti, parché tuti i gavea pecà.” (Rom. 5:12) Alora, tuti noantri morimo parché ghemo el pecato. E el pecato l’è compagno a un grando dèbito che no semo boni de pagar. — Sal. 49:8.

3. Parché che podemo dir che i nostri pecati i ze compagni a “dèbiti”?

³ Gesù el ga dito che i nostri pecati i ze come “dèbiti”. (Mat. 6:12; Luc. 11:4) Quando femo un pecato, l’è come se gavessino fato un dèbito con Geovà che gavarìssino de pagarghe. Ma, sol sarìssino boni de pagar questo dèbito quando morimo. — Rom. 6:7, 23.

4. (a) Cossa che ndaria suceder se no gavessino aiuto? (Salmo 49:7-9) (b) Cossa che la parola “pecato” la vol dir nela Bìblia? (Varda el quadro “Pecato”.)

⁴ Sensa aiuto, noantri mai sarìssino boni de gaver nantra volta quel che Adon e Eva i ga perso. (Ledi Salmo 49:7-9.a) Cossita, sarìssino compagno le bèstie che no le ga mia la speransa de esser ressussitade. — Ecl. 3:19; 2 Pie. 2:12.

5. Cossa che el nostro caro Pare el ga fato par pagar i nostri dèbiti? (Varda la ilustrassion.)

⁵ Pensemo nantra volta in quel gióveno che ghemo parlà prima. Proa pensar come che el ndaria sentirse se una persona la paghesse tuti i so dèbiti. Sicuro che lu el ndaria acetar e darghe tanto valor a questo presente. Dela stessa maniera, el nostro Pare, Geovà, el ga pagà el dèbito del pecato che ghemo ricevesto de Adon. Gesù el ga dito: “Parché Dio el ga amà tanto el mondo, che el ga dato el so ùnico Fiol, cossita tuti quei che i dimostra fede in lu no i sìpia destruti, ma i possa viver par sempre.” (Gio. 3:16) Par causa de questo presente, noantri anca podemo esser amighi de Geovà.

6. Cossa che ndaremo imparar in questo stùdio, e parché?

⁶ Cossa che ghemo de far par esser boni de doperar questo maraveioso presente e gaver el perdon dei nostri pecati? Par risponder a questa domanda, ndaremo veder arquanti testi dela Bìblia che parla sora quel che Geovà el ga fato par perdonarne. Pensar sora questo ne giutarà a darghe ancora de pi valor al so perdon.

GEOVÀ EL VOL ESSER NOSTRO AMIGO

7. (a) Che nantra roba Adon e Eva i ga perso? (b) Come semo fioi de Adon e Eva, cossa che tuti noantri ghemo de bisogno? (Romani 5:10, 11)

⁷ Adon e Eva i ga perso la vita eterna e anca la bela amicìssia che i gavea col so Pare, Geovà. Prima, lori i era parte dela fameia de Dio. (Luc. 3:38) Ma dopo che i ga desobedio a Geovà, Adon e Eva i ze stati mandadi via dela so fameia. (Gén. 3:23, 24) Come l’è stà sol dopo che i ga bio fioi, gnanca una persona la fà parte dela fameia de Geovà. (Gén. 4:1) Par quela, l’è come se gavessino de fermarse de esser nemighi de Dio e deventar so amighi. (Ledi Romani 5:10, 11.b) Ma l’è tanto bel saver che Geovà el ga fato tuto quel che ocorea par giutarne. Come cossita?

GEOVÀ EL GA CATÀ UNA MANIERA DE GIUTARNE A ESSER SO AMIGHI

8. Cossa che Geovà el ga fato par giutarne a esser so amighi?

⁸ Geovà el ga catà fora una maniera de far che tute le persone le podesse esser so amighe. Lu el ga doperà una roba che gavea el medèsimo valor che la vita perfeta de Adon. Cossita, lu el ne ga dato indrio quel che Adon el gavea perso. Le Scriture Greche le parla de tuto quel che Geovà el ga fato par giutarne a esser so amighi nantra volta. — Rom. 3:25.

9. Cossa che Geovà el ga fato par giutar i israeliti a esser perdonadi dei so pecati?

⁹ Geovà el ga catà fora una maniera de perdonar i pecati dei israeliti e giutarli a gaver una amicìssia con lu. Alora, una volta al ano, i israeliti i gavea de far la festività de nome Giorno de Domandar Perdon dei Pecati. In quel giorno, el prinsipal sasserdote el fea sacrifissi de bèstie par domandar el perdon dei pecati dei israeliti. Sicuro che quei sacrifissi de bèstie no i era boni de perdonar i pecati dele persone, parché la vita de una persona la ga de pi valor che quela de una bèstia. Ma intanto che i israeliti i seitesse a far quei sacrifissi, Geovà li perdonea. (Ebr. 10:1-4) El Giorno de Domandar Perdon dei Pecati e altri sacrifissi che i israeliti i fea li ga giutadi a gaver ben in mente che lori i era pecadori e che i gavea bisogno de nantro aiuto par esser perdonadi del bon dei so pecati.

10. Cossa che Geovà el ga fato par giutarne a esser perdonadi del bon?

¹⁰ Noantri podemo esser perdonadi del bon parché Geovà el ga fato una roba tanto bela. Cossa? Lu el ne ga dato el so caro Fiol par el perdon dei nostri pecati ‘una volta par sempre’. (Ebr. 9:28) Gesù el ga dato “la so vita par salvar tante persone”. (Mat. 20:28) Adesso, ndaremo imparar de pi sora el sacrifìssio de Gesù.

EL SACRIFÌSSIO DE GESÙ NE GIUTA A ESSER AMIGHI DE GEOVÀ

11. (a) Parché che qualchedun el gavaria de pagar a Geovà quel che l’era stà perso? (b) Chi che podaria pagarlo?

¹¹ Quando Adon e Eva i ga pecà, lori i ga perso la so vita perfeta e eterna. Alora, de acordo cola Bìblia, Geovà el ga dessidio che qualchedun el gavaria de pagar el stesso valor che quel che Adon el gavea perso. (1 Tim. 2:6) Chi che podaria pagarlo? Gavaria de esser una persona (1) che la fusse perfeta, (2) che la podesse viver nela Tera par sempre, e (3) che la volesse dar la so vita come sacrifìssio par noantri de volentiera. Sol la vita de una persona cossita la podaria pagar quel che l’era stà perso.

12. Parché che Gesù l’è stà bon de pagar quel che l’era stà perso?

¹² Parché che Gesù l’è stà bon de pagar quel che l’era stà perso? Parché (1) lu l’era perfeto e “no’l ga mia fato pecato”, (2) lu el podaria viver nela Tera par sempre, e (3) lu el ga dato la so vita de volentiera par giutarne. (Ebr. 10:9, 10; 1 Pie. 2:22) Gesù l’era perfeto, compagno a Adon vanti che el pechesse. (1 Cor. 15:45) Alora, quando Gesù l’è morto, lu l’è stà bon de pagar pròpio quel che Adon el gavea perso. (Rom. 5:19) Par quela la Bìblia la dise che Gesù l’è stà “el ùltimo Adon”. Cossita, no ghemo bisogno che nantra persona perfeta la paghe quel che Adon el ga perso, parché Gesù el ga belche dato la so vita “una volta e par sempre”. — Ebr. 7:27; 10:12.

13. Parché che podemo esser amighi de Geovà?

¹³ Parché che podemo esser amighi de Geovà? Geovà el ga catà fora una maniera de giutarne a esser perdonadi del bon. Gesù el ga dato la so vita perfeta come sacrifìssio par pagar el prèssio par i nostri pecati. — Efe. 1:7; Ebr. 9:14.

GEOVÀ EL NE LIBERA DEL PECATO E DELA MORTE E EL NE VEDE COME PERSONE GIUSTE

14. Cossa che ndaremo veder adesso, e parché?

¹⁴ Come quel che Geovà el ga fato pol giutarne? Par risponder a questa domanda, ndaremo veder arquante robe che la Bìblia la dise sora el perdon de Geovà. Sarà bel imparar sora queste robe parché le ne giuta a capir come esser perdonadi l’è bon par noantri.

15-16. (a) De cossa che semo stati liberadi? (b) Come che noantri se sentimo de esser liberadi del pecato e dela morte?

¹⁵ La Bìblia la dise che noantri semo stati liberadi par causa de un risgate o sacrifìssio. El apòstolo Piero el ga dito: ‘Valtri savé che sì stati liberadi, o risgatadi, nò par meso de robe che le se smarsisse, come el argento e el oro. Ma l’è stà par meso del sangue de Cristo, che el ga tanto valor, compagno a un piegoreto perfeto e puro.’ — 1 Pie. 1:18, 19.

¹⁶ El pecato e la morte ne fà sofrir tanto. (Rom. 5:21) Ma noantri sol podemo viver sensa pi sofrir con queste robe par causa del sangue pressioso de Gesù. (1 Cor. 15:22) Sicuro che ghe demo tanto valor a quel che Geovà e Gesù i ga fato, e volemo ringrassiarghe tanto.

17-18. (a) Parché che Geovà el ne vede come persone giuste? (b) Parché che l’è bon che Geovà el ne veda come persone giuste?

¹⁷ La Bìblia la dise che i servi de Geovà i ze giusti. Questo vol dir che Geovà no’l speta che i so servi i paghe par i pecati che i fà. Ma no vol dir che meritemo el perdon de Geovà gnanca che lu l’è de acordo cole robe sbaliade che ghemo fato. Invesse, lu el vol perdonar i nostri pecati parché ghemo fede in quel che lu el ga fato e nel sacrifìssio de Gesù. Cossita, lu no’l va mia contra la so giustìssia. — Rom. 3:24; Gàl. 2:16.

¹⁸ Parché che l’è tanto bon che Geovà el ne veda come persone giuste? Quei che i ze stati scoliesti par governar con Gesù nel cielo i ga belche el perdon dei so pecati e i ze deventadi ‘fioi de Dio’. (Tito 3:7; 1 Gio. 3:1) I so pecati i ze stati perdonadi e l’è stà come se mai i gavesse fato un sbàlio. Cossita, lori i pol far parte del Regno de Dio. (Rom. 8:1, 2, 30) Quei che i ga la speransa de viver par sempre nela Tera anca i ze giusti. Geovà li ga perdonadi e lori i ze deventadi so amighi. (Tia. 2:21-23) La mùcia de gente che seitarà viva dopo la granda tribolassion la gavarà la speransa de mai morir. (Gio. 11:26) E i ‘giusti e ingiusti’ che i ze morti i sarà ressussitadi. (Ati 24:15; Gio. 5:28, 29) Nel futuro, tuti quei che i obedisse a Geovà i gavarà la “gloriosa liberassion dei fioi de Dio”. (Rom. 8:21) Semo premosi de viver una vita perfeta e esser nantra volta fioi del nostro caro Pare, Geovà!

19. Come che la nostra situassion la ga cambià? (Varda anca el quadro “Come che el perdon de Geovà ne giuta?”.)

¹⁹ La nostra situassion la era compagna a quela del gióveno che ga ricevesto una mùcia de dèbiti come eransa e no’l saria mai bon de pagarli. Ma, Geovà el ne ga giutà. Cossita, la nostra situassion la ga cambià, parché par meso del sacrifìssio de Gesù, Geovà el ga catà una maniera de perdonarne. Quando ghemo fede in Gesù, semo perdonadi e lìberi del pecato e dela morte. Par causa del perdon de Geovà, l’è come se mai gavessino fato un sbàlio. Ma la roba pi importante la ze che belche adesso podemo gaver una amicìssia col nostro caro Pare, Geovà.

20. Cossa che ndaremo imparar nel pròssimo stùdio?

²⁰ Sicuro che ghe demo ancora de pi valor a quel che Geovà e Gesù i ga fato par noantri quando ghe pensemo sora. (2 Cor. 5:15) Sensa el so aiuto, no gavarìssino mia speransa. Nel pròssimo stùdio, vederemo un per de ilustrassion che le mostrarà parché che no ghemo de seitar a sentirse in colpa dopo che Geovà el ne ga perdonà.