16-22 DE MARSO DE 2026
CÀNTICO 20 Te ne ghè dato el to pressioso Fiol
Parché che ghemo de bisogno del sacrifìssio de Gesù?
“Chi che me liberarà del corpo che l’è soto la autorità dela morte?” — ROM. 7:24.
COSSA CHE NDAREMO IMPARAR?
Ndaremo veder come el sacrifìssio de Gesù ne giuta a gaver el perdon dei nostri pecati, ne dà speransa de esser perfeti nel futuro e ne giuta a gaver una bela amicìssia con Geovà.
1-2. De cossa che ghemo de esser liberadi, e parché ghemo bisogno de aiuto? (Romani 7:22-24) (Varda anca la stampa.)
PROA pensar in questa situassion: un prèdio el vien do e un omo el resta preso lì in meso ale rovine. Lu l’è vivo, ma no l’è bon de moverse e ndar fora lu sol. La ùnica roba che lu el pol far l’è osar par domandar aiuto e spetar che qualchedun vegna liberarlo.
2 Noantri semo nte una situassion compagna de quel omo. Come cossita? Quando Adon el ga desobedio a Geovà, lu l’è deventà un pecador. Par quela, tuti i so fioi i ga el pecato. Alora, le persone le ze come che prese nel pecato e no le ze bone de liberarse lore sole, compagno a quel omo che l’era preso in meso ale rovine. Nela so carta ai romani, el apòstolo Paolo el ga dito che noantri semo ‘prisioneri del pecato’. (Ledi Romani 7:22-24.a) Lu el ga domandà: “Chi che me liberarà del corpo che l’è soto la autorità dela morte?” Paolo el savea che no’l podea mia darghene fora col pecato o cola morte lu lu sol. (Rom. 6:23) Anca noantri semo presi nel pecato e no semo mia boni de liberarse noantri soli.
Compagno a un omo che l’è preso in meso ale rovine de un prèdio e el ghe ocore de aiuto par esser liberà, noantri semo presi par causa del pecato e ghemo bisogno de aiuto par esser liberadi (Varda i paràgrafi 1 e 2.)
3. Come che el sacrifìssio de Gesù ne giuta?
3 Dopo che Paolo el ga parlà sora el pecato, el ga fato la domanda: “Chi che me liberarà del corpo che l’è soto la autorità dela morte?” La so risposta la ne dà tanta speransa. Lu el ga dito: “Mi ringràssio a Dio, par meso de Gesù Cristo, el nostro Signor!” (Rom. 7:25) Paolo el ga dito che el sacrifìssio de Gesù l’è stà un risgate.b Alora, par via de questo sacrifìssio, noantri podemo (1) gaver el perdon dei nostri pecati, (2) gaver la speransa de esser perfeti nel futuro, e (3) gaver una bela amicìssia con Geovà. In questo stùdio, ndaremo imparar de pi sora questo sacrifìssio. Cossita, amaremo ancora de pi a Geovà, “el Dio che el dà speransa”. (Rom. 15:13) Anca, ndaremo dar de pi valor a Gesù che el ne ga liberà “par via del so risgate”. — Col. 1:14.
EL SACRIFÌSSIO DE GESÙ NE GIUTA A GAVER EL PERDON DEI NOSTRI PECATI
4-5. Parché che tuti noantri ghemo bisogno del sacrifìssio de Gesù? (Eclesiasti 7:20)
4 Noantri ghemo de bisogno del sacrifìssio de Gesù par gaver el perdon dei nostri pecati. Parché? Parché tuti semo imperfeti e sbaliemo in quel che femo e in quel che parlemo. (Ledi Eclesiasti 7:20.c) Ma arquanti pecati i ze pi bruti. Par esémpio, de acordo cola lege de Moisè, quel che el fea adultèrio o el copea qualchedun el gavea de esser copà. (Lev. 20:10; Nùm. 35:30, 31) Sicuro che ghen’è sbali che no i ze mia tanto bruti cossita, ma ancora i ze pecati. Par esémpio, Davi el ga dito: ‘Vao star atento a quel che mi fao, par no pecar cola me léngua.’ (Sal. 39:1) Alora capimo che podemo far un pecato fin par meso de quel che disemo. — Tia. 3:2.
5 Proa pensar nela to vita. Sarà che te ghè belche dito o fato qualcossa che dopo te te ghè ciamà gramo? Sicuro de si. La Bìblia la dise: “Se noantri disemo che no ghemo gnanca un pecato, semo drio imbroiar a noantri stessi e la verità no la ze in noantri.” — 1 Gio. 1:8.
6-7. Cossa che Geovà el ga fato par perdonar i nostri pecati? (Varda anca la stampa.)
6 Geovà el ga belche dato la vita de Gesù par perdonar i nostri pecati. (Efe. 1:7) Ma sarà che questo vol dir che Geovà no’l bada mia i nostri sbali? Si che el ghe bada! Lu el ga òdio par el pecato. (Isa. 59:2) Ma come Geovà el volea perdonar i nostri pecati e lu l’è un Dio de giustìssia, lu el gavaria de far qualcossa che ghe desse el dirito, de acordo cola so lege, de perdonarne.
7 De acordo cola lege de Moisè, i israeliti i gavea de far sacrifissi de bèstie par gaver el perdon dei so pecati. (Lev. 4:27-31; 17:11) Questi sacrifissi i insegnea che tuti i gavea bisogno de un sacrifìssio ancora meio par esser perdonadi del bon. L’è questo che el sacrifìssio de Gesù el ga fato. El apòstolo Paolo el ga capio come la morte de Gesù la podea giutar a tute le persone. Quando el ga scrito ai fradei in Corinto, lu el ga parlà de arquante robe brute che lori i gavea fato nel passà, e dopo el ga dito: “Ma valtri sì stati lavadi, sì stati santificadi, sì stati ciamadi giusti nel nome del Signor Gesù Cristo e col spìrito del nostro Dio.” — 1 Cor. 6:9-11.
I israeliti i gavea de far sacrifissi de bèstie par domandar perdon dei so pecati. Questo mostrea che noantri ghemo bisogno del sacrifìssio de Gesù par esser perdonadi del tuto e ricever le benedission de Geovà. (Varda i paràgrafi 6 e 7.)
8. Cossa che podemo pensar vanti dela Selebrassion de questo ano?
8 In questo ano, vanti de ndar ala Selebrassion dela morte de Gesù, proa pensar come che el perdon de Geovà ga cambià la to vita. Par esémpio, par causa dela morte de Gesù, no te toca seitar sentirte in colpa par causa dei pecati che te te ghè belche ciamà gramo. Ma, pol esser che par ti no l’è mia fàcile acetar questa verità. Fursi te pensi: ‘Mi sò che Geovà el me ga perdonà, ma mi no son bon de perdonarme.’ Se te te senti cossita, proa ricordarte che l’è Geovà quel che perdona e lu el ga dato a Gesù la autorità de dessider chi che sarà perdonà. Geovà no’l ga dato a ti gnanca a qualche altra persona questa responsabilità. La Bìblia la dise: ‘Se semo drio ndar nela luce come Geovà l’è nela luce, el sangue de Gesù, el so Fiol, ne purifica de tuti i pecati.’ (1 Gio. 1:6, 7) Alora, podemo fidarse in questa verità compagno noantri se fidemo nele altre verità dela Bìblia. Par causa del sacrifìssio de Gesù, Geovà el ga el dirito de perdonar i nostri sbali. E la Bìblia la dise che lu l’è “sempre pronto par perdonar”. — Sal. 86:5.
EL SACRIFÌSSIO DE GESÙ NE DÀ SPERANSA DE ESSER PERFETI
9. Far una roba sbaliada la ze un pecato. Ma che nantra roba “pecato” vol dir? (Salmo 51:5)
9 Nela Bìblia, la parola “pecato” la vol dir qualcossa che femo de sbalià e vol dir anca che semo imperfeti ancora vanti de nasser. (Ledi Salmo 51:5.d) Par causa del pecato, noantri ghemo voia de far quel che l’è sbalià e no ghemo una salute perfeta. Par quela, restemo maladi, deventemo veci e morimo. Questo ne giuta a capir parché che fin i bambini, che no i ga fato gnente de sbalià, i pol restar maladi e morir. Anca ne giuta a capir parché persone bone e persone rugne le sofre e more. In verità, par causa del pecato de Adon, tuti noantri ghemo el pecato.
10. Cossa che ga sucedesto con Adon e Eva dopo che i ga desobedio a Geovà?
10 Pensa adesso come el pecato ga cambià la vita de Adon e Eva. Dopo che i ga desobedio a Geovà, lori i ga bio tanti bruti sentimenti parché i era ndati contra la lege che la era “scrita nel so cuor”. (Rom. 2:15) Lori suito i ga sentio che le robe no le ndea come prima e i ga sentio che ghe ocorea querzer arquante parte del so corpo e sconderse de Geovà, come se i fusse criminosi. (Gén. 3:7, 8) Quela la ze stata la prima volta che Adon e Eva i se ga sentio in colpa, sensa protession, e i ga bio vergogna, ansietà e dolor. Lori due i ga seità con questi bruti sentimenti fin la so morte. — Gén. 3:16-19.
11. Che dificoltà ghemo par causa del pecato?
11 Par causa del pecato, dele volte se sentimo in colpa, con vergogna, ansiosi e disgustadi compagno Adon e Eva. E no importa el sforso che femo, no semo mia boni de darghene fora del tuto coi nostri problemi. Parché? Parché la Bìblia la dise che semo ‘schiavi del pecato e dela morte’. (Rom. 8:20) Questo sucede con tute le persone. Par esémpio, proa pensar nel sforso che tanti i ga belche fato par tender dela naturesa, gaver pace e finir cola violensa e cola fame. Ancora cossita, lori no i ze stati boni de darghene fora del tuto con questi problemi. Ma el sacrifìssio de Gesù ne dà una bela speransa. Che speransa ela questa?
12. Che speransa el sacrifìssio de Gesù el ne dà?
12 Par via del sacrifìssio de Gesù, ghemo la speransa de esser liberadi del “pecato e dela morte”. (Rom. 8:21) Questo vol dir che in Paradiso no restaremo maladi, disgustadi, ansiosi e mai pi ndaremo sentirse in colpa e con vergogna. E savemo che Gesù, el “Prìnsipe dela Pace” che ga dato la so vita par noantri, el ndarà governar tuta la Tera. Lu el ndarà giutarne a finir fora con quei problemi che no semo mia boni de darghene fora noantri soli. — Isa. 9:6, 7.
13. In che nantra roba te pol pensar vanti dela Selebrassion de questo ano?
13 Pensa come che sarà la to vita quando te sarè perfeto. Tuti i giorni te vè levar su con una bona salute e sensa la paura che ti o qualchedun dela to fameia patissa la fame, reste malà o mora. Questa la ze una bela speransa. Ma ela pol giutarte belche adesso. Parché? Parché “questa speransa sicura e firme la ze come una àncora par la ànima”. (Ebr. 6:18, 19) Cossita come una àncora giuta un barco a restar firme, questa speransa la pol giutarte a gaver una forte fede e a darghene fora con tute le dificoltà che te ghè ancoi. Te pol anca esser sicuro che Geovà “el ricompensa quei che i fà sforso par ndar in serca de lu”. (Ebr. 11:6) L’è stà sol par causa del sacrifìssio de Gesù che te ghè consolo ancoi e una bela speransa par el futuro.
EL SACRIFÌSSIO DE GESÙ NE GIUTA A ESSER AMIGHI DE GEOVÀ
14. Che nantra roba ga sucedesto con tute le persone dopo che Adon e Eva i ga desobedio a Geovà, e parché?
14 Dopo che Adon e Eva i ga desobedio a Geovà, nissun pi podaria esser amigo de Geovà. La Bìblia la dise che tuti noantri semo restadi distanti de Dio. (Rom. 8:7, 8; Col. 1:21) Parché? Parché Geovà l’è perfeto e no l’è mia de acordo con quei che i fà robe sbaliade. La Bìblia la dise che ‘i oci de Geovà i ze massa puri par veder quel che l’è rugno e che lu no’l aceta quel che l’è sbalià’. (Abac. 1:13) Alora, el pecato ga fato tute le persone restar pròpio distante de Dio. Par quela che par noantri esser amighi de Geovà ne ocorea de qualcossa par giutarne a ndarghe darente. E el sacrifìssio de Gesù l’è pròpio quel che ne giuta a esser amighi de Dio.
15. Come che la morte de Gesù ga giutà tute le persone a gaver una bela amicìssia con Geovà?
15 La Bìblia la dise che Gesù “l’è un sacrifìssio de riconsiliassion par i nostri pecati”. (1 Gio. 2:2) La parola greca par “sacrifìssio de riconsiliassion” anca la vol dir gaver pace nantra volta. Sarà che questo vol dir che Geovà l’è restà in pace e contento cola morte de so Fiol? Nò. Ma par causa de questo sacrifìssio, Geovà el ga podesto perdonarne de acordo con quel che lu dise che l’è giusto. Par quela, tuti noantri podemo tornar a gaver pace con Geovà e esser so amighi. (Rom. 3:23-26) Geovà el ga fin considerà come giusti quei che i ze stati fedeli e che i ga vivesto prima de Gesù dar la so vita come sacrifìssio. (Gén. 15:1, 6) Parché? Parché lu l’era sicuro che so caro Fiol Gesù el ndaria pagar questo risgate. (Isa. 46:10) Par causa de questo sacrifìssio, tuti noantri podemo gaver una bela amicìssia con Geovà.
16. Che nantra roba te pol pensar vanti de ndar nela Selebrassion questo ano? (Varda anca la stampa.)
16 Proa pensar come gaver pace nantra volta con Dio ga cambià la to vita. Par esémpio, Gesù el ga dito che quando preghemo a Geovà podemo ciamarlo de “Pare”. (Mat. 6:9) Dele volte pol esser che te ciami Geovà anca de to “Amigo”. Ma quando ciamemo Geovà de “Pare” o “Amigo”, ghemo de farlo con tanto rispeto e umiltà. Parché? Parché ancora semo imperfeti, femo sbali e no semo mia boni de rivarse darente de Geovà noantri soli. Invesse, l’è sol par meso de Gesù che podemo parlar con Geovà e esser so amighi. La Bìblia la dise che l’è stà par meso de Gesù che Geovà el ga ‘riconsilià a lu nantra volta tute le robe, cossita ghen’è pace par meso del sangue che lu el ga spandesto nel pal de tortura’. (Col. 1:19, 20) L’è sol par causa de questo sacrifìssio che noantri podemo esser amighi de Geovà, anca che semo imperfeti.
Podemo esser amighi de Geovà nantra volta sol par meso del sacrifìssio de Gesù (Varda el paràgrafo 16.)
EL SACRIFÌSSIO DE GESÙ MOSTRA LA MISERICÒRDIA DE GEOVÀ
17. Come che el sacrifìssio de Gesù mostra che Geovà el ga tanta misericòrdia? (Efesi 2:4, 5)
17 El sacrifìssio de Gesù ne giuta a capir parché la Bìblia la dise che Geovà “el ga tanta misericòrdia”. Lu el ne ga dato vita “anca quando èrino morti”. (Ledi Efesi 2:4, 5.e) Ancoi, tanti i “se ga metesto a posto par guadagnar la vita eterna” e i se ga nicorti che ghe ocore de aiuto par esser liberadi del pecato. (Ati 13:48) Geovà l’è drio giutar queste persone a cognosser a lu e al so Fiol Gesù par meso dele bone notìssie del Regno de Dio. (Gio. 17:3) Quando Sàtana l’è stà bon de imbroiar Adon e Eva, fursi el ga pensà che el ndaria intrigar Geovà de far quel che el volea. Ma gnente pol intrigar el nostro Dio de far quel che luel vol.
18. Cossa che ghemo de ricordarse quando pensemo sora el sacrifìssio de Gesù?
18 Quando pensemo sora el sacrifìssio de Gesù, se ricordemo che lu no’l ga dato la so vita sol par salvarne. La so morte anca la ze una risposta ala acusassion che Sàtana el ga fato nel giardin del Èden. (Gén. 3:1-5, 15) El sacrifìssio de Gesù mostra che Sàtana l’è un busier e el dà onor al nome de Geovà. Anca mostra el grando amor de Geovà parché ne giutarà a esser liberadi del pecato e el finirà cola morte. Noantri semo imperfeti, femo sbali e no meritemo tuto quel che Geovà el ne dà. Ancora cossita, lu el ne assa giutarlo a mostrar che Sàtana l’è un busier. (Pro. 27:11) Nel pròssimo stùdio, ndaremo imparar come che noantri podemo mostrar che demo valor a tuto quel che Geovà e Gesù i ga fato par noantri.
CÀNTICO 19 Ricordemo dela morte de Gesù
a (Romani 7:22-24) Me piase tanto la lege de Dio, de acordo col omo che mi son par rento. 23 Ma vedo nel me corpo nantra lege che la barufa contra la lege dela me mente, e la me mena prisionero dela lege del pecato che l’è nel me corpo. 24 Poareto de mi! Chi che me liberarà del corpo che l’è soto la autorità dela morte?
b PAR CAPIR MEIO: Un risgate l’è quel che se paga par liberar qualchedun che l’è stà preso. Dela stessa maniera, el sacrifìssio de Gesù el ga liberà del pecato e dela morte tuti quei che i obedisse a Geovà.
c (Eclesiasti 7:20) Parché no ghen’è gnanca un omo giusto nela tera che el fae sempre quel che l’è bon e che mai el sbàlie.
d (Salmo 51:5) Son belche nassesto cola colpa e son pecador de quando me mama la ze deventada gràvida.
e (Efesi 2:4, 5) Ma Dio el ga tanta misericòrdia e, par causa del grando amor che el ga par noantri, 5 lu el ne ga dato la vita insieme col Cristo, anca quando èrino morti par causa dei nostri pecati. Valtri sì stati salvi gràssie ala granda bontà de Dio.