Geovà el pol giutarte quando te sì desanimà

1-2. (a) Come che el apòstolo Paolo el se sentia dele volte? (b) Parché che el so esémpio el pol giutarne? (Romani 7:21-24)

QUANDO se ricordemo del apòstolo Paolo, fursi ne vien in mente che lu l’era un brao predicador, che el insegnea tanto ben la verità ai altri e che el ga scrito tanti libri dela Bìblia. Sicuro che Paolo l’era un omo coraioso e fedele. Ma dele volte, anca lu el se sentia desanimà e ansioso, compagno a tanti de noantri se sentimo ancoi.

² Ledi Romani 7:21-24.a Nela carta che Paolo el ga scrito ai romani, lu el ga parlà sora robe che anca noantri ghemo de darghene fora. Lu l’era un servo fedele de Dio e el volea tanto obedirlo. Ma dele volte, Paolo el catea che l’era fadiga farlo parché l’era imperfeto. Lu anca el restea desanimà quando el se ricordea dele brute robe che el gavea fato nel passà e parché ghe tochea darghene fora con un problema che no’l gavea gnancora solussion.

3. Cossa che ndaremo veder in questo stùdio? (Varda anca “Par capir meio”.)

³ Anca se Paolo dele volte el restesse desanimà, lu el se sforsea par no seitar a pensar brute robe.b In questo stùdio, ndaremo veder la risposta a queste domande: Cossa che assea Paolo desanimà? Cossa che lo ga giutà a darghene fora coi so pensieri? Cossa che noantri podemo far quando semo desanimadi?

PARCHÉ CHE DELE VOLTE PAOLO EL RESTEA DESANIMÀ?

4. Parché che dele volte Paolo el restea desanimà?

⁴ Lu el se ricordea dele robe che el gavea fato nel passà. Vanti de Paolo deventar un dissìpolo de Gesù, lu el ga fato tante brute robe che dopo el se ga ciamà gramo. Par esémpio, lu l’era là insieme quando i ga copà Stevon e lu el catea che quela la era la roba giusta de far. (Ati 7:58; 8:1) Paolo el ga anca perseghio e el ga tratà mal tanti servi de Dio. — Ati 8:3; 26:9-11.

5. Come che Paolo el se sentia par causa dele robe che el gavea fato nel passà?

⁵ Dopo che Paolo l’è deventà un dissìpolo de Gesù, lu el se sentia triste cole robe che el gavea fato nel passà. E col tempo, quando el se ricordea che el gavea perseghio i so fradei, fursi el restea ancora pedo. Par esémpio, intorno del ano 55, quando el ga scrito la so prima carta ai corinti, lu el ga dito che no’l meritea esser ciamà de apòstolo parché el gavea perseghio i servi de Dio. (1 Cor. 15:9) Intorno de sinque ani dopo, el ga scrito ai efesi che lu l’era el manco importante de tuti i fradei e le sorele. (Efe. 3:8) E nela so carta a Timòteo, Paolo el ga dito che el gavea bestemà contra Dio, no lo gavea rispetà e el gavea perseghio el so pòpolo. (1 Tim. 1:13) Alora, proa pensar come che Paolo el se ga sentio quando lu el ga visità congregassion che ghen’era fradei che lu el gavea perseghio o persone dela fameia de questi fradei.

6. Che nantra roba assea Paolo ansioso? (Varda anca la nota.)

⁶ Un spin nela carne. Paolo el gavea un problema che lo fea sofrir tanto. Par quela che el ga dito che l’era come se el gavesse “un spin nela carne”. (2 Cor. 12:7) No savemo mia quel che pròpio lo fea sofrir. Ma pol esser che el gavesse una malatia o nantra roba che lo assesse tanto ansioso.c

7. Parché che l’era fadiga par Paolo sempre far quel che l’è giusto? (Romani 7:18, 19)

⁷ Le robe sbaliade che el fea. Paolo el se sforsea tanto par deventar una persona cada volta meio, ma l’era imperfeto e el fea sbali. (Ledi Romani 7:18, 19.d) Par quela, lu el ga dito che tante volte lu no’l fea le robe bele che el volea far, e altre volte el fea quel che no’l gavea de far. Paolo el se sforsea par far quel che l’è giusto e no ndar drio le so voie. (1 Cor. 9:27) Alora, proa pensar come Paolo el se sentia quando el fea un sbàlio che l’era drio sforsarse par no farlo pi!

COSSA CHE GIUTEA PAOLO QUANDO LU L’ERA DESANIMÀ?

8. Cossa che Paolo el fea par deventar una persona cada volta meio?

⁸ Come vedemo nele carte de Paolo, lu el pensea in come el spìrito santo de Dio pol giutar i so servi a fermarse de pensar in robe sbaliade e deventar persone cada volta meio. (Rom. 8:13; Gàl. 5:16, 17) Nele so carte, lu anca el parlea dele voie che le ze sbaliade e le robe che i fradei no i gavea de far se i volea contentar a Geovà. (Gàl. 5:19-21, 26) Cossita capimo che Paolo el pensea nele robe che el ghe tochea cambiar. Par quela, lu el studiea la Bìblia par capir che cambiamenti el gavea de far e come che el podea farlo. Sicuro che Paolo no sol el dea consili ai altri, ma lu pròpio li metea in pràtica.

9-10. Cossa che ga giutà Paolo quando lu l’era desanimà? (Efesi 1:7) (Varda anca la stampa.)

⁹ Anca se Paolo dele volte el se sentia desanimà, ghen’era tante robe che lo giutea a restar contento. Par esémpio, lu el ghe piasea tanto de ricever notìssie de fradei de altre congregassion. (2 Cor. 7:6, 7) Nantra roba che lo assea contento la era la amicìssia che el gavea coi so fradei e sorele. (2 Tim. 1:4) E Paolo el restea felice parché el savea che el gavea una forte amicìssia con Geovà e che lu l’era drio contentarlo. (2 Tim. 1:3) Quando lu l’era preso in Roma, lu el ga dito par i fradei gaver “alegria par causa del Signor”. (Fil. 4:4) Par meso dele parole de Paolo, capimo che lu no’l seitea pensar nei so problemi e nei so sbali. Invesse, sempre che queste robe le ghe vegnea in mente, lu el proea suito pensar in quel che lo assea contento.

¹⁰ Nantra roba che ga giutà Paolo l’è stà ricordarse che Geovà lo amea e che el gavea dato la vita del so Fiol anca par lu. (Gàl. 2:20; Ledi Efesi 1:7.e) Par quela che Paolo el podea fidarse che Geovà el ndaria perdonarlo par meso de Gesù Cristo. (Rom. 7:24, 25) Alora, anca che Paolo el gavesse fato tanti sbali e el fusse imperfeto, lu l’è stà bon de dar “un sacrifìssio sensa difeto” a Geovà e el ga podesto farlo con alegria. — Ebr. 9:12-14.

11. Parché che el esémpio de Paolo ne incoraia?

¹¹ Come Paolo, fursi sentimo che ghemo de sforsarse tanto par no pensar, no parlar o no far quel che disgusta a Geovà. Pol esser che ne vien voia de dir: ‘Mi son un poro gramo!’ Varda quel che una sorela de nome Elizaf, che la ga intorno de 20 ani, la ga dito: “El esémpio de Paolo me incoraia tanto parché me giuta a capir che ghen’è anca altre persone che ghe toca seitar a darghene fora col desànimo. Anca el me ricorda che Geovà el vede quel che semo drio infrontar.” Ma cossa che pol giutarne a seitar contenti e a far quel che ghe piase a Geovà anca quando semo desanimadi?

COSSA CHE PODEMO FAR QUANDO SEMO DESANIMADI?

12. Cossa ghemo de seitar a far, e parché?

¹² Ghemo de far robe che ne giuta a gaver una amicìssia con Geovà cada volta pi forte. Come? Proa pensar in questo esémpio. Noantri se sentimo ben quando magnemo quel che l’è bon par la salute, femo esersissi e dormimo el tanto che ghe vol. Dela medèsima maniera, se sentimo pi contenti quando ledemo la Bìblia tuti i giorni, predichemo, se pareciemo par la riunion e femo comentari. Se seitemo a far queste robe, saremo boni de pensar in quel che l’è bon e se sentiremo pi contenti. — Rom. 12:11, 12.

13-14. Come che arquanti fradei e sorele i se sente dopo che i se ga sforsà par far pi forte la so amicìssia con Geovà?

¹³ Varda el esémpio de un fradel de nome John. Quando el gavea 39 ani, el ga savesto che el gavea un bruto càncaro, e in quela època, so fiol el gavea sol tre ani. Nel scomìnsio, lu l’era spaurà e tanto ansioso. Lu no l’era bon de creder che con questa età belche el gavea de tribolar par via de una malatia. Cossa che lo ga giutà a no pensar sol in robe brute? John el ga dito: “Anca se me sentia tanto straco, ndeino a tute le riunion, ala predicassion e feino la adorassion in fameia tute le stimane. Noantri feino queste robe anca se dele volte fusse tanto fadiga. L’è vera che quando sucede robe brute nela nostra vita, restemo spaventadi e tanto desanimadi. Ma suito sentimo che Geovà el ne ama e el ne dà la forsa che ne ocore. Lu el me ga giutà e l’è sicuro che va giutar anca a ti.”

¹⁴ Eliza, che ghemo parlà vanti, la ga dito: “Mi resto tanto contenta parché tute le volte che vao ale riunion e stùdio la Bìblia, sinto che Geovà l’è un amigo che me scolta e me ama.” Nolan, che l’è un superintendente de sircuito nela Àfrica, el ga dito cossa che ga giutà lu e la so dona Diane: “Anca quando semo desanimadi, seitemo a pregar, studiar la Bìblia, ndar ale riunion e predicar. Queste robe le ne giuta a gaver alegria. Noantri sempre se ricordemo che Geovà el ndarà giutarne e benedirne. Come lu ndarà farlo? Noantri no savemo, ma semo sicuri che lu ndarà giutarne.”

15. Cossa che podemo far se ancora seitemo desanimadi?

¹⁵ Ma cossa pol giutarne se seitemo desanimadi? Podemo far anca altre robe. Par giutarne a capir, metemo dir che te ghè mal ala schena e te ghè belche proà caminar tuti i giorni, ma el mal no l’è ndato via. Alora, te podarissi far peschise sora quel assunto o fin ndar al dotor par capir parché che te ghè questo mal. Dela medèsima maniera, cossa ancora te pol far se te ghè belche proà far quel che ghemo visto in questo stùdio e te seiti desanimà? Te pol peschisar de pi la Bìblia e le publicassion par capir parché che te te senti cossita e cossa pol giutarte a sentirte meio. Proa anca domandar consili a un fradel o a una sorela. Ma che altre robe pol giutarte?

16. Cossa pol giutarne a capir parché che semo ansiosi? (Salmo 139:1-4, 23, 24)

¹⁶ Te pol domandar che Geovà el te giute a capir quel che te ocore. El rè Davi el savea che Geovà lo cognossea tanto ben. Par quela, el ga domandà che lo giutesse a capir le so ansietà. (Ledi Salmo 139:1-4,g 23, 24.h) Anca ti te pol domandar che Geovà el te giute a capir parché che te resti ansioso e come che te pol darghene fora con questo sentimento. Proa anca domandarte: ‘Parché che mi son preocupà? Ghen’è qualcossa che sempre me assa ansioso? Quando me vien bruti pensamenti, proo suito cavarli via?

17. Sora che assunto te podarissi studiar par sentirte pi animà? (Varda anca la stampa.)

¹⁷ Stùdia pròpio sora quel che te ghè de bisogno. Tuti noantri dele volte ghemo de studiar sora le qualità de Geovà. Par esémpio, l’è stà tanto bon par el apòstolo Paolo pensarghe sora el perdon de Geovà e sora el sacrifìssio de Gesù. Anca ti te pol far compagno. Cossa che pol giutarte? Te pol studiar nele nostre publicassion sora la misericòrdia, el perdon e el amor leal de Geovà. Quando te ledi i i artìcoli de queste publicassion, proa pensar in come far compagno a Geovà e come quel che te ledi pol giutarte a sentirte pi animà. Dopo che te ghè catà questi artìcoli, scrivili do par léderli nantra volta quando te sì desanimà. Proa anca meter in pràtica quel che te ghè ledesto de acordo cola to situassion. — Fil. 4:8.

18. Sora cossa arquanti fradei e sorele i ga studià?

¹⁸ Eliza, che ghemo parlà prima, la ga studià sora Giò. Ela la ga dito: “Mi go infrontà una mùcia de robe al medèsimo tempo. Alora, mi go studià sora Giò. Anca lu el ga bio una mùcia de problemi e l’è restà tanto desanimà. Ma stesso che no’l savesse parché che l’era drio patir, el ga seità fidarse che Geovà lo giutaria.” (Giò 42:1-6) Diane, che ghemo belche parlà, la ga dito: “Mi e me omo semo drio studiar sora le qualità de Geovà nele nostre publicassion. Noantri se sentimo contenti de esser come baro nele man Geovà, el nostro Olero. Alora, quando semo desanimadi par causa dei sbali che femo, se ricordemo che lu l’è drio insegnarne e l’è drio giutarne a deventar persone meio. Questo fà la nostra amicìssia con Geovà restar cada volta pi forte.” — Isa. 64:8.

PODEMO ESSER SICURI CHE GEOVÀ EL NDARÀ GIUTARNE E BENEDIRNE

19. (a) Come che dele volte se sentimo? (b) De cossa podemo esser sicuri?

¹⁹ Anca se femo tuto quel che ghemo imparà in questo stùdio, pol esser che dele volte se sentimo tristi e ansiosi. Fursi ghen sarà giorni che se sentiremo pori grami. Ma col aiuto de Geovà podemo fermarse de pensar in quel che ne assa desanimadi e restar calmi. Alora, podemo esser sicuri che quasi tuti i giorni dela nostra vita i sarà felici. Parché? Parché la felicità la vien de gaver una forte amicìssia con Geovà e assarlo contento.

20. Cossa sito determinà a far?

²⁰ Seitemo a far el nostro meio par no assar che i nostri problemi, le robe che le ga sucedesto nel passà o quel che femo de sbalià ne intrighe de goder la vita. Quando scominsiemo a restar desanimadi o ansiosi, Geovà el ne giutarà a restar calmi. (Sal. 143:10) Semo sicuri che rivarà el giorno che saremo boni de pensar sol in robe bone. In Paradiso, tuti i giorni ndaremo desmissiarse contenti de servir a Geovà!