23-29 DE MARSO DE 2026
CÀNTICO 18 Gràssie par el risgate!
Come che te pol mostrar che te dè valor al sacrifìssio de Gesù?
“El amor che el Cristo el ga el ne motiva.” — 2 COR. 5:14.
COSSA CHE NDAREMO IMPARAR?
Come che tuti noantri podemo mostrar che ghe demo valor al sacrifìssio de Gesù?
1-2. Cossa che el sacrifìssio de Gesù el ne motiva a far, e parché? (2 Corinti 5:14, 15) (Varda anca la stampa.)
COME CHE te te sentirissi se te fussi stà preso in meso ale rovine de un prèdio che l’era vegnesto do e un omo el te ga liberà? Fursi ti te sentirissi tanto grato e ti te volarissi dirghe ala persona che no te ndarè mai desmentegarte de quel che ela la ga fato par ti.
2 Come ghemo visto nel stùdio vanti, noantri soli no podemo liberarse del pecato e dela morte. Ma, par meso del sacrifìssio de Gesù, noantri podemo gaver (1) el perdon dei pecati, (2) la speransa de deventar perfeti nel futuro, e (3) una bela amicìssia con Dio. Cossita, podaremo viver par sempre nel novo mondo de Geovà. Gesù el ga mostrà el so grando amor par le persone quando el ga sacrificà la so vita par noantri. E lu el ne ga amà tanto vanti de vegner ala Tera. (Pro. 8:30, 31) El apòstolo Paolo el ga scrito che el amor de Cristo “el ne motiva”. (Ledi 2 Corinti 5:14, 15.a) Questo vol dir che ghemo de mostrar che semo grati par el amor de Gesù e mai ghemo de desmentegarse de quel che lu el ga fato par noantri.
Sicuro che te ringrassiarissi tanto una persona che la ga salvà la to vita. Dela medèsima maniera, ghemo de ringrassiar a Geovà e a Gesù che i ne ga liberà del pecato e dela morte (Varda i paràgrafi 1 e 2.)
3. Parché che la to maniera de mostrar che te ghe dè valor al sacrifìssio de Gesù pol esser difarente de quela dei altri?
3 Come che ti te vè mostrar che te dè valor al sacrifìssio de Gesù? Pol esser che la maniera che te mostri che te ghe dè valor la sìpia difarente de quela dele altre persone. Pensa in questo esémpio. Imagina che tre persone le fà un viaio e le ga de ndar nel medèsimo posto. Ma cada persona la ze drio partir de una cità difarente. Alora, l’è sicuro che queste persone le ciaparà tre strade difarente par rivar nel medèsimo posto. Compagno a questo esémpio, la maniera come ti te mostri che te ghe dè valor al sacrifìssio de Gesù la ze difarente dei altri. In questo stùdio, ndaremo veder come che te pol mostrar che te ghe dè valor al sacrifìssio de Gesù se te sì: (1) un studiante dela Bìblia, (2) un fradel o una sorela batesà, o (3) un fradel o una sorela che no serve pi a Geovà cola congregassion.
I STUDIANTI DELA BÌBLIA
4. Cossa che Geovà el pensa sora i studianti dela Bìblia?
4 Se te sì un studiante dela Bìblia, pensa in questo: la to voia de imparar sora Geovà e la Bìblia mostra che Geovà el vol che ti te deventi so amigo. (Gio. 6:44; Ati 13:48) La Bìblia la dise che Geovà “el sa quel che ghen’è rento el cuor”. Questo vol dir che lu el vede el sforso che te fè par imparar sora lu, e lu l’è contento de veder che te fè i cambiamenti che ghe vol. (Pro. 17:3; 27:11) Par meso del sacrifìssio de Gesù ti te pol gaver una bela amicìssia con Geovà. (Rom. 5:10, 11) No stà mai desmentegarte de questo!
5. De acordo con Filipensi 3:16, cossa che i studianti dela Bìblia i pol far?
5 Se te sì un studiante dela Bìblia, come che te pol mostrar che te sì grato par el sacrifìssio de Gesù? Una roba che te pol far la ze quela che el apòstolo Paolo el ga dito ai Filipensi: “No importa la nostra situassion, ghemo belche fato meio de vanti, sia poco o tanto. Ancora cossita, seitemo ndar avanti dela medèsima maniera.” (Fil. 3:16) Nantra tradussion de questo versìcolo dise: “Seitemo a ndar avanti in questa strada che semo drio caminar.” Alora, no stà assar che gnente te intrighe de seitar a caminar nela strada che porta ala vita. — Mat. 7:14; Luc. 9:62.
6. Cossa che un studiante dela Bìblia el pol far se ghe fà fadiga far cambiamenti? (Deuteronómio 30:11-14) (Varda anca la stampa.)
6 Fursi no l’è mia fàcile par ti fidarte in qualcossa che te ghè pena imparà dela Bìblia. Cossa che te pol far? Fà una peschisa e prega a Geovà che el te giute a capir meio. (Sal. 86:11) E se ancora l’è difìcile par ti capir un insegnamento, proa fermarte de preocuparte con quel lì par un tempo e seita a studiar la Bìblia. Fursi te capirè meio pi avanti. O pol esser che sìpia fadiga par ti fermarte de far qualcossa che no ghe piase a Geovà. Ricòrdate che Geovà mai el ne domanda de far qualcossa che no podemo far. L’è sicuro che ti te pol contentarlo. (Ledi Deuteronómio 30:11-14.b) E Geovà el promete giutarte. (Isa. 41:10, 13; 1 Cor. 10:13) Alora, invesse de pensar tanto in quel che l’è fadiga far, pensa in tute le robe bone che Geovà el ga fato par ti come, par esémpio, che el ga mandà el so Fiol morir par ti. Quando ti te ami cada volta de pi a Geovà, te vederè che “i so comandamenti no i ze mia un peso”. — 1 Gio. 5:3.c
Geovà mai ne domanda de far quel che no semo boni e sempre el ndarà giutarne (Varda el paràgrafo 6.)
7. Se i to genitori i era belche Testimònie de Geovà quando te sì nassesto, sora cossa te pol pensarghe sora?
7 Gióveno, se i to genitori i era belche Testimònie de Geovà quando te sì nassesto, anca ti te sì un studiante dela Bìblia. Ti te sì el pi importante studiante dela Bìblia dei to genitori. La Bìblia la dise quel che anca ti te ghè de far: “Rivé darente de Dio e lu el rivarà darente de valtri.” (Tia. 4:8; 1 Cró. 28:9) Quando ti te fè qualcossa par ndar pi darente de Geovà, anca lu el vien pi darente de ti. Geovà el te dà atension nò parché te sì stà slevà nte una fameia de Testimònie de Geovà, ma parché lu el vol esser to amigo. Come che te pol esser so amigo? Par meso del sacrifìssio de Gesù. No stà mai desmentegarte de questo. (Rom. 5:1, 2) Alora, vanti de ndar ala Selebrassion de questo ano, pensaghe sora parché la morte de Gesù la ze importante par ti. Cossa te pol far par mostrar che te ghe dè valor al sacrifìssio de Gesù? Pensa sora la to maniera de viver e le robe che te pol far nel laoro a Geovà.d
QUEI CHE I ZE BATESADI
8. Come che quei che i ze batesadi i ga mostrà che i ghe dà valor al sacrifìssio de Gesù?
8 Se ti te te ghè batesà, te ghè belche mostrà de tante maniere che te ghe dè valor al sacrifìssio de Gesù. Par esémpio, te ghè cambià la to vita par contentar a Geovà e te sì deventà so amigo. Te ghè obedio al comandamento de Gesù de predicar. Anca te te ghè dedicà a Geovà e te sì stà batesà. E fursi qualchedun l’è vegnesto contra ti parché te servi a Geovà. (2 Tim. 3:12) Ma se te sì restà leal, questo mostra che te lo ami e che te ghe dè valor al sacrifìssio de Gesù. — Ebr. 12:2, 3.
9. Cossa che quei che i ze batesadi i ga de star atenti?
9 Ti che te sì batesà, te ghè de star atento a un perìcolo. Te podarissi scominsiar a no dar tanto valor al sacrifìssio de Gesù. Ma come che questo pol suceder? Varda el esémpio dei fradei del passà che i era de star in Èfeso. Gesù li ga lodadi par la so perseveransa, ma el ghe ga anca dito: “Mi go una roba contra ti. Te ghè abandonà el amor che te gavei nel scomìnsio.” (Apo. 2:3, 4) Gesù el ga mostrà che ti, che te sì batesà, te podarissi scominsiar a far robe par Dio sol parché te sì costumà e nò par amor. Fursi ancora te preghi, te vè ale riunion, ala predicassion, ma sensa pensar parché te fè queste robe. Alora, cossa che te podarissi far se te senti che el to amor par Geovà no l’è mia pi forte come quel de una volta?
10. Come che te pol “pensarghe sora” e ‘dedicarte de maniera completa’ ala to adorassion? (1 Timòteo 4:13, 15)
10 El apòstolo Paolo el ga dito a Timòteo de “pensarghe sora” e ‘dedicarse de maniera completa’ ala so adorassion. (Ledi 1 Timòteo 4:13,e 15.f) Anca ti te pol pensar in quel che te pol far par darghe ancora de pi valor ala to adorassion a Geovà. (Rom. 12:11; varda la nota de stùdio “Sejam fervorosos no espírito”.) Par esémpio, te pol torte un pochetin de pi tempo par pareciar le riunion. Questo te giutarà a esser pi atento quando te si là. Te pol anca studiar la Bìblia nte un posto ndove te pol restar ti ti sol e pensarghe sora in quel che te sì drio imparar. Cossita come te ghè bisogno te meter legna nel fogo par tegnerlo impissà, te ghè de seitar far queste robe par darghe valor al sacrifìssio de Gesù e a tute le altre robe che Geovà el te dà. E vanti dela Selebrassion, te pol pensar in tute le bele robe che te ghè parché te servi a Geovà.
11-12. Se par un tempo no te ghè voia de meterghela tuta nela adorassion a Geovà, vol dir che te ghè perso el spìrito de Dio? Spiega. (Varda anca la stampa.)
11 E se sucede che no te ghè pi quela voia de meterghela tuta nela adorassion a Geovà, no vol dir che te ghè perso el so spìrito. Invesse de restar desanimà, ricòrdate de quel che el apòstolo Paolo el ga scrito ai Corinti: “Anca se lo fao sensa voia, l’è una responsabilità che go ricevesto.” (1 Cor. 9:17) Cossa che lu el ga volesto dir?
12 Paolo dele volte no’l gavea voia de predicar, ma lu l’era determinà a seitar predicar anca quando no l’era quel lì che el volea far. Ti te pol far compagno al apòstolo Paolo. Sìpia determinà a far la roba giusta anca se no te ghè voia e prega a Geovà che el te dae “la voia e anca el poder”. (Fil. 2:13) Seita a far le robe che te giuta a restar darente de Geovà. Alora, te pol esser sicuro che dopo de un tempo, el to amor par Geovà el brusarà come un fogo nantra volta.
Seita a far robe che te giuta a restar darente de Geovà, anca se dele volte no te ghè mia voia de farle (Varda i paràgrafi 11 e 12.)
13. Come che podemo seitar a ‘esaminarse se semo nela fede’?
13 Tuti noantri ghemo de far quel che el apòstolo Paolo el ga dito in 2 Corinti 13:5: “Seité a esaminarve se valtri sì nela fede. Seité a meter soto prova quel che valtri sì pròpio.” Par esémpio, te pol domandarte: ‘Quando penso nela me maniera de viver, l’è ciaro che la me adorassion a Geovà ze la roba pi importante dela me vita?’ (Mat. 6:33) ‘Le robe che mi vardo e fao par divertirme mostra che mi òdio quel che l’è rugno?’ (Sal. 97:10) ‘Mi proo dir o far robe che giuta che ghen sìpia pace e union nela congregassion?’ (Efe. 4:2, 3) La Selebrassion la ze un bon momento par pensarghe sora queste robe. Quando pensemo in quel che Geovà e Gesù i ga fato par noantri, volemo mostrar a Geovà che ghe demo valor al sacrifìssio de Gesù e che semo drio viver par Cristo e nò par noantri stessi.
QUEI CHE NO I SERVE PI A GEOVÀ COLA CONGREGASSION
14. Parché che arquanti fradei no i adora pi a Geovà cola congregassion?
14 Arquanti fradei i se ga fermà de adorar a Geovà cola congregassion dopo de arquanti mesi o anca dopo de arquanti ani. Parché? Arquanti i ze preocupadi cole robe dela vita e i cata che l’è tanto difìcile adorar a Geovà. (Luc. 21:34) Altri i ze restadi ofendesti par causa de quel che un fradel o una sorela i ga dito o fato. (Tia. 3:2) Ancora altri i ga fato un bruto pecato e no i vol domandar aiuto. Ma come che el sacrifìssio de Gesù pol giutarte a tornar a adorar a Geovà cola congregassion?
15. De acordo con Ezechiel 34:11, 12, 16, come che Geovà el mostra che el se importa con quei che no i lo adora pi cola congregassion?
15 Cossa che Geovà el sente par i fradei che no i lo adora pi cola congregassion? Lu no l’è inrabià e gnanca no’l se ga desmentegà de lori. La Bìblia la dise che lu el va in serca dele piégore perse par ténderle, darghe de magnar e le giuta a tornar a lu. (Ledi Ezechiel 34:11, 12,g 16.h) Te pol esser sicuro che Geovà l’è drio far la medèsima roba par ti. Se te sì drio leder questo stùdio, lu el sa che te vol ancora contentarlo. Geovà el ga visto robe bone in ti quando el te ga giutà a cognosserlo e a far parte dela so congregassion. E lu el seita veder le robe bone che te fè e el vol che ti te torni ala so fameia.
16. Cossa che pol giutarte a tornar a Geovà? (Varda anca la stampa.)
16 Varda le bele parole dela revista Volte para Jeovà: “L’è sicuro che Geovà el te giutarà a ritornar a lu. Lu el te darà forsa par infrontar le preocupassion dela vita e el te giutarà a fermarte de restar ofendesto par causa de quel che un fradel el ga dito o fato contra ti. E lu el ndarà perdonarte e giutarte a gaver una cossiensa neta. Tuto questo te giutarà a servir a Geovà insieme coi fradei e sorele nantra volta.” E anca ricòrdate che i ansiani i ga tanto caro de giutarte. Lori i podarà esser ‘come una protession contra el vento, come un posto par protegerte dela tempesta’. (Isa. 32:2) Savemo che te ghe dè valor al sacrifìssio de Gesù. Alora domandate: ‘Cossa posso far par “meter tuto a posto” intrà mi e Geovà?’ (Isa. 1:18; 1 Pie. 2:25) Par esémpio, sarà che te pol ndar a una riunion nel Salon del Regno? Lì, te pol parlar con un dei ansiani e dirghe che te ghè bisogno de aiuto par tornar a Geovà. Lu el pol fin domandar che qualchedun stùdie la Bìblia con ti par un tempo. Te pol esser sicuro che Geovà el ndarà benedir i to sforsi par tornar a lu e par mostrar che te ghe dè valor al sacrifìssio de so Fiol.
Domandate: ‘Cossa posso far par “meter tuto a posto” intrà mi e Geovà?’ (Varda el paràgrafo 16.)
COSSA CHE TE NDARÈ FAR?
17-18. Come che te pol doperar ben el to tempo vanti dela Selebrassion?
17 Gesù el ga dito che Geovà lo ga mandà par dar la so vita “cossita tuti quei che i dimostra fede in lu no i sìpia destruti, ma i possa viver par sempre”. (Gio. 3:16) No ghemo mai de desmentegarse che Geovà el pol liberarne del pecato e dela morte par meso del sacrifìssio de Gesù. (Rom. 3:23, 24; 2 Cor. 6:1) Alora, vanti dela Selebrassion de questo ano, tote el tempo par pensarghe sora el amor de Geovà e de Gesù. Questo ndarà motivarte a mostrar che te ghe dè valor a quel che Geovà e Gesù i ga fato par ti.
18 Come che ti te ndarè mostrar che te ghe dè valor al sacrifìssio de Gesù? Fursi la to risposta la sarà difarente de quela dei altri. Ma te pol esser sicuro che Geovà el ndarà benedir i to sforsi e el sforso de tanti fradei e sorele de tuto el mondo che no i vive pi “par lori stessi, ma par quel che l’è morto par lori”, o sia, Gesù. — 2 Cor. 5:15.
CÀNTICO 14 Lodemo a Gesù el nostro Rè
a (2 Corinti 5:14, 15) El amor che el Cristo el ga bio el ne motiva. Ghemo capio che un sol omo l’è morto par tuti, parché deromai tuti i era morti. 15 Lu l’è morto par tuti. Cossita, quei che i vive no i ga pi de viver par lori stessi, ma par quel che l’è morto par lori e l’è stà ressussità.
b (Deuteronómio 30:11-14) “Questo comandamento che mi te dao ancoi no l’è massa fadiga de obedirlo e no l’è de pi de quel che te pol far. 12 No l’è su nel cielo che te ghè de dir: ‘Chi che sarà bon de ndar su al cielo e portarlo qua par esser boni de scoltarlo e obedirlo?’ 13 Gnanca l’è del’altra banda del mar che te ghè de dir: ‘Chi che ndarà par l’altra banda del mar e ndarà portarlo qua par esser boni de scoltarlo e obedirlo?’ 14 Parché la parola la ze ben darente de ti, nela to boca e nel to cuor, cossita te sarè bon de obedirla.
c Te pol doperar la parte “Sfòrsate par . . . ” che ghen’è nel fin de cada lession del libro Te pol viver felice par sempre! par giutar el to studiante a gaver una amicìssia cada volta pi forte con Geovà.
d Par saver cossa che te pol far par darghe valor a tuto quel che Geovà e Gesù i ga fato par ti, varda el artìcolo “Seita a sforsarte par adorar a Geovà ancora meio”, nela Sentinela de maio de 2023.
e (1 Timòteo 4:13) Fin che mi vegno, seita sforsarte par leder in pùblico, par dar consili, e par insegnar.
f (1 Timòteo 4:15) Te ghè de pensarghe sora queste robe. Te ghè de dedicarte in queste robe de maniera completa. Cossita tuti i vederà el to progresso de maniera ciara.
g (Ezechiel 34:11, 12) “Cossita dise el Sovrano Signor Geovà: “Son qua, e mi pròpio vao in serca dele me piégore e vao ténderle. 12 Vao tender dele me piégore come un pastor che el cata le so piégore perse e el ghe dà de magnar. Vao ricuperarle de tuti i posti che le ze state spaiade nel giorno de nùvole e scuridon.
h (Ezechiel 34:16) “Mi vao in serca de quela che la ze persa. Vao giutar a ritornar quela che la se ga ciapà in drio. Vao meter fasse in quela che la se ga fato mal. Vao giutar la fiaca a vegner pi forte. Ma mi vao finir fora cola gorda e cola forte. Queste mi vao giulgar e darghe la punission che le mèrita.”