Parla la verità cole bone e nela ora giusta

1. Cossa ghemo de far par esser parte dela fameia de Geovà?

QUANDO cognossemo un fradel o una sorela, pol esser che ghe domandemo: “Come che te ghè imparà la verità?” Arquanti i ne risponde cossita: “I me genitori i me ga insegnà la verità.” Altri pol esser che i ne diga: “Fà poco tempo che go imparà la verità.” Noantri rispondemo cossita parché la verità dela Bìblia ne insegna a viver. Savemo che, par far parte dela fameia de Geovà, ghemo de mostrar che amemo la verità e vivemo de acordo con ela. Una maniera de far questo la ze quando sempre parlemo la verità e femo quel che l’è giusto. — Sal. 15:1-3.

2. (a) Cossa che Gesù sempre el fea? (b) Cossa che sucedea quando le persone le scoltea la verità che Gesù el insegnea?

² Gesù sempre el parlea la verità, anca quando i so nemighi no i ghe piasea. (Mat. 22:16) Gesù el ga dito cossa che sucedea quando lu el insegnea le verità ale persone: “Parché son vegnesto meter un contra el altro, el fiol contra so pare, la fiola contra so mare e la nora contra so sogra.” (Mat. 10:35) Gesù el volea che tuti i lo scoltesse, ma anca el savea che gnanca tuti i saria de acordo con quel che lu el insegnea. (Mat. 23:37) Lu el savea che le persone le podaria amar o odiar quel che lu el disea. — 2 Tes. 2:9-11.

3. Cossa che ndaremo veder in questo stùdio?

³ Compagno a Gesù, noantri sempre volemo parlar la verità, anca se le persone no le ghe piase. Noantri femo cossita quando predichemo sora la Bìblia. Ma sarà che questo vol dir che no ghemo de pensarghe sora come e quando insegnar la verità sora la Bìblia? Sicuro che nò! In questo artìcolo, ndaremo risponder a queste domande: Ndove podemo catar la verità? Parché, come e quando ghemo de parlar la verità sora la Bìblia? Saver la risposta a queste domande ndarà giutarne a predicar cole bone e nela ora giusta.

NDOVE PODEMO CATAR LA VERITÀ?

4. Parché che podemo dir che la verità la vien de Geovà?

⁴ La verità la vien de Geovà. Tuto quel che lu el dise l’è vero. Par esémpio, quel che lu el dise sora quel che l’è giusto e sbalià l’è vero. (Sal. 19:9; 119:142, 151) Le so promesse par el futuro le ndarà suceder. (Isa. 55:10, 11) Lu el fà tuto quel che el promete. (Nùm. 23:19) Alora, Dio mai el dise busie. (Ebr. 6:18) Par quela, Geovà l’è cognossesto come ‘el Dio dela verità’. — Sal. 31:5.

5. Parché che no l’è mia fadiga catar el ‘Dio dela verità’? Spiega. (Ati 17:27)

⁵ Arquanti i cata fadiga cognosser a Geovà, ‘el Dio dela verità’. Ma, nela creassion, ghen’è tante prove che lu el ghen’è. (Rom. 1:20) Nel passà, quando el apòstolo Paolo l’era drio parlar con arquanti grechi, lu el ga dito che Dio el vol che ‘lo catemo’ e che lu ‘no l’è distante de noantri’. (Ledi Ati 17:27.a) La Bìblia la mostra che Geovà el vol esser amigo de persone ùmile e che le ze in serca dela verità. — Gio. 6:44.

6. Quale che le ze arquante verità dela Bìblia, e parché che te piase tanto de queste verità?

⁶ Una dele maniere che podemo cognosser a Dio la ze studiando la Bìblia. I òmini i ga scrito la Bìblia par meso del spìrito santo de Dio. (2 Pie. 1:20, 21) Alora, tuto quel che ghen’è nela Bìblia l’è de fidarse. Par esémpio, ela la dise che Geovà el ga creà tute le robe. (Gén. 1:1, 26) La Bìblia anca la dise parché semo pecadori e parché ghen’è tanto sofrimento e morte. (Rom. 5:12; 6:23) Podemo esser sicuri che Geovà el ndarà doperar so Fiol par finir con tuti i problemi che Sàtana, “el pare dela busia”, el ga fato vegner fora. (Gio. 8:44; Rom. 16:20) Podemo fidarse nela promessa dela Bìblia che Gesù el ndarà finir fora coi rugni, el ndarà ressussitar i morti, el ndarà far che tuta la Tera la devente un paradiso e el farà che tuti i umani i sìpia perfeti. (Gio. 11:25, 26; 1 Gio. 3:8) Che grando privilègio che ghemo, mia vera? Geovà el ne ga insegnà la verità e el ne ga dato la oportunità de insegnarla ai altri. — Mat. 28:19, 20.

PARCHÉ CHE PARLEMO LA VERITÀ?

7-8. Sarà che l’è importante parché che parlemo la verità? Parla de un esémpio. (Marco 3:11, 12) (Varda anca la stampa.)

⁷ Come ghemo parlà prima, se volemo far parte dela fameia de Geovà, ghemo de dir la verità. Ma anca l’è importante par Geovà parché parlemo la verità. Varda quel che ga sucedesto quando Gesù l’era qua nela Tera. (Ledi Marco 3:11, 12.b) Intanto che l’era drio predicar darente el mar dela Galilea, tanta gente la ze vegnesta fin lu. Intrà de lore, ghen’era un per de persone che le gavea demoni. Questi demoni i osea: “Ti te sì el Fiol de Dio.” Parché che quela volta i ga dito la verità sora Gesù? Parché i volea che le persone le se fidesse in lori par dopo esser boni de imbroiarle. Gesù el savea parché lori i era drio far cossita. Par quela, el ghe ga proibio de dir ai altri chi che lu l’era.

⁸ Cossa imparemo? Par Geovà, l’è importante che parlemo la verità sora lu ai altri parché lo amemo. E, quando i altri i ne loda par quel che insegnemo, ghemo de dar tuta la glòria a Geovà e nò a noantri stessi. — Mat. 5:16; varda anca Ati 14:12-15.

9. Cossa che no ghemo mia de far, e parché?

⁹ Vedemo nantro esémpio. Metemo dir che un fradel che el ga un laoro importante nela organisassion el te dise informassion che no te ghè de contar ai altri. Ma te ghe conti ai altri quel che el te ga dito. Pol esser che dopo le persone le sàpia che quel che te ghè dito l’era vero e le resta maraveiade con quel che te sè. Fursi le pense che te sì una persona importante. Ma sicuro che Geovà no’l restarà mia contento. (Pro. 11:13) Parché nò? Parché te ghè dito informassion che no te gavarissi mia de dir e te ghè volesto farte veder ai altri.

COME PARLAR LA VERITÀ?

10. Cossa che vol dir parlar parole “bele”? (Colossensi 4:6)

¹⁰ Ledi Colossensi 4:6.c El apòstolo Paolo el ga ricordà i fradei che i vivea in Colosso che lori i gavea sempre de dir parole “bele”. Cossa che questo vol dir? Nel greco, questa parola dà la idea che ghemo sempre de parlar con bontà e con parole che sìpie bone par i altri.

11-12. Parché che ghemo de star atenti ala maniera che insegnemo la verità? Parla de un esémpio. (Varda anca la stampa.)

¹¹ Ghemo de far quel che el apòstolo Paolo el ga dito quando ndemo insegnar la verità ai altri. Ebrei 4:12 dise che la Bìblia la ze come “una spada che la taia”. Cossa che questo el vol dir? La Bìblia la pol mostrarne pròpio quel che noantri o i altri i ze drio sentir e pensar. Ma se no la doperemo ben, pol esser che le persone le restarà disgustade o le ndarà fin barufar con noantri. Come che questo podaria suceder?

¹² Metemo dir che semo in predicassion e parlemo con un omo che el prega ai santi e che ghe piase selebrar el Nadal e la Pàscoa cola so fameia. Pol esser che doperemo la Bìblia par mostrarghe che no giova gnente pregar ai santi e che la Bìblia la insegna che no ghemo mia de selebrar el Nadal o la Pàscoa. (Isa. 44:14-20; 2 Cor. 6:14-17) Se femo cossita nela prima volta che parlemo con lu, semo drio dirghe la verità, ma questa no la ze una maniera de doperar ben la Parola de Dio.

13. Come che podemo “consar le nostre parole con sal”?

¹³ Paolo el ga dito che le nostre parole le ga de esser “come che consade con sal”. Lu no’l volea dir che ghemo de sconder la verità. Invesse, lu el ga dito che ghemo de insegnar de una maniera che ghe piase ale persone. (Giò 12:11) Pol esser che sìpia fadiga far cossita. Metemo dir che te sì drio cosinar par altre persone e te consi el magnar dela maniera che ti te piase. La medèsima roba sucede quando pensemo che la nostra maniera de parlar la va ben a tuti. Par esémpio, in arquante culture, le persone le parla neto scieto fin coi pi veci. Ma in altre culture no va mia ben parlar cossita, parché le persone le pol fin ofenderse. Paolo el ga dito che ghemo de “saver come risponder a cada persona”. Questo vol dir che ghemo de “consar” le nostre parole de acordo con quel che ghe piase ale persone e nò de acordo con quel che par bon a noantri.

QUANDO PARLAR LA VERITÀ?

14. Sarà che Gesù el ga insegnà i so dissìpoli tuto de un colpo sol? Spiega.

¹⁴ Gesù el ga insegnà tante robe ai so dissìpoli e lo ga fato con bontà. (Mar. 6:34) Ma lori i gavea ancora tante robe de imparar. Anca cossita, Gesù no’l ga proà insegnarghe tuto de un colpo sol, parché lu el savea che lori no i saria mia boni de capir e che ghen’era la ora giusta de insegnarghe. (Gio. 16:12) Cossa che imparemo?

15. Sarà che ghemo de insegnar i nostri studianti dela Bìblia tuto de un colpo? Spiega. (Proverbi 25:11) (Varda anca el ritrato.)

¹⁵ Par meso del so esémpio, Gesù el ne ga insegnà che no l’è parché savemo la verità che podemo insegnar le persone tuto de un colpo. Come che podemo far compagno a lu? Ghemo de pensar nele persone. Ricorda del esémpio de quel omo che ghe piase de selebrar el Nadal e la Pàscoa cola so fameia. Noantri savemo che Geovà no’l ghe piase de queste feste. Ma imagina che te ghè scominsià a studiar la Bìblia con quel omo una stimana prima del Nadal. No saria mia bondoso mostrarghe suito nela Bìblia che queste feste le ze sbaliade. L’è vera che arquanti studianti i fà presto meter in pràtica quel che i ga imparà. Ma altri i ghe mete de pi tempo. Alora, podemo giutar i nostri studianti se ghe insegnemo le robe che i ga de saver nela ora giusta e quando i ze boni de capirle. — Ledi Proverbi 25:11.d

16. Come che podemo giutar i nostri studianti dela Bìblia?

¹⁶ Insegnar sora Geovà ai altri ne assa tanto contenti. Una maniera importante de giutar le persone la ze par meso del nostro esémpio. (3 Gio. 3, 4) Alora, vivi de acordo cola verità, parla la verità ai altri parché te ami a Geovà e, quando te sì drio insegnar ai to studianti la verità, te ghè de farlo con bontà e nela ora giusta. E, se i altri i te loda, daghe la glòria a Geovà. Cossita, te ndarè provar che te servi a Geovà, el Dio dela verità.