Impara a pensar compagno a Geovà e a Gesù

1-2. (a) Come che ghemo de mostrar che amemo a Geovà? (b) Come che Gesù el ga mostrà che el amea a Geovà?

QUANDO l’era qua nela Tera, Gesù el ga mostrà qual che l’era el comandamento pi importante dela Lege. Lu el ga dito: “Ama a Geovà, el to Dio, con tuto el to cuor, con tuta la to ànima, con tuta la to forsa e con tuta la to mente.” (Luc. 10:27) Alora, questo testo el ne insegna che ghemo de mostrar el nostro amor a Geovà par meso dela nostra forsa e par meso de quel che ghemo nel cuor, o sia, dele nostre voie e sentimenti. Anca ghemo de mostrar a Geovà el nostro amor par meso dela nostra mente, o sia, dela maniera che pensemo. Ma cossa che ndarà giutarne a far questo? Imparar sora la maniera de pensar de Gesù. Anca se no saremo mai boni de capir del tuto come Geovà el pensa, podemo imparar col esémpio de Gesù, parché lu el ga fato pròpio compagno al so Pare. — 1 Cor. 2:16.

² Gesù el amea a Geovà con tuta la so mente. Lu el savea quel che Geovà el volea che el fesse e l’era dessidio a sempre obedirghe, anca se ghe tochesse sofrir. La roba pi importante nela vita de Gesù la era contentar so Pare. Par quela, lu no’l ga mai assà che qualcossa lo intrighesse de far quel che Geovà el volea.

3. Cossa che Piero el ga imparà con Gesù, e cossa che el ga incoraià i fradei a far? (1 Piero 4:1)

³ Piero e i altri apòstoli i ga podesto restar tanto tempo insieme de Gesù e imparar a pensar compagno a lu. Alora, quando Piero el ga scrito la so prima carta, lu el ga incoraià i fradei a pensar come Gesù.a (Ledi 1 Piero 4:1.b) Le parole che Piero el ga dito in questo testo le era doperade in quela època par dir a un soldà che el gavea de pareciarse par una guera. Cossita, capimo che pensar compagno a Gesù l’è come una arma che ne giuta a lotar cole voie sbaliade e a no cascar nele tràpole del mondo de Sàtana. — 2 Cor. 10:3-5; Efe. 6:12.

4. Cossa che ndaremo imparar in questo stùdio?

⁴ In questo stùdio, ndaremo imparar sora come che Gesù el pensea e come che podemo pensar compagno a lu. Anca ndaremo veder come noantri podemo: (1) pensar compagno a Geovà, (2) esser ùmili, e (3) gaver bon giudìssio e sempre pregar a Geovà par domandarghe aiuto.

PENSA COMPAGNO A GEOVÀ

5. Cossa che Piero el ga fato che ga mostrà che lu no l’era mia drio pensar compagno a Geovà?

⁵ Varda una volta che Piero no’l ga pensà compagno a Geovà. Gesù el ga contà ai so apòstoli che lu el ndaria a Gerusalen, el saria preso par i lìderi religiosi, el ciaparia bote e el saria copà. (Mat. 16:21) Piero el savea che Gesù l’era el Messia che el ndaria salvar el pòpolo de Dio. Par quela, pol esser che ghe ga fato fadiga creder che Geovà el assaria che Gesù el fusse copà. (Mat. 16:16) Piero el ga dito: “Gàpia pecà de ti stesso, Signor! Questo no te ndarà mai suceder.” (Mat. 16:22) Alora, Piero e Gesù no i era intesi parché Piero no l’era drio pensar come Geovà.

6. Come che Gesù el ga mostrà che el pensea compagno al so Pare?

⁶ Gesù el pensa pròpio compagno so Pare. Par quela, lu el ga dito a Piero: ‘Va via de qua Sàtana! Te sì un sasso che proa farme strabucar, parché no te pensi compagno a Dio, ma compagno ai òmini.’ (Mat. 16:23) Anca se Piero el volesse giutarlo, Gesù no’l ga scoltà el so consìlio. Gesù el savea che, par far la volontà de Geovà, lu el gavaria de sofrir e morir. Cossita, Piero el ga capio che el gavea de imparar a pensar compagno a Geovà. Sicuro che imparemo tanto de quel che ga sucedesto con Piero e Gesù.

7. Come che Piero el ga mostrà che l’era drio pensar compagno a Geovà? (Varda la ilustrassion.)

⁷ Ma, dopo de un tempo, Piero el ga mostrà che l’era drio sforsarse par pensar compagno a Geovà. Come lo savemo? Geovà el ga mandà che Piero el predichesse a Cornèlio parché el volea che, de lì avanti, tuti i podesse adorarlo insieme. In quela època, i giudei no i stea mia insieme de quei che no i era mia giudei. Ma, Piero l’è stà bon de cambiar la so maniera de pensar. Podemo esser sicuri de questo parché dopo che Geovà lo ga giutà a capir quel che el volea, Piero l’è ndato de “volentiera” predicar a Cornèlio. (Ati 10:28, 29) Cossita, Cornèlio e tuti dela so casa i ze stati batesadi. — Ati 10:21-23, 34, 35, 44-48.

8. Come che podemo mostrar che pensemo compagno a Geovà? (1 Piero 3:8)

⁸ Un per de ani dopo, Piero el ga dito che ai fradei ghe ocorea “gaver la medèsima maniera de pensar”. (Ledi 1 Piero 3:8.c) Ma cossa pol giutarne a pensar cossita? Par meso dela Bìblia, ghemo de imparar come che Geovà el pensa e sforsarse de pensar compagno. Par esémpio, la Bìblia la dise che ghemo de meter el Regno in primo posto nela vita. (Mat. 6:33) Alora, cossa gavarìssino de far se un fradel el desside laorar de pi par Geovà? Sicuro che no ndaremo mai dirghe che no ghe ocore sforsarse tanto cossita. Pitosto, volemo incoraiarlo e dirghe che ndaremo giutarlo in quel che ghe ocore.

SÌPIA ÙMILE

9-10. Come che Gesù el ga mostrà che l’era ùmile?

⁹ Nela note vanti de morir, Gesù el ga insegnà ai so apòstoli che lori i gavea de esser pi ùmili. In quel giorno, Gesù el gavea domandà che Piero e Gioani i ndesse ciapar el magnar e le robe che ghe ocorea par la ùltima volta che Gesù el ndaria magnar insieme de lori. Pol esser che lori i ze ndati ciapar una mastela e tovaie par lavar i pié de quei che i vegnesse magnar. Ma chi che ndaria lavar i pié de quei che saria lì?

¹⁰ In quela sera, Gesù el ga suito scominsià a lavar i pié dei so apòstoli. Sicuro che lori i ze restadi spaventadi de veder che Gesù l’era drio far un laoro che i schiavi i gavaria de farlo. La Bìblia la dise che Gesù ‘el se ga cavà via la roba che la era par sora dela so veste. El ga ciapà una tovaia e la ga ligada intorno dela so sintura. Dopo, el ga metesto àqua nte una mastela e el ga scominsià a lavar i pié de tuti i apòstoli’. (Gio. 13:4, 5) Gesù el ga fin lavà i pié de Giuda, che dopo ndaria tradirlo. Sicuro che ghe ga metesto tempo par lavar i pié de tuti i so apòstoli, ma lu l’è stà ùmile e el ga finio el laoro. Dopo, el ghe ga dito: ‘Gavé visto quel che go fato? Valtri me ciamé de “Istrutor” e “Signor”, e gavé rason, parché son pròpio. Alora, se mi, che son el Signor e Istrutor, go lavà i vostri pié, anca valtri gavé de lavarve i pié un del altro.’ — Gio. 13:12-14.

11. Come che Piero el ga mostrà che l’era deventà una persona ùmile? (1 Piero 5:5) (Varda anca la ilustrassion.)

¹¹ Piero el ga imparà tanto dela umiltà che Gesù el ga mostrà. Come che lo savemo? Dopo che Gesù l’è torna in cielo, Piero el ga curà un omo che l’era sòto, e una mùcia de gente ga visto el so miràcolo. (Ati 1:8, 9; 3:2, 6-8, 11) Piero l’è stà slevà nte una cultura che le persone le vol esser pi importante dei altri. Alora, sarà che Piero el ga volesto farse veder dopo del so miràcolo? Nò. Invesse, lu el ga dato glòria a Geovà e a Gesù, e el ga dito: ‘L’è stà par meso del nome de Gesù e dela nostra fede nel so nome che questo omo che vede e cognossé l’è deventà forte.’ (Ati 3:12-16) Dopo de un tempo, Piero el ga scrito ai fradei che lori i gavea de esser ùmili. Nel greco, quando Piero el ga doperà le parole “mostrar tanta umiltà”, lu el ga volesto dir che ghemo de vestirse de umiltà compagno a una persona che la mete su una roba. Cossita, noantri se ricordemo de quando Gesù el ga metesto una tovaia nela sintura par lavar i pié dei so apòstoli. — Ledi 1 Piero 5:5.d

12. Come che podemo esser ùmili?

¹² Noantri podemo far compagno Piero e seitar a sforsarse par esser ùmili. Ma ne ocore ricordarse che no basta mostrar che semo ùmili sol par meso de quel che parlemo. Invesse, le parole in 1 Piero 5:5 le ne insegna che mostremo che semo ùmili anca par meso de quel che pensemo sora noantri stessi. Par esémpio, quando femo robe ai altri, ghemo de farle parché amemo a lori e a Geovà e nò par farse veder. Noantri anca mostremo che semo ùmili se restemo contenti de far laori a Geovà anca quando nissun vede quel che femo. — Mat. 6:1-4.

GAPIA “BON GIUDÌSSIO”

13. Cossa che una persona che la ga bon giudìssio la fà?

¹³ Cossa che una persona che la ga “bon giudìssio” la fà? (1 Pie. 4:7) Ela la se sforsa de capir quel che Geovà el pensa vanti de far una dessision e la ga sempre in mente che la roba pi importante nela so vita la ze la so amicìssia con Geovà. Questa persona la capisse che no la sa tuto e se sforsa de mai pensar che la ze pi importante che i altri. Ela anca la mostra che la ga bon giudìssio parché sempre la prega a Geovà par domandarghe orientassion.e

14. Quando che Piero no’l se ga fidà in Geovà?

¹⁴ Nela ùltima note de Gesù qua nela Tera, lu el ga dito ai so dissìpoli: “Tuti valtri ndaré abandonarme questa note.” Alora, suito Piero el ghe ga dito: “Ancora che tuti i altri i te abandone par causa de quel che ndarà suceder con ti, mi mai vao abandonarte!” Dopo, Gesù anca el ga dito ai so dissìpoli: “Seité esser atenti e seité far orassion.” (Mat. 26:31, 33, 41) Ma Piero no’l ga metesto in pràtica questo consìlio e no’l ga bio el coraio che ghe ocorea par dir che l’era dissìpolo de Gesù. Lu el ga dito che no lo cognossea, e dopo el se ga ciamà tanto gramo. — Mat. 26:69-75.

15. Come che Gesù el ga mostrà bon giudìssio nela note vanti de morir?

¹⁵ Gesù el se fidea del tuto in Geovà. Anca se lu el fusse perfeto, el ga pregà tante volte nela note vanti de morir. Cossita, lu el ga bio el coraio che ghe ocorea par far quel che Geovà el volea. (Mat. 26:39, 42, 44; Gio. 18:4, 5) Sicuro che Piero no’l se ga desmentegà che Gesù el ga pregà tanto par domandar el aiuto de Geovà.

16. Come savemo che Piero el ga imparà a fidarse in Geovà e a sempre pregar par domandarghe orientassion? (1 Piero 4:7)

¹⁶ Piero el ga imparà a fidarse de pi in Geovà e a pregar par domandarghe orientassion. Come che lo savemo? Dopo che Gesù l’è stà ressussità, lu el ga dito a Piero e ai altri apòstoli che lori i riceveria spìrito santo par far el laoro de predicassion. Ma Gesù el ga dito che ghe tochea spetar in Gerusalen fin che questo sucedesse. (Luc. 24:49; Ati 1:4, 5) Alora, intanto che Piero el spetea in Gerusalen, ‘el ga seità a far orassion’ insieme de altri fradei. (Ati 1:13, 14) Dopo de un tempo, lu el ga scrito una carta par incoraiar i fradei a gaver bon giudìssio e a seitar a pregar a Geovà. (Ledi 1 Piero 4:7.f) Cossita, capimo che Piero el ga imparà a fidarse in Geovà e el ga giutà tanto le congregassion. — Gàl. 2:9.

17. Cossa che ghemo de seitar a far? (Varda anca el ritrato.)

¹⁷ Alora, par gaver bon giudìssio ne ocore sempre pregar a Geovà. Noantri ghemo de seitar a domandarghe orientassion, anca se ne par che semo belche bravi de far i nostri laori. E quando ghemo de far dessision importante nela vita, ne ocore pregar a Geovà par domandarghe aiuto e fidarse che lu el sa quel che l’è meio par noantri.

18. Cossa che ghemo de seitar a far?

¹⁸ Sicuro che restemo tanto contenti de saver che semo stati creadi de una maniera che podemo gaver le medèsime qualità de Geovà. (Gén. 1:26) L’è vera che no semo boni de esser perfeti compagno a Geovà. (Isa. 55:9) Ma come Piero, volemo seitar a imparar sora la maniera che Geovà el pensa e a sforsarse de esser ùmili e de gaver bon giudìssio.