Seita a imparar dela Parola de Dio!

1. Che robe ghemo de bisogno par viver e esser felici? (Mateo 5:3)

GEOVÀ el sa che ne ocore far un per de robe par viver. Par esémpio, ghemo bisogno de magnar, de robe de meter su e un posto de star. Se no ghemo una de queste robe, pol esser fadiga viver o podemo fin morir. Ma noantri anca ghemo bisogno de cognosser a Dio e ricever le so orientassion. (Ledi Mateo 5:3.a) Alora, se volemo esser felici, ne ocore esser amighi de Dio.

2. Parché che podemo dir che semo compagni a una persona pròpio poareta?

² Nel greco, la spression che ghen’è in questo testo anca la ze doperada par parlar de qualchedun pròpio poareto che ga bisogno del aiuto dei altri. Pensa nte una persona tanto poareta che la ze sentada par tera e cole robe tute sbregade. Ela la ze tanto mal ciapada e no la ga gnente de magnar. De giorno, la resta soto el sol e dopo che vien note la patisse de fredo. Come la ghe fà schifo ai altri, nissun ghe vien darente. Questa persona poareta la sa che ghe ocore del aiuto dei altri se la vol seitar viva. L’è compagno con quei che i sa che i ga bisogno de Dio. Lori i capisse che sol i podarà viver ben se i aceta el aiuto de Dio. Par quela, i ze premosi de imparar tuto quel che Geovà ghe insegna.

3. Cossa che ndaremo imparar in questo stùdio?

³ In questo stùdio, ndaremo veder quel che podemo imparar dela dona dela Fenìssia che la ga suplicà che Gesù la giutesse. La so stòria la ndarà mostrarne tre robe che ne ocore far se volemo che Geovà el ne insegne. Dopo, ndaremo imparar sora el esémpio dei apòstoli Piero e Paolo e del rè Davi.

TRE ROBE CHE NE OCORE FAR

4. Cossa che la dona dela Fenìssia la volea che Gesù el fesse?

⁴ Varda el esémpio de una dona dela Fenìssia. La Bìblia la mostra che la so fiola la gavea rento un ‘demònio che la fea patir tanto’. (Mat. 15:21-28) Questa dona la se ga indenocià davanti a Gesù e la ga suplicà che lu la giutesse. Ndemo imparar de pi sora tre robe tanto importante che la ga fato.

5. (a) Che robe la dona dela Fenìssia la ga fato? (b) Cossa che Gesù el ga fato par quela dona, e parché? (Varda anca la stampa.)

⁵ Quela dona dela Fenìssia la ga mostrà la vera umiltà. Parché che podemo dirlo? Ela no la se ga ofendesto quando Gesù la ga comparada a un cagneto, una bestioleta che quei che no i era giudei i gavea casa. Cossa che ti te gavarissi fato nel posto de quela dona? Sarà che te ndarissi restar disgustà e no te volarissi pi el aiuto de Gesù? Quela dona dela Fenìssia no la ga fato cossita. Invesse, ela no la ga desistio de domandar el aiuto de Gesù. Parché? Parché la gavea fede in lu. E quando Gesù el ga visto la fede che la gavea, lu el ga volesto giutarla. Anca se lu el gavesse pena dito che l’era vegnesto giutar sol le “piégore perse del pòpolo de Israel”, lu el ga giutà quela dona e el ga parà via el demònio dela so fiola.

6. Come che podemo far compagno ala dona dela Fenìssia?

⁶ Se volemo imparar de quel che Geovà el insegna, ghemo de esser ùmili, mai desister de domandar el so aiuto e gaver fede. Compagno a quela dona dela Fenìssia, noantri ghemo de esser ùmili par no desister de domandar el aiuto de Geovà. Ne ocore anca gaver una forte fede in Gesù e fidarse in quei che lu el dopera par darne orientassion. (Mat. 24:45-47) Geovà e Gesù i ga caro de giutarne se femo queste tre robe. (Varda anca Tiago 1:5-7.) Adesso, ndaremo veder come Geovà el ne dà orientassion e come el ne giuta esser felici. Ndaremo anca imparar sora el esémpio dei apòstoli Piero e Paolo e del rè Davi.

COMPAGNO A PIERO, SEITA A IMPARAR DELA PAROLA DE DIO

7. (a) Cossa che Gesù el ga domandà che Piero el fesse? (b) Cossa che Piero el ghe ocorea par far pi forte la so fede? (Ebrei 5:14–6:1)

⁷ Varda adesso el esémpio del apòstolo Piero. Lu l’è stà un dei primi giudei a capir che Gesù l’era el Messia e che Geovà l’era drio doperarlo par predicar sora la speransa de “vita eterna”. (Gio. 6:66-68) Prima de ndar al cielo, Gesù el ga dito a Piero: ‘Daghe de magnar ale me piegorete.’ (Gio. 21:17) Piero el ga fato tuto quel che Gesù el ghe gavea domandà e Geovà lo ga fin doperà par scriver due carte che dopo le ze deventade parte dela Bìblia. Ma anca se Piero el gavesse fato tute queste robe, lu el gavea de studiar la Parola de Dio par far pi forte la so fede. Par esémpio, anca se el savesse che le parole de Paolo le era “fadiga de capir”, lu sempre le studiea. (2 Pie. 3:15, 16) Lu el se fidea che Geovà lo giutaria a capir e a meter in pràtica quel che el imparea. — Ledi Ebrei 5:14–6:1.b

8. Cossa che Piero el ga fato quando el ga ricevesto nove orientassion?

⁸ Come Piero el gavea una forte fede in Geovà, lu sempre el obedia ale orientassion che el ricevea. Varda un esémpio. Piero el ga bio una vision de un àngelo che ghe ga fato veder bèstie che le era impure de acordo cola Lege. Quel àngelo el ghe ga dito: ‘Levate su, Piero. Copale e magnale.’ Come Piero l’era giudeo, el ga pensà che l’era sbalià far quela roba. Par quela, lu el ga dito al àngelo: ‘Mi nò, Signor! Parché no go mai magnà gnente che fusse impuro.’ Alora, el àngelo el ghe ga rispondesto: ‘Fermate de dir che le robe che Dio el ga purificà le ze impure.’ (Ati 10:9-15) Piero el ga capio quel che el àngelo el ga volesto dir e el ga cambià la so maniera de pensar. Come che lo savemo? Pena dopo de quela vision, tre òmini i ga domandà a Piero che el fusse visitar la casa de Cornèlio, un omo che no l’era giudeo. In quela època, i giudei i disea che l’era sbalià ndar rento la casa de qualchedun che no l’era giudeo. (Ati 10:28, 29) Cossa che Piero el ga fato? Lu el gavea capio che Geovà el vol che tuti i impare dele bone notìssie. Alora, lu el ga cambià la so maniera de pensar e el ga predicà a Cornèlio e a tuti dela so casa. (Pro. 4:18) Quele persone le ga credesto in quel che Piero el ghe ga dito, le ga ricevesto spìrito santo e le ze state batesade. — Ati 10:44-48.

9. Parché che l’è bon studiar sora le verità che le ze pi fadiga de capir?

⁹ Compagno a Piero, anca noantri ghemo de seitar a studiar la Bìblia. Ma ghemo anca de torse el tempo par studiar le verità che le ze pi fadiga de capir. Parché che l’è bel far cossita? Primo, parché quel che imparemo farà pi forte el nostro amor e rispeto par Geovà. Secondo, gavaremo ancora de pi voia par parlar ai altri sora el nostro caro Pare, Geovà. (Rom. 11:33; Apo. 4:11) El esémpio de Piero anca ne insegna che, quando la organisassion la capisse meio un insegnamento dela Bìblia, ghemo de suito acetar e cambiar quel che ne ocore. Se femo cossita, Geovà sempre el ndarà darne orientassion e saremo boni de seitar a servirlo.

COMPAGNO A PAOLO, SFÒRSATE PAR MOSTRAR LE QUALITÀ CHE GHE PIASE A DIO

10. De acordo con Colossensi 3:8-10, cossa ghemo de far par assar Geovà contento?

¹⁰ Se volemo esser felici e seitar a imparar de quel che Geovà el ne insegna, ghemo de far cambiamenti nela nostra personalità. Paolo el ga dito che ghemo de ‘cavar via la vècia personalità e vestirse cola nova personalità’. (Ledi Colossensi 3:8-10.c) Ghe vol tanto sforso e tempo par far nova la nostra personalità, ma Geovà el ne giuta a farlo. Varda el esémpio del apòstolo Paolo. Quando l’era gióveno, lu el se sforsea tanto par far quel che ghe piasea a Dio. (Gàl. 1:14; Fil. 3:4, 5) Ma lu no’l capia come adorar a Dio dela maniera giusta e gnanca el cognossea la verità sora Gesù. Lu anca l’era orgolioso e el fea robe che ndea contra Dio. — 1 Tim. 1:13.

11. Che cambiamento Paolo el ga bio de far? Spiega.

¹¹ Prima de deventar un dissìpolo de Gesù, Paolo el restea cativo par poco gnente. La Bìblia la dise che lu el odiea tanto i dissìpoli de Gesù che el volea copar a tuti. (Ati 9:1) Ma dopo che l’è deventà un dissìpolo, lu el se ga sforsà tanto de controlar la so ràbia e de deventar una persona passiente e bondosa. (Efe. 4:22, 31) Anca cossita, nte una volta che Paolo e Barnabè no i era boni de ndar intesi sora una roba, lori “i se ga dito su con ràbia”. (Ati 15:37-39) Quel che Paolo el gavea fato no l’era mia giusto, ma lu el ga seità a sforsarse par esser una persona bondosa e de piaserghe a Geovà. — 1 Cor. 9:27.

12. Cossa ga giutà Paolo a far i cambiamenti che el gavea de bisogno?

¹² Paolo l’è stà bon de cambiar quel che ghe ocorea parché no’l se fidea nela so forsa. (Fil. 4:13) Compagno a Piero, lu el se fidea ‘nela forsa che Dio el ghe dea’. (1 Pie. 4:11) Ancora cossita, lu el restea desanimà par causa dei so sbali. Quando questo sucedea, lu el pensea nele bele robe che Geovà el ghe gavea belche fato e el seitea a sforsarse par cambiar e assar Geovà contento. — Rom. 7:21-25.

13. Come che podemo far compagno a Paolo?

¹³ Come che podemo far compagno a Paolo? Anca se servimo a Geovà fà tanti ani, ghemo de seitar a sforsarse par gaver le qualità che ghe piase a lu. L’è vera che una ora o l’altra restaremo inrabiadi o ndaremo dir o far qualcossa che disgusta ai altri. Quando questo sucede, no ghemo de pensar che no saremo mai boni de assar Geovà contento. Invesse, ghemo de seitar a sforsarse par cambiar quel che ne ocore. (Rom. 12:1, 2; Efe. 4:24) Ghemo de ricordarse de una roba tanto importante: Se volemo gaver le qualità che ghe piase a Geovà, ghemo de cognosserlo ben e seitar a imparar sora lu.

COMPAGNO A DAVI, ASSA CHE GEOVÀ EL TE DAE PROTESSION

14-15. Come che Geovà el ne dà protession? (Salmo 27:5) (Varda anca la stampa dela prima pàgina.)

¹⁴ Par esser felici, ghemo bisogno dela protession de Geovà. Ma come che Geovà el ne protege e cossa ne ocore far par gaver la so protession?

¹⁵ El rè Davi l’era sicuro che Geovà el ndaria protegerlo quando el gavesse de bisogno. (Ledi Salmo 27:5.d) Geovà el protege i so servi de tuto quel che podaria rovinar la so fede. Come che lu el fà questo? Lu el protege la nostra amicìssia con lu quando le persone le proa intrigarne de adorarlo. (Sal. 34:7; Isa. 54:17) Sàtana e i so demoni i ze poderosi, ma Geovà el ga tanto de pi poder che lori. Alora, anca se morimo, Geovà el promete che el ndarà ressussitarne. (1 Cor. 15:55-57; Apo. 21:3, 4) E, quando ghemo ansietà, Geovà el ne dà la forsa che ne ocore par seitar a servirlo. (Pro. 12:25; Mat. 6:27-29) Geovà anca el ne dà i ansiani e una fameia de fradei e sorele che ne giuta a infrontar le dificoltà e a seitar gaver una forte fede. (Isa. 32:1, 2) E, quando ndemo ale riunion, noantri imparemo altre maniere che Geovà el ne giuta e el ne dà protession. — Ebr. 10:24, 25.

16. Come che Geovà el ga protegesto Davi?

¹⁶ Quando Davi el fea quel che l’era giusto, Geovà lo protegea parché lo giutea a far bone dessision e a esser felice. (Varda anca Proverbi 5:1, 2.) Ma quando Davi no’l fea quel che l’era giusto, Geovà no lo protegea dele robe rugne che ghe sucedea par causa dei so sbali. (2 Sam. 12:9, 10) Ma, tante volte, Davi el ga sofrio par causa dei sbali dei altri. Quando questo sucedea, lu el preghea a Geovà e el ghe parlea tuto quel che l’era drio sentir. Come che Geovà lo protegea? Lu el ga prometesto a Davi che el ndaria tenderlo e giutarlo a sentir el so amor. — Sal. 23:1-6.

17. Come che podemo far compagno a Davi?

¹⁷ Podemo far compagno a Davi quando preghemo a Geovà e ghe domandemo aiuto par far bone dessision. Ghemo anca de ricordarse che, se desobedimo a Geovà e femo brute dessision, lu no’l ndarà protegerne dele robe rugne che le vegnarà fora. (Gàl. 6:7, 8) Ma pol esser che ghen’è colpi che sofrimo anca se obedimo a Geovà. Quando questo sucede, ghemo de contar a Geovà tuto quel che semo drio sentir e domandarghe el so aiuto. Podemo esser sicuri che lu el ndarà darne consolo e el ne giutarà a sentir el so amor par noantri. — Fil. 4:6, 7.

SEITEMO A NDAR DRIO ALE ORIENTASSION DE GEOVÀ!

18. (a) Cossa che le persone le pensa sora ndar drio ale orientassion de Dio? (b) Cossa te ghè de far par seitar esser felice? (Varda anca la stampa.)

¹⁸ El testo del ano de 2026 dise: “Quei che i sa che i ga bisogno de Dio i ze felici.” Ancoi, l’è tanto importante far quel che dise questo testo. Parché? Noantri vivemo nte un mondo ndove le persone no le ze felice parché no le va drio ale orientassion de Dio. Tanti i crede in Dio, ma i lo adora dela maniera che i vol. Altri i se fida sol nela orientassion dei umani. Ne ocore star atenti par mai ndarghe drio a queste persone. Cossa che pol giutarne? Seitar a studiar la Bìblia, a imparar sora le qualità che ghe piase a Geovà e a assar che lu el ne dae protession.