Fìdate in Geovà e nò in ti stesso

1. Parché che Paolo el podea sentirse contento cola so vita?

EL APÒSTOLO Paolo el savea che suito el ndaria morir. Ma, quando el pensea nela so vita e in quel che el gavea fato par Geovà, lu l’era tanto contento. Paolo el ga dito: “Go finio la carera, go vivesto de acordo cola fede.” (2 Tim. 4:6-8) Paolo el ga fato bone dessision nela so vita e el savea che el gavea assà Geovà contento. Anca noantri volemo far bone dessision e contentar a Geovà. Alora, cossa che ne toca far?

2. Cossa che capimo de 2 Corinti 5:7?

² Paolo el ga dito sora lu e altri servi de Geovà: “Vivemo de acordo cola fede e nò de acordo con quel che vedemo.” (2 Cor. 5:7) Cossa che podemo capir? Una persona che no la ga mia fede in Geovà, la fà le dessision sol de acordo con quel che la vede, la scolta o la sente. Ma la persona che la ga fede la se preocupa con quel che Geovà el pensa par far le dessision. Ela anca la ze sicura che, se la fà quel che lu el dise, la gavarà una vita felice adesso e anca nel futuro. — Sal. 119:66; Ebr. 11:6.

3. Che bele robe podarà suceder se vivemo de acordo cola fede? (2 Corinti 4:18)

³ Dele volte, tuti noantri femo dessision de acordo con quel che vedemo, scoltemo o sentimo. Ma, se pensemo sol in queste robe quando ghemo una dessision importante de far, no ndaremo mia ben. Parché? Parché no se pol mia fidarse sol in quel che vedemo e scoltemo. E rivarà una ora che faremo una dessision che disgusta a Geovà. (Ecl. 11:9; Mat. 24:37-39) Invesse, se femo le dessision de acordo cola fede, ndaremo contentar a Geovà, sentiremo pace, vera felicità e podaremo viver par sempre. — Sal. 16:8, 9; Isa. 48:17, 18; Efe. 5:10; ledi 2 Corinti 4:18.a

4. Come una persona la pol capir se la ze drio viver de acordo cola fede o de acordo con quel che la vede?

⁴ Come podemo saver se semo drio viver de acordo cola fede o de acordo con quel che vedemo? Podemo domandarse: ‘Cossa che mi penso vanti de far una dessision? Sarà che mi me preocupo sol con quel che posso veder, o anca con quel che Geovà el pensa?’ In questo stùdio, ndaremo veder come viver de acordo cola fede quando ndemo scòlier un laoro, quando ndemo dessider con chi maridarse e quando ricevemo una orientassion nova nela organisassion.

QUANDO TE VÈ SCÒLIER UN LAORO

5. Cossa che ghemo de pensar quando ndemo scòlier un laoro?

⁵ Tuti noantri volemo gaver i soldi par dar ala nostra fameia quel che ghe ocore. (Ecl. 7:12; 1 Tim. 5:8) Ghen’è laori che se pol ciapar de pi soldi e dar ala fameia quel che ghe ocore e anca meter via un pochetin. Ma ghen’è laori che se ciapa sol i soldi che ghe ocore par viver. L’è vera che quando ndemo scòlier un laoro, se preocupemo con quanto ndemo ciapar. Ma, se sol se preocupemo con quel lì, semo drio viver de acordo con quel che vedemo.

6. Come podemo mostrar che vivemo de acordo cola fede quando ndemo catar un laoro? (Ebrei 13:5)

⁶ Se vivemo de acordo cola fede, ghemo de pensar se el laoro che ndaremo scòlier el ndarà intrigar la nostra amicìssia con Geovà. Podemo domandarse: ‘Sarà che in questo laoro me tocarà far una roba che disgusta a Geovà?’ (Pro. 6:16-19) ‘Me tocarà perder le riunion, o gavarò manco tempo par predicar e studiar la Bìblia? Sarà che me tocarà restar massa tempo distante dela me fameia?’ (Fil. 1:10) Se vedemo che si, saria meio no acetar el laoro, anca se l’è fadiga catarghene nantro. Come vivemo de acordo cola fede, le nostre dessision le mostrarà che se fidemo che Geovà el ndarà tenderne. — Mat. 6:33; ledi Ebrei 13:5.b

7-8. Come che el fradel Javier ga mostrà che el vive de acordo cola fede? (Varda anca el ritrato.)

⁷ Javier,c un fradel dela Amèrica del Sud che el volea esser pioniero, el savea come l’era importante viver de acordo cola fede. Lu el ga dito: “Go proà catar un laoro che mi ciapesse de pi e che me assesse contento. Mi son stà bon de gaver una intervista par el laoro che mi volea. Ma vanti de ndar, mi go domandà che Geovà el me giutesse a far una bona dessision parché mi ero sicuro che el savea quel che l’era el meio par mi. Mi volea ciapar de pi, ma no volea che el laoro el me intrighesse de far el me meio a Geovà.”

⁸ Javier el ga dito: “El omo dela intervista el me ga dito che, in tanti giorni, me tocaria restar de pi nel laoro. Alora, mi ghe go dito che no podaria farlo par causa dela me adorassion a Dio.” Javier el ga dessidio no acetar el laoro. Due stimane dopo, lu l’è deventà pioniero, e dopo el ga catà un laoro de mesa giornada. Lu el ga dito: “Geovà el ga scoltà le me orassion e me ga giutà a catar un laoro che no me intriga de esser pioniero. Mi son tanto contento, parché adesso go pi tempo par servir a Geovà e star coi me fradei.”

9. Cossa che te ghè imparà con Jean?

⁹ E se vedemo che el laoro che ghemo ancoi l’è drio intrigarne de viver de acordo cola fede? Varda el esémpio de Jean, un fradel del Congo. Lu el ga dito: “Mi gavea un laoro che me piasea tanto. Mi ciapea tanti soldi e tuti i me rispetea.” Ma tante volte, Jean no’l podea ndar ale riunion parché ghe tochea laorar de pi. E altri i ghe domandea de dir busie e sconder robe sbaliade che i fea nela empresa. Lu el gavea voia de ndar via del laoro, ma el gavea paura de no catarghene nantro. Cossa che lo ga giutà? Lu el ga dito: “Abacuche 3:17-19 me ga giutà a capir che Geovà el ndaria tenderme anca se mi assesse el laoro e no ciapesse pi tanti soldi. Alora, mi go dessidio ndar via. Tanti paroni nel mondo i pensa che le persone le ndarà far tuto quel che i ghe domanda par no perder el laoro e che fin le assarà de banda Dio e la so fameia. Mi son restà contento cola me dessision parché son bon de seitar a far el me meio par Geovà e par la me fameia. E un ano dopo, Geovà me ga giutà catar fora nantro laoro. In questo laoro, mi ciapo quel che ocore par tender dela me fameia e go pi tempo de laorar par Geovà. L’è vera che ancora se metemo Geovà in primo posto nela nostra vita, pol vegner fora dificoltà. Ma Geovà sempre el ndarà tenderne.” Se se fidemo nei consili e nele promesse de Geovà, faremo bone dessision e saremo sicuri che el ndarà benedirne.

QUANDO TE VOL MARIDARTE

10. (a) Cossa che tanti i pensa vanti de maridarse? (b) Parché che pensar sol in queste robe no saria mia bon?

¹⁰ L’è stà Geovà che el ga fato el matrimònio, e tanti i vol maridarse. Cossa che tanti i pensa vanti de far questa dessision? Una sorela che la vol maridarse fursi la varda se el fradel l’è bel, la so maniera de far le robe, cossa che altri i pensa sora lu, cossa che lu el pensa sora i soldi, se el tende ben dela fameia e se ela la resta contenta con lu.d Queste le ze robe tanto importante. Ma se una persona la pensa sol in queste robe, no la sarà drio viver de acordo cola fede.

11. Come podemo mostrar che vivemo de acordo cola fede quando ndemo scòlier con chi maridarse? (1 Corinti 7:39)

¹¹ Geovà el resta tanto contento quando i fradei e sorele i va drio i so consili par scòlier con chi maridarse. Par esémpio, una persona che la va drio i consili dela Bìblia no la scomìnsia a smorosar quando la ze massa gióvena. (1 Cor. 7:36) Ela anca la scòlie qualchedun che gàpia le qualità che Geovà el dise che le ze importante par gaver un bel matrimònio. (Pro. 31:10-13, 26-28; Efe. 5:33; 1 Tim. 5:8) E cossa la fà se qualchedun che no serve a Geovà mostra interesse de smorosarla? Ela la se fida nel consìlio de smorosar ‘sol con quei che i serve el Signor’. (Ledi 1 Corinti 7:39.e) I fradei e le sorele che i vive de acordo cola fede i se fida che Geovà el pol tenderli meio che qualche altra persona. — Sal. 55:22.

12. Cossa te ghè imparà con Rosa?

¹² Vardemo el esémpio de una pioniera dela Colómbia de nome Rosa. Nel so laoro, ela la stea tanto tempo con un omo che no l’era Testimònia de Geovà. Lu el ghe volea tanto ben. Anca ela la ga scominsià a volerghe tanto ben. Rosa la ga dito: “Lu el fea tante robe bone par i altri e l’era un bravo omo. E me piasea tanto come lu el me tratea. Lu el gavea tute le bele qualità che me piasea nte un sposo, sol che lu no l’era mia Testimònia de Geovà. In quela època, mi me sentia sola e volea tanto maridarme, ma no gavea cognossesto un fradel che me piasea. Alora, l’è stà fadiga dirghe che no ndaria smorosarlo.” Invesse de Rosa pensar sol in quel che la podea veder, la ga pensà come la so dessision ndaria intrigar la so amicìssia con Geovà. Alora, ela la ga dessidio no parlar pi con quel omo e la ga seità a far el so meio a Geovà. Poco dopo, la ze stata convidada par far la Scola par Vangelisadori del Regno, e adesso la serve come pioniera spessial. Rosa la ga dito: “Geovà el me ga fato esser tanto felice.” Alora, anca che par viver de acordo cola fede, ne ocore assar de banda una roba che el nostro cuor el vol tanto, questa sempre sarà la meio dessision.

QUANDO RICEVEMO UNA ORIENTASSION DELA ORGANISASSION

13. Cossa pol suceder quando no capimo ben una orientassion?

¹³ Noantri sempre ricevemo orientassion de come servir a Geovà. Queste orientassion le pol vegner par meso dei ansiani, del superintendente, de Betel o del Corpo Governante. Ma cossa pol suceder quando no capimo mia tanto ben le orientassion? Podemo scominsiar a pensar sol nele dificoltà che le pol vegner fora se ghe ndemo drio. E fursi anca scominsiemo a pensar sol nei difeti de quei che i ne ga dato la orientassion.

14. Cossa che ndarà giutarne a obedir quando ricevemo orientassion dela organisassion? (Ebrei 13:17)

¹⁴ Semo sicuri che Geovà l’è drio orientar la so organisassion e che el sa tuto quel che sucede con noantri. Par quela, suito obedimo ale orientassion de volentiera. (Ledi Ebrei 13:17.f) Savemo che, quando semo obedienti, giutemo che ghen sìpia union nela congregassion. (Efe. 4:2, 3) Noantri se fidemo che, anca se quei che i ne dà orientassion i ze imperfeti, Geovà el ndarà benedirne se semo obedienti. (1 Sam. 15:22) E se ghe vol cambiar la orientassion, savemo che Geovà lo farà nel tempo giusto. — Mic. 7:7.

15-16. Cossa che ga giutà un fradel a seitar a viver de acordo cola fede? (Varda anca el ritrato.)

¹⁵ Varda un esémpio che mostra parché che l’è bon gaver fede e ndar drio ale orientassion dela organisassion. Nel Peru, tanti i parla spagnol, ma ghen’è tanti che i parla altre léngue. Una de queste léngue la ze el Quechua. Romai fà tanti ani che i fradei i va in serca de persone che parla questa léngua in quel posto. Ma, par causa de un per de lege del governo, la organisassion la ga dato orientassion par cambiar la maniera de ndar in serca dele persone. (Rom. 13:1) Par quela, tanti fradei no i era sicuri se ndaria ben. Ma quando lori i ga obedio le orientassion, Geovà el ga benedio el so sforso e lori i ze stati boni de catar tante persone che parla Quechua.

¹⁶ Un dei fradei che l’era preocupà con questo cambiamento l’era Kevin. Lu el ga dito: “Mi pensea: ‘E adesso, come femo catar fora quei che parla Quechua?’” Cossa che Kevin el ga fato? Lu el ga dito: “Mi go pensà in Proverbi 3:5 e nel esémpio de Moisè. Quando Moisè e i israeliti i era drio ndar fora del Egito, Geovà el ghe ga dito de ndar banda al Mar Rosso. Par lu, ghe parea che questa orientassion no la ndaria mia ben parché saria fàcile che i egipsi li ciapesse. Ma ancora cossita, Moisè el ga obedio. Alora, Geovà li ga benedidi e el ga verto el mar par salvarli.” (Éso. 14:1, 2, 9-11, 21, 22) Anca se Kevin l’era preocupà col cambiamento, lu el ga obedio. E cossa che ga sucedesto? Lu el ga dito: “L’è stà tanto bel veder come Geovà el ne ga benedio. Vanti, ndeino ala predicassion e sol cateino una o due persone. Ma adesso, ndemo a posti che ghen’è tanti che parla Quechua. Par quela, semo boni de discorer con tante persone, visitarle e far studi. E adesso, tante persone le ze drio ndar ale riunion.” Sicuro che quando vivemo de acordo cola fede Geovà el ne benedisse tanto!

17. Cossa che te ghè imparà in questo stùdio?

¹⁷ In questo stùdio, ghemo visto come seitar a viver de acordo cola fede in tre assunti tanto importanti. Ma podemo doperar quel che ghemo imparà in tante altre situassion dela nostra vita. Par esémpio, quando ndemo scòlier una diversion, come doperemo el nostro tempo, quando ndemo dessider se ndaremo far una università o come slevar i fioi. In tute le dessision dela nostra vita, volemo pensar nò sol in quel che se vede, ma anca nei consili de Geovà e nela so promessa de tenderne. Anca volemo pensar se questa dessision ndarà intrigar la nostra amicìssia con lu. Se femo cossita, noantri serviremo a Geovà par sempre! — Mic. 4:5.