Sìpia sicuro che Geovà sempre el te tenderà

1. Come che Moisè el ga mostrà che el se fidea in Geovà quando el ga menà fora i israeliti del Egito?

NEL LIBRO de Ebrei, ghen’è tanti esempi de bravi servi de Geovà che i se ga fidà del tuto in lu. Un de questi bei esempi l’è stà Moisè. (Ebr. 3:2-5; 11:23-25) Moisè el ga mostrà che el gavea tanta fede in Geovà quando el ga menà fora i israeliti del Egito. Parché che podemo dirlo? Lu no’l ga bio paura de Faraò gnanca del so esèrsito. Moisè anca el se ga fidà in Geovà quando el ga menà el pòpolo banda al Mar Rosso e al deserto. (Ebr. 11:27-29) Dopo, quando tanti israeliti no i era pròpio sicuri che Geovà li tenderia, Moisè el ga seità a fidarse del tuto in lu. Questa la ze stata la meio dessision parché Geovà el ga dato tuto quel che el pòpolo el ga bio de bisogno nel deserto.a — Éso. 15:22-25; Sal. 78:23-25.

2. Parché che Geovà el ga dito a Moisè: “Sarà che ghen’è qualcossa che la man de Geovà no la pol far?” (Nùmeri 11:21-23)

² Intorno de un ano dopo che i israeliti i era stati liberadi del Egito, Moisè el ga scominsià a domandarse come che Geovà el ghe daria carne al pòpolo. Pol esser che Moisè no l’era mia bon de creder che Geovà el saria bon de darghe carne a milioni de israeliti che i era in meso el deserto. Alora Geovà el ghe ga dito: “Sarà che ghen’è qualcossa che la man de Geovà no la pol far?” (Ledi Nùmeri 11:21-23.b) Le parole “la man de Geovà” in questo testo l’è el spìrito santo de Dio, o sia, la forsa che lu el dopera par far quel che el vol. Alora, l’era come se Geovà el fusse drio dir a Moisè: ‘Pénsito che no son mia bon de far quel che go dito?’

3. Parché che l’è importante imparar sora quel che ga sucedesto con Moisè e i israeliti?

³ Pol esser che te te ghè belche domandà se Geovà el ndaria pròpio tender dela to fameia e de quel che valtri gavé de bisogno. Alora, questo stùdio el ndarà giutar a ti, ma anca a tuti noantri! Ndaremo veder quel che ga sucedesto con Moisè e i israeliti, e parché che i ga assà de fidarse in Geovà. Dopo, ndaremo veder arquanti prinsipi dela Bìblia che i ndarà giutarne a esser ancora pi sicuri che Geovà sempre el ne tenderà.

IMPARA DE MOISÈ E DEI ISRAELITI

4. Parché che arquanti israeliti i ga scominsià a gaver dubi che Geovà el ghe daria quel che i gavea de bisogno?

⁴ Pensemo in quel che ga sucedesto coi israeliti intanto che i era drio ndar ala Tera Prometesta. ‘Tante persone che no le era mia israelite’ le era vegneste via del Egito insieme al pòpolo. (Éso. 12:38; Deu. 8:15) Queste persone le ga scominsià a stufarse de magnar el manà e le ga scominsià a sbrontolar. Alora, anca tanti israeliti i ga scominsià a sbrontolar con Moisè sora el manà. (Nùm. 11:4-6) Tuti i volea magnar quel che i magnea nel Egito. Par quela, Moisè el ga scominsià a pensar che ghe tochea a lu catar fora carne par darghe al pòpolo. — Nùm. 11:13, 14.

5-6. Cossa che podemo imparar con quel che ga sucedesto coi israeliti nel deserto?

⁵ Quei che no i era israeliti no i ga dato valor a quel che Geovà l’era drio darghe, e i israeliti i ga scominsià a pensar compagno a lori. La medèsima roba la pol suceder con noantri. Quando le persone intorno no le ze contente con quel che le ga, pol esser che anca noantri assemo de darghe valor a quel che Geovà el ne dà. Fursi, scominsiemo a pensar nele robe che gavéino nel passà o a voler quel che i altri i ga. Ma ghemo de ricordarse che sol saremo felici se imparemo a restar contenti cole robe che ghemo adesso, no importa se l’è poco o tanto.

⁶ I israeliti i gavea de ricordarse che Geovà el gavea prometesto darghe tante bele robe quando i rivesse nela Tera Prometesta, e nò intanto che i era in meso el deserto. Cossa che imparemo? Invesse de restar disgustadi cole robe che no ghemo adesso, ne ocore pensar in tuto quel che Geovà el ga prometesto darne in Paradiso. Noantri anca podemo pensarghe sora testi dela Bìblia che i ne giuta a fidarse ancora de pi in Geovà.

7. Parché che podemo esser sicuri che Geovà sempre el sarà bon de giutarne?

⁷ Geovà el ga domandà a Moisè se ‘ghen’era qualcossa che la so man no la podea far’. Fursi, Geovà l’era drio insegnarghe che lu el gavea forsa par far tuto quel che el vol e ndove lu el vol. Lu el podaria darghe tanta carne par magnar, anca se lori i fusse in meso el deserto. Par quela che la Bìblia la dise che, ‘cola so man poderosa e el so brasso stirà’, Geovà el ga giutà el so pòpolo. (Sal. 136:11, 12) Alora, podemo esser sicuri che, quando infrontemo una dificoltà, Geovà el ndarà giutarne no importa ndove semo. — Sal. 138:6, 7.

8. Cossa pol giutarne a mai far el sbàlio che i israeliti i ga fato nel deserto? (Varda anca la ilustrassion.)

⁸ Alora, Geovà el ga dato al pòpolo una mùcia de codorne par magnar, come el gavea prometesto. Ma i israeliti no i ghe ga ringrassià par quel bel miràcolo. Invesse, tanti de lori i ga laorà un giorno e meso par ciapar de pi codorne che i podea. Geovà l’è restà tanto cativo de veder che i era drio pensar sol in lori stessi e li ga castigadi. (Nùm. 11:31-34) Cossa che imparemo de quel che i israeliti i ga fato? Ghemo de restar contenti con quel che belche ghemo e mai cascar nela tràpola de voler cada volta de pi. No importa se semo siori o poareti, ghemo de sforsarse par ‘imuciar richesse nel cielo’, o sia, far pi forte la nostra amicìssia con Geovà e Gesù. (Mat. 6:19, 20; Luc. 16:9) Se femo cossita, podemo esser sicuri che Geovà sempre el ndarà darne quel che ne ocore.

9. De cossa podemo esser sicuri?

⁹ Geovà el giuta i so servi anca ancoi. L’è vera che pol esser che ne manche soldi o robe de magnar.c Ma ghemo de ricordarse che Geovà el ndarà sempre darne la forsa che ne ocore par infrontar le dificoltà e che mai el ndarà abandonarne. Adesso, ndaremo veder due dificoltà che fursi infrontemo, e come che Geovà el pol giutarne. Prima, ndaremo veder quel che ghemo de far se ne manca soldi. Dopo, vederemo cossa ghemo de far se se preocupemo come sarà la nostra vita dopo vegner veci.

COSSA POL GIUTARNE SE NE MANCA SOLDI?

10. Che dificoltà fursi infrontemo?

¹⁰ Come semo drio viver nei ùltimi giorni, savemo che infrontaremo cada volta de pi dificoltà par causa dei governi, dele guere, dele desgràssie dela naturesa o dele malatie che vien fora in tuto el mondo. Pol esser che ne tocarà catar fora nantro laoro e fursi cambiar el posto ndove stemo cola nostra fameia parché ghemo perso tuto. Se ne sucede una roba cossita, cossa pol giutarne a far dessision che mostra che se fidemo del tuto in Geovà?

11. Cossa pol giutarne se ne manca soldi? (Luc. 12:29-31)

¹¹ Noantri ghemo de parlar a Geovà sora tute le nostre preocupassion e domandarghe che el ne dae calma e sabedoria par far bone dessision. (Pro. 16:3; Ledi Luca 12:29-31.d) Podemo seitar a domandarghe che el ne giute a restar contenti cole robe che ne ocore. (1 Tim. 6:7, 8) Podemo anca studiar le publicassion nel jw.org e vardar i vìdei che i pol giutarne a infrontar problemi coi soldi.

12. Che domande un fradel el ga de farse vanti de acetar un laoro?

¹² Tanti i ga acetà un laoro anca se ghe tochea ndar de star distante dela so fameia. Ma dopo de un tempo, lori i ga visto che no l’è stà mia una bona dessision. Alora, prima de acetar un laoro, no stà pensar sol nei soldi, ma anca se te sarè bon de seitar a giutar la to fameia a gaver una forte amicìssia con Geovà. (Luc. 14:28) Te pol domandarte: ‘Cossa che sucederà col me matrimònio se aceto questo laoro? Sarà che sarò bon de sempre ndar ale riunion, ala predicassion e star tempo insieme coi fradel e sorele?’ Se te ghè fioi, te ghè anca de domandarte: ‘Mi vao esser bon de slevar i me fioi nela “dissiplina e nela orientassion de Geovà”?’ (Efe. 6:4) E quando te vè far una dessision sora laoro, sfòrsate de ndarghe drio ai consili de Geovà e nò de quei che no i fà quel che la Bìblia la dise, anca se i ze dela to fameia.e Varda el esémpio de Tony, un fradel che el vive nela Àsia. Lu el ga bio diverse oportunità de laorar in nantro paese e ciapar tanti soldi. Ma dopo de pregar a Geovà e de parlar cola so dona, lu el ga dessidio che no’l ndaria mia acetar questi laori. Invesse, lu el ga pensà che cambiamenti i gavaria de far par sparagnar de pi soldi. Lu el ga dito: “Mi resto tanto contento parché go podesto giutar arquante persone a cognosser la verità dela Bìblia, e i me fioi i ama pròpio tanto a Geovà. La nostra fameia la ga imparà che podemo esser sicuri che Geovà sempre el ne tenderà, se femo quel che dise Mateo 6:33.”

COSSA FAR SE SE PREOCUPEMO COME SARÀ LA NOSTRA VITA DOPO VECI

13. Cossa che podemo far adesso par gaver quel che ne ocore nel futuro?

¹³ Noantri anca podemo mostrar che se fidemo in Geovà quando pensemo in come sarà la nostra vita dopo vegner veci. La Bìblia la dise che ghemo de laorar del bon par gaver quel che ne ocore quando vegnemo veci. (Pro. 6:6-11) Alora, se semo boni, ghemo de meter via soldi par el futuro. I soldi ne giutarà a gaver quel che ne ocore. (Ecl. 7:12) Ma, ghemo de star atenti de mai assar che i soldi i devente la roba pi importante par noantri.

14. Parché che l’è importante ricordarse quel che dise Ebrei 13:5 quando pensemo nel futuro?

¹⁴ Gesù el ga contà una stòria par insegnar che una persona no la ga sabedoria se la sparagna soldi ma no la ga una forte amicìssia con Dio. (Luc. 12:16-21) Ghemo de ricordarse che nissun el sa quel che sucederà nel futuro. (Pro. 23:4, 5; Tia. 4:13-15) E Gesù el ga dito che tuti quei che i volesse esser so dissìpoli i gavaria de esser pareciadi par assar in drio tuto quel che i ga. (Luc. 14:33) Nel primo sècolo, questo ga sucedesto con arquanti dissìpoli dela Giudea. Lori i ga assà indrio de volentiera tuto quel che i gavea. (Ebr. 10:34) Ancoi, tanti fradei i ga perso el so laoro e le robe che i gavea parché no i ga volesto meterse nela polìtica. (Apo. 13:16, 17)Cossa che li ga giutadi a dàrghene fora? Lori i era pròpio sicuri dela promessa de Geovà: “Mi mai vao assarte, mai vao abandonarte”. (Ledi Ebrei 13:5.f) Alora, noantri femo el nostro meio par gaver quel che ne ocorerà nel futuro. Ma, semo sicuri che Geovà ne tenderà, anca se perdemo tuto.

15. Cossa i servi de Geovà i ga de pensar sora i so fioi? (Varda anca la ilustrassion.)

¹⁵ In arquante culture tanti i ga fioi parché i pensa che ghe toca ai fioi darghe soldi e tender dei genitori quando i vien veci. Ma la Bìblia la dise che l’è i genitori che i ga de tender dei fioi. (2 Cor. 12:14) L’è vera che i genitori fursi i gavarà bisogno de aiuto quando i vien veci e i fioi i restarà contenti de giutarli. (1 Tim. 5:4) Ma i servi de Geovà no i pensa che ghe toca i so fioi gaver soldi par tenderli. Lori i sa che la alegria la vien de slevar i so fioi par deventar bravi servi de Geovà. — 3 Gio. 4.

16. Come che i genitori i pol giutar i so fioi a gaver quel che ghe ocore? (Efesi 4:28)

¹⁶ Quando te sì drio insegnar el to fiol a laorar par gaver quel che ghe ocore, mostra che te te fidi in Geovà. Intanto che lu l’è ancora gióveno giùtalo a far el so meio nela scola e insegnaghe che l’è importante esser un bravo laorador. (Pro. 29:21; ledi Efesi 4:28.g) Sfòrsate de catar bei prinsipi dela Bìblia che giutarà el to fiol a dessider se el ndarà far una università o nò. E ricòrdarte che la roba pi importante la ze giutarlo a laorar par gaver quel che ghe ocore. Cossita, el podarà far de pi par Geovà.

17. De cossa te ocore ricordarte?

¹⁷ I servi de Geovà i pol esser sicuri che Geovà el ga la forsa e la voia de giutarli a gaver quel che ghe ocore. Come vivemo nel fin de questo mondo bruto, savemo che ne ocorerà fidarse in Geovà cada volta de pi. Noantri anca savemo che Geovà el ne darà quel che ne ocore no importa quel che suceda. Alora, ricòrdate sempre che Geovà el ga el poder par giutarte, no importa quel che te sì drio infrontar.