L’è tanto bon gaver una forte amicìssia coi fradei!

1-2. (a) Cossa che l’è tanto importante par Geovà? (b) Cossa che Geovà el vol che femo?

SETO che una dele robe pi importante par Geovà la ze la maniera che tratemo i altri? Gesù el ne ga insegnà che ghemo de amar i altri come amemo a noantri stessi. (Mat. 22:37-39) Alora, ghemo de mostrar bontà anca a quei che no i serve mia a Geovà. Quando femo cossita, semo drio far compagno a lu, che “el fà vegner el sol sora i rugni e sora i boni e el fà piover sora i giusti e sora i ingiusti”. — Mat. 5:45.

² Geovà el ama a tute le persone, ma el ghe vol ancora pi ben a quele che ghe obedisse. (Gio. 14:21) Geovà el vol che femo compagno a lu. Par quela che el ne dise de ‘gaver grando amor’ e de ‘voler ben de cuor’ i nostri fradei e sorele. (1 Pie. 4:8; Rom. 12:10) Questo sentimento l’è compagno a quel che ghemo par qualchedun dela nostra fameia o par un grando amigo.

3. Cossa che ghemo de capir sora el amor?

³ El apòstolo Paolo el ga dito che ghemo de ‘seitar a volerse ben come se fùssino fradei’. (Ebr. 13:1) El amor l’è compagno a una pianta che ghemo de seitar a tenderla par farla vegner su. Geovà el vol che seitemo a far cresser el amor che ghemo par i nostri fradei. In questo stùdio, ndaremo veder parché che ghemo de far pi forte la amicìssia coi nostri fradei e come che podemo farlo.

PARCHÉ CHE GHEMO DE ESSER CADA VOLTA PI AMIGHI DEI NOSTRI FRADEI?

4. De acordo col Salmo 133:1, come podemo seitar a dar valor ai nostri fradei? (Varda anca el ritrato.)

⁴ Ledi Salmo 133:1.a Noantri semo de acordo col salmista che el ga dito che ‘l’è bon e che fà ben’ star insieme con quei che i serve a Geovà. Ma pol esser che assemo de dar valor ala union che ghemo intrà i nostri fradei parché li vedemo tante volte ala stimana. Come cossita? Proa pensar nte una persona che la passa darente una pianta granda e bela tuti i giorni. Col tempo, ela gnanca no la se fà pi maraveia de quanto bela la ze. Dela stessa maniera, pol esser che gnanca no se nicordemo pi come l’è bel star coi nostri fradei. Alora, cossa che podemo far? Podemo torse el tempo par pensar in come cada un dei nostri cari fradei e sorele i ze importante par noantri e par la congregassion. Cossita, el nostro amor par lori el restarà cada volta pi grando.

5. Cossa che pol suceder quando i altri i vede el amor che ghemo intrà de noantri?

⁵ Tanti che i va ale nostre riunion par la prima volta i resta maraveiadi de veder el amor che ghen’è intrà de noantri. Gesù el ga dito: “Par meso de questo, tuti i saverà che valtri sì i me dissìpoli: se gavé amor intrà de valtri.” (Gio. 13:35) Alora, tante volte, le persone le capisse che semo i veri dissìpoli de Cristo sol de veder questo amor. Varda el esémpio de una gióvena de nome Chaitra che la ga scominsià studiar la Bìblia. Ela la ga acetà el convite par ndar a un congresso. Dopo del primo giorno, ela la ga dito ala sorela che la ghe insegnea la Bìblia: “Me pare e me mare mai i me ga dato un strucon, e sol nel primo giorno del congresso, i fradei i me ga dato 52 struconi. Mi go sentio che Geovà l’era drio doperar i fradei e sorele par mostrar che el me vol tanto ben, e mi vui far parte de questa fameia.” Chaitra la ga fato cambiamenti nela so vita e la ze stata batesada in 2024. Questo esémpio el mostra che le persone le vede le bele robe che femo e el amor che ghemo intrà de noantri. Par quela, tante le scòlie servir a Geovà. — Mat. 5:16.

6. Che protession ghemo quando semo amighi dei nostri fradei?

⁶ Gaver una forte amicìssia coi nostri fradei e sorele l’è una protession par noantri. Paolo el ga dito: ‘Seité incoraiarse un al altro tuti i giorni. Cossita el vostro cuor no’l restarà duro e no saré imbroiadi par el pecato.’ (Ebr. 3:13) Pol esser che restemo desanimadi e pensemo che l’è massa fadiga far quel che Geovà el dise che l’è giusto. Ma Geovà el pol giutar un fradel o una sorela a nicorderse de questo e vegner giutarne in quel che ne ocore. (Sal. 73:2, 17, 23) Sicuro che l’è tanto bon par noantri esser giutadi e incoraiadi cossita.

7. De acordo con Colossensi 3:13, 14, come che el amor el giuta che ghen sìpia union intrà i servi de Dio?

⁷ Noantri semo tanto benedidi de far parte de una fameia che se sforsa par mostrar amor un par el altro. (1 Gio. 4:11) Par esémpio, el amor ne giuta a ‘suportarse un al altro’ e a viver in union. (Ledi Colossensi 3:13, 14;b Efe. 4:2-6) Sicuro che no ghen’è nantro posto nela Tera che se pol catar amor e union come ghen’è nele nostre riunion.

DÉGHE ONOR AI ALTRI

8. Come Geovà el ne giuta a viver in union coi nostri fradei e sorele?

⁸ Savemo che semo imperfeti. Par quela, sol semo boni de viver in union coi nostri fradei parché Geovà ne giuta a farlo. (1 Cor. 12:25) Par meso dela Bìblia lu el ne “insegna a amar un al altro”. (1 Tes. 4:9) Geovà el ne dise cossa ghemo de far par gaver una forte amicìssia coi nostri fradei e sorele. Ma cossa noantri ghemo de far par esser insegnadi par Geovà? Ghemo de sforsarse par studiar la Bìblia e meter in pràtica quel che imparemo. (Ebr. 4:12; Tia. 1:25) E l’è pròpio questo che le Testimònie de Geovà le se sforsa de far.

9. Come che Romani 12:9-13 ne giuta a saver come dar onor ai altri?

⁹ Cossa la Bìblia la dise che podemo far par gaver una amicìssia pi forte coi fradei? Vardemo quel che Paolo el ga dito in Romani 12:9-13. (Ledi.c) Una roba importante che Paolo el ga dito in questo testo la ze che ghemo de ‘esser premosi de dar onor un al altro’. Questo vol dir che ghemo de sforsarse par mostrar ai nostri fradei che ghe volemo tanto ben. E noantri podemo mostrarghe de diverse maniere. Par esémpio, quando perdonemo i so sbali, li convidemo par vegner casa nostra e li giutemo con quel che ghe ocore. (Efe. 4:32) Alora, cossa pénsito de proar far pi forte la to amicìssia coi fradei, invesse de spetar che lori i te vegna drio? Se te fè cossita, te vè sentir quel che Gesù el ga dito: “Ghen’è de pi felicità in dar, che in ricever.” — Ati 20:35.

10. Come che podemo sforsarse de “dar onor un al altro”? (Varda anca el ritrato.)

¹⁰ Dopo de Paolo dir che ghemo de esser premosi de dar onor un al altro, el ga dito: “Sìpia laoradori sforsadi, nò pegri.” Una persona cossita la laora tanto e la se sforsa de far ben le so responsabilità. Proverbi 3:27, 28 dise: “No stà assar de far el ben a quei che te ghè de farlo, se te sì bon de giutar.” Alora, se vedemo che qualchedun ghe ocore de aiuto, lo femo suito. No pensemo mia de assar par dopo o che qualchedun ndarà giutarlo. — 1 Gio. 3:17, 18.

11. Cossa che pol giutarne a gaver una amicìssia pi forte coi fradei?

¹¹ Noantri anca demo onor ai nostri fradei quando suito perdonemo quei che i ne ga ofendesto. Efesi 4:26 dise: “El sol no’l ga de ndar do intanto che valtri sì ancora inrabiadi.” Parché l’è importante far cossita? Nel versìcolo 27, dise che no ghemo de “dar oportunità al Diaol”. Par quela che la Bìblia tante volte la ne dise che ghemo de perdonar i nostri fradei. Par esémpio, Colossensi 3:13 dise che ghemo de seitar a ‘perdonarse un al altro del tuto’. No badar quel che i fradei i fà contra noantri l’è una dele meio maniera de far pi forte la amicìssia intrà de noantri. Come dise Efesi 4:3, quando femo cossita, ‘seitemo unidi par via del spìrito e ghemo la pace che la une’. Alora, quando perdonemo, giutemo che ghen sìpia pace e union intrà i servi de Geovà.

12. Come che Geovà el ne giuta a perdonar?

¹² L’è vera che no l’è mia fàcile perdonar qualchedun che ne ga disgustà. Ma, podemo farlo col aiuto del spìrito santo de Dio. Dopo che Paolo el ga dito che ghemo de ‘volerse ben de cuor’ e che ghemo de ‘esser laoradori sforsadi’, lu el ga dito: “Assé che el spìrito santo el ve dae ànimo.” (Rom. 12:11) Questo vol dir che el spìrito santo pol darne tanto ànimo e voia par far tuto quel che Dio el vol. Alora, el spìrito santo de Dio pol giutarne a mostrar che amemo i fradei e a perdonarli de cuor. Par quela che l’è tanto importante domandar che Geovà el ne dae el so spìrito santo par esser boni de far queste robe. — Luc. 11:13.

CHE ‘NO GHEN SÌPIA DIVISION INTRÀ DE VALTRI’

13. Cossa che pol rovinar la pace nela congregassion?

¹³ Nela organisassion de Geovà, catemo “tuti i tipi de persone”. (1 Tim. 2:3, 4) La maniera che cada un l’è stà slevà e quel che ga infrontà nela vita l’è tanto difarente un del altro. Par quela, femo dessision difarente sora la nostra maniera de vestirse, de rangiarse, divertirse e de tender dela salute. Se no stemo atenti, queste robe pol rovinar la pace nela congregassion. (Rom. 14:4; 1 Cor. 1:10) Ma come Geovà el ne insegna a amar i altri, no ndaremo voler che i altri i fae le dessision compagno a noantri. — Fil. 2:3.

14. Cossa che ghemo de sforsarse de far, e parché?

¹⁴ Noantri anca giutemo che ghen sìpia pace nela congregassion quando sempre femo robe che giuta e incoraia i fradei. (1 Tes. 5:11) Nei ùltimi ani, tanti de quei che i se gavea fermà de ndar ala predicassion o ale riunion e tanti de quei che ze stati cavadi via dela congregassion i ze tornadi. Noantri restemo tanto contenti de riceverli. (2 Cor. 2:8) Par esémpio, una sorela no la ndea pi ale riunion gnanca ala predicassion fea 10 ani. Varda cossa che la ga dito dopo che la ze tornada: “Tuti i era contenti de saludarme, e go visto nela so fàcia che i era contenti che mi ero lì.” (Ati 3:19) Come che questa sorela la se ga sentio? Ela la ga dito: “Go sentio che Geovà l’era drio portarme nantra volta ala strada dela felicità.” Alora, quando se sforsemo par sempre incoraiar i altri, Gesù el pol doperarne par animar a quei che i ze stufi e desanimadi. — Mat. 11:28, 29.

15. De che nantra maniera giutemo che ghen sìpia union nela congregassion? (Varda anca el ritrato.)

¹⁵ Noantri anca giutemo che ghen sìpia union nela congregassion par meso de quel che parlemo ai nostri fradei. Giò 12:11 dise: “No ze le récie che le esamina le parole, cossita come la léngua la sente el gusto del magnar?” La persona che fà un bon de un magnar lo proa vanti de servirlo ai altri. Anca noantri volemo pensar ben vanti de parlar qualcossa a qualchedun. (Sal. 141:3) Noantri volemo esser sicuri che le nostre parole le ndarà incoraiar e ‘far ben a quei che i ne scolta’. — Efe. 4:29.

16. Chi che ga de star ancora pi atento ala so maniera de parlar?

¹⁶ Ma chi che ga de star ancora pi atento ala so maniera de parlar? Quei che i ze maridadi e quei che i ga fioi sempre i ga de parlar robe che incoraia la so fameia. (Col. 3:19, 21; Tito 2:4) Anca i ansiani sempre i ga de parlar robe che giute e che ghe dae consolo ale piegorete de Geovà. (Isa. 32:1, 2; Gàl. 6:1) Proverbi 15:23 dise: “L’è tanto bon quando una persona la parla una parola nel tempo giusto.”

GHEMO DE AMAR “IN ASSION E IN VERITÀ”

17. Come che podemo amar i nostri fradei de cuor?

¹⁷ El apòstolo Gioani el ne ga incoraià a “amar no in parole gnanca cola léngua, ma in assion e in verità”. (1 Gio. 3:18) Alora, volemo amar i nostri fradei e sorele de tuto el nostro cuor. Come che podemo farlo? Ghemo de torse el tempo par star insieme de lori. Se femo cossita, el nostro amor par lori restarà cada volta pi forte. Alora, sfòrsate par star insieme de lori nele riunion, nela predicassion e proa anca visitarli. Quando femo cossita, mostremo che assemo che ‘Dio el ne insegne a amar un al altro’. (1 Tes. 4:9) E anca sentiremo che l’è tanto ‘bon e che fà ben quando fradei i vive insieme e in union!’ — Sal. 133:1.