STÙDIO 15
CÀNTICO 30 Me Dio, me Amigo e me Pupà
Gaver una forte amicìssia con Geovà l’è bon par ti!
“Quel che penso l’è che rivar pi darente de Dio l’è bon par mi.” — SAL. 73:28.
COSSA CHE NDAREMO IMPARAR?
In questo stùdio, ndaremo imparar come che podemo far pi forte la nostra amicìssia con Geovà e parché che l’è bon esser so amighi.
1-2. (a) Cossa che ghemo de far se volemo esser amighi de una persona? (b) Cossa che ndaremo veder in questo stùdio?
PENSA nte un amigo che te ghe vol tanto ben. Cossa gheto fato par gaver una forte amicìssia con lu? Pol esser che te ghè tolto del to tempo par cognosserlo, saver quel che ghe piase, quel che no ghe piase mia, e par saver dele dificoltà che el ga belche infrontà. Te ghè anca visto le bele qualità che el ga e che te volei far compagno.
2 Par gaver una forte amicìssia con una persona, ghemo de sforsarse e torse tempo. Ghemo de far la medèsima roba se volemo esser amighi de Geovà. In questo stùdio, ndaremo veder parché che l’è bon far ancora pi forte la nostra amicìssia con Geovà e come che podemo farlo.
3. Parché che l’è importante pensar nele robe bone che ghemo quando semo amighi de Geovà? Parla de un esémpio.
3 Ghemo de far de pi che sol saver che esser amighi de Geovà l’è bon par noantri. Ghemo anca de fermarse par pensar parché l’è bon gaver una amicìssia con lu. Cossita, volaremo esser cada volta pi amighi de lu. (Sal. 63:6-8) Varda un esémpio. Tuti i sa che l’è bon magnar polito, far esersissi, riposar e bever àqua. Ma come tanti no i se ferma par pensar come queste robe le fà ben, lori no le fà mia e no i ga una bona salute. Invesse, quei che sempre i se ferma par pensar come queste robe li giuta a gaver una bona salute, i ga cada volta pi voia de farle. La medèsima roba la sucede cola nostra amicìssia con Geovà. Se sempre pensemo parché che l’è bon esser so amighi gavaremo cada volta pi voia de far pi forte la nostra amicìssia con lu. — Sal. 119:27-30.
4. De acordo con Salmo 73:28, cossa che el salmista el ga dito sora la so amicìssia con Geovà?
4 Ledi Salmo 73:28.a El Salmo 73 l’è stà scrito par Asafe o par un dei so dissendenti. Questo salmista l’era un levita che l’era stà scoliesto par sonar mùsica nel témpio. Anca se lu el fusse drio servir a Geovà fea tanto tempo, lu el ga capio che l’era importante ricordarse parché che l’è bon ‘rivarse pi darente de Dio’. E lu el volea che anca i altri i pensesse sora la so amicìssia con Geovà. Adesso, ndaremo veder parché che l’è bon cognosser meio a Geovà e far pi forte la nostra amicìssia con lu.
SE SEMO AMIGHI DE GEOVÀ, SEMO FELICI
5. (a) Parché che semo felici quando semo amighi de Geovà? (b) De acordo con Proverbi 2:6-16, come che la sabedoria de Geovà la ne giuta e ne protege?
5 Ledi Proverbi 2:6-16.b Se seitemo a far pi forte la nostra amicìssia con Geovà, saremo cada volta pi felici. (Sal. 65:4) Parché che podemo dirlo? Vedemo un esémpio. Quando ledemo la Bìblia e femo quel che Geovà el dise, ghemo cada volta pi sabedoria. E questa sabedoria la ne protege de robe che le pol farne sofrir tanto e la ne protege de far bruti pecati. Par quela che la Bìblia la dise: “El omo che el ga sabedoria e el omo che el ghe vede rento i ze felici.” — Pro. 3:13.
6. Parché che el salmista l’è restà desanimà?
6 Ma, dele volte anca quei che i ze amighi de Geovà i resta desanimadi. Quel che el ga scrito el Salmo 73 l’è restà tanto desanimà quando l’è ndato drio ai so bruti pensieri. Lu el ga scominsià a pensar che quei che i fea robe sbaliade e che no i servia a Geovà i gavea una vita tanto meio. Lu el pensea che quei che i era cativi e orgoliosi, i podea gaver tuto quel che i volea, i era siori e no i sofria. Lu l’è restà tanto cativo e el ga fin volesto gaver tuto quel che i gavea. (Sal. 73:3-7, 12) Lu l’era restà tanto desanimà che el ga fin pensà che no ghen’era gnente de bon de servir a Geovà. Lu el ga dito: ‘L’è stà par gnente che me go sforsà par gaver un cuor puro e par no far robe sbaliade.’ — Sal. 73:13.
7. Cossa che ghemo de far quando semo tanto desanimadi? (Varda anca la ilustrassion dela prima pàgina.)
7 Anca se el salmista l’era tanto desanimà, lu el ga fato quel che ghe ocorea par cambiar la so maniera de pensar. La Bìblia la dise che lu l’è ndato rento el “grandioso santuàrio de Dio”, ndove Geovà lo ga giutà. (Sal. 73:17-19) Alora, quando semo desanimadi, ghemo de pregar e domandar che Geovà el ne giute a saver cossa far. Lu l’è el nostro meio amigo e el capisse cossa che semo drio sentir. Par meso dei bei consili dela Bìblia e dei cari fradei e sorele, Geovà el ndarà darne la forsa che ne ocore par seitar a servirlo. Alora, anca quando semo drio infrontar problemi e semo tanto ansiosi, podemo esser sicuri che Geovà el ndarà tenderne e giutarne a restar calmi. — Sal. 94:19.c
El scritor del salmo 73 l’è davanti el “grandioso santuàrio de Dio” (Varda el paràgrafo 7.)
SE SEMO AMIGHI DE GEOVÀ, GHEMO UNA BELA VITA E UNA SPERANSA
8. Che altre due robe ghemo quando semo amighi de Geovà?
8 Varda anca altre due bele robe che ghemo quando semo amighi de Geovà. Prima, ghemo una bela vita ancoi, e seconda, ghemo una speransa che podemo fidarse par el futuro. (Ger. 29:11) Ndemo imparar de pi sora queste due robe.
9. Parché che esser amighi de Geovà ne giuta a gaver una bela vita ancoi?
9 Quando semo amighi de Geovà, ghemo una bela vita. Tante persone ancoi no le crede che ghen’è un Dio. Alora, lore no le sa mia parché che semo qua nela Tera, e le crede che un giorno no ghen sarà pi persone qua. Invesse noantri ghemo imparà nela Bìblia che ghen’è un Dio e che “el ricompensa quei che i fà sforso par ndar in serca de lu”. (Ebr. 11:6) E savemo anca che Geovà el ne ga creà par servirlo. Alora, quando doperemo la nostra vita par far quel che ghe piase, semo felici. — Deu. 10:12, 13.
10. De acordo con Salmo 37:29 che bela speransa ghemo par el futuro?
10 Tante persone ancoi no le ga mia una speransa par el futuro. Alora sol le pensa de laorar, maridarse, gaver fioi e meter via soldi par quando le vien vecie. Queste persone no le pensa mia in Dio. Invesse noantri che servimo a Geovà se fidemo in lu e semo sicuri che lu el ndarà sempre tenderne. (Sal. 25:3-5; 1 Tim. 6:17) Geovà el ne promete tante bele robe par el futuro, e semo sicuri che el ndarà far tuto quel che el ga dito. Semo premosi de viver in Paradiso e poder adorar a Geovà par sempre. — Ledi Salmo 37:29.d
11. Cossa che sucede quando semo amighi de Dio, e cossa che Geovà el sente quando femo quel che l’è giusto?
11 Ma ghemo tante altre benedission quando semo amighi de Geovà. Par esémpio, quando se ciamemo grami dei nostri sbali, Geovà el ne perdona. (Isa. 1:18) Par quela, no seitemo a sentirse in colpa par causa dei sbali che ghemo fato nel passà. (Sal. 32:1-5) Quando Geovà el vede che semo drio far quel che l’è giusto, lu el resta tanto contento. (Pro. 23:15) Sicuro che te sì bon de pensar anca in altre benedission che te ghè de esser amigo de Geovà. Ma come che te pol far ancora pi forte la to amicìssia con lu?
SEITA A FAR PI FORTE LA TO AMICÌSSIA CON GEOVÀ
12. Cossa che te ghè belche fato par esser amigo de Geovà?
12 Se te sì batesà, te ghè belche fato arquante robe par esser amigo de Geovà. Par esémpio, te ghè imparà le verità sora Geovà e sora Gesù, te te ghè ciamà gramo dei to pecati, te ghè fato robe che mostrea che te gavei fede in Dio e te te ghè sforsà par obedirghe. Ma par far pi forte la to amicìssia con Geovà, te toca seitar a far queste robe. — Col. 2:6.
13. Che tre robe ndarà giutarne a far ancora pi forte la nostra amicìssia con Geovà?
13 Cossa che ndarà giutarne a far ancora pi forte la nostra amicìssia con Geovà? (1) Ghemo de seitar a leder e a studiar la Bìblia. Ma ghemo de far de pi che sol imparar un per de verità sora Dio. Volemo anca capir come che Geovà el pensa, quel che el vol che femo, e dopo sforsarse par meter in pràtica nela vita quel che ghemo imparà. (Efe. 5:15-17) (2) Ghemo anca de pensarghe sora come che Geovà el mostra amor par noantri. Cossita, ndaremo far pi forte la nostra fede. (3) Ghemo de seitar a odiar quel che Geovà el òdia e mai gaver amicìssia con persone che fà robe sbaliade. — Sal. 1:1; 101:3.
14. Cossa ghemo de far tuti i giorni par assar Geovà contento? (1 Corinti 10:31) (Varda anca la ilustrassion.)
14 Ledi 1 Corinti 10:31.e Par far pi forte la nostra amicìssia con Geovà, ghemo anca de far quel che ghe piase a lu. L’è vera che l’è tanto importante ndar ala predicassion e ale riunion, ma ghemo de far quel che assa Geovà contento tuti i giorni. Par esémpio, ghemo de far tuto polito, esser persone de fidarse e giutar i altri par meso de quel che ghemo. (2 Cor. 8:21; 9:7) Noantri anca ghemo de mostrar che ghe demo valor ala vita. Alora, ghemo de star atenti a quanto che magnemo e bevemo e ghemo de tender dela nostra salute. Quando Geovà el vede che semo drio sforsarse de assarlo contento in tuto quel che femo, lu el ne ama ancora de pi. — Luc. 16:10.
Assemo Geovà contento quando tendemo dela nostra vita e dela nostra salute e quando femo robe bone par i altri (Varda el paràgrafo 14.)
15. Come che Geovà el vol che tratemo i altri?
15 Geovà el mostra bontà a tuti, anca a quei che no i lo serve mia. (Mat. 5:45) E Geovà el vol che anca noantri mostremo amor ale persone. Alora, se volemo far pi forte la nostra amicìssia con Geovà, ghemo de tratar a tuti con amor e bontà. Par quela ‘no parlemo mal de nissuni gnanca barufemo e tratemo a tute le persone con brandura’. (Tito 3:2) Noantri gnanca no pensemo che semo meio de quei che i no servi mia a Geovà. — 2 Tim. 2:23-25.
PODEMO GAVER UNA FORTE AMICÌSSIA CON GEOVÀ ANCA SE SBALIEMO
16. Cossa che quel che el ga scrito el Salmo 73 el ga scominsià a pensar?
16 Gheto belche pensà che Geovà no’l te amea pi par causa dei to sbali? Come ghemo belche visto in questo stùdio, anca quel che el ga scrito el Salmo 73 el se ga sentio cossita. Lu el ga dito: ‘I me pié quasi i ga sbrissià.’ (Sal. 73:2) Lu anca el ga dito che ‘no l’era bon de pensar gnanca de capir gnente, come una bèstia che no la sa gnente’. (Sal. 73:21, 22) Pol esser che lu el ga pensà che par causa dei so sbali Geovà no lo amea pi e no’l ndaria perdonarlo.
17. (a) Cossa che el salmista el ga capio anca se el fusse tanto desanimà? (b) Cossa che imparemo de quel che ga sucedesto col salmista? (Varda anca la ilustrassion.)
17 Anca se el salmista el gavesse sentio che Geovà lo gavea abandonà, suito el ga cambià la so maniera de pensar. Lu el ga capio che el gavea tanto bisogno dela so amicìssia con Geovà. Lu el ga dito: “Adesso mi son sempre con ti. Ti te me ghè ciapà par la man drita. Ti te me insegni par meso dei to consili, e te vè mostrarme la to aprovassion.” (Sal. 73:23, 24) Quando semo desanimadi par causa dei nostri sbali, anca noantri ghemo de pregar a Geovà e domandarghe forsa. (Sal. 73:26; 94:18) E anca se ghemo fato sbali, ghemo de tornar a Geovà e esser sicuri che lu l’è pronto par perdonarne. — Sal. 86:5; 103:13, 14.
Quando sentimo che la nostra amicìssia con Geovà la ze restada fiaca, ghemo de sforsarse de pregar e ndar ale riunion (Varda el paràgrafo 17.)
SEITA A FAR PI FORTE LA TO AMICÌSSIA CON GEOVÀ PAR SEMPRE
18. Parché che podaremo far pi forte la nostra amicìssia con Geovà par sempre?
18 La Bìblia la dise che la cognossensa, le strade e el saver de Geovà i ze pròpio profondi. (Rom. 11:33) Cossita, capimo che podaremo seitar a far pi forte la nostra amicìssia con Geovà par sempre, parché mai se fermaremo de imparar sora lu.
19. De cossa che el Salmo 73 el te assa sicuro?
19 Quel che el ga scrito el Salmo 73, che l’è stà Asafe o un dei so dissendenti, l’era sicuro che el podaria seitar a far pi forte la so amicìssia con Geovà. Lu el ga dito: ‘Noantri che semo el to pòpolo e le to piégore ringrassiemo a ti par sempre, e te lodaremo par sempre.’ (Sal. 79:13) Alora, sìpia sicuro che te pol seitar a far pi forte la to amicìssia con Geovà e che lu el ndarà benedirte par sempre. Cossita come el salmista, te pol dir: “Dio l’è un grando sasso che el tien firme el me cuor e lu l’è tuto quel che go de bisogno par sempre.” — Sal. 73:26.
CÀNTICO 32 Resta dela banda de Geovà!
a (Salmo 73:28) Ma quel che penso l’è che rivar pi darente de Dio l’è bon par mi. Go catà protession con ti, Sovrano Signor Geovà, par parlar de tute le robe che te fè.
b (Proverbi 2:6-16) Parché Geovà el dà la sabedoria. Par meso dele so parole, el dà cognossensa e bon giudìssio. 7 Dio el ga metesto via la sabedoria e el ghe la dà a quei che i ze giusti. Lu l’è una protession par quei che i fà tuto polito. 8 Lu l’è atento ala strada de quei che i ze giusti e el tende de quei che i ze leai. 9 Cossita te ndarè capir come far polito, far el ben e far quel che l’è giusto. 10 Quando la sabedoria la ndarà rento el to cuor e te piaserà gaver la cognossensa, 11 la capacità de pensar la te tenderà e el bon giudìssio el te protegerà. 12 Queste robe le te giutarà a no far quel che l’è sbalià, e a salvarte dei òmini che i parla robe rugne, 13 de quei che i ga assà indrio quel che l’è giusto par far quel che l’è sbalià, 14 che i ghe piase far i altri sofrir e i resta contenti de far quel che l’è rugno, 15 quei che i fà finta de esser quel che no i ze, una strada che la ze tanto storta. 16 La sabedoria la te protegerà dela dona slandra, la te protegerà de no esser imbroià par quel che la dona imoral la dise.
c Fursi saria bon che quei che i se sente ansiosi, desanimadi o triste par tanto tempo i ndesse al dotor. Par saver de pi sora questo, varda La Sentinela, n.º 1 de 2023.
d (Salmo 37:29) I giusti i sarà paroni dela tera e i viverà par sempre nela tera.
e (1 Corinti 10:31) Alora, se magné, se bevé o se fé qualche altra roba, gavé de far tute le robe par la glòria de Dio.