No te sarè mai ti ti sol

1-2. (a) Parché che podemo dir che mai semo noantri soli? (b) Cossa che ndaremo imparar in questo stùdio?

QUANDO semo drio infrontar dificoltà, fursi se sentimo soli come se fùssino nte un pìcolo barco nel mar in meso un bruto temporal. Ma Geovà, el nostro caro Pare, el vede tuti nostri problemi e sempre el ne giuta dàrghene fora. Par quela, te pol esser sicuro che mai te sarè ti ti sol. Geovà el ga prometesto: ‘Mi vao giutarte.’ — Isa. 41:10.

² In questo stùdio, ndaremo veder quatro robe che Geovà el fà par giutarne: (1) lu el ne insegna quel ghemo de far, (2) el ne dà quel che ne ocore, (3) el ne protege, e (4) el ne consola. Geovà el ga prometesto che no importa che dificoltà vegna fora, lu mai el ndarà desmentegarse de noantri e mai el ndarà abandonarne. Par quela, mai saremo noantri soli.

GEOVÀ EL NE INSEGNA QUEL CHE GHEMO DE FAR

3-4. Come che Geovà el ne insegna? (Salmo 48:14)

³ Ledi Salmo 48:14.a Geovà el sa che no podemo far bone dessision sensa el so aiuto. Alora, lu el ne insegna la meio roba de far par meso dela Bìblia. (Sal. 119:105) Geovà el ne insegna come far bone dessision e come gaver bone qualità che le ne giuta a esser pi felici adesso e a viver par sempre nel futuro.b Par esémpio, imparemo che ghemo de far tuto polito, perdonar i altri e sforsarse de amarli de cuor. (Sal. 37:8; Ebr. 13:18; 1 Pie. 1:22) Quando ghemo queste bele qualità, deventemo amighi meio e giutemo la nostra fameia a esser pi felice.

⁴ Par meso dela Bìblia, Geovà anca el parla de persone che le ga bio dificoltà e sentimenti compagni ai nostri. (1 Cor. 10:13; Tia. 5:17) L’è tanto bon quando ledemo sora queste persone e metemo in pràtica quel che imparemo. Parché? Primo, parché capimo che lori i ga bio problemi e dificoltà come noantri e che Geovà el ndarà giutarne come li ga giutadi. (1 Pie. 5:9) Secondo, parché imparemo quel che ghemo de far par dàrghene fora coi nostri problemi. — Rom. 15:4.

5. Chi che Geovà el dopera par insegnarne quel che ghemo de far?

⁵ Geovà anca el ne insegna cossa far par meso dei nostri bravi fradei e sorele.c Par esémpio, i superintendenti de sircuito sempre i visita le congregassion par incoraiarne. Lori i fà discorsi par giutarne a seitar fedeli e unidi. (Ati 15:40–16:5) I ansiani i se sforsa par giutar tuti i fradei e sorele dela congregassion a gaver una forte amicìssia con Geovà. (1 Pie. 5:2, 3) I genitori i insegna i so fioi a amar a Geovà, a far bone dessision e a gaver el costume de sempre studiar la Bìblia. (Pro. 22:6) E le nostre brave sorele le giuta le gióvene par meso del so esémpio, de boni consili e incoraiamento. — Tito 2:3-5.

6. Come che mostremo che ghe demo valor a quel che Geovà el ga fato par noantri?

⁶ Geovà el ga belche fato tuto quel che ghe ocorea par insegnarne come far bone dessision e come esser felici. Alora, come mostremo che ghe demo valor a quel che el ga fato? Proverbi 3:5, 6 dise: “Fìdate in Geovà de tuto el to cuor, no stà fidarte nel to pròpio saver.” Se se fidemo in Geovà, lu el ndarà ‘mostrarne quala che la ze la strada giusta’. Cossita, saremo protegesti de infrontar arquanti problemi e saremo tanto felici. Sicuro che restemo tanto contenti de saver che Geovà el ne cognosse, el ne ama e el ne dà bei consili. — Sal. 32:8.

GEOVÀ EL NE DÀ QUEL CHE NE OCORE

7. Come che Geovà el ne giuta a gaver quel che ne ocore? (Filipensi 4:19)

⁷ Ledi Filipensi 4:19.d Come ghemo visto, Geovà el ne insegna come far bone dessision. Ma lu anca el ne giuta con quel che ne ocore. Come cossita? Lu el benedisse el sforso che femo par gaver de magnar, robe de meter su e un posto de star. (Mat. 6:33; 2 Tes. 3:12) Sicuro che dele volte tuti noantri restemo preocupadi con queste robe. Ma Geovà el ne ga dito che no ghemo de star massa ansiosi. (Mat. 6:25) Parché? Parché lu l’è un Pare, che el tende dei so servi e sempre el ndarà darne quel che ghemo de bisogno. (Mat. 6:8; Ebr. 13:5) Alora, podemo fidarse del tuto quando lu el ne dise che sempre el ne darà quel che ne ocore.

8. Cossa che Geovà el ga fato par Davi?

⁸ Varda come che Geovà el ga giutà Davi. Lu el ga bio de scampar via par tanti ani quando el rè Saul el volea coparlo. Ma anca se no l’era mia fàcile, Geovà sempre el ga tendesto de Davi e dei so òmini e ghe ga dato tuto quel che i gavea de bisogno. Par quela che, ani dopo, Davi el ga scrito: “Mi ero gióveno e adesso son vècio, ma mai go visto un giusto abandonà gnanca i so fioi drio ndar in serca de pan.” (Sal. 37:25) Compagno a Davi, sicuro che anca ti te ghè belche sentio come che Geovà el ga tendesto de ti e dei to fradei quando gavé infrontà dificoltà.

9. Come che Geovà el giuta i so servi quando sucede una desgràssia? (Varda anca la ilustrassion.)

⁹ Geovà el giuta i so servi anca quando sucede una desgràssia. Par esémpio, nel primo sècolo in Gerusalen, tanti dissìpoli de Gesù i ga patio la fame. Alora, fradei e sorele de tanti posti i ghe ga dato quel che ghe ocorea. (Ati 11:27-30; Rom. 15:25, 26) Anca ancoi, i servi de Geovà i se giuta un al altro. Quando sucede una desgràssia, Geovà el dopera i so servi par dar de magnar, àqua, robe de meter su e remedi par quei che i ze drio tribolar. Fradei e sorele che laora nela costrussion i rangia su case e Saloni del Regno. E Geovà anca el dopera i so servi par suito dar consolo e incoraiar quei che i ze drio sofrir.e

10-11. Cossa che podemo imparar con quel che ga sucedesto con Boris?

¹⁰ Geovà el giuta a tuti, anca a quei che no i lo serve mia. Dela medèsima maniera, noantri proemo giutar anca quei che no i ze nostri fradei o sorele. (Gàl. 6:10) Par quela, queste persone le pol imparar de pi sora noantri e sora Geovà. Varda quel che ga sucedesto con Boris, un omo che el tendea de una scola nela Ucrània. Lu sempre el ga rispetà e el ga tratà con bontà i aluni che i era Testimònie de Geovà. Alora, quando lu el ga dessidio scampar via dela guera e ndar par nantro posto, i fradei i lo ga giutà. Un tempo dopo, lu l’è ndato ala Selebrassion dela Morte de Gesù. Lu el ga dito sora quel che i fradei e sorele i ghe ga fato: “Le Testimònie de Geovà le ga mostrà bontà e le me ga giutà. Mi dao tanto valor a quel che le ga fato par mi.”

¹¹ Noantri podemo far come Geovà e mostrar amor a tuti quei che i ga de bisogno, no importa se lori i ze nostri fradei o nò. (Luc. 6:31, 36) Volemo tanto che le persone le gàpia voia de imparar de pi sora Geovà par causa de quel che femo. (1 Pie. 2:12) Ma anca se lore no le deventa servi de Geovà, gavaremo la alegria che vien de giutar i altri. — Ati 20:35.

GEOVÀ EL NE PROTEGE

12. Che protession Geovà el ga prometesto dar ai so servi? (Salmo 91:1, 2, 14)

¹² Ledi Salmo 91:1, 2,f 14.g Ancoi, Geovà el promete che sempre el va proteger la nostra amicìssia con lu. Lu mai el ndarà assar che Sàtana el intrighe i so servi de adorarlo dela maniera giusta. (Gio. 17:15) E nela granda tribolassion, semo sicuri che Geovà el ndarà giutarne a seitar a gaver una forte fede e el ndarà salvarne, come el ga prometesto. — Apo. 7:9, 14.

13. Come che Geovà el protege cada un de noantri?

¹³ Come che Geovà el protege cada un de noantri? Par meso dela Bìblia, Geovà el ne giuta a capir quel che l’è giusto o sbalià. (Ebr. 5:14) Quando imparemo e metemo in pràtica nela nostra vita i prinsipi de Geovà, vivemo meio e semo felici. (Sal. 91:4) Geovà anca el ne protege par meso dela congregassion. (Isa. 32:1, 2) Quando semo insieme i nostri cari fradei e sorele che i ama a Geovà e i se sforsa de obedirghe, se incoraiemo un al altro e ghemo forsa par dàrghene fora cole robe sbaliade. — Pro. 13:20.

14. (a) Parché che Geovà no’l ne protege de tute le dificoltà? (b) De cossa che el Salmo 9:10 ne assa sicuri? (Varda anca la nota.)

¹⁴ L’è vera che nel passà Geovà el ga protegesto arquanti dei so servi par no farse mal o esser copadi. Ma arquanti i ga sofrio tanto e fin i ze stati copadi. La Bìblia la dise che anca ‘a tuti noantri pol suceder qualcossa rugna che no spetemo mia’. (Ecl. 9:11) Ma parché che Geovà el assa che arquanti dei so servi infronte perseghission e la morte? Par mostrar che Sàtana l’è un busier. (Giò 2:4-6; Mat. 23:34) Anca se Geovà no’l finisse con tuti i nostri problemi, podemo esser sicuri che lu mai el abandona quei che lo ama.h — Sal. 9:10.

GEOVÀ EL NE CONSOLA

15. Come che Geovà el ne consola par meso dela orassion, dela Bìblia e dele riunion? (2 Corinti 1:3, 4)

¹⁵ Ledi 2 Corinti 1:3, 4.i Sofrimo tanto quando ghemo massa pensieri o quando more una persona che amemo. Sito drio infrontar un bruto colpo cossita? Pol esser che te sì drio sentirte ti ti sol. Sarà che qualchedun pol capir quel che te senti? Te pol esser sicuro che Geovà el te capisse del tuto. Ma lu el fà ancora de pi che sol capir el to sofrimento, parché la Bìblia la dise che lu “el ne consola in tute le nostre tribolassion”. Come? Quando preghemo a Geovà e domandemo el so aiuto, lu el ne dà la so pace, “che la ze pi granda de quel che podemo capir”. (Fil. 4:6, 7) Anca ghemo consolo quando ledemo la Bìblia e capimo come Geovà el ne ama, ne insegna e ne dà speransa. E quando ndemo ale riunion, semo incoraiadi par meso de quel che imparemo dela Bìblia e del amor dei nostri cari fradei e sorele.

16. Cossa che te ghè imparà col esémpio de Natan e Priscilla?

¹⁶ Podemo capir come che Geovà el ne consola e el ne incoraia par meso dela Bìblia col esémpio de Natan e Priscilla, un casal dei Stati Unidi. Arquanti ani indrio, lori i ga dessidio ndar de star nte un posto ndove ghen’era bisogno de predicadori. Natan el ga dito: “Èrino sicuri che Geovà el ndaria benedir quel che èrino drio far.” Ma dopo che i ze rivadi, lori i ga scominsià a infrontar problemi de salute e coi soldi. Dopo de un tempo, lori i ga bio de tornar casa, ma i ga seità a tribolar coi soldi. Natan el ga dito: “Geovà no’l ga fato quel che mi pensea che el faria par giutarne. E mi me domandea se gavea fato qualcossa de sbalià.” Ma dopo de un tempo, lori i se ga nicorti che Geovà mai li gavea abandonà e che sempre el gavea dato quel che i gavea de bisogno. Lu el ga dito: “Quela època la ze stata pròpio fadiga, ma la Bìblia la ze stata come un bon amigo che me dea consili e me incoraiea. Alora, invesse de pensar nele dificoltà, ghemo scominsià a pensar de pi in come che Geovà l’era drio giutarne. Cossita, èrino sicuri che lu sempre el saria dela nostra banda par infrontar tute le dificoltà che vegnaria.”

17. Come che Helga la ga ricevesto consolo? (Varda anca la ilustrassion.)

¹⁷ Anca i nostri fradei e sorele i pol consolarne tanto. Varda quel che ga sucedesto con Helga, una sorela che la ze de star nela Hungria. Par tanti ani, ela la ga bio una mùcia de problemi che la ga fato sentirse ansiosa e sensa valor. Ma Helga la ze sicura che Geovà sempre el ga doperà i so fradei e sorele par consolarla. Ela la ga dito: “Dele volte, me sentia tanto straca, parché me tochea laorar, tender del me fiol malà e gavea tanti altri problemi. Quando ero straca cossita che Geovà el me giutea. Nei ùltimi 30 ani, Geovà el ga fato quel che el ga prometesto e el me ga consolà tuti i giorni. Lu el doperea i fradei e sorele par mostrarme bontà e amor. Lori sempre i me mandea un carton e messagi, o i me lodea quando ero pròpio desanimada.”

18. Come che podemo consolar i altri?

¹⁸ Podemo ndar drio el bel esémpio de Geovà quando consolemo i altri. Ma come che podemo farlo? Podemo scoltarli con passiensa, parlar con bontà e giutar in quel che ghe ocore. (Pro. 3:27) Noantri se sforsemo de giutar tuti quei che i ze drio sofrir, anca quei che no i serve mia a Geovà. Par esémpio, pol esser che un visin l’è malà, ansioso, o l’è morto qualchedun che el amea. Alora, podemo visitarlo, scoltarlo con atension e mostrar un testo dela Bìblia che pol consolarlo. L’è tanto bel far compagno a Geovà, “el Dio de tuto el consolo”. Cossita, podemo giutar i nostri fradei e sorele a perseverar e quei che ancora no i serve a Geovà a voler adorarlo. — Mat. 5:16.

GEOVÀ SEMPRE EL NDARÀ GIUTARNE

19. Cossa che Geovà el fà par noantri, e come che podemo imitarlo?

¹⁹ Geovà el se preocupa tanto con tuti i so servi, e lu mai el ndarà abandonarne quando ghemo dificoltà. Lu el ne tende con amor, compagno un caro pare el fà col so bambin. Geovà el ne insegna a far bone dessision, el ne dà quel che ne ocore, el ne protege e el ne consola. Quando imitemo a Geovà, podemo giutar e incoraiar quei che i ze drio sofrir. Savemo che ancora gavaremo dificoltà e problemi, ma semo sicuri che Geovà sempre el ndarà giutarne, parché lu el ga prometesto: “No stà gaver paura, parché mi son con ti.” (Isa. 41:10) Alora, sìpia sicuro che mai te sarè ti ti sol!