‘La batàlia la ze de Geovà’

Nel ano de 1999 el governo dela Frància el ga dito che Betel el gavaria de pagarghe imposti dei donativi che i gavea ricevesto de 1993 a 1996. Noantri ghemo proà domandar aiuto a altri tribunai dela Frància, ma no l’è ndato ben. Dopo che ghemo perso nte un dei tribunai, el governo el ga tolto de Betel de pi de 6,3 milioni de dòlari (de pi de 11 milioni de reai). Noantri saveino che la ùnica maniera de proar ciapar quei soldi indrio l’era domandar aiuto ala Corte dela Europa. Ma, prima de ndar al tribunal, la Corte la ne ga dito de riunirse coi advogadi del governo e anca con una autorità dela Corte par proar meterse intesi.

Noantri ghemo pensà che quela autorità dela Corte dela Europa ndaria dirne de pagar una parte de quel imposto al governo. Ma ghemo capio che, se féssino questo, ndarìssino desobedir i prinsipi dela Bìblia, parché i fradei e sorele i gavea dato quei soldi ala organisassion, e nò al governo. (Mat. 22:21) Ancora cossita, semo ndati a quela riunion coi advogadi del governo parché voleino mostrar rispeto ale règole dela Corte dela Europa .

Noantri semo ndati catarse coi advogadi del governo rento una bela sala nela Corte dela Europa. Suito, la dona che la era drio parlar in nome dela Corte dela Europa la ga dito che le Testimònie de Geovà le gavaria de pagar un per de imposti al governo dela Frància. Ma, col aiuto del spìrito santo, ghe ghemo suito domandà se la savea che el governo el ne gavea belche tolto de pi de 6,3 milioni de dòlari.

Quela dona la ze restada tanto disgustada e la ga domandà ai advogadi del governo se l’era vero. Quando i ga dito de sì, ela ghe ga dito su e la ga suito finio cola riunion. In quela ora, mi go capio che Geovà l’era drio cambiar tuto par farne vinser quel caso. Noantri semo restadi tanto contenti e no èrino gnanca boni de creder in quel che l’era drio suceder.

In 30 de giugno de 2011, la Corte dela Europa la ga dito che no gavarìssino de pagar quel imposto e che el governo el gavaria de darne indrio i soldi e anca con giuri. Questa dessision tanto importante la protege la organisassion fin ancoi nela Frància. Quela domanda che Geovà el ne ga giutà a far la ze stata come el sasso che el ga copà Golia. Noantri ghemo vinsesto parché, come Davi el ga dito a Golia, ‘la batàlia la ze de Geovà’. — 1 Sam. 17:45-47.

Ma noantri ghemo vinsesto tante altre volte nei tribunai. Anca se governi tanto poderosi e arquante religion ze vegnesti contra noantri, ghemo vinsesto 1.225 volte in 70 paesi e anca in tribunai internassionai. Par causa de queste vitòrie, de acordo cola lege semo una religion, podemo ndar ala predicassion, dessider no dar onor al nostro paese e ghemo la libertà de no acetar sangue.

Ma come che mi son ndato giutar nte un caso nela Corte dela Europa se ero nela sede mondial, nei Stati Unidi?

I ME GENITORI I ME GA DATO UN BEL ESÉMPIO

El me pare George e la me mare Lucille i ga fato la turma de nùmero 12 dela Scola de Gileade. In 1956, quando mi son nassesto, lori i era drio servir nela Etiòpia. Lori i ga scoliesto el me nome par causa de Filipe, el vangelisador del primo sècolo. (Ati 21:8) Nel ano dopo, el governo el ga proibio el laoro dele Testimònie de Geovà nela Etiòpia. Anca se ero pròpio pìcolo, me ricordo che ne tochea adorar a Geovà sconti. Come no capia ben quel che l’era drio suceder, me parea fin una diversion. Ma, in 1960, el governo dela Etiòpia ne ga mandà via del paese.

Noantri semo ndati de star nel Kansas, Stati Unidi. I me genitori i ga seità a amar la predicassion compagno quando i era missionari. Lori i se ga sempre sforsà de far el so meio a Geovà. Cossita, me pare e me mare i ga dato un bel esémpio a mi, a me sorela pi vècia, Judy, e a me fradel pi gióveno, Leslie. Noantri tre semo nassesti nela Etiòpia. Mi me go batesà con 13 ani. Tre ani dopo, semo ndati de star in Arequipa, nel Peru, par giutar nela predicassion.

In 1974, quando mi gavea 18 ani, el Betel del Peru el ga domandà che mi e altri 4 fradei ndessino servir come pionieri spessiai. Ghemo predicà su par le montagne dei Andi, ndove nissun ancora gavea parlà sora Geovà cole persone. Ghemo parlà sora Geovà a indi dele léngue quechua e aimarà e viaieino de un posto al’altro nte un trailer che ciameino de “La Arca”, parché el parea una granda cassa. Me piase tanto ricordar de quando doperea la Bìblia par mostrar a quele persone che Geovà el ndarà finir fora cole malatie, cola morte e col sofrimento. (Apo. 21:3, 4) Tante de quele persone le ga scominsià servir a Geovà.

SON NDATO SERVIR NELA SEDE MONDIAL

In 1977, el fradel Albert Schroeder, che l’era del Corpo Governante, l’è ndato visitar el Peru. Lu el me ga incoraià a far la petission par laorar nela sede mondial e go fato pròpio cossita. Un tempo dopo, in 17 de giugno de quel ano, mi go scominsià a laorar nel Betel de Brooklyn. Par quatro ani, mi go giutà nel departamento che neta e rangia su quel Betel.

In giugno de 1978, mi go cognossesto Elizabeth Avallone nte un congresso internassional in Nova Orleans, Louisiana. I so genitori i se sforsea tanto de far el so meio a Geovà compagno me pare e me mare. Elizabeth la servia come pioniera regolar fea quatro ani e la volea seitar a laorar par Geovà par tuta la so vita. Dopo cognosserse meio, se ghemo passionà. Mi e Elizabeth se ghemo maridadi in 20 de otobre de 1979, e la ze vegnesta servir in Betel insieme de mi.

Mi e Elizabeth ghemo servio nela congregassion spagnola del Brooklyn. Quei cari fradei e sorele i ne ga tratà sempre con amor. Noantri anca ghemo servio in altre tre congregassion ndove i fradei i ne ga sempre giutà a seitar a servir in Betel. Questi cari fradei, i nostri amighi e persone dela nostra fameia i ne ga giutà a tender dei nostri genitori quando i ze vegnesti veci. Noantri ghe demo tanto valor a tuto quel che i ne ga fato.

EL ME LAORO NEL DEPARTAMENTO GIURÌDICO

In genaro de 1982, mi son stà convidà par servir nel Departamento Giurìdico de Betel. Tre ani dopo, i fradei i me ga domandà de far la università par deventar advogado. Mi son restà maraveià de saver che le persone nei Stati Unidi e nei altri paesi le ze lìbere par far arquante robe par via dele vitòrie dele Testimònie de Geovà nei tribunai. Noantri discoreino tanto sora queste vitòrie nele aule nela università.

In 1986, quando mi gavea 30 ani, son stà convidà par esser superintendente del Departamento Giurìdico. Mi son restà tanto contento de veder che i fradei i se fidea in mi, anca se ero gióveno. Ma come no l’era un laoro fàcile de far e ghen’era tante robe che no savea mia, mi son restà preocupà.

In 1988, mi son deventà un advogado. Ma mi no me gavea nicorto come la università la gavea intrigà la me amicìssia con Geovà. Quando una persona la stùdia tanto cossita, pol esser che la scomìnsie a sentirse meio che i altri e a voler sempre de pi. Ma Elizabeth la me ga giutà tanto! Ela la me ga giutà a far la me amicìssia con Geovà forte nantra volta. Dopo un tempo, ero amigo de Geovà come prima. Mi go visto che gaver stùdio no l’è la roba pi importante nela vita. Invesse, noantri semo felici quando ghemo una bela amicìssia con Geovà e un grando amor par lu e par i fradei.

MI GO GIUTÀ A DIFENDER I LAORI DELA ORGANISASSION

Alora, dopo dela università, go scominsià a meterghela tuta par giutar el Departamento Giurìdico a dàrghene fora cole robe che ghe volea in Betel e a difender la organisassion de Geovà nei tribunai. No l’era fàcile far questo laoro parché tante robe càmbia de colpo nela organisassion. Ma me piasea tanto de farlo! Par esémpio, in quela època domandeino soldi ale persone par assar le publicassion. Ma, nel scomìnsio de 1991, i fradei i ga domandà che el Departamento Giurìdico giutesse la organisassion a fermarse de far questo. Dopo de quel lì, le Testimònie de Geovà le ga scominsià a assar le publicassion ale persone sensa domandarghe soldi. Cossita, el nostro laoro l’è restà pi sémplisse parché no ghe volea pi pagar imposti dele nostre publicassion. Tanti fradei i pensea che, par via de questo cambiamento, la organisassion no la gavaria pi soldi par seitar a far le publicassion e che manco persone le ndaria imparar la verità. Ma no l’è stà questo che ga sucedesto. De là in qua, ghen’è de pi del dópio de Testimònie de Geovà e adesso tute le persone le pol imparar dela Bìblia sensa pagar gnente. Mi go visto che sol semo boni de far cambiamenti quando ghemo el aiuto de Geovà e del schiavo fedele e prudente. — Éso. 15:2; Mat. 24:45.

Noantri no ghemo vinsesto nei tribunai sol parché ghemo boni advogadi. Tante volte, i giuisi e le autorità del governo i ne ga giutà parché i vede quel che femo. Par esémpio, in 1988, tre fradei del Corpo Governante e le so done i ze ndati a congressi internassionai in Cuba. La maniera che questi fradei i ga tratà a tuti ga giutà le autorità de questo paese a capir che no se metemo mia nela polìtica. Cossita, go visto che quando i fradei del Corpo Governante i ga tratà i altri con bontà e rispeto l’è stà tanto meio che quel che gaveino parlà prima nele riunion che gaveino bio con lori.

Tante volte, semo boni de dàrghene fora con un caso sensa ndar a un tribunal. Ma dele volte, ne toca ndar ai tribunai par difender la organisassion. (Fil. 1:7) Par esémpio, par tanti ani, le autorità dela Europa e dela Corea del Sud le volea obrigar che i fradei i ndesse al esèrsito. Par quela, intorno de 18 mila fradei nela Europa e 19 mila fradei nela Corea del Sud i ze ndati in preson parché no i ga volesto ndar al esèrsito.

Alora, la Corte dela Europa la ga giulgà el caso Bayatyan contra la Armenia, e in 7 de lùlio de 2011, la ga dessidio che tuti i paesi dela Europa i ga de assar che quei che no i vol ndar al esèrsito i possa far altri laori par el governo. In 28 de giugno de 2018, anca la Corte dela Corea del Sud la ga fato una dessision cossita. Noantri sol ghemo vinsesto in questi giulgamenti parché i nostri cari gióveni i ze stati boni de seitar leai a Geovà.

I departamenti giurìdichi de tuto el mondo i laora tanto par difender la nostra libertà de adorar a Geovà e predicar sora el Regno. Noantri restemo contenti de giutar i nostri cari fradei de altri paesi che i tribola par causa del governo. Ma no importa se noantri vinsemo o nò nte un tribunal, sempre semo boni de parlar de Geovà e dela Bìblia a governanti e ale autorità che le ze lì. (Mat. 10:18) Tante persone importante come i giuisi, persone del governo, persone che fà le notìssie e tanti altri i scolta i testi che doperemo nei tribunai. Cossita, lori i pol imparar chi che le ze le Testimònie de Geovà e in cossa che le crede. Arquanti fin i ga volesto scominsiar a servir a Geovà.

MI RINGRÀSSIO TANTO A GEOVÀ

Fà belche 40 ani che giuto a difender la organisassion in Betei de tuto el mondo. Son belche ndato a arquanti tribunai e me go belche catà con autorità tanto importanti. Me piase laorar insieme de cari fradei e sorele del Departamento Giurìdico dela Sede Mondial e dei Betei de tuto el mondo. Geovà el me ga benedio tanto e mi go una vita tanto bela.

Elizabeth sempre la me ga giutà tanto in questi 45 ani. Ghemo bio alegria e dificoltà. Anca se la ga una bruta malatia che la assa sensa forsa, ela la seita a incoraiarme. Mi posso dir che la me dona la ze pròpio brava.

Semo sicuri che no semo boni de vinser gnente noantri soli. Pensemo compagno a Davi che el ga dito che ‘Geovà l’è una forsa par i so servi’. (Sal. 28:8) Alora la ‘batàlia la ze de Geovà’.