Sito contento cole robe che te ghè?

1. Cossa che vol dir esser contenti cole robe che ghemo e cossa che questo no vol mia dir?

SITO contento cole robe che te ghè? Una persona contenta la dà valor a tuto quel che Geovà el ghe ga dato e cossita la ga alegria e pace. Ma esser contento con quel che ghemo no vol dir esser pacìfichi o mai moverse fora par far altre robe. Par esémpio, l’è tanto bon voler far de pi par Geovà. (Rom. 12:1; 1 Tim. 3:1) Ancora cossita, no restemo disgustadi se no ricevemo un laoro nela organisassion che volemo tanto.

2. Cossa che pol suceder se mai semo contenti cole robe che ghemo?

² Se mai semo contenti con quel che ghemo, podemo far brute dessision. Par esémpio, arquanti i laora di e note par ciapar soldi e comprar robe che no ghe ocore mia. Ghen’è fradei che i ga fin ciavà soldi e altre robe che i volea. Pol esser che lori i ga pensà: ‘Mi mèrito quel lì’, ‘Mi vui questo adesso’ o ‘Dopo mi pago indrio quel che go ciavà’. Ma ghemo de ricordarse che ciavar sempre disgusta tanto a Geovà. (Pro. 30:9) Altri fradei i ze restadi tanto disgustadi e i se ga fin fermà de servir a Geovà parché no i ga ricevesto un laoro nela organisassion che i volea tanto. (Gàl. 6:9) Ma come che un servo de Geovà el podaria far una bruta roba cossita? Lu el ga assà de darghe valor ale robe che el gavea.

3. Cossa che imparemo con quel che Paolo el ga scrito in Filipensi 4:11, 12?

³ El apòstolo Paolo el ga scrito che el gavea ‘imparà a esser contento in qualche situassion’. (Ledi Filipensi 4:11, 12.a) Lu l’era in preson quando el ga scrito la carta ai filipensi. Ma lu no’l gavea perso la alegria parché el gavea imparà ‘el segreto de esser contento’. Cossa che imparemo con quel che Paolo el ga scrito? Compagno a lu, tuti noantri podemo imparar a esser contenti con quel che ghemo. L’è vera che no l’è mia fàcile, ma podemo imparar a far cossita. In questo stùdio, ndaremo veder un per de robe che pol giutarne.

DAGHE VALOR A QUEL CHE TE GHÈ

4. Come che darghe valor a quel che ghemo ne giuta a esser contenti? (1 Tessalonissensi 5:18)

⁴ Una persona che la dà valor a quel che la ga la ze pi contenta. (Ledi 1 Tessalonissensi 5:18.b) Par esémpio, quando vedemo che ghemo tuto quel che ne ocore par viver, no restemo preocupadi con robe che volemo ma che no ghemo mia. E quando semo contenti coi laori che femo nela organisassion, no pensemo sol in altri laori che volarìssino ricever e femo el nostro meio. La Bìblia la dise che quando preghemo ghemo de ringrassiar a Geovà. Cossita, semo contenti e ghemo la “pace de Dio che la ze pi granda de quel che podemo capir”. — Fil. 4:6, 7.

5. Che bele robe Geovà el ga fato par i israeliti? (Varda anca la ilustrassion.)

⁵ Varda quel che ga sucedesto coi israeliti. Lori i ga sbrontolà diverse volte parché ghe manchea el magnar che i gavea nel Egito. (Nùm. 11:4-6) L’è vera che la vita nel deserto no la era mia fàcile, ma ancora cossita lori i podaria esser contenti. Come? I israeliti i podaria pensarghe sora quel che Geovà el gavea belche fato e l’era drio far par tenderli. Nel Egito, lori i era schiavi e i sofria tanto. Alora, Geovà el ga castigà i egipsi cole diese piaghe par libertar el so pòpolo. Quando i israeliti i ze ndati via del Egito, Geovà li ga giutadi a portar via tanto oro, argento e robe de meter su. (Éso. 12:35, 36) Dopo, quando i egipsi i ze ndati drio i israeliti, Geovà el ga verto el Mar Rosso par coparli e giutar el so pòpolo a scampar via. Intanto che i israeliti i era in meso al deserto, Geovà ghe ga dato el manà par magnar tuti i giorni. Ma, parché i israeliti i sbrontolea tanto? Parché no i era mai contenti con gnente. Alora, anca se Geovà ghe desse el magnar che i volea, lori no i ghe daria valor.

6. Cossa che pol giutarte a darghe valor a quel che te ghè?

⁶ Alora, cossa che pol giutarte a dar valor a quel che te ghè? Prima, sfòrsate de torte el tempo tuti i giorni par pensar sora bele robe che te ga sucedesto. Te pol anca scriver do due o tre de queste robe. (Lam. 3:22, 23) Seconda, ringràssia ai altri par quel che i te ga fato. E ricòrdate de ringrassiar a Geovà tuti i giorni. (Sal. 75:1) Tersa, scoli ben i to amighi. Se te ghè amighi che sempre i sbrontola, anca ti te ndarè sbrontolar. Invesse, se te ghè amicìssie con persone che sempre ringràssia par le robe bone che sucede, te ndarè drio el so esémpio. (Deu. 1:26-28; 2 Tim. 3:1, 2, 5) Se te te sforsi de ringrassiar par quel che te ghè de bon, no te ndarè sol pensar nele dificoltà gnanca in quel che no te ghè mia.

7. Cossa che ga giutà Aci a darghe valor a quel che la gavea?

⁷ Varda quel che ga sucedesto con Aci, una sorela che la ze de star nela Indonèsia. Ela la ga dito: “Nela pandemia del COVID-19, go scominsià a far comparassion intrà mi e i fradei e sorele. Alora, go perso la alegria.” (Gàl. 6:4) Ma cossa che la ga giutada a cambiar? Aci la ga dito: “Go scominsià a pensar nele benedission che Geovà el me dà tuti i giorni e come l’è bon far parte dela so organisassion. Alora, go scominsià a sempre ringrassiar a Geovà par le bele robe che mi gavea. Cossita, son restada pròpio contenta.” Se anca ti te ghè perso la alegria, te pol sforsarte de far compagno a Aci.

SÌPIA ÙMILE

8. Cossa che ga sucedesto con Baruche?

⁸ Baruche, el secretàrio del profeta Geremia, l’è restà disgustà cola so vita par un tempo. Lu el gavea de giutar Geremia a dir ai israeliti desobedienti cossa che ndaria suceder a lori. Ma, invesse de restar atento a quel che Geovà volea che el fesse, Baruche el ga scominsià a pensar massa sol in quel che lu el volea far. Par quela, Geovà ghe ga dito: “Te sì drio ndar in serca de grande robe. Férmate de ndar in serca de queste robe.” (Ger. 45:3-5) L’era come se Geovà el ghe gavesse dito: “Resta contento cole robe che te ghè.” Baruche el ga acetà el consìlio de Geovà e el ga seità a adorarlo.

9. De acordo con 1 Corinti 4:6, 7 come che esser ùmili pol giutarne? (Varda anca la ilustrassion.)

⁹ Dele volte, un servo de Geovà el resta disgustà quando un fradel o una sorela riceve un laoro nela organisassion che lu el volea. Parché? Pol esser che el pense cossita parché el ga tante abilità, l’è un bravo laorador e el serve a Geovà fà tanti ani. Alora, cossa che podaria giutarlo? Pensarghe sora quel che Paolo el ga scrito in 1 Corinti 4:6, 7. (Ledi.c) Ghemo de ricordarse che l’è stà Geovà che el ne ga dato tuti i laori e abilità che ghemo. E noantri no ghemo queste robe parché semo pi importanti che i altri. Invesse, Geovà l’è drio mostrar che el ne ama e che el ga tanta bontà. — Rom. 12:3, 6; Efe. 2:8, 9.

10. Cossa che pol giutarne a esser ùmili?

¹⁰ Una roba che pol giutarne a esser ùmili la ze pensarghe sora el bel esémpio de Gesù. Varda quel che ga sucedesto nela note che lu el ga lavà i pié dei so apòstoli. El apòstolo Gioani el ga scrito: ‘Gesù el savea che el Pare el ghe gavea dato autorità. El savea che l’era vegnesto de Dio e che el ndaria tornar a Dio. Par quela, el ga scominsià a lavar i pié dei dissìpoli.’ (Gio. 13:3-5) Ancora che el fusse el Fiol de Dio, Gesù no’l ga pensà che ghe tocaria ai so dissìpoli lavar i so pié gnanca che el meritea un bel posto de star, tanti soldi o una vita fàcile. (Luc. 9:58) Gesù el ga assà un bel esémpio par noantri parché lu l’era ùmile e l’era sempre contento con quel che el gavea. — Gio. 13:15.

11. Cossa che ga giutà Dennis a esser contento?

¹¹ Dennis, un fradel dela Holanda, l’è drio proar esser ùmile compagno a Gesù. Ma questo, no l’è mia fàcile. Lu el ga dito: “Dele volte, quando una persona la riceve un laoro nela organisassion che mi volea, mi resto disgustà e vedo che me vien fora el orgòlio. Quando questo sucede, mi stùdio nantra volta sora la umiltà. Nel aplicativo JW Library^®, go marcà arquanti testi che i parla sora la umiltà. Cossita, l’è pi fàcile catarli e lederli nantra volta. Anca go nel me telèfono arquanti discorsi che i parla sora la umiltà e proo vederli sempre.”d Cossa che Dennis el ga imparà? Lu el ga dito: “Go capio che tuti i laori che fao i ga de dar glòria a Geovà e nò a mi stesso. Tuti noantri femo tante robe par Geovà, ma l’è sempre lu che li fà ndar ben.” Se te scominsi a restar disgustà parché no te ghè un laoro nela organisassion che te volei, sfòrsate de esser ùmile. Cossita, la to amicìssia con Geovà la restarà pi forte e ti te restarè pi contento. — Tia. 4:6, 8.

PENSA SORA LE PROMESSE DE GEOVÀ

12. Che promesse par el futuro ne giuta a restar contenti? (Isaia 65:21-25)

¹² Saremo pi contenti se pensemo nele bele promesse de Geovà par el futuro. Nel libro de Isaia, Geovà el dise che el capisse le nostre dificoltà e el ne promete che el ndarà finir fora con tuti i nostri problemi nel futuro. (Ledi Isaia 65:21-25.e) Come che sarà la nostra vita? Tuti noantri gavaremo un bel posto de star, un laoro che ne assa contenti e sol gavaremo robe bone de magnar. Mai gavaremo paura che suceda robe brute con noantri o coi nostri fioi. (Isa. 32:17, 18; Eze. 34:25) El nostro futuro el sarà tanto bel e semo sicuri che Geovà el ndarà far tuto quel che el ga prometesto.

13. Come che la bela speransa che ghemo par el futuro pol giutarne?

¹³ Ancoi, l’è ancora pi importante pensarghe sora le promesse de Geovà par el futuro. Parché? Parché semo drio viver nei “ùltimi giorni” e tuti i ga tante dificoltà. (2 Tim. 3:1) Tuti i giorni, Geovà el ne giuta a dàrghene fora coi nostri problemi e el ne dà forsa par perseverar. (Sal. 145:14) Ma la nostra speransa la pol anca giutarne a ndar avanti quando semo drio infrontar bruti colpi. Par esémpio, fursi te triboli par dar ala to fameia quel che ghe ocore. Ma no stà mia pensar che sarà sempre cossita. Ricòrdate che Geovà el ga prometesto che te gavarè tuto quel che te ocore e ancora de pi in Paradiso. (Sal. 9:18; 72:12-14) Pol esser che te sì drio sofrir tuti i giorni par causa de una bruta malatia o dela depression. Ma questo no sarà mia par sempre parché Geovà el ndarà finir fora con tute le malatie e anca cola morte. (Apo. 21:3, 4) Alora, anca se te sì drio sofrir parché l’è morto qualchedun che te amei, parché una persona te ga tratà mal o parché te ghè una malatia fà tanto tempo, te pol restar contento adesso! Parché? Parché l’è sicuro che no importa le dificoltà che te ghè ancoi, queste tribolassion le ‘durarà par poco tempo’. Invesse, le bele robe che ndarà suceder in Paradiso le sarà “par sempre”! — 2 Cor. 4:17, 18.

14. Cossa che podemo far par fidarse ancora de pi nele promesse de Geovà?

¹⁴ Cossa che podemo far par fidarse ancora de pi nele promesse de Geovà? Proa pensar nte una persona che no la ghe vede ben. Ela la dopera ociai par vardar ben quel che l’è distante. Pensarghe sora le promesse de Geovà l’è compagno a doperar questi ociai, parché le ne giuta a veder come sarà la nostra vita in Paradiso. Par esémpio, se te ghè pensieri par causa dei to dèbiti, proa ricordarte che nel futuro no ghen sarà pi dèbiti, soldi e che nissun pi sarà poareto. Se te resti ansioso parché no te ghè mia ricevesto un laoro nela organisassion che te volei tanto, proa ricordarte che in Paradiso no ghen sarà pi preocupassion cossita, che te sarè perfeto e che te ndarè viver par sempre. (1 Tim. 6:19) Par via dei nostri pensieri, pol esser fadiga pensar come la nostra vita in Paradiso la sarà bela. Ma quanto de pi pensemo sora le promesse de Geovà, pi sicuri saremo che le ndarà suceder.

15. Cossa che te ghè imparà col esémpio de Christa?

¹⁵ Varda come la speransa la giuta Christa, la dona de Dennis, che ghemo belche parlà. Ela la ga dito: “Mi go una malatia che fà i me musculi restar cada volta pi fiachi e me fà mal tuti i giorni. Go bisogno de una carega de rode e resto in leto quasi tuto el giorno. Poco tempo indrio, un dotor me ga dito che la me situassion la ze bruta e che no restarò meio. Ma la prima roba che go pensà la ze stata: ‘Lu no’l sa dela me speransa!’ Mi go pace parché sò quel che ndarà suceder nel futuro. Son bona de dàrghene fora cole me dificoltà ancoi parché sò come la me vita la sarà bela in Paradiso.”

“NO GHE MANCARÀ GNENTE DE BON A QUEI CHE I SE FIDA IN GEOVÀ”

16. Parché che el rè Davi el ga dito che ‘no ghe manca gnente de bon a quei che i se fida in Geovà’?

¹⁶ Anca se adoremo a Geovà e semo contenti, seitaremo a infrontar dificoltà. Pensa, par esémpio, in quel che ga sucedesto col rè Davi. Arquanti i ga dito busie sora lu, un per de amighi i lo ga tradio, un rè el ga proà coparlo par tanti ani e al manco tre dei so fioi i ze stati morti. Ma ancora con queste dificoltà, Davi l’era contento. Lu el ga dito: “No ghe mancarà gnente de bon a quei che i se fida in Geovà.” (Sal. 34:9, 10) Ma parché che lu el ga dito questo? Parché lu el savea che Geovà no’l protege i so servi de tute le dificoltà che pol suceder, ma che lu sempre el ndarà giutarli. (Sal. 145:16) Podemo esser sicuri che Geovà el ndarà giutar anca noantri a dàrghene fora con tute le nostre dificoltà. Semo sicuri che podemo esser felici e gaver pace!

17. Cossa che ndarà suceder se te sì contento con quel che te ghè?

¹⁷ Geovà el vol che te sìpia felice. (Sal. 131:1, 2) Alora, sfòrsate de dar valor a tuto quel che te ghè, esser ùmile e fidarse ancora de pi nela bela promessa che te ghè par el futuro. Cossita, anca ti te podarè dir: ‘Si, mi son contento!’ — Sal. 16:5, 6.