Geovà el ne giuta a perseverar

1. Parché che dele volte no l’è mia fàcile seitar fedeli a Geovà, ma cossa che pol giutarne? (1 Piero 5:10)

TUTI noantri ghemo tanti problemi, e dele volte, no l’è mia fàcile ndar avanti. Arquanti dei nostri fradei i ze drio infrontar una bruta malatia fà tanto tempo, altri i ze drio tribolar parché l’è morto qualchedun che i amea e ghen’è de quei che i sofre parché la so fameia o el governo ghe vien contra. (Mat. 10:18, 36, 37) Ma no importa la dificoltà che ti te sì drio infrontar, sìpia sicuro che Geovà el pol giutarte a perseverar. — Ledi 1 Piero 5:10.a

2. Cossa che ne giuta a perseverar?

² Cossa vol dir perseveransa? Vol dir seitar a esser leai e a servir a Geovà con alegria anca quando ghemo dificoltà, infrontemo perseghission o ghemo de darghene fora con voie sbaliade. Ma no semo mia boni de perseverar noantri soli. Invesse, l’è Geovà che el ne dà “el poder che l’è pi grando del normal”. (2 Cor. 4:7) In questo stùdio, ndaremo veder quatro robe che Geovà el ne ga dato par giutarne a seitar fedeli e come che podemo doperarle dela meio maniera.

ORASSION

3. Parché che podemo dir che la orassion la ze un miràcolo?

³ Anca se noantri semo imperfeti, Geovà el scolta quel che parlemo a lu. (Ebr. 4:16) La orassion la ze un miràcolo de Geovà che ne giuta a seitar fedeli. Proa pensar: Te pol pregar a Geovà nela ora che te vol e parlar tuto quel che te ocore. Te pol pregar in qualche léngua e in qualche posto, anca se te sì distante de tuto o fin in preson. (Giona 2:1, 2; Ati 16:25, 26) E anca quando te sì ansioso o no te sì bon de doperar le parole giuste, Geovà el te capisse. (Rom. 8:26, 27) Semo sicuri che la orassion la ze un miràcolo de Geovà!

4. Parché che semo sicuri che Geovà el ndarà giutarne a gaver perseveransa?

⁴ La Bìblia la dise che ‘no importa cossa che domandemo a Geovà, de acordo cola so volontà, lu ne scolta’. (1 Gio. 5:14) Ma sarà che lu el vol giutarne a gaver perseveransa? Sicuro che si! Geovà el vol giutarne a seitar leai par mostrar che Sàtana l’è sbalià. (Pro. 27:11) E la Bìblia anca la dise che Geovà el vol “mostrar la so forsa a quei che i lo serve de tuto el cuor”. (2 Cró. 16:9) Alora, semo sicuri che Geovà el vol e el pol giutarne a seitar leai. — Isa. 30:18; 41:10; Luc. 11:13.

5. Come che pregar a Geovà pol giutarne a gaver pace? (Isaia 26:3)

⁵ La Bìblia la dise che, quando preghemo a Geovà e parlemo dei nostri pensieri, lu el ne dà la so pace ‘che la ze pi granda de quel che podemo capir e che la protege el nostro cuor e la nostra mente’. (Fil. 4:7) Sicuro che ghe demo tanto valor a questa pace. Tanti che no i serve a Geovà i se sforsa de restar calmi quando i ga dificoltà. Par esémpio, arquanti i fà meditassion par assar la testa voda e no pensar gnente. Ma far una roba cossita no l’è mia bon, parché quando una persona no la ze bona de controlar i so pensamenti, i demoni i pol farla pensar quel che lori i vol. (Varda anca Mateo 12:43-45.) E anca se questa persona la resta pi calma, ela no la ga la pace de Geovà, che la ze tanto meio. Ma quando se fidemo del tuto in Geovà e preghemo par domandar el so aiuto, lu el ne dà pace. (Ledi Isaia 26:3.b) Una roba che lu el fà par darne pace la ze giutarne a ricordarse de bei testi dela Bìblia. Questi testi i mostra che lu el ne ama e che el vol giutarne. Cossita, restemo pi tranquili. — Sal. 62:1, 2.

6. Cossa che te pol dir nele to orassion? (Varda anca el ritrato.)

⁶ Cossa che te pol far? Quando te ghè una dificoltà, prega a Geovà, ‘buta sora lu la to carga’ e domanda la so pace. (Sal. 55:22) Te pol domandarghe che el te giute a far le meio dessision par darghene fora con quela dificoltà. (Pro. 2:10, 11) E no stà desmentegarte de anca ringrassiar a Geovà. (Fil. 4:6) Proa star atento par capir come Geovà l’è drio giutarte tuti i giorni e ringràssia par tute le bele robe che lu l’è drio far par ti. No stà mai assar che le dificoltà le te intrighe de veder tute le benedission che te ghè belche ricevesto. — Sal. 16:5, 6.

LA BÌBLIA

7. Come che studiar la Bìblia ne giuta gaver perseveransa?

⁷ Geovà el ne ga dato la Bìblia par giutarne a gaver perseveransa. Nela Bìblia, ghen’è tanti testi che i mostra che lu el ndarà giutarne. Par esémpio, Mateo 6:8 dise: “El vostro Pare el sa dele robe che valtri gavé de bisogno vanti de domandarghe.” L’è stà Gesù che el ga dito queste parole, e lu el cognosse a Geovà de pi che qualche altra persona. Par quela, podemo esser sicuri che Geovà el sa de quel che ghemo de bisogno e el ndarà giutarne sempre che semo drio infrontar una dificoltà. Ghen’è ancora altri testi nela Bìblia che i mostra che Geovà sempre el ndarà darne forsa e giutarne. — Sal. 94:19.

8. (a) Cossa che la Bìblia la dise che pol giutarne a perseverar? (b) Cossa che pol giutarne a ricordarse dei consili dela Bìblia?

⁸ La Bìblia la ga bei consili che ne giuta a far bone dessision e a seitar leai quando infrontemo dificoltà. (Pro. 2:6, 7) Par esémpio, la Bìblia la dise che no ghemo de restar ansiosi con quel che sucederà doman. Invesse, l’è meio preocuparse col giorno de ancoi e fidarse in Geovà. (Mat. 6:34) Se ledemo la Bìblia tuti giorni e pensemo sora quel che ledemo, sarà pi fàcile ricordarse dei consili dela Bìblia quando ne ocore far una dessision o quando ghemo una dificoltà.

9. Come che leder sora bravi servi de Geovà del passà pol giutarne?

⁹ La Bìblia anca la parla de tanti servi de Geovà che i se ga fidà in lu e i ga bio el so aiuto. (Ebr. 11:32-34; Tia. 5:17) Quando pensemo sora quel che ga sucedesto con queste persone, semo ancora pi sicuri che Geovà “l’è la nostra protession e la nostra forsa” e che sempre “podemo ricever el so aiuto in tempi de dificoltà”. (Sal. 46:1) Quando imparemo sora questi bravi servi de Geovà, semo incoraiadi a ndar drio al so bel esémpio. — Tia. 5:10, 11.

10. Come che la Bìblia pol giutarte a gaver perseveransa?

¹⁰ Cossa che te pol far? Ledi la Bìblia tuti giorni e scrivi do testi che i pol giutarte. Arquanti ghe piase leder el testo del giorno de matina bonora. Cossita, lori i seita a pensarghe in quel testo tuto el giorno. Una sorela de nome Mariac la fà pròpio cossita e la ga ricevesto el aiuto che ghe ocorea quando la ga savesto che so pare e so mare i gavea càncaro. Ma cossa che la ga giutada a ndar avanti nei ùltimi mesi de vita dei so genitori? Maria la ga dito: “Tute le matine, mi ledea el Testo del giorno e pensea sora quel che mi podea imparar. Questo me ga giutà a pensar in Geovà e nele bele robe che lu el ne insegna invesse de seitar a pensar sol nele me dificoltà.” — Sal. 61:2.

CARI FRADEI E SORELE

11. Come che el esémpio dei nostri fradei ne giuta a perseverar?

¹¹ Geovà el ne ga dato cari fradei e sorele par giutarne a perseverar. Saver che tuta la nostra fameia de fradei nel mondo la ze drio passar par i medèsimi sofrimenti ne giuta a ricordar che no semo mia noantri soli. (1 Pie. 5:9) Savemo che tanti de lori i ga bio i medèsimi problemi che noantri e che i ze stati boni de seitar leai. Cossita, capimo che anca noantri podemo perseverar! — Ati 14:22.

12. Come che i fradei i pol giutarne, e cossa che noantri podemo far? (2 Corinti 1:3, 4)

¹² Nostri fradei e sorele i pol incoraiarne tanto. Questo ga sucedesto nel passà col apòstolo Paolo. Nele so carte, lu el ga parlà el nome de arquanti fradei e ghe ga ringrassià par el aiuto che i ghe ga dato intanto che l’era preso. Questi fradei e sorele i gavea consolà Paolo e anca i gavea portà quel che el gavea de bisogno. (Fil. 2:25, 29, 30; Col. 4:10, 11) La medèsima roba pol suceder ancoi. Nostri fradei i pol consolarne e giutarne a darghene fora cole dificoltà. Ma anca noantri podemo giutarli quando i ga de bisogno. — Ledi 2 Corinti 1:3, 4.d

13. Cossa che ga giutà Maya?

¹³ I nostri fradei i ga incoraià tanto la nostra sorela de nome Maya, dela Rùssia. In 2020, la polìssia la ze ndata rento la so casa in serca de qualcossa de sbalià. Dopo, ghe ga tocà ndar al tribunal parché la parlea dela so fede ai altri. Maya la ga dito: “Par un tempo, mi son restada tanto disgustada, ansiosa e sentia che no gavea pi forsa par ndar avanti. Alora, i fradei i me ciamea par telèfono, scrivea carte e i mostrea che i me volea tanto ben. Mi belche savea che semo una fameia e che ghemo tanto amor intrà de noantri. Ma dopo che i me fradei i me ga giutà, son sicura che semo una fameia che se ama tanto.”

14. Come che i nostri fradei e sorele i pol giutarne a perseverar? (Varda anca el ritrato.)

¹⁴ Cossa che te pol far? Resta insieme dei to fradei e sorele quando te ghè dificoltà. No stà tirarte indrio de domandar aiuto ai ansiani. Se te ocore, lori i pol esser “una protession contra el vento, come un posto par protegerse dela tempesta”. (Isa. 32:2) Ricòrdate che anca i to fradei e sorele i ga le so dificoltà. Alora, quando te proi giutarli in quel che ghe ocore, te gavarè alegria, e questa alegria la ndarà giutarte a seitar leal. — Ati 20:35.

LA NOSTRA SPERANSA

15. Come la speransa la ga giutà a Gesù e come la pol giutar anca a noantri? (Ebrei 12:2)

¹⁵ Geovà el ga dato speransa ai so servi. Cossita, lori i ze boni de seitar leai. (Rom. 15:13) Par esémpio, la speransa la ga giutà Gesù a darghene fora col pedo giorno dela so vita qua nela Tera. (Ledi Ebrei 12:2.e) Lu el savea che se el seitesse leal, lu el ndaria mostrar che Sàtana l’è un busier e che Geovà el mèrita esser adorà. Gesù anca l’era premoso de star insieme al so Pare nantra volta e esser Rè del Regno de Dio insieme ai so 144 mila fradei. Dela stessa maniera, no importa che dificoltà che infrontemo ancoi, la nostra speransa la ne dà forsa par perseverar.

16. Come che la speransa la ga giutà Alla, e cossa che te ghè impara de quel che la ga dito?

¹⁶ Varda come la speransa la ga giutà Alla, una sorela dela Rùssia. El so omo l’è stà metesto in preson intanto che el spetea el giorno par esser giulgà nte un tribunal. Alla la ga dito: “Parlar con Geovà sora la speransa che lu el me ga dato e pensarghe sora quel che ndarà suceder nel futuro me ga giutà a no restar massa desanimada. Son sicura che dopo de queste dificoltà, ghen sarà tante bele robe. Geovà el ndarà finir fora coi so nemighi e el ndarà benedirne tanto.”

17. Come che podemo mostrar che ghe demo valor ala speransa che Geovà el ne ga dato? (Varda anca el ritrato.)

¹⁷ Cossa che te pol far? Sfòrsate de torte el tempo par pensar sora la bela speransa che Geovà el ne ga dato. Proa pensar come che sarà la to vita in Paradiso e nele bele robe che ndarà suceder. Cossita, te sarè sicuro che tute le dificoltà ‘le durarà par poco tempo e le ze pìcole’. (2 Cor. 4:17) Sfòrsate anca de parlar ai altri sora la bela speransa che te ghè. Proa capir come l’è fadiga par le persone darghene fora cole so dificoltà sensa cognosser le bele promesse de Geovà par el futuro. Fursi te ocore discorer sol un pochetin con lore par darghe voia de cognosser ancora de pi a Geovà e le so bele promesse.

18. Parché che podemo fidarse nele promesse de Geovà?

¹⁸ Dopo che Giò l’è stà bon de darghene fora con tante dificoltà, lu el ga dito a Geovà: “Adesso sò che te sì bon de far tute le robe e no ghen’è gnente de quel che te pensi che no te pol far.” (Giò 42:2) Giò el gavea imparà che gnente pol intrigar Geovà de far quel che lu el vol. Quando se ricordemo che Geovà sempre el fà quel che el promete e che el ne giuta a darghene fora cole nostre dificoltà, ghemo forsa par seitar leai a lu. Par capir meio, proa pensar nte una dona che la ga una bruta malatia fà tanto tempo. Pol esser che ela la ze tanto desanimada dopo che gnanca un dotor l’è stà bon de giutarla. Ma ela la cata un dotor che la se fida e lu el ghe spiega parché la ga quela malatia e come el ndarà curarla. Anca se la sa che ghe meterà un tempo par esser curada, suito la se sente tanto felice. Ela la sarà bona de darghene fora con quela malatia contenta, parché la sa che la restarà meio. Dela stessa maniera, esser sicuri che gavaremo una bela vita in Paradiso ne giuta a perseverar.

19. Cossa ghemo de far par gaver perseveransa?

¹⁹ Come ghemo visto, Geovà el ne ga dato la orassion, la Bìblia, i nostri cari fradei e sorele e una bela speransa par giutarne a perseverar. Se femo el nostro meio par doperar quel che Geovà el ne ga dato, lu el ndarà giutarne anca se semo drio infrontar bruti colpi. Cossita, intanto che spetemo el giorno che Sàtana e questo bruto mondo i sarà finidi fora, saremo boni de seitar perseverar. — Fil. 4:13.