Te pol esser sicuro che Geovà el te ga perdonà!

1-2. Come che se sentimo de saver che Geovà el ne ga perdonà? (Varda anca la ilustrassion.)

EL RÈ Davi el savea come l’era sentirse in colpa par causa dei bruti sbali che el gavea fato. (Sal. 40:12; 51:3, informassion nel scomìnsio del salmo) Ma lu el se ga ciamà gramo, el ga cambià e Geovà lo ga perdonà. (2 Sam. 12:13) Alora, Davi el savea come l’era bon sentir el perdon de Geovà. — Sal. 32:1.

² Compagno a Davi, anca noantri restemo tanto contenti quando Geovà el ne mostra misericòrdia e el perdona i nostri pecati. Savemo che Geovà sempre el ndarà perdonar quei che i se ciama grami, che i prega par lu par domandar scusa, che i parla coi ansiani e che i se sforsa del tuto par mai tornar a far quel pecato. Lu el vol perdonarne, anca se ghemo fato pecati pròpio bruti. (Pro. 28:13; Ati 26:20; 1 Gio. 1:9) E l’è tanto bon saver che, quando Geovà el ne perdona, l’è come se lu gnanca el se ricordesse del sbàlio che ghemo fato! — Eze. 33:16.

3-4. (a) Cossa che una sorela la ga sentio dopo che la ze stata batesada? (b) Cossa che ndaremo imparar in questo stùdio?

³ Ma fursi, te fà fadiga creder che Geovà el te ga perdonà. Varda quel che ga sucedesto con Jennifer. I so genitori ghe ga insegna sora Geovà, ma quando la ze vegnesta pi granda, la ga scominsià a far robe brute de scondon. Dopo un per de ani, la ga cambià la so maniera de viver, la se ga dedicà e batesà. Varda cossa che la ga dito: “Nel passà, mi fea imoralità sessual, bevea tanto, ero una persona cativa e sol ndea drio i soldi. Mi savea che la Bìblia la dise che Geovà el dopera el sacrifìssio de Gesù par perdonarne. E anca se mi me gavea belche ciamà grama e gavea domandà che Geovà el me perdonesse, no ero sicura che lu el me gavea perdonà.”

⁴ Anca a ti te fà fadiga esser sicuro che Geovà el te ga pròpio perdonà? Ricòrdate che Davi el ga sentio la misericòrdia de Geovà e l’è stà perdonà dei so sbali. Geovà el vol che anca ti te te senti cossita. In questo stùdio, ndaremo veder parché che ghemo de esser sicuri che Geovà el ne perdona e cossa che pol giutarne.

PARCHÉ CHE GHEMO DE ESSER SICURI CHE GEOVÀ EL NE PERDONA?

5. Cossa che Sàtana el vol che pensemo? Parla de un esémpio.

⁵ Se semo sicuri che Geovà el ne ama e el ne perdona, no ndaremo mia creder nela busia de Sàtana. Ricòrdate che Sàtana el fà tuto quel che el pol par intrigarne de servir a Geovà. Par esémpio, lu el proa farne pensar che Geovà mai el ndarà perdonar i nostri sbali. Varda quel che ga sucedesto con un omo de Corinto che el gavea fato imoralità sessual e l’era stà cavà via dela congregassion. (1 Cor. 5:1, 5, 13) Lu el se ga ciamà gramo, ma Sàtana no’l volea che i fradei dela congregassion lo perdonesse e lo acetesse nantra volta. Sàtana el volea che quel omo el pensesse che gnanca Geovà lo gavea perdonà. Cossita, lu saria “vinsesto par la so tristessa” e no’l ndaria pi servir a Geovà. Ancoi, Sàtana el seita a far la stessa roba. Ma noantri, “cognossemo le so intension”. — 2 Cor. 2:5-11.

6. Cossa che pol giutarne se seitemo a sentirse in colpa?

⁶ Se semo sicuri che Geovà el ne ga perdonà, no se sentiremo pi in colpa par i nostri sbali e gavaremo alegria nantra volta. Quasi tuti noantri se sentimo in colpa quando femo un sbàlio. (Sal. 51:17) Questo l’è tanto bon parché gavaremo anca la voia de cambiar e far quel che l’è giusto. (2 Cor. 7:10, 11) Ma, se noantri seitemo a sentirse in colpa dopo che se ghemo ciamà grami e che ghemo cambià, podemo restar massa desanimadi e fin fermarse de adorar a Geovà. Invesse, quando semo sicuri che Geovà el ne ga perdonà, no seitemo a sentirse in colpa e podemo adorarlo nantra volta cola cossiensa tranquila e con tanta alegria. (Col. 1:10, 11; 2 Tim. 1:3) Ma cossa che podemo far par esser sicuri che Geovà el ne ga perdonà del tuto?

COSSA POL GIUTARNE A ESSER SICURI CHE GEOVÀ EL NE PERDONA DEL TUTO?

7-8. (a) De acordo con Ésodo 34:6, 7, cossa che Geovà el ga dito a Moisè sora lu stesso? (b) De cossa che podemo esser sicuri?

⁷ Pensa sora quel che Geovà el ga parlà de lu stesso. Varda par esémpio le so parole a Moisè nel Monte Sinai.a (Ledi Ésodo 34:6, 7.b) Anca se Geovà el ga tante bele qualità, lu el ga scoliesto dir a Moisè che lu “el ga misericòrdia e compassion”. Sarà che un Dio cossita no’l ndaria perdonar una persona che la ga fato un sbàlio, ma che la se ga ciamà grama? Sicuro de si! Se Geovà no la perdonesse, lu el saria tanto rugno. E savemo che Geovà no l’è un Dio cossita.

⁸ Geovà l’è el Dio dela verità. (Sal. 31:5) Par quela, podemo fidarse quando lu el dise che l’è misericordioso. Ma se te seiti a sentirte in colpa par causa de un sbàlio che te ghè fato nel passà, domandate: ‘Son pròpio sicuro che Geovà l’è un Dio de misericòrdia e compassion e che el perdona a tuti quei che i se ciama grami?’ Alora, sìpia sicuro che Geovà el ga perdonà anca ti.

9. Cossa che vol dir esser perdonadi? (Salmo 32:5)

⁹ Pensa sora quel che la Bìblia la dise sora el perdon de Geovà. Par esémpio, ledemo quel che Davi el ga scrito sora questo perdon. (Ledi Salmo 32:5.c) Davi el ga dito: “Ti te ghè perdonà el me sbàlio e i me pecati.” La parola ebraica par “perdon” anca la vol dir “cavar via” o “portar via”. Alora, quando Geovà el ga perdonà Davi, l’è stà come se el gavesse cavà via i so pecati e li gavesse portadi via. Sicuro che Davi el ga sentio tanta alegria quando el ga capio che Geovà lo gavea perdonà del tuto. (Sal. 32:2-4) La medèsima roba pol suceder con noantri. Quando se ciamemo grami dei nostri pecati, no ne ocore seitar a portar la colpa parché Geovà li ga ciapadi e portadi via distante de noantri.

10-11. Cossa che imparemo sora Geovà quando ledemo che lu l’è “pronto par perdonar”? (Salmo 86:5)

¹⁰ Ledi Salmo 86:5.d In questo testo, Davi el dise che Geovà l’è “sempre pronto par perdonar”. Questo vol dir che Geovà no’l resta suito cativo quando femo un sbàlio. Invesse, lu l’è sempre pronto par perdonar quei che i se ciama grami. Parché? La seconda parte del testo dise: “Ti te dimostri tanto amor leal par tuti quei che i te invoca.” Nel ùltimo stùdio, ghemo imparà che, par causa del amor leal, Geovà el ama a tuti quei che i lo serve e mai el ndarà abandonarli. E l’è par causa de questo amor leal che lu el perdona del tuto quei che i se ciama grami. (Isa. 55:7) Se no te sì mia sicuro del perdon de Geovà, domandate: ‘Mi credo pròpio che Geovà l’è sempre pronto par perdonar tuti quei che i se ciama grami e che i ghe domanda perdon?’ Alora, se te capissi che Geovà el perdona tuti quei che i se ciama grami e che i ghe domanda perdon, te pol esser sicuro che el te ga perdonà anca a ti.

¹¹ La Bìblia la dise che Geovà el sa come semo stati creadi e che semo imperfeti. (Sal. 139:1, 2) L’è tanto bon saver che Geovà el ne capisse. Adesso, ndemo veder nantro salmo che Davi el ga scrito e come el pol giutarne a esser sicuri che Geovà el vol perdonarne.

COSSA CHE GEOVÀ EL SE RICORDA SORA NOANTRI?

12-13. De acordo col Salmo 103:14, cossa che Geovà el se ricorda sora noantri, e cossa che lu el fà?

¹² Ledi Salmo 103:14.e Davi el ga dito che Geovà “el se ricorda che semo polver”. Alora, Geovà el sa pròpio ben che semo imperfeti. Questo l’è un dei motivi che Geovà l’è pronto par perdonar i so servi che i se ciama grami. Adesso, ndemo capir ancora de pi sora quel che Davi el ga scrito.

¹³ Davi el ga dito che Geovà “el cognosse ben come semo stati fati”. Lu el ga fato Adon del ‘polver dela tera’ e el savea ben de tuto quel che ghe ocorea. Par esémpio, anca quando Adon l’era perfeto, lu el gavea bisogno de magnar, de dormir e de tirar el fià. (Gén. 2:7) Ma dopo del pecato de Adon e Eva, esser polver anca vol dir esser imperfeti e gaver de sforsarse tanto par far quel che l’è giusto. Par quela che Davi el ga dito che Geovà sempre el “se ricorda” che no l’è fàcile par noantri far quel che l’è giusto. Alora, Geovà el sa che ndaremo sbaliar, ma lu l’è sempre pronto par mostrar misericòrdia e perdonarne quando se ciamemo grami. — Sal. 78:38, 39.

14. (a) Cossa che Davi el ga dito che ne giuta a capir ancora meio el perdon de Geovà? (Salmo 103:12) (b) Cossa che podemo imparar de come Geovà el ga perdonà Davi? (Varda anca el quadro “Come che Geovà el perdona e el se desméntega?”.)

¹⁴ Cossa che pol giutarne a capir ancora meio el perdon de Geovà? (Ledi Salmo 103:12.f) Davi el ga dito che Geovà “el mete i nostri sbali tanto distante de noantri, cossita come el leste l’è distante del oeste”. Come cossita? El leste l’è sempre nte una banda del mondo e el oeste l’è sempre de quel’altra banda. No ghen’è mia come esser darente del leste e del oeste al medèsimo tempo. Cossa che questo ne insegna sora el perdon de Geovà? Un libro che parla sora la Bìblia el spiega che, dopo che Dio el ne perdona, el nostro pecato l’è compagno un odor che va via e no lo sentimo pi. Alora, podemo esser sicuri che Geovà mai pi el ndarà pensarse o ricordarse de un sbàlio che el ga belche perdonà. Quando Geovà el perdona, gnente pol farlo ricordarse de quel che ga sucedesto e lu gnanca el ndarà castigarne par causa de quel che ghemo fato. — Eze. 18:21, 22; Ati 3:19.

15. Cossa che podemo far se seitemo a sentirse in colpa par causa dei sbali che ghemo fato nel passà?

¹⁵ Come quel che Davi el ga scrito nel Salmo 103 ne giuta a esser sicuri che Geovà el ne perdona del tuto? Se te seiti a sentirte in colpa par causa dei pecati che te ghè fato nel passà, domandate: ‘Sarà che son drio desmentegarme che Geovà el sa che son imperfeto e che el perdona quei che i se ga ciamà grami come mi? Sarà che seito a pensar nei me pecati che Geovà el se ga belche desmentegà?’ Se Geovà no’l seita a ricordarse de quel che ghemo fato nel passà, gnanca noantri ghemo de farlo. (Sal. 130:3) Quando semo sicuri del perdon de Geovà, no se sentimo pi in colpa par causa dei nostri sbali e semo boni de seitar a servirlo con alegria.

16. Parché che no l’è mia bon seitar a ricordarse de pecati che Geovà el ga belche perdonà? Parla de un esémpio. (Varda anca la ilustrassion.)

¹⁶ Proa pensar nte una persona che la ze drio guidar un auto. Ela la pol vardar nel retrovisor par veder quel che ghen’è de drio. Ma saria tanto bruto se ela la seitesse sempre vardar indrio intanto che la guida el auto. Par guidar dela maniera giusta, ela la ga de vardar avanti, e sol dele volte vardar indrio. Dela stessa maniera, dele volte, l’è bon ricordarse dei sbali che ghemo fato parché ne giuta a gaver forsa de mai farli nantra volta. Ma, se seitemo a ricordarse dei sbali che Geovà el ga belche perdonà, podemo perder la alegria e no saremo boni de adorarlo dela maniera giusta adesso. Invesse, ghemo de seitar a vardar avanti e sempre ricordarse dele bele promesse par el futuro, ndove tute le robe che le sucede ancoi, “no le sarà ricordade”. — Isa. 65:17; Pro. 4:25.

SÌPIA CADA VOLTA PI SICURO DEL PERDON DE GEOVÀ

17. Parché ghemo de sforsarse par esser cada volta pi sicuri che Geovà el ne ama e che l’è pronto par perdonarne?

¹⁷ Sàtana el vol intrigarne de adorar a Geovà. Lu el sa che el ga poco tempo, e par quela el seitarà a far de tuto par fermarne de adorar a Geovà. (Apo. 12:12) Lu el vol farne pensar che Geovà no’l ne ama e che no’l ndarà perdonarne. Alora, ghemo de sforsarse ancora de pi par esser sicuri che Geovà el ne ama e che l’è pronto par perdonarne. (1 Gio. 3:19) Anca se Sàtana l’è contra noantri, podemo seitar fedeli a Geovà!

18. Cossa che te pol far par esser sicuro che Geovà el te ama e che el te ga perdonà?

¹⁸ Par esser sicuro che Geovà el te ama, proa meter in pràtica quel che te ghè imparà nel ùltimo stùdio. Par esser sicuro che Geovà ndarà perdonarte, ricòrdate cossa che Geovà el ga dito sora lu stesso. Pensa sora quel che la Bìblia la dise sora el so perdon e ricòrdate che lu el sa tanto ben che semo imperfeti e che sempre el ne mostra misericòrdia. E quando Geovà el perdona, lu no’l se ricorda pi de quel che te ghè fato. Cossita, te sarè sicuro che Geovà el mostra misericòrdia e compagno a Davi te ndarè dir con tanta alegria: ‘Gràssie Geovà, parché ‘te ghè perdonà i me sbali!’ — Sal. 32:5.