Geovà el vol che tuti i se ciame grami

1. Cossa che una persona la ga de far quando la se ciama grama?

QUANDO una persona la fà un sbàlio, ela la ga de ciamarse grama. La Bìblia la dise che, quando una persona la se ciama grama, la scomìnsia a odiar el sbàlio che la ga fato, la se ferma de far quel sbàlio e anca la se sforsa par mai farlo nantra volta. — Varda anca el Glossário, “Arrependimento”.

2. Parché che tuti noantri ghemo de saver quel che vol dir ciamarse grami? (Neemia 8:9-11)

² Parché che tuti noantri ghemo de saver quel che vol dir ciamarse grami? Parché tuti i giorni noantri femo sbali e pecati. Semo fioi de Adon e Eva, e par quela, femo pecati e morimo. (Rom. 3:23; 5:12) Questo sucede con tuti noantri. Fin servi fedeli del passà i ga bio de sforsarse tanto par dàrghene fora con voie sbaliade, come el apòstolo Paolo. (Rom. 7:21-24) Ma questo no vol mia dir che ghemo de seitar sempre tristi e disgustadi par causa dei nostri pecati. Ghemo de ricordarse che Geovà l’è misericordioso e el vol che tuti i sìpia felici. Varda quel che ga sucedesto coi giudei nei giorni de Neemia. (Ledi Neemia 8:9-11.a) Geovà no’l volea mia che lori i seitesse disgustadi par causa dei sbali che i gavea fato. Invesse, lu el volea che quei giudei i tornesse a adorarlo con tanta alegria. Geovà el sa che, quando se ciamemo grami par causa de un sbàlio, restemo contenti. Par quela, Geovà el ne insegna quel che ghemo de far. Alora, se se ciamemo grami dei nostri pecati, podemo esser sicuri che Geovà el ndarà perdonarne.

3. Cossa che ndaremo imparar in questo stùdio?

³ In questo stùdio, ndaremo imparar de pi sora ciamarse gramo. Prima, ndaremo veder quel che Geovà el ga insegnà ai israeliti sora ciamarse grami. Dopo, ndaremo veder come Geovà el giuta le persone a ciamarse grame, e anca quel che Gesù el ga insegnà ai so dissìpoli.

COSSA CHE GEOVÀ EL GA INSEGNÀ AI ISRAELITI?

4. Cossa che Geovà el ga insegnà ai israeliti sora ciamarse grami?

⁴ Quando Geovà el ga dato lege ai israeliti, lori i ga prometesto che i ndaria obedirghe. Lu el ghe ga dito: “Questo comandamento che mi te dao ancoi no l’è massa fadiga de obedirlo e no l’è de pi de quel che te pol far.” (Deu. 30:11, 16) Alora, se i israeliti i fusse obedienti a Geovà, lori i saria benedidi e i gavaria protession. Ma se lori no i fusse mia obedienti e i fesse un sbàlio, come adorar falsi dèi, Geovà no’l ndaria pi benedirli, e lori i ndaria sofrir tanto. Ma questo no volea mia dir che Geovà el ndaria abandonarli. Invesse, lori i podaria ‘tornar a Geovà, so Dio, e scoltar la so voce’, o sia, ciamarse grami. (Deu. 30:1-3, 17-20) Cossa che Geovà ghe ga insegnà sora cossa vol dir ciamarse grami? Lori i ga imparà che anca dopo de far un sbàlio, lori i podea far quel che Geovà el vol, e cossita, ricever la so benedission nantra volta.

5. De acordo con 2 Rè 17:13, 14, come che Geovà el ga mostrà che no’l gavea desistio dei israeliti?

⁵ Anca se i israeliti i era el pòpolo che Geovà el gavea scoliesto, lori i ghe ga desobedio tante volte. I israeliti i ga adorà falsi dèi e i ga fato tante robe pròpio brute. Par quela, lori i ga sofrio tanto. Ma Geovà no’l ga desistio de lori. Par esémpio, lu el ga mandà tanti profeti una volta drio man l’altra par giutar i israeliti a ciamarse grami e tornar a adorar a Geovà. — Ledi 2 Rè 17:13, 14.b

6. Come che Geovà el ga doperà i so profeti par giutar i israeliti? (Varda anca la ilustrassion.)

⁶ Geovà el ga doperà tanti dei so profeti par dir ai israeliti cossa che ndaria suceder se i seitesse a far quel che l’è sbalià e anca par giutarli a far quel che l’è giusto. Par esémpio, par meso de Geremia, Geovà el ga dito: ‘Torna a mi, Israel rebelde. No te vardarò con ràbia, parché mi son leal. No restarò inrabià par sempre. Te ghè sol de nicorderte dei to sbali, parché te ghè desobedio a Geovà.’ (Ger. 3:12, 13) Par meso de Gioel, Geovà el ga dito: ‘Torné a mi de tuto el vostro cuor.’ (Gioel 2:12, 13) Geovà anca el ga dito par meso de Isaia: ‘Neteve, cavé via de davanti de mi le robe brute che valtri fé. Fermeve de far quel che l’è rugno.’ (Isa. 1:16-19) E, par meso de Ezechiel, Geovà el ga domandà: ‘Sarà che me piase veder la morte de quel che l’è rugno? No me piase de pi vederlo cambiar la so vita e seitar vivo? No go caro che nissuni i mora. Alora, cambié quel che si drio far e seité a viver.’ (Eze. 18:23, 32) Geovà el resta contento quando una persona la se ciama grama, parché lu el vol che tuti i viva par sempre. Ma sarà che Geovà el giuta la persona sol dopo che la se ciama grama? Ndemo veder arquanti esempi.

7. Cossa che Geovà el ga insegnà ai israeliti par meso de quel che ga sucedesto con Oseia e Gomer?

⁷ Geovà el ga doperà quel che ga sucedesto con Oseia e la so dona, Gomer, par insegnar una roba tanto importante ai israeliti. Gomer la gavea tradio so omo e lo gavea abandonà par ndar drio a nantro omo. Sarà che ela la meritea aiuto, o nò? Geovà el sa cossa che tuti i ga rento el cuor, e lu el ga dito a Oseia: ‘Va nantra volta e ama la dona che la ze amada par nantro e che la tradisse so omo. Fà compagno a Geovà, che el ama la nassion de Israel, intanto che lori i adora altri dèi.’ (Ose. 3:1; Pro. 16:2) Gomer la era drio far bruti pecati. Ancora cossita, Geovà el ga dito che Oseia el gavea de ndar drio a ela e perdonarla.c Cossita, ela la tornaria a esser so dona. Dela stessa maniera, Geovà no’l gavea mia abandonà i israeliti, anca se lori i era desobedienti e testardi. Lori i era drio far robe pròpio brute, ma Geovà el seitea a amar el so pòpolo e el volea giutarli a ciamarse grami e a cambiar quel che ghe ocorea. Cossita, imparemo che Geovà “el sa quel che ghen’è rento el cuor” de tuti e el vol giutarli a ciamarse grami ancora quando i ze drio far bruti pecati. (Pro. 17:3) Ndemo veder come Geovà el giuta.

COME CHE GEOVÀ EL GIUTA I PECADORI A CIAMARSE GRAMI?

8. De acordo con Génesi 4:3-7, cossa che Geovà el ga fato par proar giutar Cain a ciamarse gramo? (Varda anca la ilustrassion.)

⁸ El primo fiol de Adon e Eva l’è stà Cain. Compagno ai so genitori, anca lu el fea pecati. La Bìblia la dise che “i so laori i era rugni”. (1 Gio. 3:12) Pol esser che l’è stà par causa de questi laori rugni che Geovà “no’l ga aprovà Cain e la so oferta”. Invesse de cambiar quel che l’era drio far, “Cain l’è restà tanto inrabià e disgustà”. Alora, cossa che Geovà el ga fato par giutarlo? Geovà el ga parlà con Cain con bontà. (Ledi Génesi 4:3-7.d) El ga dito che el ndaria benedirlo se lu el cambiesse quel che l’era drio far. Geovà anca el ghe ga dito cossa che ndaria suceder se lu el seitesse a far robe sbaliade. Ma, invesse de acetar el aiuto de Geovà, Cain l’è stà testardo e no’l se ga mia ciamà gramo. Sicuro che Geovà l’è restà pròpio disgustà. Ma ancora che Cain no’l gavesse acetà el so aiuto, Geovà no’l ga mia desistio de giutar i pecadori a ciamarse grami.

9. Cossa che Geovà el ga fato par giutar Davi a ciamarse gramo?

⁹ Geovà el amea tanto el so servo Davi e el ga dito che ‘lu el contentea el so cuor’. (Ati 13:22) Ancora cossita, Davi el ga copà una persona, el ga fato adultèrio e altri bruti pecati. De acordo cola Lege de Moisè, Davi el gavaria de esser copà. (Lev. 20:10; Nùm. 35:31) Ma Geovà el ga volesto giutarlo a ciamarse gramo.e Alora, lu el ga mandà che el so profeta Natan el parlesse con Davi e el proesse farlo ciamarse gramo. Natan el ga contà una stòria che ga tocà el cuor de Davi. Davi el se ga nicorto che lu el gavea disgustà tanto a Geovà e el se ga ciamà gramo del bruto sbàlio che el gavea fato. (2 Sam. 12:1-14) Dopo, Davi el ga scrito un Salmo che mostra che lu el se gavea pròpio ciamà gramo. (Sal. 51, informassion nel scomìnsio del salmo) Questo Salmo el ga belche giutà tante persone a ciamarse grame dei so sbali, compagno a Davi. Cossa che te senti quando te pensi sora el amor che Geovà el ga mostrà a Davi quando el ga volesto giutarlo?

10. Come che te te senti quando te pensi sora la passiensa e sora el perdon de Geovà?

¹⁰ Geovà el ga òdio par tuti i pecati e mai l’è de acordo con quel che l’è sbalià. (Sal. 5:4, 5) Geovà el sa che seitemo a far sbali parché semo imperfeti, ma lu el ne ama tanto e el proa giutarne a ciamarse grami dei nostri pecati. L’è tanto bel saver che Geovà el vol perdonarne e che sempre el proa giutar a tuti, no importa che bruti pecati i fà. Sicuro che, quando pensemo sora la passiensa e sora el perdon de Geovà, volemo sforsarse del tuto par seitar leai. E se femo qualche sbali, volemo far presto ciamarse grami. Adesso, ndemo veder cossa che Gesù el ga insegnà ai so dissìpoli.

COSSA CHE GESÙ EL GA INSEGNÀ AI SO DISSÌPOLI?

11-12. Cossa che Gesù el ga insegnà ai so dissìpoli sora el perdon de Geovà? (Varda anca la ilustrassion.)

¹¹ Nel primo sècolo, quando l’era tempo de rivar el Messia, Geovà el ga doperà Gioani Batista par giutar le persone a capir che lore le gavea de ciamarse grame. Anca Gesù el ga insegnà che i so dissìpoli i gavaria de far cossita. — Mat. 3:1, 2; 4:17.

¹² Intanto che Gesù l’era nel cielo insieme a so Pare, lu el ga visto tute le volte che Geovà el gavea mostrà misericòrdia a tuti quei che i se gavea ciamà grami. Par quela, quando l’era qua nela Tera, Gesù el ga insegnà ai so dissìpoli che Geovà el volea perdonar tuti noantri. Par esémpio, lu el ga contà una bela stòria che assa ben ciaro come la ze granda la misericòrdia de Geovà. Questa bela stòria la ze de un pare e so fiol. Questo fiol l’è ndato drio a tante robe sbaliade par un tempo. Ma, dopo, lu “el se ga nicorto de quel che el gavea fato” e l’è tornà casa. Cossa che so pare el ga fato? Gesù el ga dito che, quando el fiol “no l’era gnancora rivà, el so pare lo ga visto e ghe ga fato pecà. Lu l’è ndato de carera e el ghe ga dato un strucon e lo ga basà con tanto amor”. El fiol el ga domandà se el podaria esser un servo de so pare, ma lu lo ga ciamà de “fiol” e el ga dito ai altri: ‘Me fiol l’era perso, e l’è stà catà.’ — Luc. 15:11-32.

13-14. (a) Cossa che Piero el ga imparà sora el perdon de Geovà? (b) Cossa che Piero el ga insegnà ai altri? (Varda anca la ilustrassion.)

¹³ Par meso de Gesù, el apòstolo Piero el ga imparà tanto sora el perdon de Geovà. Piero el gavea fato tanti sbali, ma lu el ga visto che Gesù l’era sempre pronto par perdonarlo. Par esémpio, Piero el ga dito tre volte che no’l cognossea Gesù, e dopo l’è restà pròpio disgustà con quel che el gavea fato. (Mat. 26:34, 35, 69-75) Alora, dopo esser ressussità, Gesù el se ga fato veder a Piero, fursi quando l’era lu lu sol. (Luc. 24:33, 34; 1 Cor. 15:3-5) Sicuro che, in quela volta, Gesù el ga mostrà al so caro apòstolo che lo gavea perdonà del tuto. — Varda Marco 16:7.

¹⁴ Dopo de imparar tanto sora el perdon de Geovà e de Gesù, Piero anca el ga insegnà ai altri. Par esémpio, lu el ga fato un discorso dopo del Pentecoste par tanti giudei che no i credea mia in Gesù. Lu el ghe ga spiegà che la morte de Gesù l’era colpa soa de lori. Ancora cossita, Piero el ghe ga dito: “Gavé de ciamarve grami e cambiar la maniera de viver. Cossita i vostri pecati i sarà eliminadi e Geovà el farà che valtri gàpie pace.” (Ati 3:14, 15, 17, 19) Piero anca el ga spiegà che, quando se ciamemo grami, se fermemo de pensar e far robe sbaliade e scominsiemo a far quel che ndarà contentar a Geovà. Lu anca el ga spiegà che Geovà el ndaria finir fora coi nostri sbali. Arquanti ani dopo, Piero el ga dito sora Geovà: “Lu el mostra passiensa con valtri, parché no’l vol che gnanca un el sìpia destruto, ma el vol che tuti i se ciame grami.” (2 Pie. 3:9) Come l’è bel saver che Geovà l’è sempre pronto par perdonarne, anca se ghemo fato un bruto pecato!

15-16. (a)  De acordo con 1 Timòteo 1:12-15, cossa che el apòstolo Paolo el ga imparà sora el perdon? (b) Cossa che ndaremo imparar nel pròssimo stùdio?

¹⁵ Paolo el ga fato tante brute robe vanti de esser un dissìpolo de Gesù. Lu el ga perseghio tanto i dissìpoli de Cristo. Par quela, tanti i pensea che lu mai el saria bon de cambiar. Ma, Gesù el se fidea che Paolo el podaria ciamarse gramo e cambiar la so vita. Geovà e Gesù i vedea tante bele qualità in Paolo. Par quela che Gesù el ga dito: “Par mi, questo omo l’è un vaso che go scoliesto.” (Ati 9:15) Gesù el ga fin fato un miràcolo par giutar Paolo a cambiar la so vita. (Ati 7:58–8:3; 9:1-9, 17-20) Alora, dopo che l’è deventà un dissìpolo de Gesù, Paolo el ga mostrà diverse volte che el ghe dea tanto valor ala misericòrdia e ala bontà de Geovà e de Gesù. (Ledi 1 Timòteo 1:12-15.f) Par quela che Paolo el ga dito: “Dio, cola so bontà, l’è drio proar farte ciamarte gramo.” — Rom. 2:4.

¹⁶ Una volta, Paolo el ga savesto che un omo l’era drio far imoralità sessual e el fea ancora parte dela congregassion in Corinto. Alora, cossa che Paolo el ga fato? Quel che lu el ga scrito par la congregassion in Corinto ne insegna come che Geovà el mostra amor quando el dissiplina i so servi, e anca come lu el mostra misericòrdia a quei che i se ciama grami. Nel pròssimo stùdio, ndaremo imparar de pi sora quel che ga sucedesto in quela congregassion e come che podemo far compagno a Geovà.