Te sì bon de dàrghene fora cole voie sbaliade

1. Cossa che sucede con tuti noantri?

SE TE ghè belche bio voia de far qualcossa che disgusta a Geovà, no stà restar desanimà. Parché? Parché la Bìblia la dise: “Le tentassion che gavé infrontà no le ze difarente de quele che i altri i infronta.” (1 Cor. 10:13) Questo testo ne mostra che no importa la dificoltà che ghemo, ghen’è anca altri che i ze drio infrontar el stesso problema. Ricòrdate che no te si mia ti ti sol parché Geovà l’è con ti e lu el pol giutarte a dàrghene fora cole to voie sbaliade.

2. Che voie sbaliade fursi ghemo de darghene fora? (Varda anca la ilustrassion.)

² La Bìblia la dise: “Cada un l’è proà par esser provocà e imbroià par la so pròpia voia.” (Tia. 1:14) Alora, pol esser che noantri ghemo voie sbaliade difarente un del altro. Par esémpio, ghen’è fradei che i ga voia de far imoralità con una dona. Invesse altri, fursi, i vol far imoralità con altri òmini. Arquanti che i se ga fermà de vardar pornografia fursi i ga voia de vardar nantra volta. Altri i era ciuchetoni o doperea droghe, ma i ga voia de tornar a farlo. Queste le ze sol arquante dele voie sbaliade che tanti dei nostri fradei, sorele e fin quei che stùdia la Bìblia i ga. Fursi, ghemo belche pensà compagno el apòstolo Paolo: “Quando mi vui far quel che l’è giusto, rento de mi ghen’è quel che l’è mal.” — Rom. 7:21.

3. Cossa che fursi pensemo se fà tempo che se sforsemo de darghene fora con una voia sbaliada?

³ Se fà tanto tempo che te proi darghene fora con una voia sbaliada, fursi te pensi che mai te sarè bon de far quel che l’è giusto. Pol esser anca che te senti che Geovà no l’è mia contento con ti parché te ghè voia de far una roba che lo disgusta tanto. Ma questo no l’è mia vero! In questo stùdio, ndaremo imparar (1) parché che dele volte pensemo che no semo mia boni de far quel che l’è giusto o che no meritemo le benedission de Geovà, e (2) come che podemo darghene fora cole nostre voie sbaliade.

COSSA CHE “EL PERVERSO” EL VOL CHE SENTIMO?

4. (a) Cossa che Sàtana el vol farne pensar quando ghemo voie sbaliade? (b) Parché che semo sicuri che podemo darghene fora cole voie sbaliade?

⁴ Sàtana el vol farne pensar che no saremo boni de darghene fora cole voie sbaliade e de obedir a Geovà. Gesù el ga dito che saria cossita quando el ga pregà: “No stà assarne cascar in tentassion, ma libèrane del Perverso.” (Mat. 6:13) Sàtana el ga dito che tute le persone le se fermaria de obedir a Geovà quando ghe vegnesse voia de far robe sbaliade. (Giò 2:4, 5) Ma varda sol! L’è stà Sàtana che ze ndato drio ale so voie sbaliade e no’l ga volesto pi obedir a Geovà. Lu el pensa che noantri semo come lu e che no seitaremo fedeli a Geovà. Sàtana el ga pensà che podaria fin far Gesù, el Fiol perfeto de Geovà, desobedir a so Pare. (Mat. 4:8, 9) Ma, sarà che no semo mia boni de darghene fora cole nostre voie sbaliade? Sicuro che sì! Ghemo de ricordarse de quel che el apòstolo Paolo el ga scrito: “Par tute le robe go forsa gràssie a quel che el me dà poder.” — Fil. 4:13.

5. Parché che savemo che Geovà el se fida che saremo boni de seitar fedeli a lu?

⁵ Geovà l’è difarente de Sàtana, e el se fida che noantri saremo boni de seitar fedeli a lu anca se ghemo voie sbaliade. Parché che podemo dirlo? Parché Geovà el ga belche dito che una granda mùcia de gente la vegnaria fora dela granda tribolassion. La Bìblia la dise che tante persone le ndarà ‘lavar le so longhe robe e le farà vegner bianche nel sangue del Piegoreto’. Questo vol dir che queste persone le ze giuste e che le ndarà rento el novo mondo de Dio. (Apo. 7:9, 13, 14) E, come savemo, Geovà no’l pol dir busie. Alora, semo sicuri che lu el se fida che semo boni de darghene fora con tute le voie sbaliade e a seitar fedeli.

6-7. Cossa che Sàtana el vol che pensemo?

⁶ Sàtana anca el vol farne pensar che Geovà mai l’è contento con noantri parché ghemo voie de far robe sbaliade. Ma varda sol! L’è Sàtana quel che el ga disgustà a Geovà, che no’l ndarà viver par sempre e che el sarà finio fora. (Gén. 3:15; Apo. 20:10) Alora, lu el resta cativo parché noantri ghemo una speransa e el proa farne pensar che no saremo in Paradiso. Ma noantri podemo contentar a Geovà e viver felici par sempre! La Bìblia la dise che Geovà el vol giutarne e nò giulgarne. Lu “no’l vol che gnanca un el sìpia destruto, ma el vol che tuti i se ciame grami”. — 2 Pie. 3:9.

⁷ Alora, se pensemo che no saremo boni de darghene fora cole voie sbaliade o che mai saremo boni de contentar a Geovà, saremo drio pensar compagno a Sàtana. Capir questo ne giuta a seitar firmi contra la so tràpole. — 1 Pie. 5:8, 9.

COME CHE SE SENTIMO PAR VIA DEL PECATO?

8. Cossa che capimo dela parola pecato? (Salmo 51:5) (Varda anca “Par capir meio”.)

⁸ Sàtana el proa anca farne pensar che no saremo boni de seitar fedeli e de contentar a Geovà. Ma ghen’è ancora nantra roba che pol intrigarne de adorar a Geovà. Cossa? El pecato che ghemo ricevesto dei nostri primi genitori, Adon e Eva.a — Giò 14:4; Ledi Salmo 51:5.b

9-10. (a) Cossa che Adon e Eva i ga sentio par via del so pecato? (Varda anca la ilustrassion.) (b) Come che se sentimo ancoi par causa del pecato?

⁹ Proa pensar come che Adon e Eva i se ga sentio dopo che i ga desobedio a Geovà. La Bìblia la dise che lori i ga proà querzer el so corpo. El libro Perspicaz anca el dise che el pecato li ga fato sentirse in colpa, ansiosi, con paura e vergogna. Par via del pecato, Adon e Eva mai pi i podaria esser amighi de Geovà nantra volta. No importa cossa lori i fesse, sempre i ndaria sentir colpa, ansietà, paura e vergogna.

¹⁰ Ma quel che sucede con noantri l’è difarente de quel che ga sucedesto con Adon e Eva. Parché? Parché par causa del sacrifìssio de Gesù ghemo el perdon dei nostri pecati e podemo esser amighi de Geovà. (1 Cor. 6:11) Ma ancora cossita, semo imperfeti e femo robe sbaliade. Par quela podemo sentirse in colpa, ansiosi, con paura e vergogna, anca se no ghemo mia fato “un pecato compagno quel de Adon”. (Rom. 5:14) L’è vera che semo nassesti imperfeti e col pecato, ma no ne ocore restar desanimadi parché podemo far quel che l’è giusto e ghemo una bela speransa par el futuro.

11. Anca se pensemo che no saremo boni de darghene fora con voie sbaliade, cossa che ghemo de far e parché? (Romani 6:12)

¹¹ Come semo imperfeti, pol esser che dele volte pensemo che no semo boni de darghene fora con una voia sbaliada. Fursi scoltemo come che una voce rento de noantri che ne dise che no semo mia boni. Ma no stà creder in questo! Parché? Parché la Bìblia la ne dise che no ghemo de ‘assar che el pecato el seite a controlar el nostro corpo’. (Ledi Romani 6:12.c) Questo vol dir che podemo scòlier no ndarghe drio ale nostre voie sbaliade. (Gàl. 5:16) Ricòrdate anca che Geovà sol el speta de noantri quel che podemo far. Lu el se fida che saremo boni de darghene fora con queste voie e far quel che l’è giusto. (Deu. 30:11-14; Rom. 6:6; 1 Tes. 4:3) Alora, semo sicuri che podemo seitar fedeli a Geovà!

12. Cossa che podemo far se pensemo che mai saremo boni de contentar a Geovà e parché?

¹² Quando ghemo voie sbaliade, pol esser che pensemo che mai saremo boni de contentar a Geovà. Ma no ghemo mia de creder in questo! Parché? Parché Geovà el sa tute le robe” sora noantri, el ne cognosse e el ne capisse tanto ben. (Sal. 103:13, 14; 1 Gio. 3:19, 20) Lu el sa che ghemo el pecato e anca el sa le voie sbaliade che cada un el ga. Alora, se se sforsemo de darghene fora con queste voie, Geovà el ndarà vederne come persone giuste. Parché che podemo dirlo?

13-14. Sarà che Geovà el restarà disgustà quando ne vien voia de far una roba sbaliada? Spiega.

¹³ La Bìblia la dise che ghen’è una difarensa intrà gaver una voia sbaliada e far una roba sbaliada. Gnanca sempre podemo controlar le nostre voie, ma sempre podemo dessider quel che ndaremo far. Par esémpio, arquanti dela congregassion in Corinto nel primo sècolo i era omossessuai vanti de deventar dissìpoli de Gesù. Alora, Paolo ghe ga scrito: “Questo l’è quel che arquanti de valtri eri.” Ma no podemo dir che lori mai pi i ga bio voie sbaliade. Ancora cossita, Geovà li vedea come persone giuste. (1 Cor. 6:9-11) Quei dissìpoli i ze stati boni de controlarse e de no ndar drio dele so voie sbaliade. Cossita, lori i ga contentà a Geovà. La medèsima roba la pol suceder con ti.

¹⁴ Alora, no importa la voia sbaliada che te ghè, te sarè bon de darghene fora. E anca se te seiti a gaver queste voie, te pol controlarte e no far ‘quel che el to corpo e la to mente i vol’. (Efe. 2:3) Cossa che pol giutarte?

COSSA CHE POL GIUTARTE A SEITAR FEDELE?

15. Parché che ghemo capir quale zele le nostre fiachesse se volemo darghene fora con una voia sbaliada?

¹⁵ Una roba che pol giutarte a seitar fedele la ze capir le to fiachesse. Te ghè de star atento par ‘no imbroiarte par le maniere sbaliade de pensar’. (Tia. 1:22) Come cossita? Par esémpio, un fradel che el ga voia de bever massa el pol pensar che no l’è drio far un sbàlio quando el beve tanto parché ghen’è altri fradei che i beve ancora de pi. Altro fradel fursi el pensa che no’l ga colpa de vardar pornografia parché la so dona no la ghe mostra tanto amor come el volaria. Ma noantri mai ghemo de esser imbroiadi par questa maniera de pensar gnanca catar fora scusa par far robe sbaliade. Te sì ti che te ghè la responsabilità par quel che te fè. — Gàl. 6:7.

16. Cossa che pol giutarte a seitar fedele a Geovà?

¹⁶ Dopo de capir le to fiachesse, te ghè de far ancora pi forte la to voia de far quel che l’è giusto. (1 Cor. 9:26, 27; 1 Tes. 4:4; 1 Pie. 1:15, 16) Dopo, proa pensar quando che fursi te podarissi gaver voie sbaliade. Pol esser che ghen’è una ora o un posto ndove te sì che questa voia la resta ancora pi forte. Par esémpio, fursi l’è pi fadiga darghene fora cola voia sbaliada de note o quando te sì canso. Par quela, sìpia parecià e dessidi quel che te ndarè far. Alora, te ghè de pareciarte prima che la voia sbaliada la vegna fora. — Pro. 22:3.

17. Cossa che podemo imparar del esémpio de Giusepe? (Génesi 39:7-9) (Varda anca la ilustrassion.)

¹⁷ Varda quel che ga sucedesto quando la dona de Potifar la ga volesto far imoralità con Giusepe. Suito lu el ghe ga dito de nò e el ga scampà via! (Ledi Génesi 39:7-9.d) Giusepe belche el savea che l’era sbalià far sesso cola dona de nantro omo e no’l volea far gnente che disgustesse a Geovà. Par quela, lu el savea cossa el gavaria de far ancora prima che la dona de Potifar la ghe disesse qualcossa. Cossa che imparemo? Se te fè pi forte la to voia de far quel che l’è giusto prima che suceda qualcossa, sarà pi fàcile darghene fora con una voia che la ze sbaliada.

“SEITÉ A ESAMINARVE”

18. De acordo con 2 Corinti 13:5, che nantra roba te pol far par darghene fora cole voie sbaliade?

¹⁸ Nantra roba che te pol far par darghene fora cole voie sbaliade la ze ‘seitar a esaminarte’. (Ledi 2 Corinti 13:5.e) Come cossita? Stà atento a quel che te sì drio far. Alora, l’è bon torte un tempo par veder se te ocore cambiar quel che te sì drio pensar e far. Par esémpio, anca quando te sì stà bon de darghene fora con una voia sbaliada, domandate: ‘Sarà che go metesto massa tempo par dir de nò?’ Se te pensi che te podarissi gaver dito de nò pi svelto, no stà restar desanimà. Invesse, proa pensar come che te pol far meio se sucede una roba cossita nantra volta. Te pol domandarte: ‘Se me vien in mente pensamenti sbaliadi, sarà che son bon de cavarli via pi svelto? Quel che mi fao par divertirme me giuta a gaver pi voia de seitar leal a Geovà? Se son drio assister qualcossa e vien fora una roba imoral, mi fao presto vardar par nantra banda? Son sicuro che quel che Geovà el dise l’è sempre la meio roba de far anca se me ocore sforsarme tanto par farlo?’ — Sal. 101:3.

19. Come anca le pìcole robe che femo pol intrigarne de seitar fedeli?

¹⁹ No stà catar fora scuse par una roba sbaliada che te sì drio far. La Bìblia la dise: “El cuor l’è pi traditor de qualche altra roba e l’è pericoloso.” (Ger. 17:9) E Gesù el ga dito che “del cuor vien fora bruti pensamenti”. (Mat. 15:19) Par esémpio, pensa nte una persona che la se ga fermà de vardar pornografia. Dopo de un tempo, ela la scomìnsia a vardar altri ritrati che ghe fà gaver voia de far sesso, ma come le persone no le ze nude, ela la pensa che no ghen’è problema. O fursi la dise: “No l’è mia sbalià sol pensar in queste robe. No son mia drio far un pecato.” Ma, questa persona la ze drio ‘pensar come far le so voie dela carne’. (Rom. 13:14) Alora, cossa che ghemo de far? Ghemo de seitar atenti e no far gnanca pìcole robe che ne portaria a far una bruta dessision o gaver ancora de pi voie sbaliade.f No stà ndarghe drio “bruti pensamenti” gnanca catar fora scuse par far robe sbaliade.

20. Cossa che ndarà suceder nel futuro, e che aiuto ghemo adesso?

²⁰ Come ghemo visto, col aiuto de Geovà, podemo darghene fora cole voie sbaliade e seitar fedeli. E par via dela so misericòrdia, ghemo la speransa de viver par sempre in Paradiso. Sarà tanto bel adorar a Geovà de maniera perfeta sensa gnanca una voia sbaliada. Ma adesso, podemo esser sicuri che saremo boni de seitar fedeli e che Geovà l’è contento cola nostra adorassion. Sìpia sicuro che, col to sforso e cole benedission de Geovà, te sarè bon de darghene fora cole voie sbaliade!